Kyat Yahudi né rkélak Paulus po Gubernur Feliks ni
24
Ngané lim ta re télapasé né, imamé né riri kepala po agama Yahudi, ta ngósno Ananiase njé, nwóm nóp po pnuw Kaisarea. Kyat tut ta po agama Yahudi séfis néli ma rdé i, si re kyat isó nóté, ngósno né Tertuluse. Tertuluse njé nméitén fié, ni yabé né maduga néféténé kyaté nó sélsólé né po pengadilan njé ni. Se si rwóm nópé né, rfané régbono légaé gubernure njé bo réfétno i Paulusé nó sélsólé né. 2 Se pocé légaé gubernure njé nkakém Paulus lima i ni, bóngo Tertuluse néfétén Paulusé nó sélsólé né faje,“Légaé gubernur ta awé, amé nte mam kyat tut awé, ta mkawasa po ité rir bóténé njé ni. Tatubé lima sogado nte, isó pa ta nfarwae bóténé njé, se nténténgéné. Faje nóté, awé muné fié farimé ta lé po ité rir bóténé nje ni, se awé re mfaméteglo keé se re ndadi i fié ndimé, ta mulo ité rir bóténé nje re nfan fié. 3 Necé ta mulo amé kséngé, kfatélolmo anim féyfié po am ni né. Awé re mgali amé né félé, se ta mulo po géwgów sói lo le, amé kéceg be amam syukur fafélé po aw ni. 4 Necé re tuné ndimé. Se ta fié kéféténé mnuw matiné, nase kfatagaha nim yabé né se. Se nte kéror po aw ni, bo mmésié amé né, mlongé mam méiténé cuci ta bo kécego awé nte.
5 Paulusé nje kyat isó ta délé kyat léo i. I nfakesnope po bóténé nje ni wómé ntit ta wómé, nfarwae kyat Yahudi né po riri pnuwé lo né ndimé, sogado mleleye. Necé am re kuné ta fatuwé. Po i re ni dél ta rdéréré Yesus kyat Nasrani njé né, i ro ta ndadi kyat tut po si ni. 6 I ma nuté kyat isó ta kyat Yahudi i pa némin po agama Yahudi né mam Um Sambayang ta npélóyé njé ni, se nfacafaruné keé i. Necé ta mulo ga kgó i né. [Pocé amé bo kfasól i, ta dolo amam hukum agama Yahudi nané né. 7 Nópé ga tentara caléncó né riri kepala ta ngósno Lisiase njé nwómé, naye keé i po faomamé wlólo. I dolo nétén am facuci le ma tisé, nwómé nyó i le. 8 Pocé nécego amé, ‘Iga bo ffasól i né, mare fégbono légaé gubernur Feliks po Kaisarea.’] Se légaé ta awé, faje: bo mutné i, mutné i ro. Nase mlongé, awé ro ma nase muné ta féléo ta kkélak i né, fatuwé ndimé.”
9 Tertuluse nméiténé rewóré, kyat Yahudi ta pocé né réceg faje, “Alli, fatuwé, molen i. Farimé ta i nécegé né fatuwé ndimé.”
Paulusé ncónglo kyat ta rkélak i né po Feliks ni
10 Légaé gubernure njé néngóto Paulus néli, néftul i bo nméiténé. Pocé bóngo re Paulusé nméiténé, “Légaé ta awé. Re tahun nuén fis néli nte awé mkawasa ité rir bóténé nje. Necé ya ma kuné fié. Se ta mulo ya kséngé kégbono awé nte, bo kéfétén ta si rérkélak ya né, bo muné ta ya ksól pa. 11 Ta ga nte, nwómo i ngané yófésó re luw pafule, ya kfan néya po pnuw Yerusalemé, kfapélóy Jou Lahatala ngósno pocé. Iga mutné kyaté né, nase muné ta ya kécegé nte né fatuwé. 12 Ta yai nteya Yerusalemé né, ya kfakotale kdé kyat pa, re ya ma kfakesnope néli re lima pa. Ya ta délé kpe fajé pa, masike yai po amam Um Sambayang ta npélóyé njé ni pari, po amam um sambayang ta nésé né pari, po géwgów pua le ta po Yerusalemé né, kyat Yahudi ta rkélak ya nte rémnaw ya kpe fajé pa. 13 Faje nóté, ta si rkélak ya nte né, rfaftulo aw gélesó pa bo muné ta fatuwé ya ksólé, se nte si récegé riri le. 14 Masolo esó le ta ya kepino aw pa, bo awé ma muné. Ya re nik dél ta kdéréré Jou Yesusé ni dodoto né, kyat Yahudi iglé récogoma ta amé kpe né sólé, cogo kdéréré Jou Lahatala ta fatuw pa. Mayta fajé pa. Ya kdéréré be Jou Lahatala, ta ité rir gélé re gaé né ma rdéréré I njé né. Ya ma kdélé farimé ta po amam hukum agama Yahudi wlólo né, re farimé ta Jou Lahatala ni nénan tatubé re rlefo po ni Buké wlólo né. 15 Bo ya re kyat Yahudi nesté, ya ma kngongano Jou Lahatala ta dolo si né nóté. Amé kngongano I né, ta pote se néli, kyat fio pari kyat léo tmóté né, nase I ro nfapangéné keé ité nmulé. 16 Se necé ta mulo dorém re ngénngané kuté nik diri né fafié, bo wlegé njé nmétegél po Jou Lahatala ni, re po kyat ni nóté.
17 Re tahun nuén fis néli nte, ya ktolén po Yerusalem pa. Se taga nte kfan néya po Yerusalemé né. Kfan néya né, kut pipisé ta bo kfanténo rir dél ta reriri reróri pa né, ya ma kuté nik pipis ta bo kpeo nik sadaka po Jou Lahatala ni né. 18-19 Kwóm néya Yerusalemé né, ya ksung po kyat Yahudi mam Um Sambayang ta npélóyé njé ni. Pocé ya re nik délé né tagare kdéréré mam hukum agama esó ta ngósno, ‘tfaberesi wlo né’. Ta amé kdéréré ta néi, pocé po um sambayangé wlólo né ma reni kyat Yahudi séfis néli nóté. Kyat ta nesté rémnaw ya pocé. Ta rémnaw ya né, kpe gélesó pa. Ya re nik délé nesté ma kfélé pa. Kpe gégliné facuci ma tisé. Nópé ga riri dél kyat Yahudi ta si lima bótén Asia né rcawan ya. Kyat Asia nesté ta rfakékakmé riri dél kyat Yahudi né bo rcawan ya, sogado gégliné ndimé. Se iga si récogoma ksólé, pe sói se ga tiso si nte? Ndé fafié, kyat ta nesté rwóm lima, bo rkélak ya po aw ni nte. 20 Mayta légaé ta awé, ta fié né mutné kyat ta it re si pote fajé né. Ta fakajere né, si rutné ya po kyat tut ta rkawasa po amam agama Yahudi né. Anak sélsól sói ta si rduké né? Rduk gélesó pa! 21 Maduga esó le ta rcawan ya né, né masolo kméiténé né, kgélay faje, ‘Eh, kyat ta rmóté né pa?, Jou Lahatala nase nfapangéné keé si nmulé.’ Ya masolo kéceg cuci ta néi, tabóngo rkélak ya se kégbono mewé nte.”
22 Gubernur Feliks nuné fié Jou Yesusé ni dodoto né, masolo nfaténténgén i le, bóngo newetce keé be nópé, ga néceg faje, “Wóré, twóm pote su. Nómesu tentara caléncó né riri kepala Lisias nwóm yama, ga taga kutné mewé nóté, bo kuné ta awé msól pari tisé.”
23 Pocé fajé ma reni tentara kyat witéncó riri kepala njé, bóngo gubernure njé nécego i faje, “Mfaléngóto Paulusé. Mayta bo nénfan i néli re lima né mpo i fié le, gélesó pa. Iga ni délé né rwómé bo réflengén i, fajé si ro, maga bo rfatebé nó sói néli pa?”
Paulusé négbono Feliks i re Drusila
24 Re nfano i ngané fis néli, gubernur Felikse nwómé, i re ni dél pégelé njé, ngósno né Drusila. Pégelé njé kyat Yahudi i. Pocé gubernure njé nkakém Paulusé, bóngo Paulusé néfétno si faje, “Yesusé, I ro ta Jou Lahatala néjaji it tatubé, ta bo nfasélamat ité. Se ité mare tdélé I, bo tduk salamaté.” 25 Paulusé néféténé né félé, néfétno si né faje, “Bo tdéréré Jou Yesusé, nase I n-gali ité tpe ta métegélé, re I ma nase n-gali ité tkawasa keé wloré né bo ta lé né ma tpe na. Pote se néli Jou Yesusé nwómé nmulé bo nfaméteglo ité, I nase néftul pai ta ndéréré I bo i re I sogado fajé néli le, re nase néftul pai ta ndéréré I pa né, nase nfasólé keé si sogado fajé néli le.” Feliks nlongé ta néi, tabóngo némtaté. Pocé i nécego Paulus faje, “Pana fajé, twóm pote óro. Fanuéncó, renik yabé pana, ga kkakém awé nóté. Se nte, méléy su.” 26 Se Paulusé néléy néli po bui lo nmulé. Pocé se néli, gubernure njé ma nénenkakém Paulusé, nénuta po wlo wlólo, “Kfatoléné keé pocé óro. Ma ga nénuta ntolén po bui wlólo né re némnuwé, ga ndo ya pipisé bo kfasópéné keé i.”
27 Re nfano i tahun nuén luwé ro, Perkius Festuse niwén Felikse, ndadi gubernur po propinsi Yudea. Ta Feliks bo ndirke i né, ncópné Paulus pa. Sogado i npe fajé né, npe be kyat Yahudi né wlori le, bo cogo rlolém i.