Kisah Para Rasul 18

Paulusé néfétén Jou Yesusé po pnuw Korintus

Rewóré ta néi, Paulusé neé pnuw Atena ga nfan po pnuw Korintuse. 2-3 Pocé reni kyat Yahudi isó ta i lima pnuw Pontuse, i ngósno né Akwila. Akwila ni dél pégelé njé ngósno Priskila. Si dórén luwé né tagare rwóm lima bótén Italia, sebabta Kolano Klaudius nfaungé kyat Yahudi ta rtolén pocé po pnuw Roma né. Paulusé i re Akwila riri yabé be esó le, haiwané ni liké ga rpeé terpale. Paulusé ndipén Akwila pocé, tabóngo ntolno ni si, riri yabé né be esó le se. 4 Pocé po Korintuse né, kyat Yahudi re kyat nésé ta si ma rdélé Jou Lahatala né, étné ngénngan sabtu rsambayangé. Se pocé Paulusé ncung néminé riri um sambayangé lo, néfétno si Jou Yesus fafié, bo kyat ta rdélé I pa ma rdélé I. Npe fajé né, étné be ngénngan sambayangé.

5 Silas i re Timotiusé rwóm lima bótén Makedonia né, pocé Paulusé re npe yabé nésé pana, maduga néfétén be Jou ni méiténé. I nfaftulo Kyat Yahudi né faje, “Yesusé njé fatuwé I ro ta Jou Lahatala néjaji it tatubé né, ta bo nfasélamat ité.” 6 Nópé ga kyat Yahudi nesté riri lé i, se rfakcegé i, “Co, kyaté njé, ga i ni malólé né!” Kyaté nesté rlongé Paulus pa, se Paulusé nfatetete ni kabaya né, bo nfatopo keé si. Ta nfan pafule né, bóngo nécegé si, “Mewé fdélé Jou Yesus pa, necé wóré ga mewé. Bo fduk sói néli, mati ffasólo ya na. Ya re kéfétno mewé, se ya késaén faoge. Ya nte bo kfané kéfétno kyat iglé nóté, kyat ta kyat Yahudi si pa né.”

7 Paulusé ncópén pocé kyat Yahudi né riri um sambayangé lo né, nfan néli po Titius Yustusé ni umé lo, nérakén um sambayangé njé. Titusé kyat Yahudi i pa, mayta re ncungé ni agama Yahudi, se i ma ndéréré nsambayangé. 8 Pocé fajé ma reni légaé isó nóté ngósno Krispuse. I kyat tut i po agama Yahudi né riri um sambayangé lo. Légaé ta njé nlongé Paulusé néfétén péséwé né, tabóngo ndélé Jou Yesusé, i re ni dél ta po ni umé wlólo né ndimé. Reni kyat Korintus félé nóté ta rlongé Paulusé néféténé né, se si ma tagare rdélé Jou Yesusé, se rbaptis si.

9 Dorém esó, Paulusé némnaw Jou Yesusé nwómo i, bóngo nécego i faje, “Ma mémtaté kyat na. Méféténé keé nik méiténé né fafié, ma mtébné na. 10 Sebabta ya nte kteptubo re kdéréré awé. Isó pa ta bo npun awé, sebabta po pnuw ta njei, aniké kyaté né félé.” 11 Rewóré ta néi, tabóngo Paulusé ntolén i pocé po pnuw Korintuse, ni mnuwo tahun nuéncó re spalé. Pocé i nfasodoto si Jou Lahatala ni méiténé, bo rdélé Jou Yesusé.

12 Ta Galio ndadi gubernur po bótén Akhaya né, pocé kyat Yahudi ta riri lé Paulusé né rfajólo si, rcérero Paulus néli se rgó i, ga rut i néli po légaé gubernure njé ni, bo nfaméteglo si. 13 Pocé bóngo rfabingo i, “Légaé ta njei nfaftulo kyat pote bo rfapélóy Jou Lahatala ngósno, mayta ta i nfaftulo né newetce keé ité rir hukum pemerintah Roma né.”

14 Pocé Paulusé bo nméiténé ga légaé gubernure njé nécegé kyat Yahudi nesté faje, “Ee, kyat Yahudi ta mewé. Kyat ta njéi npe gélesó pa, npe sól pa, npe ta lé pa. Bo ncólé, nase klongé mewé. 15 Mayta nte ffakotale be nimi méiténé né, ngósnomi, re nimi hukum agama Yahudi né. Se jolosi ga ffaifio mewé ro. Ya nte dolo bo kbusu ro bo kfaméteglo yabé ta dolo mewé fpe nte né.” 16 Tabóngo nfaungé keé si po ni umé lo. 17 Se kyaté nesté rcópén po gubernure njé ni um nétóo, ga rémnaw món isó ngósno Sosténése. Kyat ta nejéi kyat tut i nóté po agama Yahudi né riri um sembayangé lo. Néli rgó i ga rfanpuné i po légaé njé ni um nétóo né. Gubernure njé ga nfapida i.

Paulusé neé pnuw Korintuse, npólén i po pnuw Antiokhia

18 Paulusé ntolén po pnuw Korintuse né ngané fis néli nóté, rewóré ga bo npólén i po bótén Siria nmulé. Se pocé nfawasé i po ni dél ta rdéréré Jou Yesusé nesté ni, tabóngo ndé ni kyat ta bo rcobél po bótén Siria. Priskila re Akwila ma rdéréré i. Si rwóm nélaw po pnuw Kengkrea, pocé bóngo ta Paulusé re néjaji po Jou Lahatala ni né re nwómo i ro, se nkótélé keé ni uté né. 19 Si rcobélé né, sogado rwóm po pnuw Efesusé. Re rwóm po Efesusé né, Paulusé nfatolén Priskila i re Akwila pocé. Paulusé ga ncung némin po agama Yahudi né riri um sambayangé lo, néfétno si Jou Yesusé né fafié, bo kyat ta rdélé pa ma rdélé. 20 Kyat ta pocé né réror po i ni, “Paulusé, ma méléy su na, mtolno amé mnuw facuce su pa?” 21 Paulusé ga nfawasé i, nécegé si faje, “Lewlów su, bo kpe néli su. Iga Jou npo ya fié, nase kpólén ya lima pote nóté.” Pocé bóngo re neé pnuw Efesusé, ncaplo yel isó, bo ndé i néli po bótén Siria.

22 Yelé njé ndimé nélew po pnuw Kaisarea né, bóngo re Paulusé ntebé nélewé, ga nlongén néya po pnuw Yerusalemé. Néya ntilé ni dél ta rdélé Jou Yesus né, bóngo rfangsengo si. Rewóré ta néi, ga nfalów nóp po pnuw Antiokhia. 23 I ntolén pocé ngané fis néli, rewóré ga nfané nóté po pnuw re pnuw ta po bótén Galatia re bótén Frigia. I néjel bótén ta néi né, ntilé po kyaté-kyat ta réréndéréré Jou Yesusé ni dodoto né, nfasungo si méitén ta fié, bo si rbóng ta rdéréré Jou Yesusé.

Apolose néfétén Jou Yesusé po pnuw Efesusé re po pnuw Korintuse

24 Pocé po pnuw Efesusé reni Kyat Yahudi isó, ngósno né Apolose. I kyat Aleksandria i, tagare nwóm lima. Kyaté njé nuné Jou Lahatala ni Buké wlólo né fié, re nméiténé né ma nuné fié. 25 Kyaté né re rfaftulo i ndéréré Jou Yesusé, se re nuné fié. I ma ta délé wlo ncuka néfétén Jou Yesusé, maduga ta néfétén Jou Yesusé ni dodoto né, nfamwómo i pa. Ta i nuné né, nuné be Yohanes ta nbaptisé kyaté njé ni dodoto né. 26 Ngénngan ta né ro Apolos néfétno kyat po agama Yahudi né riri um sambayangé lo, néféténé keé ndimé, némtaté kyat pa. Pocé pégelé Priskila i re ni légaé njé ma rlongé i. Apolose nméitén rewóré ndimé, bóngo si rut i néli riri umé lo. Pocé bóngo rfaftulo i nóté bo nuné mare tdéréré Jou Yesusé ga tduk salamaté.

27-28 Pocé se néli Apolose nécegé bo ncobél néli po bótén Akhaya. I ni dél ta po Efesusé né rgali i, se rpo i surat isó bo nut i néli po riri dél ta réréndéréré Jou Yesusé ni dodoto po Akhaya né, bo nwómé né, rcéngé i re rlongé i fié. Se Apolose nwóm néli né, tabóngo kyat ta réréndéréré Jou Yesusé ni dodoto pocé né rcéngé i. Kyat ta nesté, Jou ni féyfié re pélóy po si ni, ta mulo re rduké riri salamaté. Pocé Apolos ta délé n-gali re n-gawene si fié. Ta i n-gali si né fan faje: pocé po Akhaya né, reni kyat Yahudi félé ta rdélé Jou Yesus pa. Se Apolose nfaptoblo ndé si cuci po kyat ta félé usnori lo. I néfétno si né fié, bo runé ta Jou Yesusé I yama Jou Lahatala ni. I ma nbaca ayat félé po Jou Lahatala ni Buké wlólo, bo runé ta Jou Yesusé, I ro ta Jou Lahatala néjaji it tatubé lima lesu, ta bo nfasélamat ité né.