8
Stefanuse nmóté né, Saulusé ma nfauto fio.Saulusé nfakangelangé kyat ta rdélé Jou Yesusé né
1b-3 Kyat ta fatuw-fatuwé rdélé Jou Yesusé né rgawéné Stefanus sogado rput i nuéncó le. Rtangso i né rérén-gélayé. Ngénngan ta néi ro, ta Stefanuse re nmóté né, kyaté-kyat ta rdélé Jou Yesus po Yerusalemé né, étné be ngénngan rduk kangelang cuci i pa. Kyaté-kyat ta rdélé Jou Yesus pa né réyówé si, se rfatat si bo rdélé Jou Yesusé nóté na. Isó njé Saulusé, i ta délé néyówé yéfén sói le, bo nfakangelangé keé si. Ncung um re umé, nfasrósé i ni món pa i ni mépin pa, se nfasungé keé si po bui lo. Se ta rduk si pa né ga, farimé rówés si, nae ta msakori néli re lima po bótén Yudea re Samaria. Masolo kyat ta rénut Jou Yesus ngósno né ga rówés pa, si be po Yerusalemé.
Filipusé nfawómo Habar ta Fié, né néfétén be Jou Yesus nóp po pnuw Samaria
4-5 Kyat ta nae ta msakori nesté, rfan néli re lima né, rdipén pai le rfawómo i Jou ni méiténé, bo ndélé Jou Yesusé. Pocé ta rfawómo Jou ni méiténé né, isó ngósno Filipusé. I ma néfétén Jou ni méiténé ta dolo ni délé nesté nóté. I nfan nóp po pnuw isó ta po bótén Samaria, néfétno kyat ta pocé né. I néfétno si né faje, “Jou Yesusé, I ro, ta Jou Lahatala néjaji it tatubé lima njé. I re nwómé! Se fdélé I, bo nfasélamate mewé!” 6-7 Pocé reni kyat félé ta setané ntolno keé wlori wlólo né, se nfasópéné keé si. Rcópéné né, rgélayé, “Beé, ga mfamót ya né ga.” Kyat ta rkaf re kyat ta rfané né métegél pa, i nfafié si ndimé se rfané né re métegélé. Farimé ta i npe né, i néror be néya po Jou ni, ta ndadi i. Se kyaté né runé ta ni kawasa né yama Jou Lahatala ni ndimé, ta mulo rfaténténgén si ndimé, ta délé rfaméylongé i fafié. 8 Se kyat ta po pnuw ta njé ni né, séngséngé bóto si.
9 Po pnuw ta njéi ma, reni kyat isó ngósno Simoné. Kyat ta njé nmape urémé. I nó urémé né, kyat Samaria né ta délé rfawgiwé si le, cogo nó urémé né ndé i se. Bóngo i ntail i ni diri, nécegé cogo né i ro. 10 Kyat farimé po pnuw ta njéi, kyat ta mya re kyat ta pélóyé ma, wlori ncuka i ndimé, se récegé, “Alli, nihalé Jou Lahatala ni kawasa ta pélóyé re ntebé po i ni!” 11 Re mnuwé ro i npe nó urém ta néi, se kyaté né dolo bo rfakduko si pana, ta délé rdélé i ndimé. 12 Mayta ta Filipusé nwómé né, néfétno si, ta ni ngale nópé né faje, “Jou Lahatala nase ndadi kolano nkawasa keé kyat ta rdélé I né. Jou Yesus Kristus nwóm yama it ni, bo nfasélamate ité.” Kyaté né rlongé ta néi, rdélé i, se récegé, “Jo, amé ma bo kdéréré Jou Yesus.” Se món re mépiné né si néli i ni, tabóngo Filipusé nbaptis si. 13 Pocé Simoné ma ndélé, sogado nbaptis i nóté. Nbaptis i rewóré, i ndéréré re ntéptubo be Filipus néli re lima. Néngóto ta Filipusé npe né, i nénuta, “Alli, Filipusé ma fié i le né ga! Nfafié kyat ta rpisé né nécegé le, ta rfié si! Setan ta po kyaté wlori lo né ma, nfasópéné keé ndimé!”
14-16 Pocé fajé kyat ta rénut Jou Yesus ngósno ta si po Yerusalemé né rlongé, ta kyat Samaria né ma re rdélé Jou Lahatala ni méiténé, né re rdélé Jou Yesusé. Se pocé bóngo rfécego, “Ta fié né, Petrus i re Yohanes rfan nópé, réflengéné kyaté nesté.” Pocé bóngo si dórén luwé né rfan nóp Samaria. Si rwóm nópé ga runé ta kyat Samaria nesté re rbaptis si, mayta Jou ni Rohé njé ntolno si pafule. Pocé bóngo Petrus i re Yohanesé rméitén rdé Jou, réroré, “Ya, Jou, kéror po Aw ni, mtebo Nim Rohé njé nóp po kyat ta re rdélé Awé nesté ni.” 17 Pocé rétewlé faori po si ni, bóngo Jou ni Rohé njé ncung si.
18 Pocé Simoné némnaw ta Jou ni Rohé njé ncungé kyat Samaria nesté né, bóngo nfano Petrus ecé se nécego si, “Ya, nimi pipis cuci nte, 19 bo nómi urémé né ffaftulo ya se. Bo ya ma, kpe dolo mewé nóté, kétewlé be faoge né néya kyaté né, bóngo Jou ni Rohé njé ncung si.”
20 Pocé ta Petrusé ncónglo i, “Beé, jolosi mmót awé né ga, re mfauto keé nim pipisé né! Ta Jou ni Rohé ntebo yama nte fié, nópé ga awé bo mtuklo re pipisé né! 21 Amé nte kfafan Jou ni yabé né. Se awé mati mbóng am na, sebabta wlemé njé nmétegél pa, necé Jou ma nuné. 23 Kémnaw awé nte dolo wlemé piso amé. Nam sélsólé né re nfadérorémé keé wlemé njé, se re nlé ndimé ro. 22 Sói ta méroré né ta délé lé, se mngali awé bo mpe nóté na. Nte méroré bo Jou ma nfasólo aw na, ta méménuta né lé ndimé se.”
24 Pocé bóngo Simoné nécego Petrusé, “Ado, ma mlolahi ya na! Méror po Jou ni, bo ta féléo ta mécegé né ma mgo ya na!”
25 Petrus i re Yohanesé réfétno si ta féléo ta Yesus re n-gali si né, re réfétno si Jou ni méiténé né. Si réfétno si rewóré, bóngo réléy néya Yerusalemé. Rfan néya né, rtilé pnuw re pnuw ta po bótén Samaria, réfétno si Habar ta Fié, né Jou Yesusé.
Filipusé néfétén Jou Yesus po kyat Etiopia isó, kyat ta pélóy i
26 Filipusé néléy pafule, Jou ni nénan isó yama soroga nwómo i se nécego i, “Mfan nóp yéfén ta ntebé po Yerusalemé né, nduwen nélaw po pnuw Gaza, po Yéfén ta nbeklingéne njé ni.” 27 Tabóngo Filipusé nfan nóp yéfén ta njé ni. Pocé reni kyat Etiopia isó ncaplo ni bendi. Kyat ta njéi kyat ta pélóy i. Ni yabé né nétané kolano [mépin] po bótén Etiopia ni pipisé né ndimé. Kyat ta ncaplo ni bendi njé ndéréré ni agama Yahudi. I nsambayang po Yerusalemé, 28 se nfané nte bo néléy po ni bóténé lo. Ta nényómto yéféné njé, néntolén i bóngo nbaca Jou Lahatala ni Buké njé, ta i wlólo né Jou ni nénané Yesaya néfétén Yesusé. 29 Pocé Filipusé nduk i, bóngo Jou ni Rohé njé nécego Filipusé, “Filipusé, mfan néli mérakno i facuci.” 30-33 Tabóngo Filipusé nbable npe néli se nérakén i, pocé nfaméylongé i nbaca né. Ta i nbaca né, i ni glio né fanfaje,
‘Kyaté njé kfatailo i dolo domba
ta rtuda i néli bo réwetés i.
I dolo domba ta réwetésé ni plu né ma,
nfaténténgén I le,
néceg gélesó pa.
Kyaté né rfaméymóy I le.
Ta rpeo I néli né métegél pa ndimé.
I re ntu pa, pai ta bo néféténé I ntu re gbu né,
sebabta I re nmóté,
re tiso I po dunia wlólo nte.’
Pocé, bóngo Filipusé nutné i, “Légaé ta awé, msaé, ta mbaca né?”
Kyaté njé ncónglo i, “Eh, ksaé pa. Mare kyat ta rtebo ni ngale bo kuné. Se mpak yama, mtolén mdé ya facuci pa?”
34 Filipusé npak néya, bóngo kyat Etiopia njé nutné i, “Ta Jou ni nénané Yesaya néfétén i njé, i néfétén i ni diri pari pai?”
35 Pocé bóngo Filipusé nméiténé, ntebo ni ngale, i néfétno i né faje, “Domba ta néfétén I njé, Jou Yesusé.” 36 Ta si dórén luwé rérénfan po yéfén pepólo né, Filipusé nméiténé lesu. Pocé rwómo wóé isó, bóngo kyat Etiopia njé nécegé i, “Ah, wóé isó ta njópe nte! Bo téftón sói nóté? Nópé, bo mbaptis ya ro pa?”
37 Filipusé ncónglo i, “Iya, kbaptisé awé né ga, asal ta mdélé Jou Yesus ta fatuwé.”
“Jo, ya kdélé Jou Yesus ta fatuwé, I Jou Lahatala ntu i.”
38 Pocé, kyaté njé nfatóyné ni bendi njé, si dórén luwé né rtebé nóp wóé lo, bóngo Filipus nbaptis i. 39 Nbaptis i rewóré, régafet si néya, télél be Filipusé, Jou ni Rohé njé nélóngé keé i. Se kyat Etiopia njé némnaw i pana, bóngo ncaplo bendi njé nmulé, nfan i né séngséngé bóto i. 40 Filipusé ga ncópén po pnuw isó ngósno Asdode. Pocé bóngo nfané ntilé pnuw re pnuwé, néfétén Habar ta Fié, né Jou Yesusé, sogado nwóm po pnuw Kaisarea.