TeKareva Mombosi Sanu Tinulis
NiMarkus
SiYohanes TeTopombaptis Nonyadiaa Tetoo-too Karna SiYesus Sedeꞌi Maꞌopo Majaok
(Mat. 3:1-6, 11-12; Luk. 3:3-6, 15-17; Yoh. 1:19-28)
1
1 Einimo tepamulaongnya teKareva sanu Mombosi niYesus Kristus,
teUnga nuꞌAlataꞌala.
2 Sima netetulis eilalong nubuku nunabi Yesaya,
teꞌAlataꞌala nonjarita eisiKristus,
“Poꞌinepea,
Siaꞌu,
teꞌAlataꞌala,
monuju tetopokarevaꞌU mongaliurui Siꞌoo
sanu monyadiaa tetoo-too molaboti teꞌajajaok Niꞌoo.
3 Tetopokareva heꞌua mongulara eitoo-too eitana sanu noodoy,
ab
‘Pasadiaa tejalang nuSiopu niꞌita ane
poꞌondolong tejalang sanu nolabati-Nya!’ ”
4 Sima heꞌua,
siYohanes teTopombaptis najaok eitana sanu noodoy eiTana nuYudea.
Siia nokarevaa siira kanaboi matoba ane nobaptis antau teꞌAlataꞌala mongampuni tedosa niira.
5 Tetoo-too lamai jojoo teTana nuYudea ane jojoo tetoo nuYerusalem najaok eisiYohanes antau moꞌinepea siia momaguru.
Siira nongakui tedosa niira eiꞌAlataꞌala ane binaptis niYohanes eiBangkalang nuYordan.
6 SiYohanes nepake tepakeanc sanu pinogutu lamai tevulu nuꞌunta ane tesulepenya teꞌuli.
Siia nenginang teꞌalipapaa ane temadud.
7 Siia nokarevaa eitoo-too,
“Umai sotoo majaok touk siaꞌu.
Tekuasa-Nya mooge,
heꞌuapa siaꞌu.
Siaꞌu jio masipato mopoongko ane mombuꞌas teluit nusandale-Nya.
8 Teogo upake nombaptisi siꞌemiu,
tapi teꞌAlus nuꞌAlataꞌala nopake-Nya mombaptisi siꞌemiu.
SiYohanes Nombaptis SiYesus, TeUnga NuꞌAlataꞌala
(Mat. 3:13-17; Luk. 3:21-22; Yoh. 1:32-34)
9 Watu heꞌua najaok siYesus lamai teKota nuNasaret,
eiTana nuGalilea,
umaꞌo eisiYohanes eiBangkalang nuYordan.
Eiriꞌua Siia binaptis niYohanes.
10 Watu siYesus nesuvung lamai teogo,
Siia neꞌita telangit neteboꞌa.
TeꞌAlus nuꞌAlataꞌala nenyau lamai tesuruga sima sambaang temerpati nesompo eiSiia.
11 Lamai heꞌua,
inepe tesuara nuSiopu Alataꞌala lamai tesuruga nongulara,
“Siꞌoo teUngaꞌU sanu Uꞌagalani ane Siꞌoo nopaꞌasanang teambokU.”
SiYesus Sinoꞌarai Eitana Sanu Noodoy
(Mat. 4:1-11; Luk. 4:1-13)
12 Touk siYesus binaptis,
teꞌAlus nuꞌAlataꞌala nongomung siYesus umaꞌo eitana sanu noodoy.
13 Eꞌendenya apampulueleo Siia umai eitana sanu noodoy ane tepuang nuseetan nonyoꞌarai siYesus mogutu tedosa.
Umai eiriꞌua tebinaatang-binaatang meila.
Temalaekat-malaekat najaok nomiara Siia.
SiYesus Nompamulamo Nokarevaa TeKareva Sanu Mombosi
(Mat. 4:12-17; Luk. 4:14-15)
14 Jio meende lamai heꞌua,
siYohanes teTopombaptis iraꞌop.
Eiwatu heꞌua,
siYesus umaꞌo eiTana nuGalilea nokarevaa TeKareva sanu Mombosi nuꞌAlataꞌala.
15 Einimo inularaꞌo-Nya,
“Tewatunya naganamo ane tePomarenta nuꞌAlataꞌala majaoko!
Patobamo ane pomarcayamo eiKareva sanu Mombosi!”
SiYesus Neubu Apatoo Tetopomuka Tebau Majari Temurit-Nya
(Mat. 4:18-22; Luk. 5:1-11)
16 Pepees siYesus nelampa eipipit nuBonto nuGalilea,
inita-Nya rotoo tetopomuka,
siSimon ane tetuainya siꞌAndreas pepees norampak tepuka eibonto.
17 SiYesus nongular eisiira,
“Maemo,
ponuuto Siaꞌu,
Upaꞌajari siꞌemiu tetopomuka numanusiaf!”
18 Siira selengaan nolinjoꞌi tepokarajaaong niira momuka tebau,
lamai heꞌua siira najari tetoponuut niYesus.
19 Watu siira umaꞌo naavaro sedeꞌi lamai riꞌua,
inita niYesus siYakobus ane siYohanes,
teunga-unga niSebedeus.
Siira odu-odung eilalong nupayangan niira pepees nopoꞌombosi tepuka niira.
20 SiYesus noleva siira majari temurit-murit-Nya.
Touk heꞌua siira nolinjoꞌimo siama niira ane tevotuang-votuang eipayangan ane nonuut siYesus.
SiYesus Nombugo Teꞌalus Sanu Majaat Nesuvung Lamai Sotoo Telangkai
(Luk. 4:31-37)
21 Lamai heꞌua siYesus ane temurit-murit-Nya najaok eiKota nuKapernaum.
EiEleo nuPengondok nutoo-too nuYahudi siYesus nentama eilalong nupongganeong nuYahudi,
nompamulamo Siia nomagurua tejarita nuꞌAlataꞌala eitoo-too sanu eiriꞌua.
22 Tetoo-too heꞌua neherang neꞌeepe tepangajar-Nya,
karna Siia nomagurua siira sima tetoo sanu umai teꞌababaraka sanu mooge,
jio sima teguru-guru nuparenta nuꞌAlataꞌala.
23 Watu siYesus ulengi eiriꞌua,
sotoo sanu pinentamai nuꞌalus sanu majaat nentama eilalong nupongganeong nuYahudi ane neroroa,
24 “Yesus tetoo nuNasaret,
tesapa teꞌurusan Niꞌoo eisiꞌami?
Siꞌoo najaok mopoꞌoropu siꞌami?
Uotoi sisee Siꞌoo,
Siꞌoo tetoo sanu mapacingg lamai teꞌAlataꞌala!”
25 Tapi siYesus nonyingga teꞌalus sanu majaat heꞌua,
“Poodoy!
Pesuvung lamai tetoo eini!”
26 Lamai heꞌua teꞌalus sanu majaat heꞌua nonggugura tetoo heꞌua,
ane oroa-roa moporos nolinjoꞌi tetoo heꞌua.
27 Jojoo tetoo sanu umai eiriꞌua neherang,
siira nejajaritaong,
“Tesapa eini?
Eini tepangajar sanu vuou.
Siia umai teꞌababaraka!
Watu siYesus nonuju teꞌalus sanu majaat,
teꞌalus heꞌua tututuu nonuruk eiSiia!”
28 Nakarevaongo tekareva sima siYesus eijojoo tetoo eiTana nuGalilea.
SiYesus Nepeꞌeondok Tetoo Mabari
(Mat. 8:14-17; Luk. 4:38-41)
29 SiYesus concoono siYakobus ane siYohanes nesuvung lamai tepongganeong nuYahudi heꞌua ane umaꞌo eiVonua niSimon ane niꞌAndreas.
30 Eiriꞌua temeniang bengkel niSimon kinokoaꞌonya nopoduling eipoꞌoturuong.
Selengaan siira nongulara eiSiia,
simeniang bengkel niSimon nepees.
31 SiYesus nentama eilalong nukamarnya,
diniitinya telimanya ane vinaunaꞌo-Nya.
Selengaan siia jiongo kinokoaꞌonya ane siia nonyadiaa sanu noꞌinang niira.
32 Ndoungnya,
nalapas osondok nueleo,
tetoo-too najaok nongomung jojoo tetoo sanu nepees,
ane jojoo tetoo sanu pinentamai nuꞌalus sanu majaat.
Tetoo-too heꞌua inomung eisiYesus,
antau Siia mepeꞌeondok siira valii.
33 Jojoo tetoo eikota heꞌua neincong eitolo nubamba nuvonua heꞌua.
34 SiYesus nepeꞌeondok jojoo tetoo sanu nasesa nengangayaong tepees,
ane nabari teꞌalus sanu majaat binugo-Nya lamai tetoo-too.
Tapi jio vineena niYesus teꞌalus-alus sanu majaat heꞌua mongulara tesapa-sapa,
karna siira moꞌotoi siYesus heꞌua teUnga nuꞌAlataꞌala.
SiYesus Nokarevaa TeKareva Sanu Mombosi NuꞌAlataꞌala Eitoo-too EiTana NuGalilea
(Luk. 4:42-44)
35 Sasambat tutuu,
siYesus nembaungo lamai tepoꞌoturuong,
lamai heꞌua Siia nesuvung ane umaꞌo eitana sanu noodoy.
Eiriꞌua Siia nonggane eiSiopu Alataꞌala.
36 Jio neende lamai heꞌua,
siSimon ane tetagu-tagunya nelolo Siia.
37 Watu jinaoko niira siYesus,
siira nonjarita eiSiia,
“Jojoo tetoo nelolo Siꞌoo!”
38 SiYesus nongulara eisiira,
“Siꞌita kana umaꞌo eipomoiaong ntaninya,
eikota-kota sanu meꞌoꞌosuꞌong lamai eini,
antau Siaꞌu maala valii mokarevaa teKareva sanu Mombosi eitoo-too sanu nomoia eiriꞌua.
Heꞌua tesabanya Siaꞌu najaok.”
39 Lamai heꞌua siYesus umaꞌo eijojoo teTana nuGalilea.
Siia nokarevaa teKareva sanu Mombosi eipongganeong-pongganeong nuYahudi ane nombugo teꞌalus sanu majaat lamai tetoo-too.
SiYesus Nepeꞌeondok Sotoo Sanu Nopudung
(Mat. 8:1-4; Luk. 5:12-16)
40 Sotoo sanu nopudung najaok eisiYesus,
nopotuꞌu eitolo niYesus ane nomongi eiSiia,
“Ane Siꞌoo seilu,
Siꞌoo maala mepeꞌeondok siaꞌu.”
41 Noondong teambok niYesus neꞌita tetoo heꞌua.
Siia nonggama tetoo heꞌua ane nongular eisiia,
“Siaꞌu seilu mepeꞌeondok siꞌoo.
Peondoko!”
42 Selengaan tepudung heꞌua neondoko.
43 Lamai heꞌua siYesus nonuju ane nontuuna eitoo heꞌua,
44 “Lambot,
inyaa siꞌoo mongulara tesapa-sapa sima tesaba eini eitoo ntaninya.
Tapi naꞌomoh eiVonua nuꞌAlataꞌala eiYerusalem popoꞌitaa teꞌalaemu eiꞌimam.
i Veena tepombee sanu pinarentaa niMusa,
karna siꞌoo neondoko.
Tepombee heꞌua tetanda eijojoo tetoo,
siꞌoo neondoko.”
45 Tetoo heꞌua umaꞌo eiꞌimam ane nombee tepombee,
tapi jio boi nopoodoy,
siia nesuvung ane nompamula nokarevaa eijojoo tetoo iamaꞌo siia pineꞌeondok.
Siia nokarevaa tekareva eijojoo tetoo eiTana nuGalilea,
jaok siYesus jiongo maala mentama eikota ane tetoo-too meꞌita.
SiYesus nomoia eiaangnya eitana sanu moodoy.
Tapi tetoo-too najaok eiSiia lamai jojoo tepomoiaong.