Kisah Para Rasul 26

Kolano Agripa nutné Paulusé, bóngo ncónglo i

Kolano Agripa nécegé Paulusé, “Yó, wóré méféténé. Ta si rkélak awé né, fatuw pari tisé?” Pocé ga Paulusé nélóngé fao né néya bo kyaté né rfaténténgén si, bóngo néfétno légaé njé bo nuné ta i ncól pa, se néceg faje:

2-3 “Jou kolano ta awé. Kyat Yahudi ta pote né rkélak ya né re félé, mayta ya ksól pa, ta mulo kégbono awé bo kéfétno awé nte. Awé muné fié kyat Yahudi mam adaté né, re ta amé kekenfakotale né ma muné fié nóté. Se ya kséngé kégbono awé nte. Ya ma bo kéror po aw ni, ma msawan ya su matiné, mayta mlongé fafié ta ya bo kéfétno awé nte.

4 Ta móné mya ya lesu po niké pnuw re bóténé lo né, sogado ga kluwe ya néya po pnuw Yerusalemé, anik fénfan re téltoléné né, kyat Yahudi farimé re runé ya ndimé. 5 Po amam agama Yahudi né, kyat ta rdéréré mam dodoto Farisi né, wlori né nmóto be mam hukum agama Yahudi né. Se faiwóbno lesu sogado nte, ya ma kfambóngo ya re si, ta délé kdéréré mam dodoto Farisi né fié. Kyat Yahudi ta rkélak ya nesté né re runé ya ndimé. Iga wlori, si ma bisa réfétno awé nóté. 6-8 Tatubé lima lesu, Jou Lahatala re néjaji po mam gélé re gaé né, ta I nase nfapangéné keé kyat ta re rmóté né. Jaji ta néi, re nfabingo mam gélé re gaé nesté ni ndimé, Yakobé ntu yófésó re séluwé né mnapo nturi re gburi né nóté. Se si rfapélóy Jou Lahatala ngósno dorém re ngénngané, runé ni jaji ta néi, nase bo ndadi i óro. Se légaé ta awé, ta Jou Lahatala néjaji po mam gélé re gaé nesté ni né, ya ma kngongano ta néi. Se necé ta mulo kyat Yahudi nesté rcawan ya se rut ya lima se kégbono awé nte, bo awé ta mfaméteglo amé.” Pocé Paulusé négiwé i néli, ga néceg faje, “Se bo kutné kyat Yahudi ta mewé nte. Ta Jou Lahatala nfapangéné kyat ta rmóté né, pe sói se ga fdélé pa né?

9 Ta ngané fis lima né, ya ma dolo mewé nóté, kécogoma kyat ta rdélé Yesusé kyat Nazareté njé né, rdélé Jou Lahatala ta fatuw pa. Se ya ta délé kfakangelang si, bo I ni kyaté né rdélé I nóté na. 10 Ya kfakangelang kyaté nesté po Yerusalemé. Kyat ta rdélé Yesusé pocé né ya kfasungé keé si po bui lo, kut imam ta rpélóyé né ngósnori se. Ta néi le pa, ta kpe né. Sogado kyaté né bo rpuné keé si ma, ya ma kfauto fio. 11 Ya kfangsungé mam agama Yahudi ni um sambayangé né, kfakangelangé kyat ta rdélé Yesusé né. Ya kané si rfakcegé Yesus ngósno né, re rdéréré I nóté na. Nik séwsawané nawto ya né, kéngóto si ma, ta délé nik lé si. Ya kfakangelang si po Yerusalemé le pa, mayta kfafejale si sogado po pnuwé pnuw ta po bótén nésé, bóngo kfakangelang si pocé nóté.

Paulusé néfétén ta faiwóbno i ndélé Jou Yesusé né

12 Se nuéncó ya kfan po pnuw isó ngósno Damsyiké, bo kfakangelangé kyat ta rdélé Yesusé né nóté. Imam ta rpélóyé né rané ya, se kut ngósnori né. 13 Ta kenfan néli né, mgo ngénngan fapéluné. Légaé ta awé, se ta ya kenfan néli né pa?, télél be ga ménano isó ncage yama soroga, nfaljelé ya re nik délé nesté. Ta ncage am yama né, ni seleteme né nfalcól lów re ngénngané njé ntulé né. 14 Kémnaw ménano njé né, am farimé térébébsé am nóp bétbété lo. Pocé ga ya klóngé méitén esó ta maIbrani ndé ya, néceg faje, ‘Saulus, Saulusé, mpe sói se ga nim lé Ya né, se mpuné keé niké kyaté né né? Awé ma nase bo mkangelang bo makotale le po Jou ni né.

15 Pocé ga ksónglo I, ‘Pai awé, Jou?’ Jou ncónglo ya, ‘Ya nte Yesusé, ta awé nim lé Ya né. Awé re mfakangelang ya, sebabta re mfakangelangé niké kyaté né. 16 Mayta nte mpangéné ro, mosél néya. Ya kwómo awé nte né, bo kané awé mdadi nik nénan awé ro, bo mfané méféténé ta re mémnaw Ya kwómo awé nte né. Ya ma nase kwómo awé nóté, se nase méfétén ta néi nóté. 17-18 Ya kané aw néli po kyat ta riri agama Yahudi né pa. Kyat ta nesté runé Jou Lahatala pafule, mayta méfétno si bo rdéréré I. Kyaté nesté bo rdéréré Jou Lahatala né, kfatailo si dolo kyat ta rébyafé se tagare rémnawé, dolo kyat ta tagare rcópén tóma dérorémé lo né, rcung némin po ménano wlólo. Bo rdélé Jou Lahatala né, nase I nkawasa keé si, se setané né riri kolano njé nase nkawasa si pana. Pocé bóngo Jou Lahatala nase nfayangésé keé róri sélsólé né, bóngo rfambóngo si re kyat ta Jou Lahatala re npili si né. Mfatélolmo aw fafié: néli, bo sogado re méfétno si ta néi, kyat félé nase rfakangelang awé, kyat Yahudi re kyat ta kyat Yahudi si pa né nóté. Mayta gélesó pa, Ya nase kteptubo re kdéréré awé, se sói ta si bo rpe né, réfen aw pa.’

Paulusé néfétén ta i nut Jou ni méiténé

19 Jou kolano Agripa, ya kémnaw Jou Yesusé né rewóré, tabóngo ta I nané ya né, kdéréré keé I ndimé. 20 Ta faiwóbno né, ya kfan po pnuw Damsyiké né, kéfétno kyat ta si pocé né. Rewóré, kéfétno kyat ta si po Yerusalemé né, re kyaté-kyat ta si po bótén Yudea né ndimé. Tabóngo re ya ma kéfétno kyat ta riri agama Yahudi pa né nóté. Ta ya kéfétno si né faje, ‘Fngali mewé, fpóléné mew néli po Jou Lahatala ni. Fngali mew rewóré, nimi fénfané re téltoléné né mare re nésé, bo kyaté né runé ta re fngali mewé.’ 21 Ya kéfétén ta néi néli re lima, necé ta mulo ga kyat Yahudi né rgó ya po amam Um Sambayang ta npélóyé njé ni, réyówé yéfén bo rpuné keé ya. 22-23 Mayta masike rgó ya ma, Jou Lahatala ntéptubo re ndéréré ya sogado ngénngan péséwé nte, se necé ta mulo ya kosél pote kéfétno mew farimé, kyat ta mya re kyat ta pélóyé. Ta ya kéféténé né, kéfétén be Kristusé. I ta Jou Lahatala néjaji it tatubé, ta bo nwómé nfasélamat ité né. Ta ya kéféténé né, kéceg be néya pa. Ta ya kéféténé né, nfamgo re ta Jou Lahatala ni nénan Musa i re Jou ni nénan tatubé lima né ma re rfawómo ité ro. Tatubé lima lesu, si re récegé bo sogado I nwómé né, nase kyaté né rfakangelang I sogado nmóté. Mayta gélesó pa, sebabta si ma re récegé, I kyat ta faiwóbno ta nmóté né, mayta nase npangéné nmulé. I npangéné nmulé né, kyat pai le ta ndélé I nase nduk salamaté, masike kyat Yahudi pari kyat Yahudi si pa ma, nase rduké ndimé.”

Paulusé wlo ncuka bo kolano Agripa ma ndélé Jou Yesusé

24 Paulusé nméitén fajé, tabóngo gubernur Festuse nefngero nó néli, “Eh, Paulusé, awé nte mbébowé! Awé re muné félé, se farimé ta muné né re nfabébowé keé awé.”

25 Pocé ga Paulusé ncónglo i, “Nik suba re tabea, légaé ta awé. Ya nte kbebow pa. Farimé ta kéféténé nte né, fatuwé ndimé. 26 Ta kéfétén péséwé né, kolano Agripa ma re nuné ndimé, se kémtat pa kéfétno i ta néi né. Farimé ta re kéféténé nte né, i re nuné ndimé, sebabta ta re ndadi i né, kyaté né re rpeé penpin pana, mayta kyat ta félé né ma re runé ndimé.” 27 Pocé bóngo Paulusé négiwé i néli kolano Agripa ni, ga nécego i, “Légaé kolano ta awé. Jou Lahatala ni nénan ta re réféténé ni méiténé tatubé né, awé mdélé si pari tisé? Ya kuné awé ma mdélé fié.”

28 Kolano Agripa nécego Paulusé, “Méfétén cuci ta néi, awé méyówé yéféné bo cogo famla ya ma kdéréré Yesusé?”

29 Pocé Paulusé ncónglo i, “Ya kéror po Jou Lahatala ni, bo mla pari tisé né, awé ma mdélé Jou Yesusé. Mayta nase awé le pa, aw re kyat farimé ta flongé ya nte, fdélé Jou Yesus dolo ya nte nóté. Maduga ya kéroré né, bo fdélé Jou Yesusé né, mati sogado rbólété mew ta dolo ya kduk nte na.”

30 Pocé bóngo re kolano Agripa, i re ni jou boki Bernike, gubernur Festuse, re kyat ta rtoléné rdé si pocé né ma rosélé ndimé. 31 Si rcópén pocé, bóngo rfécego, “Légaé ta njéi ncól pa, se bo tfasung i bui pari tpuné keé i ma métegél pa, nase ité ma tcólé.”

32 Pocé kolano Agripa ma nécego gubernur Festuse, “Légaé ta njéi, bo tfasópén i ma gélesó pa. Mayta re néroré bo négbono kolano ta npélóyé njé ni lesu, se fajé óro, bo tfatebé keé i néya po i ni.”