50
1 SiYusup negonggol siamanya,
notumangis ane nembonginya.
2 Lamai heꞌua siYusup nomarentaa tevotuang-votuang sanu mapande mominyai tebatang niamanya antau jio movook.
3 Teendenya apampulueleo siira nominyai tebatang heꞌua karna heꞌua tewatu sanu pinaraluua.
Teendenya pitumpulueleo tetoo-too nuMesir nonuut nonangisi siYakub karna siia naatemo.
4 Touk tewatunya siira notumangis heꞌua,
siYusup nonjarita eitoo-too sanu apangka nupuang,
“Ane siꞌoo masanang teambok eisiaꞌu,
jaritaa tetutuunongu eini eipuang.
5 ‘Watu siamaꞌu jiompo naate,
siaꞌu tinujunya mojanji siaꞌu montanong siia eipontanonong sanu sinadiaaꞌomo eiTana nuKanaꞌan.
Karna heꞌua veena siaꞌu umaꞌo montanong siamaꞌu.
Touk heꞌua siaꞌu metencile.’ ”
6 Lamai heꞌua tepuang nonjaritaa,
“Pelampamo umaꞌo montanong siamamu sima tejanji niꞌoo eisiia.”
7 Lamai heꞌua siYusup umaꞌomo montanong siamanya.
Jojoo tetoo sanu apangka nuPuang nuMesir,
tetoo-too sanu mepenting eivonua nupuang ane tetoo-too sanu mepenting eiTana nuMesir umaꞌo concoono siYusup.
8 Soungaong niYusup,
terururusnya,
ane sorurus jojoo niYakub sanu ntaninya valii umaꞌo.
Boi teunga-unga niira medeꞌi ane tepetuvuong-petuvuong ilinjoꞌi eiWilaya nuGosyen.
9 Tetantara-tantara sanu nesave teꞌajaran ane sanu nesave tekareta nonuut valii.
Mabari tutuu tetoo sanu nonuut umaꞌo tepontanonong heꞌua.
10 Watu siira najaok eipomautong tegando eiGoren-Haꞌatad,
eisabata nutimur eiBangkalang nuYordan,
siira noondong ane notumangis noporos.
a Eiriꞌua valii siYusup nonggauka tepolambot tetoo maate,
teendenya pitueleo.
11 Watu tetoo-too nuKanaꞌan neꞌita tepolambot eiGoren-Haꞌatad heꞌua siira nonjarita,
“Tutuu noondong tetoo-too nuMesir heꞌua nonangisi tetoo maate!”
Karna heꞌua tepomoiaong heꞌua tinopei teꞌAbel-Misraim.b
12 Sima heꞌua teunga-unga niYakub nogugauk tesapa sanu tinuuna niYakub eisiira.
13 Siira nongomung tebatangnya umaꞌo eiTana nuKanaꞌan ane nongembeaꞌonya eiGoa nuMakhpela,
eisabata nutimur nuKota nuMamre,
tetana sanu inoli niꞌAbraham lamai siꞌEvron tetoo nuHet antau majari tepontanonong.
14 Touk siYusup nontanong siamanya,
siia ane terurusnya jojoo ane tetoo-too sanu nonuut netencile umaꞌo eiTana nuMesir.
SiYusup Nopaꞌasanang Teambok Nurururusnya
15 Touk siama niira naatemo,
terururus niYusup neꞌuꞌutanyaong,
“Iamaꞌo ane siYusup mongembe eilalong nuambok teꞌasasala niꞌita ane seilu mesava karna jojoo sanu majaat ginauka niꞌita eisiia?”
16 Heꞌua sabanya siira nonuju tetoo nonjaritaa tetutuunong eisiYusup,
“Jijiompo siama niꞌita naate,
17 siia nonuju siꞌami monjarita sima eini eisiꞌoo,
‘Ampunimo teꞌasasala ane tedosa nusiaꞌa-siaꞌamu sanu ginauka niira luulu.’
Jadi eꞌeini siꞌami nomongi eisiꞌoo ampunimo teꞌasasala niꞌami,
siꞌami sanu nomarcaya eiꞌAlataꞌala sanu sinombaa niamamu.”
Touk neꞌeepe tetutuunong heꞌua siYusup notumangis.
18 Lamai heꞌua terururusnya najaok,
noposuncul eitolonya ane nonjarita eisiia,
“Siꞌami eini tevotuang-votuangmu.”
19 Tapi siYusup nonjarita eisiira,
“Inyaa mobule.
Siaꞌu jio teꞌAlataꞌala.
Siaꞌu jio maala mehukum siꞌemiu.
20 Siꞌemiu nosituruk mogugauk sanu majaat eisiaꞌu,
tapi teꞌAlataꞌala nombalika teꞌajajaat heꞌua najari teꞌombombosi,
antau sanu najari luulu heꞌua nonyabaa nabari tetoo sanu netuvu eꞌeini tetoo bari piniara antau tataap netuvu.
21 Inyaa mobule,
siaꞌu mongganai tesapa sanu noparaluua niꞌemiu concoono teunga-unga niꞌemiu.”
Sima heꞌua siia nopaꞌasanang teambok niira.
SiYusup Naate
22 SiYusup ane terururusnya nomoia eiTana nuMesir.
Siia netuvu nagana 110 ntoung.
23 Siia neꞌita teunga numoꞌupu niꞌEvraim.
Teunga-unga niMakhir ilabit niYusup sima teunganya mboto.
SiMakhir heꞌua teunga niManasye.
24 Siia nonjarita eirururusnya,
“Jiongo meende siaꞌu maate,
tapi teꞌAlataꞌala momiara ane momimpin siꞌemiu mesuvung lamai tetana eini,
umaꞌo eitana sanu jinanjia eisiꞌAbraham,
eisiꞌIshak ane eisiYakub.”
25 Lamai heꞌua siYusup nonuju jojoo terurusnya nojanji.
Siia nonjaritaa eisiira,
“Pojanji eisiaꞌu,
watu teꞌAlataꞌala momiara ane momimpin siꞌemiu umaꞌo eitana heꞌua,
siꞌemiu mongomung valii tevuꞌu-vuꞌu nubatangu.”
26 Lamai heꞌua siYusup naatemo teꞌumurnya 110 ntoung.
Tebatang iminyai ane inembeaꞌonya eilalong nukasi eiTana nuMesir.