Paulus i re Barnabasé réfétén Jou Yesus po pnuw Ikoniumé
14
Paulusé i re Barnabasé rwóm po pnuw Ikoniumé né, rcung némin agama Yahudi né riri um sambayangé lo, réfétén Jou Yesusé, ta dolo si re rpe po pnuw Antiokhia né. Pocé réfétno si fafié, tabóngo kyat Yahudi re kyat ta Yahudi si pa ma félé ta rdélé Jou Yesusé. 2 Mayta kyat Yahudi ta iglé né rdélé pa, se rfakcegé Paulusé i re Barnabas po kyat ta kyat Yahudi si pa né, tabóngo riri lé keé kyat ta rdélé Jou Yesusé né. 3 Se Paulusé i re Barnabasé rtolén pocé mnuwé, réfétno si Jou Yesusé né ma rémtat pa. Si réfétén ta, “Jou ni féyfié re pelóy po it ni. Bo tdélé I, masike rór sélsólé né félé, I nase nfayangésé keé ndimé, se nfasélamat ité.” Pocé Jou ma npo si kawasa bo kyat ta rpisé re setané ntolno si né ma rfafié si ndimé, re rpe nésé-nésé néli nóté ta kyaté né rémnaw pafule. Jou n-gali si rpe ta néi, bo kyaté né runé ta réfétén Jou ni méiténé né fatuwé ndimé. 4 Kyat po pnuw ta njéi ni rfagarangé, se ndadi i dirén luwé. Iglé né rdéréré kyat Yahudi nesté, ta iglé né ga rdéréré Paulus i re Barnabas ta rénut Jou Yesus ngósno né.5 Pocé bóngo kyat Yahudi nesté rfasogaro si re riri dél ta rdéréré si né, si re riri kyat tut ta rkawasa né, bóngo réceg ta, “Ta fié né, tfanpuné si re tpeo róri lóy pa?” 6 Mayta Paulusé i re Barnabasé runé si, bóngo rówés si néli po pnuw Listra re Derbe ta po bótén Likaonia, sogado rwóm néli po pnuwé pnuw ta rfakrakén pocé né. 7 Pocé si ma réfétén Habar ta Fié, né Jou Yesusé.
Paulus i re Barnabas po pnuw Listra re pnuw Derbe
8 Pocé fajé po pnuw Listra né, reni légaé isó sóo né yófé, nfatubo se. Nfané né ma néfen pa, sóo né kalélimé ndimé se. 9 Ta Paulusé nméiténé né, légaé njé néntolén i po li fajé, nfaméylóngé. Pocé Paulusé néngóto i, bóngo nuné i, “A, légaé ta njéi ndélé Jou fié né ga, se Jou nase nfafié i.” 10 Pocé bóngo Paulusé n-gélayé nécego i faje, “Légaé, mosél néya, mfamétegél aw pa?”. Ta néi ro, légaé njé nesbite i néya, ta nfan i néli re lima.
11-12 Kyat ta pocé né rémnaw ta Paulusé nfafié i né, bóngo re rgélay, “Alli, rir Légaé Hermes i re Légaé Zeus re rtebé yama se rcung si! Barnabasé, Légaé Zeuse ta ncung i. Paulusé ga Légaé Hermese ta ncung i, sebab i ta nmaméiténé.” Ta si récegé né, rmaLikaonia, se Paulusé i re Barnabasé rcae pa. 13 Pocé po riri agama lo né, reni légaé isó ta nénfaléflóngé po riri Légaé Zeuse ni fógélo, ta i po pnuw lapo lo né. I nlongé ta kyaté né récegé né, bóngo nuté ni sapi ta món si né néli. Sapi né nfafree si re bunga ta netuo re wólé, ga nut si po pnuwé njé ni isa ni ngówéné gbono lo. Pocé i re kyat ta félé né bo rfaléflóngé po Paulus i re Barnabas ni.
14 Paulus i re Barnabasé rlongé ta néi, ga télél si, ta délé wlori pa, se rfawgawsé keé riri kabaya né. Pocé rfawsówe kyaté né ta rcéreré si, sogado rcung némin kyat kawasa njé wlólo. Néminé, bóngo rgélayé, 15 “Alli, légaé ta mewé, matiné! Mati fsuba am na, fsuba be Jou Lahatala! Am ta ntei ma kyat ta dolo mewé né nóté. Amé kwóm lima nte, bo kéfétno mew Habar ta Fié, né Jou Yesusé. Se kécego mewé nte pa?, mati fsuba re ffaléflóngé po nimi légaé nesté ni nóté na. Wódól ta mewé fpeé nimi ffaléflóngé né, reni ngale facuci ma tisé. Se kécego mewé nte, bo fpóléné mew néli po Jou Lahatala ni. Isó nésé pa, maduga Jou Lahatala le. I ro ta ntulada langét re bétbété, wolét re ni wlólo né ndimé. 16 Tatubé lima, kyat farimé nae ta rdéréré be si wlori né, necé le ma Jou nfasól si pa. 17 Jou nfasól si pa né ma, nfaténténgén I pa. Tatubé lima lesu, I ni féyfié re pélóy po it ni, sebabta félé ta I re npo ité né. I npo it félfélé ta ntebé yama langété lo, i ma nfatubé rór téntónémé né, se pyono fié. I ma ndo ité mnómé sogado nbung ité, re I ma npo it wloné ta fié, se séngséngé bóto ité.” 18 Ta Paulusé néféténé né, nwóm lów ta né ro. Masike i néfétén ta necé ma rlongé i pa, kyaté nesté wlori ncuka bo rfaléflóngé riri le.
19 Pocé kyat Yahudi iglé rwóm lima pnuw Antiokhia re Ikonium. Kyat ta nesté rfakcegé Paulusé ecé po kyat Listra nesté ni, tabóngo rdéréré keé si. Pocé bóngo ryangét si, ga rfatéteé Paulusé sogado wlo myangésé, se récogoma re nmóté. Bóngo re si réyaysé i po pnuwé njé lapo, rfapelé keé i pocé. 20 Kyat ta réréndéréré Jou Yesusé ni dodoto né rfaljelé i lima, récogoma re nmóté. Tesib re télélé npangén i néya, bóngo npólén i néli pnuw njé ni nmulé. Ni tómémóné né, i re Barnabas rfan si néli po pnuw Derbe.
Paulusé i re Barnabasé rpólén si nmulé po pnuw Antiokhia
21 Néli pnuw Derbe né, Paulusé i re Barnabas réfétén Habar ta Fié, né Jou Yesusé. Pocé kyat félé rlongé si, tabóngo rdélé Jou Yesusé, rdéréré I ta fatuwé. Rewóré ta néi, Paulus ecé rpólén si néli po Listra, Ikonium, re Antiokhia. 22 Néli rdipéné riri dél ta nuéncó ta si re réfétno si Jou Yesusé né. Pocé bóngo rfakuat si wlori, récegé, “Fdéréré Jou Yesus ta fatuwé. Kyat ta rdélé I pa né, nase rpun it re rfakcegé ité, mayta gélesó pa, mati ftébné na. Sebabta mare fajé bo Jou ndadi rir kolano, nkawasa keé it ta tdélé I né.” 23 Pocé po jemaat-jemaat ta néi, Paulusé i re Barnabasé ma rélóngé riri penatua né. Rélóngé si né, rméitén rdé Jou re rcaumé. Rméiténé rdé Jou né, réceg faje, “Jou, kyaté nesté rdélé awé. Si bo rpe nim yabé né, bo rfaménawé nimé kyaté né. Se kéror po Aw ni né, mteptubo re mdéréré si, bo ta si rpe né fié ndimé”.
24 Rewóré ta néi, Paulusé i re Barnabasé rwetés néli bótén Pisidia, sogado rwóm po bótén Pamfilia. 25 Pocé bótén Pamfilia, po pnuw Perga, si réfétén Jou ni méiténé, bo kyaté né rdélé Jou Yesusé. Si réfétén rewóré, bóngo re rcópén nélaw po pnuw Atalia.
26 Pocé bóngo rcobélé, bo réléy si po pnuw Antiokhia. Po Antiokhia né, pocé óro ta faiwóbno Jou nané Paulus i re Barnabasé rfafané ni yabé né. Jemaat ta njé óro ta néftul si re réror po Jou Lahatala ni bo ntéptubo re ndéréré si po ni féyfié wlólo. Nte re rfawóré riri yabé né se réléyé ro. 27 Re rwóm po Antiokhia né, rfajólo jemaat ta pocé né, bóngo réfétén farimé ta Jou re n-gali si, rfafané ni yabé né. Si ma réfétén ta, “Kyat ta kyat Yahudi si pa ma, Jou re npo si fié bo rdélé I.” 28 Si rtolén pocé po Antiokhia né mnuwé, si re riri dél ta réréndéréré Jou Yesusé ni dodoto né.