TeKareva Mombosi Sanu Tinulis
NiMarkus
Tepamulaong
Tebuku nuKareva sanu Mombosi niMarkus pinompamulai pongular,
“Einimo tepamulaongnya teKareva sanu Mombosi niYesus Kristus,
teUnga nuꞌAlataꞌala.”
Eilalong nuKareva sanu Mombosi heꞌua siYesus pinopoꞌitaa sima sotoo sanu mabari nonggauka ane sanu oꞌababaraka.
Teꞌababaraka-Nya inita eilalong tecara Siia nomaundura,
eilalong nuꞌababaraka-Nya eiꞌalus-alus sanu majaat,
ane eilalong nongampuni tedosa.
SiYesus nepopoꞌitaa teꞌalae-Nya sima teUnga nuManusia sanu mombeena tenyaa-Nya antau temanusia nolapasa lamai tedosa.
Tejarita sima siYesus eilalong nubuku eini netuvu ane tututuu.
Tinulis tegauk-gauk-Nya,
tejarita-Nya ane tepangajar-Nya.
Touk pampamulaong sanu mokudu sima siYohanes teTopombaptis ane sima siYesus binaptis ane sinoꞌarai nupuang nuseetan,
tebuku niMarkus eini selengaan nonjaritaa tepokarajaaong niYesus.
Tepokarajaaong-Nya nepeꞌeondok mabari tetoo ane nomaguru.
Tepasal-pasal ponouꞌong umai tejarita sima sanu najari eiduminggu ponouꞌong eilalong otutuvu niYesus eijuniaa eini,
pabibia sima ponyalipong mboto-Nya ane netuvuonye lamai teꞌamateong.
Robagiong sanu ponouꞌong lamai tebuku niMarkus,
sanu ntinamaa eilalong nutanda kurung sanu mooge,
mabari tetoo nonganggap jio sanu tinulisa tetoponulis tebuku niMarkus,
tapi boi sotoo sanu ntaninya.
Teisi
Tepamulaong 1:1-13
Tepokarajaaong niYesus eitatanga nutoo-too eiGalilea 1:14—9:50
Lamai teGalilea umaꞌo eiYerusalem 10:1-52
Teduminggu sanu ponouꞌong eiYerusalem ane moꞌosuknya 11:1—15:47
Netuvuonye siYesus 16:1-8
Nepopoꞌitaa ane neteengkat siYesus umaꞌo tesuruga 16:9-20