Kisah Para Rasul 10

Jou ni nénan isó yama soroga nwómo Kornelius po pnuw Kaisarea

Po pnuw Kaisarea né, reni légaé isó ngósno Korneliusé. Légaé ta nje tentara kompi esó riri kapala i. Riri kompi nje ngósno Italia. 2 Korneliusé, kyat Yahudi i pa, mayta i ndéréré Jou Lahatala fié. I némtat Jou Lahatala, se ngénngan néya i re ni dél po um wlólo né rfapélóy Jou ngósno né. I nmésié kyat Yahudi ta reriri reróri pa, se nénendo si pipisé. Étné be ngénngan re dorémé, nméiténé ndé Jou Lahatala.

3 Ngané esó, rakno tok nuén telé, télél be némnaw Jou Lahatala ni nénan isó yama soroga, ncung némin um wlólo, se nkakém i, “Korneliusé.”

4 Korneliusé néngóto Jou ni nénané njé, némtaté se nteróme, bóngo nécegé, “Alli, fan fawa Légaé, ta mwómo ya lima nte?”

Nénané njé ncónglo i, “Nim réror néya po Jou ni né, re nim féyfié po kyat ta reriri reróri pa né, Jou re nlongé re némnawé, se nfatélolmo awé. 5 Se nete, kané awé, mané kyat néli po pnuw Yope, bo ryó kyat isó ta ngósno Simoné, ta rkakmo i ‘Petrusé’. 6 I ntolno kyat isó ta ngósno Simoné nóté, ta ni yabé né nénfakéwelo haiwan liko. Ni umé njé i po wólét lapo.”

7 Nénané njé nméiténé rewóré, bóngo némyangés i. Pocé Kornelius nkakémé ni kyat séluw re ni tentara isó. Tentara njé ndélé Jou Lahatala fié. 8 Si lima, Korneliusé néfétno si sói ta nénané njé re nécego i né, bóngo nané si rfan néli Yope, bo réyó Petrusé.

9 Si dórén telé nesté rfané, mayta ngénngan ta néi rwóm Yope pafule. Ni tómémóné rfané nóté. Ngénngan nfapéluné né, si re rérakén pnuw Yope. Ta si réréntélmé Yope né, ntéli po Yope Petrusé npak néya po um pépo lo, nméiténé ndé Jou. 10 Nópé ga nbósémé ntélóté, se bo némnómé nó. Mnómé né nmósé pafule, se néftóné lesu, 11 télél be némnaw langate njé ntepówe, bóngo re némnaw dolo ngalép isó ta némsóye, rtebo i nóp po bétbété lo, ni sésun abén fótelo né dolo rtawlé néli re lima. 12 Po min ngalépé njé wlólo né, haiwan félé, nae ta usé: haiwan ta sóori abén fóté, haiwan ta rcaléyé, re mané ta ropé. 13 Pocé bóngo gégliné isó yama langatélo nkakémé, “Petrusé, mpangéné néya, mfatwetce haiwané né, bo mó namé se.”

14 Pocé ga Petrusé ncónglo i, “Alli, Jou, matiné! Haiwan ta néi, ya kekenó pa. Kyat Yahudi mam hukum re adaté né nécegé nece rmakékóné, se mati kó na.”

15 Gégliné njé yama nóté, nécegé ya, “Ta aw méceg kékóné né, Jou Lahatala nécegé kékóné pana, se mati méceg kékóné nóté na.” 16 Gégliné njé sogado nuén telé, bóngo ngalépé njé re i ni wlólo haiwané né térélóngé néya soroga nmulé.

17 Pocé Petrusé nénuta, “Ta péséwé né ni ngale sói, ta Jou Lahatala nfaftulo ya né?” I nénuta ta néi, ga kyat sétel ta Korneliusé nané si nesté rduk Simoné ni umé njé, se rénosél si po tó isa ni ngówéné gbono lo. 18 Rkakémé kyat ta pocé né, bóngo rutné si, “Kutné mew facuci. Kyat ta ngósno Simon Petrusé njé ntolén pote?”

19 Nteya po um pépo lo né, Petrusé nénuta ta némnaw péséwé né lesu, bóngo Jou Lahatala ni Rohé njé nécego i, “Kyat sételé réyówé awé nte. 20 Se mosél néya, famla mtebé nópé, bo mdé si néli. Masike kyat Yahudi si pa mémtat si na, mdé si ro. Ya ta kané si rwóm lima aw ni.”

21 Pocé bóngo Petrusé ntebé nópé, se nécegé kyat ta nesté faje, “Ya óro, ta mewé féyówé ya né. Se fpe sói, sogado fwóm lima nte?”

22 Tabóngo si rcónglo, “Reni tentara kompi esó riri kepala nje, ngósno Korneliusé. I nané am lima kkakém awé. Kyat ta njé wlo njé nmétegélé, re némtat Jou. Tagare kyat Yahudi né ma, wlori ncuka i ndimé. Ta taipesó néli né, Jou Lahatala ni nénané yama soroga nwómo i, pocé bóngo nané légaé njé nkakém awé. Necé ta mulo amé kkakém awé nte, bo tfan néli ni umé lo su. I bo nfaméylongé sói ta awé bo méfétno i né.”

23 Bóngo Petrusé nécego si, “Fsung tóma. Mewé ftolén pote ro. Fyénfé nimi dorém esó, mone ga tfané.”

Petrusé nfan po légaé Kornelius ni

I ni tómémóné né, Petrusé npangén néya, tabóngo i re Korneliusé ni kyaté nesté reé Yope, se rfan néli Kaisarea. Pocé kyat Yope séfis néli ta rdélé Jou Yesusé né ma rdé Petrusé.

24 Rfané riri ngané luwé, ta ga rwóm po pnuw Kaisarea. Ntéli, Kornelius re néftón si. I nkakémé ni fténo re rémó, re ni dél faljilé né, se rfajólo si po umé lo, réftón si pocé. 25 Pocé, Petrus ecé rwómé. Petrusé tagare bo ncung némin umé lo, Korneliusé nwetcé i nétó, se néspók nópé ga ncuba i. 26 Pocé ga Petrusé nécegé i, “Mosél néya, mati msuba ya na. Ya ma kyat ta dolo awé le.” Bóngo nétané po fao lo, se nfaosél i néya.

27 Petrusé nméitén ndé Korneliusé, sogado rcung némin umé wlólo. Néminé, némnawé kyaté né félé re rfajólé. 28 Pocé bóngo i nécego si, “Nik délut, faftén re farémóné ta mewé. Mewé re funé, bo ya kdéréré amam adat Yahudi né, nase kwómo mew pa, sebabta kyat Yahudi mew pa, mam adaté né nécegé cogo mewé nte fmakékóné. Kfambóngo am re kyat ta kyat Yahudi si pa né, ndadi i pa. Mayta, Jou Lahatala ta ga nfaftulo ya, mati kéceg fmakékóné nóté na. 29 Se ta mulo mewé fyó ya né, ya ma kétóf pa, mayta kdéréré mewé se kwómé. Nete, ya re kwómé. Se kutné mew pa? Fkakém ya lima nte, bo fpe sói?”

30 Tabóngo Kornelius ncónglo i faje, “Ngané tel ta re télapésé né, mérim ta dolo ité téntoléné nte, ya kméiténé kdé Jou Lahatala po nik umé lo, ta tok nuén telé né ta dolo kyat Yahudi mewé féfénsambayangé né. Ta ya kénméiténé kdé Jou né, télél be ga kyat isó nosél néya po usnogé lo, ni kebaya njé n-geglewe. 31 I nécego ya, ‘Korneliusé, anim réror néya po Jou Lahatala ni né, I re nlongé. Nim féyfié po kyat ta reriri reróri pa né ma, Jou re nlolmo awé. 32 Se nete, mané kyaté rfan néli po pnuw Yope, bo réyó kyat isó ngósno Simon Petrusé. I ntolno kyat isó ta ngósno Simoné nóté, ta ni yabé né nénfakéwelo haiwan liko, ni umé njé i po wólét lapo.’ 33 Se pocé ya kbablé kané kyat rfan néli réyó awé, rut aw lima. Anim féyfié re pélóy po am ni, re mwóm lima nte se. Ta amé kfajólo am pote faje, amé kuné ta Jou ma I pote. Amé nte bo kfaméylongé awé, bo klongé sói ta Jou Lahatala re nané aw mfabingo amé né.”

34 Pocé tabóngo Petrusé nméiténé ndé si faje, “Nik dél ta mewé, ya nte tagare kuné ta fatuw-fatuwé Jou Lahatala nmésié be kyat Yahudi am pa. 35 Mayta pai le ta némtat I re ndéréré ta I nané né, i ro ta nfamégoe Jou Lahatala wlo né, masike kyat pai le, po bótén pua le. 36 Mewé re flongé Habar ta Fié ta Jou Lahatala nfawómo kyat Israel amé né. Habar ta Fié ta néi, né I ro, Jou Yesus Kristusé. Bo tdélé I né, nase nfayangésé keé rór sélsólé né. Fajé bóngo Jou Lahatala ncawan it pana, Jou Yesusé re nféyfio ité se! Yesus ta njéi, I kyat Israel amam Jou I le pa, mayta farimé kyaté rir Jou I. 37 Mewé re flongé sói re sói ta Yesusé re npe né. Yohanesé nbaptisé kyaté né rewóré, pocé ga Yesusé nfafané ni yabé né po bótén Galilea, sogado kyat farimé po bótén Yudea ma rlongé ndimé. 38 Yesusé njé, Kyat Nazaret I. Jou Lahatala nané I yama, npo I ni Roh re kawasa né nóté. Pocé Yesusé nfan po pnuw re pnuwé, ngénngan néya npe be ta fié, re nfafié kyat farimé ta gwó re setan nfarwae si, sebabta Jou Lahatala ntéptubo re ndéréré I. 39 Amé dórén yófésó re séluwé né kémnaw farimé ta I npe po Yerusalem re Yudea, se kéféténé. Ni wóré nópé, kyaté né résókté I po salibé lo se rfamóté keé i. 40 Mayta, masolo ngané telé le, Jou Lahatala nfapangén I nmulé, bóngo nfaftulo I 41 po am ni. Kyat ta iglé né ga rémnaw I pa, ta I re npangéné nmulé né. Masolo kyat am ta bo kéfétén I néli re lima né, am ta Jou Lahatala re npili amé se kémnaw I né. Ta I nmóté ga npangéné nmulé né, am ta nte ta kémnóm re kiném kdé I, se kéfétén ta amé re kémnawé né. 42 I nané amé kéfétno kyaté-kyaté né, ta Yesusé I ro ta Jou Lahatala nélóngé I bo nfaméteglo kyat ité. Masike kyat ta re rmót pari tmót pafule pari, nase néftul pai ta ndéréré I bo i re I sogado fajé néli le. I ma nase néftul pai ta ndéréré I pa né, nase nfasólé keé i. 43 Tatubé lima lesu, ta Jou Yesusé nwóm pafule né, Jou Lahatala ni nénané né ma re réfétén Jou Yesusé. Si re récegé, kyat pai le ta ndélé I né, Jou Lahatala nase nfayangésé keé nó sélsólé né, re ndélé Jou Yesusé se.”

Kyat ta kyat Yahudi si pa ma, Jou ni Rohé njé ncung si

44 Petrusé nméiténé ndé si lesu, pocé télél be Jou ni Roh njé ntebé yama, ga ncung po kyat farimé ta rfaméylongé Petrusé né, se nkawasa keé wlori né, 45-46 bóngo méitén ta runé pa ma ndadi runé, re rénfapélóy Jou Lahatala ngósno. Pocé fajé ma reni kyaté Yahudi ta rdéréré Petrus yama Yerusalemé. Si rémnaw Jou ni Rohé njé ntebé po kyat ta kyat Yahudi si pa, tabóngo récegé, “Tabeu, se kyat ta nesté ma Jou Lahatala npo si ni Rohé njé nóté né ga!” Tabóngo Petrusé néceg, 47 “Wóré fémnawé. Kyaté nesté, Jou ni Roh re ncung si dolo ité nte nóté! Se bo tbaptis si re wóé né, ndél pa bo isó nfaket si.” 48 Tabóngo Petrusé nané si, “Baptis mewé ro”. Pocé rbaptis si né, rut Yesus Kristus ngósno. Rewóré ta néi, si rané Petrusé ntolno si fangané fis néli.