22
“Nik délut re faftén ta mewé. Ya nte ksól gélesó pa po mew ni, se flongé fafié ta ya bo kéfétno mewé nte.”2 Kyat ta pocé né rlongé Paulusé nmaIbrani ndé si, bóngo ta délé rfaténténgén si. Pocé bóngo nméiténé ndé si faje,
3 “Ya nte kyat Yahudi ya. Ya ktub po pnuw Tarsusé, ta po bótén Kilikia. Mayta ya kpélóy pote po Yerusalemé. Ya ma klongé Jou Lahatala ni dodoto né pote po Yerusalemé; rir légaé guru Gamaliel ta nfasodoto ya né. I nfasodoto ya ité rir hukum agama Yahudi ta Jou Lahatala npo rir wes re félbawé né, nfaftulo ya fafié bo kuné re kdéréré keé ndimé. Se ya nte ta délé kdélé re kdéréré Jou Lahatala, ta dolo mewé nte nóté. 4 Ngané fis lima né, kyat ta rdélé Yesusé né ya kécogoma rcól po Jou Lahatala ni. Se ya kfafejale si, kfakangelang si, sogado iglé né ma kpuné keé si. Ya kfagegóé si, i ni món pa, i ni mépin pa, se kfasungé keé si po bui lo. 5 Iga fdélé ya pa, futné Imamé né riri kepala njé re kyat tut po agama Yahudi né ndimé, nase réféténé né fatuwé ndimé. Nuéncó sogado rpo ya surat kawasa, bóngo kfan néli po fténor kyat Yahudi ta si po pnuw Damsyiké né. Pocé po Damsyiké né, bo kgó kyat ta rdéréré Jou Yesusé ni dodoto né. Kgó si né, bo kut si lima bo kyat tut ta rkawasa po agama Yahudi né, rfasólé keé si pote po Yerusalemé nte.
Paulusé néfétén ta faiwóbno i ndélé Jou Yesusé né
6 Ta kfan néli né, re bo kwómo pnuw Damsyiké, ni hale ngénngan fapéluné, télél be ménano isó npélóyé ncage yama langété lo, nfaljelé keé ya. 7 Se terfaspók ya nóp bétbété lo, bóngo klongé méitén esó néceg faje, ‘Saulusé, Saulusé, mpe sói se ga nim lé Ya né, se ga mpuné keé niké kyaté né né?’
8 Ya ksónglo i, ‘Pai Awé, Jou?’
Bóngo nécegé ya, ‘Ya nte Yesusé, kyat Nazareté njé. Awé re mfakangelang Ya, sebabta re mfakangelangé niké kyaté né.’
9 Pocé kyat ta rdéréré ya né rémnaw ménano njé ndimé, masolo méiténé njé rcae i pa.
10 Pocé bóngo kécegé i, ‘Se ga ya nte bo kpe fawa?’
Bóngo Jou nécegé ya, ‘Mpangéné néya, mfan néli po pnuw Damsyiké. Néli nase kyat isó nfabingo aw sói ta kané awé bo mpe né.’ 11 Mayta re kébyaf ya, sebabta ménano ta seleteme njé rémgo mtage né se. Se pocé bóngo nik délé né rétané faoge né ga rtuda ya néli po Damsyiké.
12 Pocé po pnuw Damsyiké né, reni kyat isó ngósno Ananiase. Légaé ta njéi fatuw-fatuwé ndéréré ité rir hukum agama Yahudi né fié. Riré kyat Yahudi ta pocé né farimé récegé, ‘Kyat ta njéi, kyat fio i.’ 13 Ananiase nfan lima ya ni, nosél po lapogé lo né, bóngo nécegé ya, ‘Faftén Saulusé, mémnawé nmulé.’ Ta né ro bóngo kémnawé nmulé, se kéngóto i.
14 Pocé bóngo nécegé ya, ‘Jou Lahatala ta ité rir gélé re gaé né ma rdéréré i njé, I ro ta re néftul awé bo muné sói ta I wlo bo awé mpe né. I ma re néftul awé sogado re mémnaw Jou Yesusé, re sogado mlongé I ta nméiténé ndé awé né. I le ta fatuw-fatuw nmétegélé njé. 15 I re néftul awé, se nase mfané méfétén Jou Yesusé po kyat farimé. Méfétno si ta awé re mémnaw I né, re mlongé ta I nméiténé ndé awé né. 16 Se nte méftóné mnuwé nóté na. Lima, mpangéné néya, bo kbaptis awé. Méror po Jou Yesus ni bo nfayangésé keé nam sélsólé né.’
Jou Lahatala nané Paulusé néfétén Yesus po kyat ta kyat Yahudi si pa né
17 Nbaptis ya rewóré, kpólén ya néya po Yerusalemé. Nuéncó, ta yai pote Yerusalemé né, kékénméiténé kdé Jou Lahatala po ité rir Um Sambayang ta npélóyé njé ni né. Pocé kyénéf pa, mayta dolo kbélisé Jou. 18 Pocé ya kémnaw Jou, bóngo nécego ya faje, ‘Iga méfétén ya pote Yerusalemé né, nase rlongé aw pa. Se famlale mfan awé ro, méfétén Ya po pnuw nésé.’
19 Pocé ya ksónglo I faje, ‘Kyat Yerusalemé nte re runé tatubé nik lé kyat ta rdéréré Awé né. Si ma re runé ta ken-gó si po amam um sambayangé lo né, kenfaspésé si, bóngo kfasungé keé si po bui lo. 20 Stefanus ta nénéfétén Awé né ma, nik délé né rfatéteé i. Ya ma kosél pocé, kpo si fié bo rfatéteé i né. Sogado rfamóté keé i né, riri juba ta rfapel nópé né ya ta kfaménawé né. Mayta ta re kngali ya nte, necé si re runé ndimé, se nte nase rlongé ya fié.’ 21 Pocé Jou nécego ya, ‘Wóré, mfané ro. Mfan néli po bótén ta lówé, bo méfétén ya po kyat ta kyat Yahudi si pa né, kyat ta néi rfayal ngósnogé né pafule.’”
Paulusé nméitén rewóré, tabóngo kyaté né rcawané
22 Paulusé néfétno si ta néi, ta Jou re nané i nfafan I ni méitén po kyat nésé ta kyat Yahudi si pa né, pocé tabóngo kyat Yahudi nesté rcawan i ndimé, rérén-gélayé faje, “Eh, tpuné keé i nópé! Kyat ta njéi, mare tfamóté keé!”
23 Pocé kyaté nesté rérén-gélayé, résólé riri juba né se réréteé néya, re rfaksaké peplay né néya. 24 Pocé tentara caléncó né riri kepala njé nané ni tentara né faje, “Fut Paulus néli po rir asrama lo. Néli ga futné i né faje, ‘Paulusé, awé nte mpe sói sogado kyat Yahudi né rcawan awé?’ Iga ncónglo mew pa, ffatat i facuci, bo feswake i sogado ncónglo mewé.” 25 Se tentara né rpitén i, ta ga bo réswaké i, pocé bóngo Paulus nutné tentara kyat witéncó né riri kepala njé faje, “Légaé, bo kutné aw facuci. Iga bo teswake kyat Roma ta tduk i nó sélsól pafule né, né ité rir hukum pemerintah Roma npo fié pari tisé?”
26 Tentara kyat witéncó riri kepala njé nlongé ta néi ga némtaté, se nfané nfabingo ni kepala njé, néceg faje, “Ga awé nte mpe sói? Kyat ta njei kyat Roma i, né ga mané ya bo keswake i né?”
27 Kepala njé nlongé ta néi, ta nfan néli Paulus ni, bóngo nutné i, “Fatuw-fatuwé awé kyat Roma awé? Wóré msóngélé.”
Paulusé ncónglo i, “Iya”.
28 Bóngo kepala njé nécegé i, “Ya kyat Roma ya pa. Aniké kyat tuté né ma kyat Roma si pa. Se ta ya kdadi kyat Roma ya né, ya kpólés cuci i pa.”
Paulusé nécegé i, “Mayta ya ga, tatubé lima lesu, niké kyat tuté né kyat Roma si ro. Se ya nte kyat Roma ya ro.”
29 Kepala njé nlongé ta néi, bóngo némtaté, nénuta, “Alli, Paulusé ma kyat Roma i né ga, ya re kané rfakiko i rante né! Bo kyat ta rkawasa po Roma né rlongé, nase rfalé ya!” Pocé bóngo kyat ta bo rfasól Paulusé né ma résuwé si.
Paulusé négbono kyat tut ta rkawasa po agama Yahudi né
30 Pocé kepala njé nénuta po wlo wlólo, “Pe sói se kyat Yahudi né rcawan Paulusé se bo rfasól i?” Kepala njé bo nutné kyat Yahudi ta néi, se ni tómémóné né, i nfakékakmé imam ta rpélóyé nesté re kyat tut ta rkawasa po agama Yahudi né, nané si rfajólo si lima i ni. Pocé nané bo rut Paulusé néli i ni, nfaosél i po si usnori lo.