Paulusé bo nfan po bótén Makedonia re bótén Yunani
20
Kyaté né rpe gégliné rewóré se re béklingéné, pocé Paulusé nkakémé kyat ta réréndéréré Jou Yesusé ni dodoto né, bóngo nfaftóto si, “Nte ya bo kfané. Se ffatélolmo mew fafié, bo fdéréré be Jou Yesus ta fatuw-fatuwé.” Rewóré ta néi, Paulusé nfawasé i, bóngo nfan po bótén Makedonia. 2 I néjel bótén ta néi, ntilé po pnuwé-pnuwé, nfasungo si méitén ta fié né félé bo rdélé Jou Yesus ta fatuwé, sogado nwóm po bótén Yunani. 3 Pocé po bótén Yunani né, i ntoléné ni mnuwo sni sételé wlólo. Sni sétel ta re télapésé né, bóngo bo nfan po Yerusalemé, ncóbele ndé i néli po bótén Siria. Ta i bo ncobélé ro né, nópé ga nlongé ta kyat Yahudi iglé né re rfasogaro si bo rpuné keé i. Se nénuta, “Ta fié né, ksobélé nóté na, mayta bo klongéné le kdé po bótén Makedonia nóté.”4 Se pocé bóngo nfané. Kyat ta rdé i né ngósnori né faje: Soparter (kyat Berea i, légaé Piruse ntu i); Aristarkhuse i re Sekunduse (kyat Tesalonika si); Gayuse (kyat Derbe i); Tikhikusé i re Trofimusé (kyat Asia si); re Timotiusé. 5 Paulusé i re kyat ta nesté rfané rtubé, réftón ama po pnuw Troasé. 6 Am po pnuw Filipi lesu, kyat Yahudi né rfapélóy riri ngénngan ta ró roti ta reni ragi pa né. Rewóré ta néi, ga ta ga ksobél néli po pnuw Troasé, ni mnuwo né ngané limé wlólo ga kwómé. Pocé amé kfakduk re si. Amé ktolén pocé ngané fité wlólo.
Paulusé nfapangén món isó ta nmót po pnuw Troasé
7-8 Po ngénngan minggu né, kfajólo am po um isó ni, po kamar ta nélik po ya njé ni. Pocé ni logaloga ta re réstingé né félé. Ta kfajólo amé né, bo kfakpekte roti bo kó, kfatélolmo am ta féléo i né ta Yesusé re npe né. Paulusé ma nméiténé ndé am farimé ta pocé né. I nméiténé né mnuwé, sogado dorém fapéluno, ni tómémóné né bo nfané se. 9 Pocé fajé ma reni móné mya isó ta néntolén i po jalena lo né, nfaméylongé Paulusé nméiténé, i ngósno né Eutikhuse. Paulusé nméiténé né mnuwé, sogado móné mya njé nmamélelé se néfen pana, sogado némtolé, télél be ga némnap i po um tingkat abén telé ta po ya né se nópé. Kyat ta pópé né rcib i néya né, re nmóté. 10 Pocé bóngo Paulusé ntebé po ya se nóp bétbété lo né, néspóko móné mya njé, negbi i bóngo nécegé kyat ta pocé né, “Ma wlomi né kangelang na, npe gélesó pa.” 11 Wóré ga Paulusé npak néya um tingkaté lo né nmulé, pocé ga amé kfakpekte roti, kfatélolmo ta féléo i né ta Yesus re npe né, bóngo kfapelé wlu né se kémnómé mam. Pocé Paulusé nméiténé nmulé, sogado mélówé nfaysayné i né, tabóngo nfawasé i ga nfané. 12 Móné mya njé ga, kyaté né rfatebé i néli po ni umé lo, npe gélesó pa, se séngséngé bóto si.
Paulusé neé pnuw Troasé, bo nfan po pnuw Miletuse
13 Po pnuw Troasé né, amé ksaplo fenes isó, ksobélé bo ktubé néli po pnuw Asosé. Paulusé ga nkumél i, nlongéné ndé i po lewe. Se amé kéftón i po Asosé ta dolo i re nfaftóté né, bo am re i kfapsaplo be fenes isó. 14 Se ta amé kfakduk po Asosé né, ksaple i tabóngo ksobél néli po pnuw Metiléne. 15 Pocé amé ksobélé nóté, ni tómémóné né kéngóto wéf Khiose nkepyate, ni tómémóné né kwetés néli po wéf Samose, ni tómémóné nóté kwóm po pnuw Miletuse. 16 Paulusé ndodato nase ndotel pa ngénngan Pentakosta po Yerusalemé né. Se i wlo pa bo kémnuw po bótén Asia né, ta mulo ga ktilé po pnuw Efesus pana, mayta kfalow am po pnuw Miletuse. I nfabable bo ngénngané né nwómo i pafule, re i po Yerusalemé.
Paulusé nméiténé ndé penatua ta si po jemaat Efesusé né, ta si nase bo rfamnaw pana
17 Ta am po Miletuse lesu né, Paulusé nfaftóté néli po Efesusé, néceg faje, “Fécego penatua ta si po jemaat Efesusé né, bo si lima pote su”. 18 Si rwóm néli né, bóngo nméiténé ndé si faje, “Anik délut re faftén ta mewé. Ktolno mew ngané fis néli né, funé fié nik fénfan re téltoléné né, ta faiwóbno ya keteglo nimi bótén Asia né, sogado nte. 19 Ta ya kfafan Jou ni yabé né, ya kfamya wlegé nje, kfafané ni yabé né nuén téptipéné sogado nik yowéné ma ncelé. Masike kyat Yahudi né réyówé ya sogado bo rpuné keé ya ma, ni yabé né kfafané se kfafané le. 20 Ya kekenfasodoto mew po kyat ta félé usnori lo, re po nimi umé lo. Pocé ya kepino mew gélesó esó pa, mayta kéfétno mew farimé ta nase nfaféyfié mewé né. 21 Ya re kécego kyat Yahudi re kyat ta nésé-nésé né nóté, bo rngali si, rpólén si néli po Jou Lahatala ni, necé ga tagare rdélé ité rir Jou Yesus Kristusé.
22-23 Nte Jou ni Rohé njé nané ya kfan po Yerusalemé, masolo kfan néya nte, kuné pa kyat ta si pocé né nase bo rpe ya fawa? Ta ya kuné né, Jou ni Rohé re nfabingo ya po étné pnuwé ta ya ktilélo né, bo reyai néya Yerusalemé né, nase kkangelang re rfasung ya po bui lo. 24 Mayta gélesó pa, Jou ni Rohé re nané ya kfané se kfané le. Iga ya kmót pari tis, gélesó pa. Masolo nte, asal ta kfamamélao bo kfato nik yabé né ndimé, ta Jou Yesusé re nané ya né. Ya nik yabé né, ngénngan néya kfawómo be Habar ta Fié, né pai le ta ndélé Jou Yesusé, nase nduk salamaté. Necé ta Jou Lahatala ni féyfié re pélóy po it ni né.
25 Se nte ya bo kfané. Kfan ta nte né, ya kuné ya re mewé nase tfamnaw pana. Ya re kéfétno mewé, ta Jou Lahatala I bo ndadi kolano nkawasa kyat ta rdéréré I né. 26-27 Ta yai pote po mew ni né, ya kepino mew gélesó pa. Sói néli le ta Jou Lahatala nase bo npe né, re kéfétno mewé ndimé. Se ngénngan péséwé nte, pai re pai ta nfayal Jou pa, pote se néli i nase nduké nó, mayta mati ffasólo ya na, re kéfétno mewé se.
28 Se fpe mew fafié, fdélé be Jou Lahatala. Fajé nóté ffaménawé nimi kyat ta rdélé Jou né nóté, bo si ma rdélé Jou fié. Jou ni Rohé njé re nélóngé mewé, se ffaménawé nimi kyaté né fafié. Si mulori né pélóy tuwé, Jou Lahatala re npo ntu njé sogado nmóté, né maduga npólésé keé kyaté né róri sélsólé né, bo rdadi Jou ni kyat si. Ta ffaménawé si né, tfatailo dolo kyat isó nfamenaw re n-gaweney ni domba né fié. Mewé ma ffaménawé nimi kyaté né fafié, bo rdélé Jou ta fatuwé. 29 Se kfané nte né, ya re kuné, nganésó pa luwé kyat séfis néli nase rwóm po mewé ni, rfasungo mew méitén ta sólé né, bo mewé ma fdéréré Jou nóté na. Ta lé ta kyaté nesté nase rpe né, kfatailo si dolo haiwan ta rmasésro ta rcépoké róri mnómé né, réspóko nópé tabóngo ró róri. 30 Po mew ni nte ro néli-néli ma nase reni kyat séfis néli nóté ta bo rfafan méitén ta sólé né, bo ratélé kyat ta réréndéréré Jou Yesusé ni dodoto né néli bo rdéréré be si, ma rdéréré Jou nóté na. 31 Se fpe mewé fafié, ma flongé si na. Ffatélolmo mewé, re tahun nuén telé wlólo, dorém re ngénngané, kfasodoto mewé bo fatuw-fatuwé fdéréré Jou. Kfasodoto mewé né, nuén téptipéné kduk kangelangé, sogado nik yowéné ma ncelé.
32 Se nte kfan pafule, kpo mew néli po Jou Lahatala ni fao wlólo, bo nmésié re nfaménawé mewé. Jou ni féyfié re pélóy po it ni, ta mulo re tduk salamaté. Habar ta néi ya ma kéroré bo fdéréré keé, féfétno nimi délé nesté, nase nfakuat re nfaféyfié mewé. Bo sogado fpe ta néi, nase fduk Jou ni féyfié né, ta dolo I re néjaji I ni kyaté né ndimé. 33 Ta ya re mew pote né, nimi sói néli né mgo wleg ma tisé bo kéyó né. Nimi salaka pari, guraci pari, kabaya pari, necé wleg pa ndimé bo kyó niké né. 34 Mew ta nte re funé ndimé ta ya re nik délé né mamé né, né ya ro ta kpe yabé ga tagare kgoné. 35 Ta kpe yabé né, ya ro ta délé kewakse ya le. Sói néli ta ya kduké né, ken-gali kyat ta réfen gélesó pa né. Kpe ta néi, kfaftulo mew bo ftalko ya, bo mewé ma fgali kyat ta réfen pa né nóté. Necé ta dolo Jou Yesusé re nécegé né, ‘Tdo kyat pari, kyaté né rdo ité le pari, tai puai ta fié né? Ta fié né tdo kyaté, necé ga tagare séngséngé bóto ité”.