Jou ni Rohé njé nané Barnabas i re Saulusé, bo rfafané ni yabé né
13
Po jemaat ta po Antiokhia né reni kyat ta rérénfawómo kyaté Jou ni faftóté, re kyat ta rérénfasodoto kyaté né. Si ngósnori né faje: Barnabasé, Simeon (ta rkakmé i “Béblaté”), Lukius (kyat Kirene), Menahem (kyat ta njéi, i re kolano Herodesé, rfapélóy si be po um aysó le) re Saulusé.2 Nuéncó si rcembayange re rcaumé ga, Jou ni Rohé njé nécego si, “Féftul re fané Barnabas i re Saulusé, bo rfafan yabé ta Ya re kécegé né”.
3 Rlongé ta néi, pocé ga rcaum re rméitén rdé Jou nóté, rewóré ga rétewlé faori néya po Barnabas re Saulus ni, réroré bo Jou nfaménawé si, re récego si, “Wóré ffané, ffafan Jou ni yabé ro”.
Barnabas i re Saulusé rfafané Jou ni yabé po wéf Siprus
4,9b Saulusé ni ngósén esó nóté, ta rkakmé i Paulusé. I re Barnabasé, Jou ni Rohé njé re nané si, se si rfan nélaw po pnuw Seleukia, ga rcobél néli po wéf Siprusé. 5 Pocé rdime nélew po pnuw Salamise, bóngo réfétén Jou Lahatala ni méitén po kyat Yahudi né riri um-um sambayangé lo né, bo rdélé Jou Yesusé. Yohanes Markuse ma ndéréré, bo nénen-gali si.
6-8 Si riri fénfané né po wéfé njé ni wómé ntit ta wómé, sogado rwóm po pnuw Pafose. Pocé reni kyat Yahudi isó, ngósno né Elimase, (bo rmaYunani né rkakmé i Baryesusé, i ni ngale né “nmape urémé”). Kyat ta njé nmape urémé. I nécegé cogo i ma Jou ni nénan ta nénénfawómo kyaté Jou ni faftóté, mayta ta i npe né nlól bóto. Ni kawasa né masolo nfawómé be Setané né.
Gubernur wéf Siprusé njé ma ntolén po pnuw ta njéi ni, i ngósno né Sergius Paulusé. I kyat isó ta nuné félé. Elimase ma nfaljil ndé ni. Nuéncó légaé gubernure njé nkakém Saulus i re Barnabasé, bo nlongé Jou Lahatala ni méiténé, bo i ma ndélé Jou Yesusé. Pocé ga Elimase wlo pa, bo ni délé njé ndéréré Jou Yesusé né, se nécego i, “Eh, wóré, mati mfaméylongé si na. Ta si récegé né, métegél pa ndimé.” 9 Mayta Jou ni Rohé njé nkawasa keé Paulus wlo njé, se i néngóto Elimase, bóngo nécegé i, 10 “Eh Elimase, ce, awé nte re mdadi kyat léo awé né, setané re ntolno awé se! Awé nte nim lé ta métegélé né. Mlól bóto, mfalélólé be kyaté né, ta délé re mmanéyé né ga! Jou Lahatala bo nfasélamate kyaté, nópé ga awé mpalte keé ni yéféné njé, ta délé renim téptébno pana! 11 Se nete awé nase mémnaw Jou ni péspésé né, I bo nfabyafe keé awé. Awé nase mémnaw ngénngané njé pa, sogado ngané fis néli wlólo”.
Ta né ro, mtó né pespós i, dérorémé njé ma nfamyeme keé i, se némnaw pana. Se pocé i nfasyafe kyaté né bo rtuda i, re nébyaf i se.
12 Gubernure njé némnaw ta néi, bóngo i ndélé Jou Yesusé, sebabta Jou ni dodoto ta néi nfatélel i.
Paulus i re Barnabas si po pnuw Antiokhia, ta po bótén Pisidia
13 Rewóré ta néi, Paulusé i re ni délé nesté rcópén po pnuw Pafose. Si rcobél néli po bótén isó ngósno Pamfilia, rdime nélew po pnuw isó ta ngósno Perga. Pocé ga Yohanes (ta ni ngósno esó nóté Markuse) nfatoléné keé si, ga npólén i po Yerusalemé. 14 Sié ga rcópén pocé po pnuw Perga né, ga rfan nélew po pnuw isó ngósno Antiokhia, ta po bótén Pisidia. Po ngénngan Sabtu ta kyat Yahudi né rérénsambayangé né, si rcung némin kyat Yahudi né riri um sambayangé lo né se réntolén si. 15 Pocé Kyaté né rbaca Jou Lahatala ni Buké njé, ta Musa i re Jou ni nénan ta tatubé rlefo né. Si rbaca né rewóré, bóngo kyat tut ta rpe yabé po um sambayang ta njé ni né, rané kyat néli Paulus ecé ni, récego si, “Fafténé ta mewé. Ma ga renimi dodoto cuci ta bo ffawómo amé. Se mew lima, bo féfétno amé ro.”
16 Se pocé Paulusé nosélé, nélóngé ni fao né néya bo kyaté né rfaténténgén si, bóngo nécegé si, “Nike kyat tut re faftén ta mewé. Ta it pote faje né, iglé kyat Israelé, iglé nóté kyat nésé ta fémtat Jou Lahatala. Ya kéror po mew ni, ffameylónge fafié. 17 Kyat Israelé rir Jou Lahatala, I ta npili rir gélé re gaé nesté, rdadi ni kyat si. Ta si po bótén Mesiré lesu né ma, nfaménawé si, sogado rbóng ta rfélé. Ta Jou ncópné si lima Mesiré né, pocé I ni kawasa ta délé pélóyé. 18 Si réjel néli re lima po lótelo né, tahun nuén yófé fóté wlólo. Masike rmakotalé ma, I nfaménawé si le. 19 Rewóré ta néi, nfabolito keé gélét abén fit ta po bótén Kanaané né, tabóngo néléyé ité rir gélé re gaé né néli po bótén ta néi, se nfanténé keé ndadi si riri ro. 20 Ta si rtolén po bótén Mesiré né, sogado réléy néli po bótén Kanaané né, nihale re bo tahun witén fót re yófé limé.
Rewóré ta néi, Jou Lahatala nélóngé wlón séfis néli, bo rérénfaméteglo riri bala re kawasa né. Pocé mnuw be néli, ga Jou ma néftule ni nénané isó nóté, ngósno né Samuelé. Samuelé ta njéi, i ta faiwóbno ta nénénfawómo Jou ni faftóté po kyaté né. 21 Rewóré ta néi, ité rir gélé re gaé kyat Israelé nesté réroré, ‘Samuelé, méftulé mam kolano faisó pa?’ Bóngo re Jou Lahatala npo si kolano isó, ngósno Saulé (légaé Kisy ntu i, ta i lima Légaé Benyamin ntu re gbu i). Saulé ndadi kolano pocé tahun nuén yófé fóté. 22 Jou Lahatala nésólé i rewóré, ta ga nélóngé kolano isó nóté, ngósno Daud. Bóngo Jou nécegé, ‘Ya re kémnaw i ro, Daudé, i kyat isó ta nfamégoe wlegé. Daudé, Isai ntu i, i nase npe farimé ta ya kané i né.’
23 Pocé se lima kolano Daudé ni ntu re gbu nesté, Jou Lahatala nélóngé kyat Israel ité nte né, rir kolano isó nóté. Kolano ta njéi ta bo nfasélamat ité, ta dolo I re néjaji tatubé né, ngósno né Yesusé. 24 Yesusé nfamdié ni yabé né pafule, Yohanesé nwómé ntubé po kyat Israelé né, nané si, ‘Fngali mewé fpólén mewé néli po Jou Lahatala ni, rewóré ga kbaptisé mewé’. 25 Ta Yohanesé ni yabé né re bo wóré né, i nutné re néfétno si, ‘Se ga mewé fécogoma ya nte pai? Mewé féftóné kyat ta Jou Lahatala re néjaji it tatubé njé, bo nfasélamat ité, mayta ya i pa. Ya nik yabé né rewóré ndimé, tagare I nwómé. Bo ya re kyat ta njé né, i néliw ya lówé, bo kgali késólé ni tarupa ni wólé né ma, kmóé ya’.
26 Nike délut re faftén ta mewé. Ta it pote faje né, iglé Abrahamé ni ntu re gbu ité, iglé nóté kyat nésé ta fémtat Jou Lahatala. Po it ni óro, Jou Lahatala re ntebo Yesus ta bo nfasélamat ité, ta njéi ro ité rir Habar ta Fié. 27 Ta Yesusé i pocé lesu né, kyat ta rtolén po Yerusalemé re riri kyat ta rkawasa si né, runé I pa, ta I ro, ta Jou Lahatala néjaji it tatubé, ta bo nfasélamat ité njé. Po Buké wlólo ma reni nóté, ta Jou ni nénané tatubé né rlefo réfétén Yesusé. Ta rlefo né, rbaca étné ngénngan sabtu po ité rir um sambayangé lo né, ga rcae facuci ma tisé. Se re nwómé, ga rfamóté keé I. Ta si rfamót I né, necé rfatuwo keé ta Jou ni nénan tatubé re rlefo né. 28 Masike si rduké nó sélsól pa ta bo rpun I né, si réror po Pilatus ni, bo rpuné keé I. 29 Pocé si rfanpuné i, rfaméymóy i, re ta nésé-nésé néli nóté sogado rfamóté keé I po salibé lo, ta dolo Jou ni nénané tatubé né re rfabingé ntubé po Jou ni Bukelo. Rewóré ndimé, rtebo i po salibé lo se nópé, ga rfabóyé keé i némin kuburé wlólo. 30 Mayta masike Yesusé re nmóté, Jou Lahatala nfapangéné keé i nmulé. 31 Yesusé npangéné rewóré, I nfaftulo ni diri ngané fis néli po ni délé nesté ni, ni dél ta i nmót pafule, si rérdéréré i po bótén Galalia se lima pnuw Yerusalemé. Ta I nmóté re npangéné né, kyat ta nesté si ta rémnawé né, se nesté si óro ta réfétén I po kyat Israelé nesté ni.
32 Se nte amé ma kéfétno mewé Habar ta Fié. Habar ta Fié ta néi fan faje: Tatubé Jou Lahatala néjaji po ité rir gélé re gaé nesté ni. 33 I néjaji si né, bo ntebo kyat isó ta ndadi kolano po it ni, bo nfasélamat ité né. Jaji ta njéi re nwómo ité ro, né Jou Yesus re nwómé, re nmóté, ga re npangéné nmulé! Necé, ta ndadi pafule né, Daudé re nfabingo ité ntubé ta bo ndadi i né, nlefo po Mazmur péluwé. Nfabingé ta Jou Lahatala nécego Yesusé, ni glio né faje,
‘Antig ta awé,
Ya re kfaftulo kyaté né,
ta Ya nte anim moke Ya.’
34 Jou Lahatala néceg fajé né, ni ngale né, Yesusé nase nmóté, mayta I bo nfapangén I nmulé, ni mayete njé ma némjakém pa. Ité tuné, sebab ta po ni Buké wlólo, I re nécego I faje,
‘Awé mmóté né,
Ya fatuw-fatuwé nase kfapangén awé nmulé,
sebabta tatubé Ya re kéjaji.
Ya re kéjaji Daudé ntu re gbu isó bo nmóté,
Ya ma kfapangén i nmulé.’
35 Fajé nóté, Kolano Daudé re nécego Jou Lahatala po Mazmur ayat ta nésé nóté:
‘Jou Lahatala, ya kmóté nte,
awé nase mpo ya fié pa,
bo nik mayete njé némjakém i,
sogado fajé néli le.
Ya kdéréré aw fié se.’
36-37 Ta Kolano Daudé nlefo né, néfétén i ni diri pa, mayta ta i néféténé né, néfétén Jou Yesus ta bo nmóté, ga npangéné nmulé. Sebabta Daudé npe ta Jou Lahatala nané i né rewóré, nmóté, tabóngo rput i nérakno ni wes re félbawé né, tagare ni mayete njé ma némjakém i. Mayta bo Yesusé, Jou Lahatala nfapangéné keé I, ni mayete njé ma némjakém pa.
38-39 Aniké kyat tuté, faftén re farémóné ta mewé. Sogado ya kéfétén ta Yesusé nmóté npangéné nmulé né, kécego mewé bo funé. Yesusé nmóté mayta re npangéné nmulé, I ro ta nfayangésé keé rór sélsólé né. Bo tdéréré be rir hukum agama Yahudi né, nase tkangelangé, sebabta rór sélsólé né nase sogado fajé néli le. Mayta bo tdélé Jou Yesusé, rór sélsólé né Jou nase nfayangésé keé. 40 Se ffaisno mewé fafié, ta kécego mew péséwé né. Sebabta bo fdélé I pa, ta Jou ni nénan tatubé rlefo né, nase mgo mewé, ta ni glio né faje:
41 ‘Mew ta ffaboyaboya Jou Lahatala ni méiténé né,
flongé nte su, nase ftélélé,
bóngo fmóté mewé.
Sebabta mew pocé lesu,
Ya nase kpe sói néli po usnomi lo.
Mayta masike kyaté réfétno mewé ta féléo ta kpe né,
nase fdélé pa,
se wóré mewé.’ ”
42 Paulusé néféténé rewóré, i re Barnabasé rcópén nétó um sambayangé lo né, ga kyat ta pocé né rérór po si ni, “Ngénngan sabtu ta tégbono i nje, mew lima bo tcembayange riré, bo féfétén ta néi nóté pa?” 43 Rewóré ta néi, kyat ta pocé né rcópéné, bóngo kyat félé rtéptubo Paulusé i re Barnabasé. Kyat ta nesté si kyat Yahudi re kyat nésé ta rcungé riri agama Yahudi. Pocé Paulusé i re Barnabas rpo kyat ta nesté méitén ta fié, récego si, “Jou Lahatala ni féyfié re pélóy po mew ni né, nfayangésé nómi sélsólé né. Se fdélé I óro, mati ftébné na.”
44 Ngénngan sabtu né re nwómo i, po pnuw ta njéi ni kyat cuci i pa ta rfajólo si néminé, bo rfaméylongé Jou Lahatala ni méiténé. 45 Kyat Yahudi ta iglé né ga rémnaw riri délé né félé rfajólo si néli, bóngo rtelengen si. Si rfakcegé Paulusé, “Cekede, Paulusé njé, i ni malólé né! Eh, ma flongé i na.”
46 Pocé ga Paulus i re Barnabasé rfakuaté wlori né, bóngo ta délé rbóng be réféténé, réceg ta, “Eh, Anik dél ta mewé, Jou Lahatala nané amé kéfétén I ni méitén po kyat Yahudi mew ni ntubé bo fdélé Jou Yesusé, mayta mewé nte flongé am pa. Pana fajé mewé wlomi ncuka pa bo fduk salamaté né, bo fduk ta fié sogado fajé néli né. Se wóré, nte amé kéfétno mew pana. Bo kfané kéfétno be kyat ta kyat Yahudi si pa né. 47 Sebabta Jou re nané amé né faje:
‘Ya re kéftul awé bo méfétén Ya
po kyat ta kyat Yahudi si pa,
bo kyat ta po bótén farimé,
po wómé ntit ta wómé,
rduk salamaté.
Pocé, kyat ta rdélé Ya né,
nase kfamenano keé wlori né ndimé.’”
48 Pocé kyat ta kyat Yahudi si pa né rlongé ta néi, bóngo re séngséngé bóto si, réréntail be Jou ni méiténé né, re rdélé Jou Yesusé se. Se kyat ta Jou re néftul si nesté, rdéréré keé riri Jou Yesusé, rduk ta fié sogado fajé néli né.
49 Bóngo re kyaté né réfétén Jou Lahatala ni méiténé né néli re lima, bo kyaté né famla rdélé Jou Yesusé. Si réféténé né, sogado rwóm po pnuw farimé ta po bótén ta njéi ni. 50 Po Antiokhia ma reni mépiné ta rcungé riri agama Yahudi, ta kyaté né rfayal si fié, re légaé séfis néli ta rkawasa po pnuw ta njéi. Pocé kyat Yahudi né rcawan Paulusé ecé, se rfatotaga re mépin re légaé nesté, bo riri lé Paulus i re Barnabasé. Si rfaméymóy re rfanpuné si, ta ga rfaungé keé si, bo rcópén po riri bóténé lo. 51 Pocé ga Paulus i re Barnabasé rfan si, bétbét ta natéf néli po sóori pópo lo né ma rfauto pa, rfatetete keé pocé ro, réceg ta, “Mewé nte flongé Jou ni dodoto pa, se wóré, kfan amé ro.” Se Paulusé i re Barnabasé rcópén pocé Antiokhia né, rfan néli pnuw Ikoniumé. 52 Mayta kyat ta réréndéréré Jou Yesusé ni dodoto po Antiokhia né, Jou ni Rohé njé nkawasa keé wlori né, se ta délé séngséngé bóto si.