23
Paulusé néngóto kyat tut ta po agama Yahudi né, bóngo nécego si, “Anik délut re faftén ta mewé. Ngénngan néya ta kdéréré Jou Lahatala né, farimé ta ya kpe né, kuné, wlegé njé nmétegél po Jou ni, sogado ngénngan péséwé nte.”2 Pocé ga imamé né riri kepala njé nané kyat ta po Paulus lapo lo né, nécegé si, “Eh, féspakél néli sumo lo né!”
3 Pocé Paulusé nécegé i, “Jou Lahatala nase néspakél awé! Awé nte dolo rére ta résboté, ga kyaté né rélulo yafe bo témnawé né fié. Sebabta awé nte cogo mdéréré rir hukum agama Yahudi né, mtolné kyat tuté bo mfasól ya pote. Nópé ga awé ma mdéréré pa, sebabta mané si réspakél ya.”
4 Kyat ta rosél po Paulus lapo lo né récego i, “Njé imamé né riri kepala i, Jou Lahatala ni kyat i. Nópé ga awé mfakcegé i né?”
5 Bóngo Paulusé nécegé si, “Tabeu, faftén ta mew. Kuné i pa e, ta imam né riri kepala i né. Bo kuné, ya nase kéceg i fajé pa, sebabta rlefo po Jou Lahatala ni Buké wlólo né, ni glio né faje, ‘Mati fécegé kyat ta rkawasa mewé né na.’”
6-8 Kyat ta pocé fajé né, farimé agama Yahudi si. Iglé rdéréré dodoto Saduki, iglé nóté ga rdéréré dodoto Farisi. Kyat ta rdéréré dodoto Saduki nesté né, si récogoma bo tmóté né nase tpangén pana. Si rdélé pa ta reni roh, Jou ni nénan ta yama soroga né ma rdélé pa. Mayta kyat Farisi né rdélé ta néi ndimé.
Pocé Paulusé nfaléngóto kyaté nesté, nuné ta masike si farimé né agama Yahudi si, iglé rdéréré dodoto Saduki né, iglé ga rdéréré dodoto Farisi né. Se pocé bóngo Paulusé nméiténé ndé si, gli njé dolo bo npako cuci, néceg faje, “Anik délut re faftén ta mewé. Ya nte kyat Yahudi ta kdéréré dodoto Farisi, nik déluté né ma rdéréré dodoto Farisi né nóté. Se ya kngongano Jou Lahatala, ta I nase nfapangéné keé ité, masike re tmóté. Necé ta mulo ga mewé ffasól ya nte né.”
Paulusé néceg ta néi, kyat ta rdéréré dodoto Farisi né dolo bo rfamolen i, mayta kyat ta rdéréré dodoto Saduki né ga rcawané, sebabta ta i nécegé né, si le ta rdélé pa né. Pocé bóngo kyat ta rdéréré dodoto Farisi re kyat ta rdéréré dodoto Saduki né rfakotalé, se ndadi pel abén luwé.
9 Pocé rfakotalé lesu, sogado riri séwsawané né nbóng ta nawto si. Bóngo guru agama ta si ma rdéréré dodoto Farisi né, rosélé réceg faje, “Bo amé, ta Paulusé npe né ncól facuci ma tisé. Solo ma ga roh ta fié pari, Jou ni nénané yama soroga né re rwómo i, se rané i.” 10 Kyaté nesté rfakotalé sogado bo rfanpuné róri. Pocé tentara caléncó né riri kepala njé némtaté, mati na ga rfarorosa Paulusé. Se pocé bóngo i nané ni tentara né, “Ftebé nópé, fyó Paulusé, bo fut i yama. Kyat ta rpe mléléy pocé né, feten si matiné, fyó i le bo fut i néya po asrama lo.”
11 Ta mélówé néya se ni dorémé né, Jou nwómo Paulusé, nosél po ni lapo lo, bóngo néceg ta, “Mati mémtat na. Ta awé re méfétén Ya po Yerusalemé nte né, nase méfétén Ya po pnuw Roma nóté.”
Kyat Yahudi né rfasogaro si bo rpuné keé Paulusé
12-13 Ni tómémóné né, kyat Yahudi yóféfót re gle rfajólo si, rfasogaro si faje, “Tpuné keé Paulus pa? Nte tcasi, ma tó re tiném su na, sogado tpuné keé i, ga tagare tó re tinémé.” 14 Se si rfan néli po imam ta rpélóyé nesté ni, si re riri kyat tuté né, bóngo récegé si, “Amé re ksasi. Masike ga ktéloté, amé nase kémnóm pafule, sogado kpuné keé Paulusé, ga tagare kémnómé. 15 Se ta fié né, mew re ité rir kyat tut ta po agama Yahudi né, féror po tentara caléncó né riri kepala njé ni, bo nut Paulus yama po mew ni. Iga nutné mewé, fécegé cogo bo flongé i fanuéncó nóté, bo funé ta fatuwé, i ncól pari tisé, wóré ga amé któn i po yéfén lapo lo se. Kécego mewé nte pa?, i nwóm pote pafule, amé re kpuné keé i.”
16 Ta rfasogaro si rewóré né, Paulusé ni fóno món isó ma nuné. Móné njé nlongé ta si bo rpuné keé Paulusé né, bóngo nfan néli po tentara né riri asrama lo, nfabingo Paulusé.
17 Paulusé nlongé ta néi, tabóngo nkakém tentara witéncó né riri kepala njé, se nécego i, “Mut móné nje néli po nim kepala njé ni, bo nfabingo i méitén cuci.”
18 Pocé tentara ta njé nut i néli po ni kepala njé ni, bóngo nécegé i, “Paulus ta i po bui wlólo njé nkakém ya, nané ya kfatebé móné njé lima aw ni, cogo bo nfabingo aw méitén cuci pari ó.”
19 Kepala njé nétané móné njé fao né, ntuda i néli cuci. Pocé si dórén luwé le, bóngo nutné i, “Sói ta bo mfabingo ya né?”
20 Móné njé ga nécego i, “Kyat Yahudi iglé né re rfasogaro si, récegé bo réror po aw ni, bo móné mut Paulus néli riri kyat tut ta po agama Yahudi nesté ni. Si nase récegé cogo bo rutné i nóté, bo runé ta fatuwé, ncól pari tisé. 21 Mayta légaé, ma mdélé si na, rlól awé. Kyaté nesté cuci i pa, re riri kyat yóféfót re gle ta bo rtón i po yéfén lapo. Kyat ta nesté re rcasi, cogo masike ga rtélóté, nase ró re riném pafule, sogado rpuné keé Paulusé, ga tagare ró re rinémé. Se si nte re rtón i po yéfén lapo. Se bo sogado mané rut i néli po riri kyat tuté nesté ni, tabóngo rpuné keé i nóp yéféné lo né.”
22 Bóngo kepala njé nécego i, “O, fajé e? Pana fajé, mati méfétno kyat na, ta re mfabingo ya nte. Se méléy awé ro.”
Paulusé rlué i néli po pnuw Kaisarea
23-24 Pocé tentara caléncó né riri kepala njé nkakémé ni dél séluwé ta nae ta rétané tentara witéncó né lima, bóngo nécego si, “Kané mewé nte, bo ffatebé Paulus nóp po gubernur Feliks ni su. Se ta bo fut i nte né, fkakémé nimi tentara witén luwé nesté, si re tentara fayóféfité nóté ta rcaplo kuda, re tentara fawitén luwé nóté ta rut séksagé. Ffané si bo rfaléléyé riri sói néli ndimé, bo facuci dorémé, tok nuén popété, mewé ffané ffatebé Paulus nóp po pnuw Kaisarea. Féyówé kuda né nóté, bo Paulusé ma ncaplo. Po nimi fenfanélo né, ffaménawé i fafié, bo sogado fwómé ntópé né, gélesó ta npe i na.”
25 Pocé riri kepala njé nlefo surat esó po gubernur Feliks, ta ni glio né faje,
26 Ya nik suba re tabea po aw ni, Légaé gubernur Feliks. Ya, Klaudius Lisiase, klefo suraté nje po aw ni, amam kyat tut ta mkawasa bóténé nje né. 27 Ya kfanaté kyat njé nóp po aw ni nte, ngósno né Paulusé. Kyat Yahudi né re rgó i, bo rpuné keé i. Mayta ya klongé ta i ma kyat Roma i né, se ya re nik tentara né kwóm néli si ni, bóngo kyó keé i, bo rpuné keé i se. 28 Re kyó i lima am ni, masolo kuné pafule pe sói se bo rpuné keé i né, se kut i néli po kyat tut ta po agama Yahudi né, kfaléyówé nó sélsólé né. 29 Pocé ga kuné ta si rkélak i né, cogo ndéréré si riri hukum agama Yahudi né pa, sólé se. Mayta, po ité rir hukum Pemerintah Roma né, ncól pa. Se bo tfamót i pari tfasung i bui ma, rir hukumé né ma npo it fié pa. 30 Tagare nte ya klongé ta kyat Yahudi iglé né rfasogaro si, bo rané ya kluwe Paulus po géwgów nésé, momongo rlól ya, re rtón i po yéfén lapo lo, bo rpuné keé i pocé. Se necé ta mulo ya kbablé kfanaté i nóp po aw ni. Bóngo kyat ta bo rpuné keé i né, ya ma kané si rfan nóp po aw ni nóté, bo réfétno awé i nó sélsólé né. Nik suraté nje nwóm pote su.
31 Dorém ta njé ro tentara nesté ryó Paulusé, tabóngo rfatebé i nóp po Kaisarea, ta dolo riri kepala njé re nané si né. Si rfatebé i né, sogado rwóm po pnuw Antipatrise. 32 Ni tómémóné né tentara ta iglé né rpólén si po riri asrama lo. 33 Maduga tentara ta rcaplo kuda né ga rfatebé Paulusé, rfalówé i nóp sogado rwóm po pnuw Kaisarea. Rwóm po Kaisarea né, rpo suraté njé néli po légaé gubernure njé ni, bóngo récegé i, “Neje Paulusé, kpo keé i néli po aw ni.”
34 Gubernure njé nbaca suraté njé rewóré, bóngo nutné Paulusé, “Awé nte kyat sói awé?”
Paulusé ncónglo i, “Ya nte kyat Kilikia ya.”
35 Bóngo gubernure njé nécegé i, “Téftóné kyat ta bo rfasól awé né rwóm su, ga ta ga kkakém awé. Pocé ga kutné awé, bo ya kuné ta awé msól pari tisé.”
Pocé gubernure njé nané tentara né, bo rut Paulusé néli po ni kadatongé lo, ni kadatong ta kolano Herodes npe i tatubé njé. I ma nané si bo rfaménawé i fafié.