Tepongular NiYakub Sanu Ponouꞌong Eiunga-unganya
49
1 Lamai heꞌua siYakub noleva teunga-unga langkainya ane nonjarita,
“Peincongo eiriꞌini,
eiꞌosuku.
Siaꞌu mongulara eisiꞌemiu tesapa sanu majari eisiꞌemiu eitoung-toung totoloimai.
2 Peincongo,
hei siꞌemiu teunga-ungaꞌu,
poꞌinepea siama niꞌemiu.
3 SiRuben,
teungaꞌu sanu siaꞌa,
siꞌoomo tetanda siaꞌu moꞌuig maꞌaala teunga,
sanu pabibia lamai teꞌuigu.
Siꞌoo tututuu noongkoi ane moꞌuig heꞌuapa jojoo teungaꞌu ntaninya.
4 Tapi siꞌoo tetoo sima teogo buntul sanu jio maala notaani,
siꞌoo jiongo tututuu noongkoi.
Karna siꞌoo noꞌoturu concoono tesarueꞌu,
pineꞌenciini niꞌoo tepoꞌoturuong niamamu.
5 SiSimeon ane siLewi selilio tesipanya.
Siira rotoo nepake teꞌiabut-iabut niira untuk mopoꞌorua.
6 Siaꞌu jio monuut eilalong nuposinturuꞌong niira,
valii jio eilalong nupeinconong niira.
Karna watu siira nanasu,
siira nomate tetoo-too,
ane siira nonibas teuat nuꞌintid nusapi boi karna seilu.
7 Siira kinutuk karna tenasu niira tutuu nooge.
Siira kinutuk,
karna teꞌoungkul niira najaat tutuu.
Tebija niira sinimputareaꞌua eitatanga nubija niYakub
ane tebija niira utuju momoia eitatanga nutoo-too nuꞌIsrael.b
8 SiYehuda,
c terururusmu momuji siꞌoo.
Siꞌoo mondaag jojoo temusumu,
ane terururusmu moposuncul eitolomu.
9 SiYehuda,
siꞌoo moꞌuig sima teunga nusinga,
sanu netencile eipomoiaongnya touk nenginang sanu iraꞌopnya.
Sima tesinga siia nopobokok ane nopoduling,
jio umai sotoo sanu mabarani nopepemata siia.
10 Tebija niYehuda jio mengondok momarenta
jaok sotoo tebijanya sanu masipato majaok momarenta seende-endenya.
d
Jojoo tetoo eijuniaa moposuncul eitolonya.
11 Tepuu-puu nuꞌanggurnya nabari tutuu
jaok siia maala nongotoa tekeledai eipanganya,
sima eipuu nuꞌanggur sanu tutuu nombosi.
Teogo nuꞌanggurnya mabari tutuu
jaok siia maala mepake teogo nuꞌanggur heꞌua monatap.
12 Tematanya majari mododa karna nabari nenginung teꞌanggur,
ane tengisinya majari nemeas karna nabari nenginung tesusu.
13 Tebija niSebulon momoia eipipit nudagat.
Tepomoiaong niira majari tepolabuong sanu maꞌaman untuk tepayangan-payangan sanu mooge.
Teonto niira maloas jaok eiSidon.
14 SiꞌIsakhar,
siia sima sambaang tekeledai sanu moꞌuig,
sanu rumorota pepees nongomung tesagara sanu novoat.
15 Watu siia meꞌita umai tepesoong sanu mombosi,
ane tepomoiaong sanu mopaꞌasanang,
siia rumorota tedodompalnya untuk mongomung tesagara sanu movoat,
ane majari tevotuang sanu nopajujut mokarajaa.
16 SiDan,
e mongadili tesukunya.
Siia mongadili tesukunya,
sima tesuku ntaninya eiꞌIsrael.
17 Siia sima tesaa eipipit nujalang,
tedolimaang eijalang sanu medeꞌi,
sanu nonutuk teꞌintid nuꞌajaran,
jaok teꞌajaran nelumpat ane tetoo sanu nesaveinya nanavu eitana.”
18 SiYakub nonjaritaonye,
“BoSiopu,
f siaꞌu metaang jaok Siꞌoo mopaꞌasalamat siaꞌu.”
19 SiGad,
siꞌoo noeva nutopongago-topongago,
tapi siꞌoo megois mongeva siira.
20 Tetana niꞌAsyer mohasila sanu noꞌinang sanu mombosi.
Siꞌoo monyadiaa sanu noꞌinang nupuang-puang.
21 SiNavtali heꞌua sima tejonga sanu ilapasaꞌomo.
Siia valii moꞌounga ane teunga-unganya pompogaya.
22 SiYusup heꞌua tepanga sanu mevua mabari,
tepanga nupuu sanu moꞌosuk temata nuogo.
Tepanga-panganya malabat tetembok.
23 Temusu-musunya nongeva tutuu,
ane siira nomana ane nonesa siia.
24 Tapi siia tataap moꞌuig nondiit tepana,
teꞌongkongnya jio memeꞌu
karna siia tinuluni nuꞌAlataꞌala Sanu Mabaraka,
sanu sinomba niYakub,
teꞌAlataꞌala sanu tinope teTopomiara tePetuvuong ane sanu nonjaga tetoo-too niꞌIsrael.
25 TeꞌAlataꞌala sanu sinomba nusiamamu monulunimu.
TeꞌAlataꞌala Sanu Tututuu Mabaraka mombarakaimu
mepake teujang lamai telangit
ane teogo lamai eiangkop nutana.
Siꞌoo maꞌaala mabari tebija ane tebinaatang piniaramu nohasila mabari teunga.
26 Teberkatg sanu tinarima niamamu lamai sikakainya
nooge heꞌuapa teberkat sanu neendemo umai eibuut-buut,
jojoo sanu mombosi sanu lamai luulu umai eibuut-buut.
TeꞌAlataꞌala mombeena teberkat-berkat heꞌua eisiYusup,
sanu pinaꞌajari tututuu noongkoi heꞌuapa terururusnya.
27 SiBenyamin sima teserigala sanu mabarani,
sanu menginang sanu iraꞌopnya titieleo
ane notilal-tilala tetoronya beimbengimo.
28 Heꞌua tepongular niYakub sanu ponouꞌong eiunga-unganya.
Siia nongulara sanu masipato eisiira sotoo-sotoo.
Tebija lamai sompulu rotoo teunga langkai niYakub heꞌua sanu najari sompulu rosuku niꞌIsrael.
SiYakub Naate Ane Tinanongo
29-30 Lamai heꞌua siYakub netuung eiunga-unganya sima eini,
“Siaꞌu nerasai moꞌosuko maate.
Jamo siꞌemiu kanaboi montanong siaꞌu eipontanonong nikakaiꞌu,
siꞌAbraham.
Tepontanonong heꞌua umai eiGoah nuMakhpela,
sanu netontoloong eiKampung nuMamre,
eiTana nuKanaꞌan.
Luulu siꞌAbraham nongoli tegoa heꞌua concoono tejoꞌong sanu moꞌosuk untuk pinaꞌajari tepontanonong.
Siia nongolinya lamai tetoo nuHet,
tetopenya siꞌEvron.
31 Eiriꞌua tinanong siꞌAbraham ane siSara,
valii siꞌIshak ane siRibka.
Eiriꞌua valii tinanongu siLea.
32 Tejoꞌong ane tegoa sanu eiriꞌua inolimo lamai tetoo nuHet.
Tanongo siaꞌu ampi heꞌua.”
33 Notouk netuung eiunga-unganya,
siYakub nopoduling vavalii,
neambok teambok ponouꞌongnya,
lamai heꞌua naatemo.