Saulusé n-ngali i, ndéréré ni Jou Yesusé
9
Saulusé ni lé lesu kyat ta réréndéréré Jou Yesusé ni dodoto né. Nfakcegé si, nénéyówé bo npuné keé si. Nuéncó, i nfan po Imam ta npélóyé njé ni, 2 nécego i, “Légaé, ya nte bo kfan nóp po pnuw Damsyiké. Se faje. Kéror po aw ni, mpe nik surat kawasa faisó, bo kut i nóp po rir agama Yahudi né riri um sambayang ta pocé né. Bo re kwóm nópé, suraté njé nase kfaftulo riri kyat tuté né ntubé, rewóré ga rpo ya fié bo kfegegóe kyat ta rdéréré Yesusé ni dodoto po riri pnuwé lo né. Ya nase kfagegóé, i ni món pa i ni mépin pa, kfatpitné si, ga kut si yama Yerusalemé, bo mewé futné si bóngo ffasól si.”3 Saulusé nduk surat kawasa ta njéi bóngo nfané, ntélmé nóp Damsyiké. Re nérakén nópé, télél be ménano isó ncage yama langatélo, nfajel i néli re lima. 4 Saulusé némnap i nóp bétbété lo, bóngo nlongé gégliné esó yama langatélo, néceg ta, “Saulusé, mpe sói se ga nim lé Ya né, sogado mpuné keé niké kyat ta rdéréré Ya né!”
5 Saulusé ncónglo i, “Pai Awé, Jou?”
“Ya nte Yesusé. Awé re mfakangelang Ya, sebabta re mfakangelangé niké kyaté né. 6 Mayta wóré, mpangén óro, mfan néli pnuwé njé ni. Néli pnuwé lo, nase kyat isó bo nfabingo awé sói ta nase bo mpe né.”
7 Kyat ta rdéréré Saulusé né rlongé gégliné njé, mayta rémnaw isó pa se rtérómé.
8 Saulusé nosél néya, bóngo népilé mtó né, nópé ga némnaw gélesó pana. Se si rétané po fao lo, ga rtuda i néli Damsyiké. 9 Po ngané tel wlólo nébyaf i. Némnómé ma tisé, niném wóé ma tisé.
10 Pocé po pnuw Damsyiké, reni kyat isó ta nénéndéréré Jou Yesusé ni dodoto né, ngósno Ananiase. Pocé télél be Jou ni Rohé njé nwómo i, bóngo nkakém i, “Ananiase.”
Ananiase ncónglo i, “Jo, yai ta nte.”
11 Bóngo Jou nécego i, “Mosélé, mfan néli po Yudas ni, po yéfén ta rfangósén i ‘Nmelolen’. Néli, mutné si kyat isó ngósno Saulusé, kyat Tarsus i. Nte i nénméiténé ndé Ya. 12 Ya re kfaftulo i ta awé nase bo métewlé faomé né néya i ni bo i némnawé nmulé.”
13 Pocé ga Ananiase ncónglo I, “Alli, Jou, kyat ta njéi, nimé kyat ta si po Yerusalemé né ni lé si, iglé né nfanpuné keé si! Kyat félé ta récegé. 14 I lima nte bo nfagegóé kyat ta rdélé Awé, Jou, nut Imam ta rpélóyé né ngósnori!”
15 Jou nécego i, “Wóré, mfan néli le. Kyat ta njéi, Ya re kpili i ro. I ta bo néfétén Ya po kyat ta riri agama Yahudi né pa, re po riri kolano né nóté. I ma nase néfétén Ya po kyat Israelé né nóté. 16 Pote se néli, Ya nase kfaftulo i, bo i ndéréré Ya, nase kyat félé riri lé i se rfakangelang i nóté.”
17 Pocé bóngo Ananiase nfan néli, ncung némin po Yudasé ni um wlólo. I némnaw Saulusé, bóngo nétewlé fao né néya i ni, nécegé i, “Téno, Jou Yesusé nané yai lima nte. Taipesó néli ta mfan lima yéféné lo né, I ro ta nwómo awé njé. Nte I nané yai lima né, bo awé mémnawé nmulé, bóngo Jou Lahatala ni Rohé njé bo ncungé nkawasa keé wlemé njé.” 18 I nméiténé né rewóré, télél be Saulusé nbósém ta dolo iné ni wenwunfo nepike i po mtólo wlólo né mnap i nópé, bóngo némnawé nmulé. Pocé, Saulusé nosél néya, ta Ananiase nbaptis i. 19 Rewóré ta néi, némnómé nó, bóngo nkuaté nmulé.
Saulusé néfétén Jou Yesus po pnuw Damsyik
Saulusé ntolén pocé po pnuw Damsyiké né ngané fis néli nóté, ntolno kyat ta réréndéréré Jou Yesusé ni dodoto né. 20 Pocé nfaténténgén i pana, ngénngan néya ncung némin agama Yahudi né riri um sambayangé lo, néfétén ta, “Yesusé njé, fatuwé, Jou Lahatala ntu i.”
21 Farimé ta rfaméylongé i né, rfécego, “Alli! Kyat ta njé i ro! Po Yerusalemé né, kyat ta rdéréré Jou Yesusé né, i ni lé si ndimé, re nénénpun si. I yama nte, bo n-gó kyat iglé nóté, nut si néya po Yerusalemé, bo imam ta rpélóyé nesté rutné si né. Ga nte nut Yesus ngósno? Dolo bo tdélé i pa!”
22 Mayta Saulusé ntébné pa, nbóng ta néfétén Jou Yesusé. Nfaftulo Kyat Yahudi ta po Damsyiké né, bo runé ta fatuw-fatuwé Yesusé I ro ta Jou Lahatala re néjaji tatubé lima né. Saulusé néfétén Jou Yesusé sogado Kyat Yahudi né réfen i pana, se réceg gélesó pana.
23 Re nfano i ngané fis néli né, pocé ga kyat Yahudi ta iglé né rfasogaro si bo rpuné keé Saulusé. 24 Dorém re ngénngané réréntón i po isa ni ngówéné gbono, ta po pnuw wómo né. Pocé ga kyaté né rfabingo Saulusé, se re nuné. 25 Se dorém esó bóngo ni délé nesté rówsé i, mayta rdélé i po ngówén ta njé ni pa. Réfray i po wóré kyom ta pélóyé lo, rtebo i po isa ni faspalé, bóngo nówés i néya po pnuw Yerusalemé.
Saulusé nfambóngo i re kyat ta rénut Jou Yesus ngósno
26 Saulusé nfan néya Yerusalemé. I néya, bo nbóng kyat ta rénut Jou Yesus ngósno né, masolo si rémtat i, rfécego, “Dolo bo kdélé i pa, ta cogo i ndéréré Jou Yesusé ni dodoto né. Maga i lima nte bo nfagegóé ité ga npun ité nóté!”
27 Pocé, Barnabasé nut Saulus néli si ni, bóngo néfétno si faje, “Faftén ta mewé, Saulusé nje, re ndélé Jou Yesus ta fatuwé. Yesusé re nwómo i, ta i néntélmé pnuw Damsyiké, bóngo nané i nfafané ni yabé né. Po Damsyiké, Saulus ma nénéfétén Jou Yesus ngósno né, nénenmóé i pa.”
28 Rlongé ta néi, kyat ta rénut Jou Yesus ngósno nesté rémtat pana, se Saulusé nbóng si néli, bóngo ndéréré si néli re lima po Yerusalemé. 29 I néfétén Jou Yesusé né, nénenmóé i pa. I néfétno kyat Yahudi ta rmaYunani ta ni ngale nópé né faje, “Tatubé, Jou Lahatala néjaji kyat Yahudi ité bo ntebo kyat faisó, bo nfasélamat ité. I re nwómé ro, né Yesusé!”
Pocé ga si rdélé pa, se rfangsóngélé rdé i, réyówé bo rpuné keé i. 30 Jou ni kyat po Yerusalemé né rlongé ta néi, se rfatebé i nóp po pnuw Kaisarea, bo néléy po ni pnuw Tarsusé.
31 Saulusé re néléy po Tarsusé né, kyat ta rdélé Jou Yesus po bótén Yudea, po bótén Galilea, re po bótén Samaria né, isó nfarwae si pana, séngséngé bóto si. Kyaté né ma rbóng ta rdélé Jou, rémtat I ndimé. Jou ni Rohé njé ma nfakuat si wlori né, tabóngo kyaté né nbóng ma nbóng i ta rdélé Jou né.
Petrusé nfafié kyat isó ta nkaf po pnuw Lida
32 Petrusé nfané néflengéné kyat ta rdélé Jou Yesusé po pnuw re pnuwé. Nuéncó nfané neflengen kyat ta si po pnuw isó ngósno Lida. 33 Néli, món isó ngósno Eneas, nkafé. Ni tahun nuén walé wlólo, nénenbóy i be po róngét pépo lo. 34 Petrusé ndipén i bóngo nécego i, “Eneas, Yesus Kristusé nfafié awé nte. Mpangén óro. Mfakéwelo góome né.” Tabóngo i ma npangén i néya. 35 Farimé kyat ta rtolén po Lida re Sarone né, si rémnaw ta nkafé njé re nfié, tabóngo si ma rdélé Jou.
Petrusé nfapangén pégelé isó ta re nmóté
36 Po law fajé reni pnuw isó nóté ngósno Yope. Pocé reni mépin isó ta nénéndéréré Jou Yesusé ni dodoto né, i ngósno Tabita. (Ngósno né, bo tmaYunani, Dorkasé, ta i ni ngalé né, ‘manjangané’). Mépin ta njéi, po pnuwé wlólo né ni féyfié po kyaté né félé. I nénen-gali kyat ta reriri reróri pa né. 37 Po ngénngan ta néi i nlélété, bóngo nmóté. Kyaté né rfapsep i rewóré, rcib i rpaké i néya kamar isó ta i po ya. 38 Pocé, kyat ta réréndéréré Jou Yesusé ni dodoto po Yope né, rlongé Petrusé i po pnuw Lida, bóngo rfécego, “Nte Petrusé i ntelew po pnuw Lida. Se ta fié, tfaftóté i lama.” Bóngo rané kyat séluw nélewé rfayóle. Rfan nélewé né, rduk i bóngo récego i, “Légaé, am lema nte, kéyó awé. Famla mpe nélaw su, pégelé Tabita re nmóté se.”
39 Pocé ta Petrusé ndéréré si nélawé. I re nwómé nélawé, bóngo kyaté né rfaftulo i kamar isó ta nélik po ya, ta rfapelo Tabita ni mayete njé. I npak néya né, pocé mépin balo né félé. Mépiné nesté réjel i lima, riri yowéné né ma néncelé, bóngo récego i, “Légaé, Dorkasé wlo i ni féyfié né! Mémnaw amam juba re kebaya ta i néringé nte!” Bóngo rfaftulo i.
40 Pocé ga Petrusé nané si rcópéné ndimé. Re rcópéné ndimé, bóngo Petrusé nétig nópé nméiténé ndé Jou. Nméiténé rewóré, négiwé i néli néngóto métmóté njé, bóngo nkakém i, “Tabita, mpangéné.” Bóngo Tabita népilé mtó né. I némnaw Petrusé, tabóngo npangéné se ntoléné. 41 Pocé Petrusé nétané po fao lo, nfaosél i néya. Petrusé nkakémé kyat ta rdélé Jou Yesus re mépin balo né ndimé, bóngo nécego si, “Mew lima, bo fémnawé se. Tabita ta re nmóté njé, re npangéné nmulé!”