Kisah Para Rasul 12

Kyat ta rdélé Jou Yesusé né, Herodesé ni lé si

Po ngénngan-ngénngan ta néi ma, Kolano Herodesé ta délé ni lé kyaté Kristéné né, se n-gó ta iglé né, nfasól si. 2 I npuné keé Yakobus, ta Yohanesé fténo njé, ntiplo i re yété. 3 Pocé Herodes némnaw ta i npe né, tabóngo nénuta, “Ta ya kpe nte, kyat Yahudi né rcéngé.” Se pocé nbóng ta n-gó Petrusé nóté. Necé mgo po ngénngan ta pélóyé, ta kyat Yahudi né ró roti ta reni ragi pa. 4 Herodesé n-gó Petrusé rewóré, nfasung i po bui lo, nénuta, “Tómésu ngénngan Paska re télapésé ga kut i néli po bala re kawasa nesté ni bo rfasól i.” I npo i po tentara yófésó re séwonémé, rfafaiwné si, sefót sefóté réjaga i. 5 Se Petrusé si re réjaga i po bui wlólo, mayta kyat ta po jemaat Yerusalemé né rfaténténgén si pa, rméiténé rde Jou Lahatala re wlori ta fatuw-fatuwé, réroré bo I n-gali Petrusé.

Jou ncópné Petrus po bui lo

6 Ni tómémóné né, Herodes bo nfatégbono Petrus po kyat kawasa né, bo nutné i. Mayta dorém ta njéi, Petrusé nyénéfé némtólé, re rfatépitno i rante abén luwé po faspalé luwé né, tentara si dórén luwé rfatapelune keé i. Tentara ta iglé né ga réjaga po tó ngówéné gbono. 7 Télél be Jou ni nénan isó yama soroga nosél i néya po Petrus lapo lo. Pocé bóngo Petrusé ni sele njé nménano ndimé. Nénané njé néspakél nóp po Petrusé ni ise lo, bóngo nécegé i, “Petrusé, mpangén néya, famla le!” Petrusé npangéné, bóngo rante né tefsal i po fao lo.

8 Pocé bóngo nénané njé nécego i, “Misno nim kebaya re nim tarupa né.” Petrusé nisno rewóré, bóngo nénané njé nécego i nóté, “Meyó anim juba njé pa? Mésnipo aw lima, re aw lima, bo tfan ité se.” 9 Pocé Petrusé ndéréré i nétó, maduga ta nénané njé npe né, Petrusé nuné wlo njé pa. I nécogoma nbélisé. 10 Si po miné se nétó né, rwetco tentara diréncó. Pocé rfatéfsal si nétó rwetco diréncó nóté, sogado rwómé ntóp isa besilo né, ta bo rcópén nétó pnuwé lo né. Pocé ga ngówéné njé ntepil i, bóngo rcópén si nétó. Rfan sogado rwóm po yéféné gbono lo, télél be nénané njé nfayangse i be nópé.

11 Pocé fajé, tabóngo Petrusé nduké wlo njé nmulé, bóngo néceg faje, “O, se nte fatuwé, Jou nané ni nénan isó yama soroga nfatéfsal ya po Herodes fao wlólo, re kyat Yahudi né riri ta lé ta bo rpe po ya ni né!”

12 I nénuta ta néi, bóngo nfan néli po Maria ni umé lo. Maria ta njéi, Yohanes ta rkakmé i Markuse ni Neke. Kyat félé ta rfajólo si pocé né, rénméiténé rdé Jou lesu. 13 Pocé ga Petrusé nwómé, ntok ngówén tai po tó njé, ga mépin isó ngósno Rode nlongé, se ncópén nétó bo népil ngówéné njé. 14 Ngówéné njé népil i pafule, ga nlongé Petrusé nkakémé, bóngo nfayalé gli njé. I ncéngé né ó?, sogado dolo bo nfakduko wlo pa. Se népil ngówéné njé pana, ncéreré néminé ga nfabingo si, “Eh, njé tó nte pa?, Petrusé!”

15 Si rcónglo, “Beé, ga awé nte mbébowé né ga!”

Mépiné njé nécegé si, “Eh, fatuwé, i ro njetó!”

Si rcónglo i nóté, “Eh, tisé, i pa. Njé nihale Jou ni nénané yama soroga ta néjaga i.”

16 Nte tó Petrusé ntok ngówéné njé, reni téptébno pa. Si rcópén nétó, bóngo répil ngówéné njé. Pocé ga rémnaw Petrusé, rtélélé se récegé, “Alli, se nje Petrusé né ga!” 17 Mayta, i nfagéwgiwé fao né bo rfaténténgén si. Pocé bóngo néfétno si ta Jou re nfasópén i po bui lo né. I néfétno si rewóré, bóngo nfaftóto si, “Féfétno Yakobus i re rir dél ta rdélé Jou Yesusé né nóté.” Rewóré ta néi, Petrusé nfan i po géwgów ta nésé.

18 Tómémóné ta néi, tentara ta si po bui lo né rfadéwao, se félé be gliri, rfatutno, “Fawa nte, Petrusé ga tiso i né?” 19 Kolano Herodesé ma nané kyaté réyówé Petrusé, ga rduk i pa. Se i nané kyaté né rutné tentara nesté, “Se ga Petrusé i pua?” Si rcónglo, “Ayo eh, amé kuné i pa”. Tabóngo nané kyaté rpuné keé tentara nesté.

Herodesé nduk pespes po Jou Lahatala ni

Rewóré ta néi, Herodesé neé bótén Yudea, nfan i nóp pnuw Kaisarea, ntolén i pocé. 20 Pocé Herodesé ta délé ncawané kyat ta po pnuw Tirus re Sidoné, sogado nané ni kyaté né, “Ndél pa bo fwago si mnómé nóté”. Kyat ta nesté si rkangelangé, se rfajólo si bo rfan néli po Herodes ni. Re rwóm néli, bóngo rfané régbono Herodesé ni kyat ta npélóyé njé ntubé, rbaja i sogado i ma wlo. Rewóré ga rfan po Herodes ni, réroré bo si re Herodesé rfaifio si.

21 Herodes re nécegé, “Fangané esó nase klongé kyat ta rkangelangé mnómé né”. Pocé ngénngan ta njé re nwómo i, se nefre i re ni juba ta fié, ga ntolné ni kawasa po ni karapesa ta némógé njé ni, bóngo nénénméiténé ndé si nópé. 22 Kyat ta rfaméylongé i né, réngégélayé né faje, “I nméiténé né, i ni fié né! Dolo kyat i pa, dolo Jou Lahatala i!” 23 Herodesé nlongé ta réréntail i né, i nétóf pa ta kyaté né récegé cogo i Jou Lahatala i né. Se pocé bóngo Jou ni nénan isó yama soroga npo i péspésé, se bela isó mgo i, ta gelate né ró róri i, se nmóté.

24 Pocé Jou Lahatala ni méiténé né, kyat ta ruté né rbóng ta terfasyape si, sogado kyat ta rlongé re rdéréré Jou Yesusé né ma nbóng ta félé.

25 Pocé Barnabas i re Saulusé rfatebé pipisé né po Yerusalemé né rewóré, tabóngo réléy si nóp Antiokhia, rut Yohanes ta rkakmé i Markuse njé, se i ma ndé ni si.