9
Su Kesakup ni Saulo dini Isus
(Ki nga Pinggulaula 22.6-16; 26.12-18)
1 Laak si Saulo kiin, penemalanen sidaˈay su nga sakup nu Kaunutan si Isus, pemetainen ilan sia. 2 Saˈ maˈnia, miditu si Saulo Tampusan Metaas Belian nu getaw Judea, minengi diniin sulat uitenen tu nga kaunutan di nga simbaan nu getaw Judea tug lunsud Damasco, adun saˈ duuni maitaˈen dia, sakup nug Bianan nu Kaunutan si Isus, daapenen sia libun laki, penguitenen dayun puliˈ ditu Jerusalem.
3 Naa mendadi kini si Saulo, saˈ sungu na mesebang diag lunsud Damasco kia, masiˈ mitiagan tekaw tiag genat tug langit. 4 Mibelilid diag lupaˈ si Saulo, mukaˈ duuni midengegen taluˈ, laungen, “Saulo! Mauma dema peglegetan mau?”
5 “Sir, taˈ taway dun ka?” sinaak ni Saulo.
Kaliˈ sembag su pektaluˈ kia, “Naan laˈa si Isus, su peglegetan mu. 6 Naa pegbuata, bundasa diag lunsud kia. Saˈ mateng ka, teluˈan ka dayun taˈ alanduni gempia baalen mu.”
7 Naa su nga tendug ni Saulo, tuminlen ilan, ndaˈ ilan pektaluˈtaluˈ, puˈ midengeg nilan ki tingeg kia, laak ndaˈi minitaˈ nilan. 8 Migbuat si Saulo, laak benaˈ mingmata, masiˈ ndiˈ mekengitaˈ. Kaas inulipit laak nu ngag dumanen mundas diag Damasco. 9 Telu gebii ndiˈ mekengitaˈ, ndaˈ na aan mukaˈ ndaˈ na inum.
10 Naa duuni sakup ni Isus diag Damasco, ngalanen si Ananias. Mendadi kini si Ananias, mikpaitaˈ gupia diniin su Kaunutan si Isus.
“Ananias!” sinabi ni Isus.
“Uu Kaunutan, keni dau,” laung ni Ananias.
11 Kaliˈ pektaluˈ si Isus diniin, “Pegbuata, angaya ditu karsada piningalan dun Su Melegdeng Karsada. Laaway mu dayun diag balay ni Judasi sala tawan getaw Tarso, ngalanen si Saulo. Puˈ iin, menenabi, 12 mukaˈ duuni pinitaˈ diniin nu Megbebayaˈ getaw sumiled dia suguden, ngalanen si Ananias, megdepen diniin adun mekengitaˈ puliˈ.”
13 Dagid kaliˈ sembag si Ananias, “Uu Kaunutan, melaun migukit dinaan mekatag dini Saulo kiin, pilaatanen daw gupia su piglegetawan mu ditu Jerusalem. 14 Mukaˈ bigayan daw nu nga kaunutan nug belian pegbayaˈen, daapenen sug launan mekpaingabang diniˈa.”
15 Dagid sumimbag su Kaunutan si Isus, “Panawa dema tuˈu tu niin, puˈ si Saulo kia, pimiliˈu mbaal sesuguˈen ku megukit mekatag dinaan tu nga kanaˈ getaw Judea, tu nga gadiˈ, sampay tu nga getaw Israel dadema. 16 Mukaˈ pagid paitaˈu pa diniin ki kelegenay mbiananen meksekat di kesakupen dinaan.”
17 Saˈ maˈnia, mipanaw dayun si Ananias. Benaˈ minateng mukaˈ sumiled diag balay kia, dipenanen dayun si Saulo. Miktaluˈ diniin si Ananias, “Uu Mimated Saulo, sinuguˈu nu Kaunutan si Isus, su mituaˈ diniˈa dia karsada su kepanaw mu dini. Naa, iini sinuguˈu niin medini niˈa, adun mekengitaˈa puliˈ, dakus pengepuˈan ka nug Balakat nu Megbebayaˈ.” 18 Mitekaw dayun mawaˈ ki mamaˈ gunap sedaˈ mitabun dia mata ni Saulo, mikengitaˈ puliˈ. Suminambut megbuat, mikpebunag dayun tubig. 19 Tubus itu minaan si Saulo, dayun mipuliˈ su sekegen.
Mingukit si Saulo tug Damasco
Mendadi genat itu migbebenwa si Saulo santaˈ gebii dia nga sakup ni Isus diag Damasco. 20 Miditu dayun nga simbaan nu getaw Judea, pingukiten dia puˈ si Isus, iin sug Bataˈ nu Megbebayaˈ.
21 Naa sug launan mikedengeg di taluˈ ni Saulo, misebuˈan ilan gupia, laung nilan, “Kanaˈ bain nu migleget gupia tu nga mekpaingabang dini Isus ditu Jerusalem? Mukaˈ kanaˈ baini midini dun, puˈ adun daapenen siai nga mikpetuud dini Isus, adun uitenen ditu gedapan nu nga kaunutan nug belian ta ditu Jerusalem?”
22 Dagid migdugang laaki ginuung ni Saulo megukit, kaas ndiˈ maulakan nu nga getaw Judea megbenwa diag Damasco. Pinepet dinilan ni Saulo puˈ si Isus, iin su Tinduˈ nu Megbebayaˈ Meglekaunutan.
23 Mendadi benaˈ santaˈ gebii, ki nga getaw Judea kini, mikpasad ilan petain nilan si Saulo. 24 Dagid duuni getaw mikpesuun dun dini Saulo. Naa gebii gendaw, pegingaten nu getaw Judea su nga gengaˈan nug lunsud Damasco, adun epaˈen nilan sia petayay si Saulo. 25 Laak dagid duuni gebii, kaliˈ pegleketau su nga sakup ni Saulo, iwit nilan iin tu gembagel dending nug lunsud kia, inisen nilan dig bukag, dayun nilan tentunay diag liu si Saulo.
Ditu Jerusalem si Saulo
26 Mendadi, minuliˈ na pelum ditu Jerusalem si Saulo, minampuˈ dayun sia dia nga sakup ni Isus. Dagid mendek ilan diniin, puˈ ndaˈ ilan metuuday dun puˈ suminakup nain dini Isus. 27 Dagid si Bernabe, suminugut dini Saulo. Iwit ni Bernabe si Saulo ditu nga peneligan ni Isus, inukiten dinilan su kekitaˈ ni Saulo ditu Kaunutan dia karsada, su kangayen kiin ditug Damasco. Inukit pagid ni Bernabe dinilan su kekabit nu Kaunutan diniin, sampay su kenibeluˈ ni Saulo mengukit mekatag dini Isus ditug Damasco. 28 Saˈ maˈnia, migduma si Saulo dia nga peneligan ni Isus dia Jerusalem. Minibeluˈ gupia si Saulo megukit mekatag di Kaunutan. 29 Dagid saˈ miglantugiˈ si Saulo di nga getaw Judea mektaluˈ pikebitan nu getaw Grecia, ilan kini, petain nilan sia si Saulo. 30 Benaˈ misuunan nu kepetedan sug delendeman nu getaw Judea kia, iwit nilan si Saulo tu Cesarea, dayun pibundas nilan peleguyay tu Tarso.
31 Maˈantu, su tibuuk pikumpungan nu nga sakup ni Isus, ndaˈ nai megleget dun dig liwagan Judea, Galilea, mukaˈ Samaria. Kagina pinguliksegan ilan nug Balakat nu Megbebayaˈ, migisegi sinuunan nilan di kekpetuud, minamal ilan megbasa tu Megbebayaˈ mukaˈ migdugang ilan.
Minangay tug Lida mukaˈ Jope si Pedro
32 Naa si Pedro, sabaˈen mengepitan tu nga sakup ni Isus di ngag lunsud, minateng diag Lida, mingumbelayan tu piglegetawan nu Megbebayaˈ dia. 33 Mendadi duuni mipekitaˈen getaw dia, ngalanen si Eneas, mipilung, walu taun ndaˈ siben pekegbuat diag belilidanen. 34 Kaliˈ pektaluˈ si Pedro diniin, “Naa Eneas, pauliˈan ka ni Isukristu. Pegbuata, pengikpesay muig belilidan mu kiin.” Dayun pegbuat si Eneas. 35 Naa su ngag launan getaw pegbenwa diag Lida mukaˈ di Saron, benaˈ minitaˈ nilan si Eneas mikepanaw na, miagak ilan dayun sumakup tu Kaunutan si Isus.
36 Naa duunig libun ditug lunsud Jope mikpetuud dini Isus, ngalanen si Tabita. (Di pikebitan nu getaw Grecia, si Dorcas, maˈananen gusa.) Kini si Tabita, pinemalanen pepianay su nga getaw, pegebanganen su nga pubri. 37 Mendadi mitaang dun, migladu si Tabita, dayun minatay. Benaˈ mitubus nu ngag dumanen ugasay, bitang nilan sug bangkayen di sugud diag ditaas. 38 Naa sug lunsud Jope kia, mesempel diag Lida. Mendadi benaˈ midengeg nu nga sakup dia Jope puˈ diag Lida si Pedro, suminuguˈ ilan duaˈ tawan, pimuun nilan dini Pedro, “Kelelaat pediniin ka nami deliˈ.” 39 Saˈ maˈnia, mingikpes si Pedro, migdunut tuˈu dinilan. Benaˈ minateng dia Jope, pibundas si Pedro dia sugud diag ditaas. Mikpungun dayun dini Pedro su kelaun balulibun. Pekelegenan ilan gupia, pinitaˈ nilan pagid dini Pedro su nga suub mukaˈ duma penepeten pimenaiˈ ni Tabita su tetubuˈ pa.
40 Mendadi, piawaˈ ni Pedro dia sugud sug launan getaw. Minginlulud dayun si Pedro menenabi. Benaˈ mitubus menenabi, liningay ni Pedro kig bangkay kia, kaliˈ peksabi, “Tabita, pegbuata!” Mingmata si Tabita. Minitaˈen si Pedro, dayun migbuat. 41 Inulagak ni Pedro megindeg. Dayun sebiay ni Pedro su nga kelaun mikpetuud kampuˈ nu ngag balulibun, pigwakilen dayun dinilan si Tabita, mitubuˈ na puliˈ. 42 Mileep dayun diag lunsud Jope su gukiten dun. Melaun dayun mikpetuud tu Kaunutan si Isus. 43 Si Pedro, migbebenwa pa santaˈ gebii dia Jope diag balay ni Simon, getaw meninaˈ panit.