26
Su Sembag ni Pablo di Gedapan ni Agripa
1 Miktaluˈ si Agripa dini Pablo, “Naa mendadi, mesuˈat na meksembaga.” Tinggal dayun si Pablo sug baingkenen, mikpuun dayun sumbag. Kaliˈ pektaluˈ si Pablo,
2 “Uu Adiˈ Agripa! Gempia palad mekesembagu nandaw dini gedapan mu mekatag di kelaun dinangat nu nga getaw Judea dinaan, 3 kagina metaasi sinuunan mu dig betad mukaˈ di piglisuˈan nu getaw Judea. Mendadi penengiin ku diniˈa, kelelaat pektigel mu ki sembagu kini.
4 “Mendadi, misuunan nug launan getaw Judea su pigbetadu genat pa di kaikaˈayu, saanan ku ditu ngag betaˈan ku, sampay su dituunu na Jerusalem. 5 Saˈ mesaakan mu ilan, medengeg mu da siai sembag nilan, miniben na nilan suunay mukaˈ metakesiˈan nilan, saˈ sia mauyaˈan nilan, puˈ piksibaˈan ku gupia dunutay sug betad nu getaw Judea, sakupu nu pikumpungan Pariseo. 6 Mukaˈ nandaw, kini nau mikindeg, pegukumenu mekatag di kekpedatengu tu kenuud nu pinasad kiin nu Megbebayaˈ tu nga ginepuˈay ta. 7 Asa iin dademai pedetengen nu sepuluˈ buˈ duaˈ bansa nu getaw Israel, selian nilan mektamuy tu Megbebayaˈ gebii gendaw. Mendadi, uu Adiˈ, masiˈ getaw Judeai duminangat dinaan kini sabaˈ di kekpedatengu dun! 8 Naa, yamu ngag dumau dini, mauma dema ndiˈ amu metuudan dun puˈ petubuˈen puliˈ nu Megbebayaˈ su nga minatay?”
9 Laung padun ni Pablo, “Mendadi naan, duuni gendaw mituudanu dun puˈ melengas menamalu kumuntra dini Isus kiin getaw Nazaret. 10 Kaas piglegetan ku su nga sakupen ditu Jerusalem. Melaun piglegetawan nu Megbebayaˈ pinikutan ku, bigayanu pegbayaˈ nu nga kaunutan nug belian nu getaw Judea, mukaˈ saˈ inukuman ilan lagaˈ na ginaa nilan, sinanguˈu. 11 Tatapu ilan pemedasay dia nga simbaan, pisilutu ilan adun sia penampalaksaan nilan su kekpetuud nilan kia. Mibaga gupiai gangitu dinilan, kaas piglegetan ku ilan sampay di ngag lunsud tug lain benwa.”
Migukit si Pablo mekatag di Kesakupen dini Isus
(Ki nga Pinggulaula 9.1-19; 22.6-16)
12 Laung padun ni Pablo, “Maˈantu, minangayu ditug Damasco, pigwekilanu mukaˈ sinuguˈu nu nga kaunutan nug belian nu getaw Judea. 13 Mendadi, uu Adiˈ, benaˈ diaanu dalan miktui gendaw, tekaw mitiaganu tiag genat tug langit, medelag pa di gendaw. Mitiagan dun dadema su nga tendugu. 14 Dayun ami gelaˈ mibelilid diag lupaˈ, duuni midengegu tingeg pekabit dinaan di pikebitan nami nga getaw Judea, laungen, ‘Uu Saulo! Mauma dema peglegetan mau? Kig badas dinaan, libaneg diniˈa.’ 15 Kaliˈu pektaluˈ, ‘Taˈ taway dun iin?’ Sumimbag su Kaunutan, laungen, ‘Naan si Isus, ki peglegetan mu. 16 Dagid pegbuata, gindega. Puˈ mikpaitaˈu diniˈa kini adun tenduˈen ku yaˈa sesuguˈen ku. Mukaˈ pagid tenduˈen ku yaˈa mekpesuun di nga getaw tu kekpaitaˈu diniˈa nandaw dakus tu kekpaitaˈu diniˈa genat nandaw. 17 Guunen ku yaˈa tu kekpeleget diniˈa nu nga getaw Judea mesama su kanaˈ getaw Judea, puˈ suguˈen ku yaˈa mangay dinilan 18 puˈ adun paitaˈ mu dinilan su metuud, adun megawaˈ ilan di medelem dayun lumingay ilan tu metuud mukaˈ medelagan ilan dun, dakus megawaˈ ilan di gengkeman ni Satanas, lumingay ilan tu Megbebayaˈ. Pedesunen ilan dayun di salaˈ nilan pebian di kekpetuud nilan dinaan, dayun mpeduma ilan tu nga pinaas piglegetawan ku.’”
Migukit si Pablo mekatag dig Baalenen
19 Laung padun ni Pablo, “Naa saˈ maˈantu, uu Adiˈ Agripa, ndaˈu pemilasay ki pinitaˈ dinaan kia genat tug langit. 20 Mikpuunu dayun megukit diag Damasco, dayun genat itu, migukitu ditu Jerusalem mukaˈ ditu tibuuk benwa Judea sampay ditu nga kanaˈ getaw Judea. Inukitu dinilan puˈ subay meksikesuun ilan mukaˈ lumingay ilan tu Megbebayaˈ, dakus pembetaden nilan su mbantang di getaw miksikesuun. 21 Naa kiai puunanen, dinaapu nu getaw Judea ditug Balay Pengedapan tu Megbebayaˈ, petainu nilan sia. 22 Laak pigebanganu nu Megbebayaˈ sampay nandaw, kaas mikegindegu dini nandaw tumakesiˈ diniu nga metaas getaw mesama di gembabaˈ. Mukaˈ ki ginukitu kini nandaw, iin da gupia su ginukit nu nga pimuunan nu Megbebayaˈ dengantu kampuˈ ni Moises, su pisuun nilan pedaan puˈ mpenggulaula di maiben gendaw. 23 Laung nilan subay matay su Tinduˈ nu Megbebayaˈ Meglekaunutan, mukaˈ subay iini mauna metubuˈ puliˈ, adun petendayanen su nga getaw Judea mesama su nga kanaˈ getaw Judea, adun medelagan ita nu kegawenen dinita.”
24 Selian ni Pablo sumbag, migbeksay si Festo diniin, laungen, “Pablo, mibuˈang ka! Milebiani kektuˈun mu, kaas mibuˈang ka!”
25 Kaliˈ sembag si Pablo, “Uu pegbesaan Festo, kanaˈu mibuˈang! Ki pekteluˈen ku kini, minget metuud. 26 Si Adiˈ Agripa, misuunanen daig launanen kini, kaas ndaˈu medapaˈ megukit dun di gedapanen. Misuunan ku ndaˈiduni mileglud diniin, puˈ ndaˈ penggulaula di meleglud.” 27 Laung padun ni Pablo, “Uu Adiˈ Agripa, mikpetuuda ba tu nga sinulat nu nga pimuunan nu Megbebayaˈ dengantu? Aa, suunan ku mituudan ka dun!”
28 Suminaak si Agripa dini Pablo, “Aba, dedeliˈen mau sia baalay Kristianu?”
29 Kaliˈ sembag si Pablo, “Maiben saˈ medaliˈ, iini penengiin ku tu Megbebayaˈ, yaˈa Sir mukaˈ kig launan niu mekineeg dinaan dini nandaw, meksamasama ita sia sumakup dini Isus, asa naan laak salau da beluden!”
30 Mendadi, migbuat su gadiˈ mukaˈ su gubirnadur, sampay si Berenice mukaˈ su ngag duma nilan pegingkud. 31 Benaˈ mipalus ilan dia, migyagayaga ilan dayun, saladuaˈ miktaluˈ, “Ki getaw kiin, ndaˈi salaˈen lagaˈ na ginaanen atawaka pirisuun laak.” 32 Laung ni Agripa dini Festo, “Mesuˈat na sia beluyeni getaw kiin, saˈ kanaˈ da sia minengi ukumen ditu gedapan nu tampusan gadiˈ si Cesar.”