10
Si Pedro mukaˈ si Cornelio
1 Naa duuni getaw tu Cesarea, ngalanen si Cornelio, kaunutan nu pikumpungan sundalu nu getaw Roma piningalan dun “Su Pikumpungan nu Getaw Italia.” 2 Kini si Cornelio, mikpetuud gupia tu Megbebayaˈ. Pia kanaˈ getaw Judea, migbasa tu Megbebayaˈ, sampay su nga gapenen. Tatapen pemegayay su nga getaw Judea, mukaˈ menamal menenabi tu Megbebayaˈ. 3 Mendadi duuni gendaw, ginengaˈ menaugi gendaw, duuni sesuguˈen nu Megbebayaˈ getaw langit pinitaˈ masiˈ nu Megbebayaˈ dini Cornelio, mituaˈ dia suguden. Kaliˈ peksabi su getaw langit, “Cornelio!”
4 Si Cornelio, tintengen su getaw langit, sabaˈ mindek gupia. Sinaaken diniin, “Sir, taˈi tuyuˈ mu sia dinaan?”
Kaliˈ sembag su getaw langit, “Su kenenabi mu mukaˈ sug betad mu memegay, tilimaˈ nu Megbebayaˈ, midelendema niin. 5 Mendadi, suguˈ mui sesuguˈen mu meditu Jope, adun uiten nilan puliˈ dinii sala tawan getaw, si Simon, sala ngalanen si Pedro. 6 Iin, migbebenwa diag balay nu sala Simon, getaw meninaˈ panit, dia geksid dagat sug balayen.”
7 Naa saˈ maˈnia, benaˈ migawaˈ dia su getaw langit, miksabi si Cornelio duaˈ tawan sesuguˈenen dakus sala tawani sundalu megilak diniin. Su sundalu, migbasa dadema tu Megbebayaˈ. 8 Naa benaˈ inukitan ilan ni Cornelio di mipenggulaula kia, sinuguˈen ilan tuˈu mangay ditu Jope.
9 Mendadi benaˈ di sala gendaw, saanan dia pailan dalan su nga sinuguˈ kia mukaˈ mesempel nailan tug lunsud Jope, kini si Pedro, minaik tu gatep menenabi, miktui gendaw. 10 Naa mukaˈ migutem na, mauyaˈanen sia maan. Laak selianen pa megelat gilak, pinitaˈ masiˈ nu Megbebayaˈ diniin maˈniin 11 mipukaˈ sug langit, duun dayuni mitentun dia gupiden maˈniin palas gembagel gumut miketan di paat buuk sunguten. 12 Bitang dia su kelaun gininisan metetubuˈ, sampay mamak mukaˈ manukmanuk. 13 Duun dayuni midengeg ni Pedro taluˈ, laungen, “Naa, Pedro, pegbuata, titiˈ mu ki sedaˈan mu, aan ka dayun!”
14 Dagid kaliˈ sembag si Pedro, “Pelai, uu Kaunutan! Ndaˈu mainsan aan dun, su melemuˈan ami dun sampay su ndiˈ nami maˈaan nga getaw Judea.”
15 Midengeg pa puliˈ ni Pedro su taluˈ, laungen, “Adin su tinaluˈ nu Megbebayaˈ mpia aanen, ndiˈ mu teluˈay ndiˈ mu maˈaan.” 16 Mendadi ki mipenggulaula kia, telu deksuˈ pa pauliˈay, dekag pa mibatun na puliˈ diag langit su gumut.
17 Mendadi selian ni Pedro melibuleng di gulugan nu pinitaˈ diniin kia, mibaangan na nu nga sinuguˈ ni Cornelio kia sug balay ni Simon, pegindeg nailan dia gengaˈanen. 18 Miksabi ilan dayun, sinaak nilan, “Diin ma pegbebenwa si Simon, sala ngalanen si Pedro?”
19 Naa segay ni Pedro megulug sia di pinitaˈ diniin kia, tiluˈan masiˈ iin nug Balakat nu Megbebayaˈ, laungen, “Pekineega! Duuni telu tawan getaw minateng, pekpenengaun ka nilan. 20 Pegbuata, penauga. Ndiˈa pegalangalang megdunut dinilan, puˈ naani suminuguˈ dinilan.” 21 Saˈ maˈnia, minaug dayun si Pedro, laungen ditu telu tawan kia, “Mabuˈ naani pekpenengaun niu. Taˈ mai tuyuˈ niu dinaan?”
22 Kaliˈ ilan sembag, “Sinuguˈ ami nu kaunutan nami si Cornelio. Si Cornelio kiin, mekesuun getaw. Pigbesaanen su Megbebayaˈ, mukaˈ inal dain dema nu kelaun getaw Judea. Naa, duuni sesuguˈen nu Megbebayaˈ getaw langit miktaluˈ diniin puˈ inggaten ka nami meditug balayen, puˈ adun medengegen ki gukiten mu.” 23 Saˈ maˈnia, piseled ilan ni Pedro, adun mektulug pailan dia gebii kia.
Naa benaˈ miglegendaw, mingikpes si Pedro, tumindug dayun dinilan mpanaw. Duun dademai nga getaw Jope migdunut dinilan, nga kepetedan nilan. Naa si Cornelio kia, saananen mekpedateng dinilan, inggateni ngag betaˈanen mukaˈ nga sambaten mekpungun diag balayen. 24 Benaˈ puliˈ gendaw, minateng si nga Pedro dia Cesarea. 25 Benaˈ sungu metulan diag balay si Pedro, sinungkak dayun ni Cornelio, miglaub si Cornelio dia gedapanen, luminuˈud dayun diniin. 26 Laak dagid inulagak ni Pedro, laungen diniin, “Pegindega, puˈ sama kilawan mau da laak.” 27 Selian nilan megabitabit, minundas si Pedro dia seled, minitaˈen su melaun getaw mipungun dia. 28 Kaliˈ pektaluˈ si Pedro dinilan, “Mendadi yamu nu nga getaw, suunan niu puˈ binandu diag betad dinami nu nga getaw Judea, lumamug tu getaw dig lain bansa atawaka mengumbelayan dun. Dagid pisuun na dinaan nu Megbebayaˈ, subay ndaˈi getaw pemilangen ku milemuˈan atawaka kanaˈ penembaˈen nu Megbebayaˈ.a 29 Kaas saˈ piangayu ni Cornelio, ndaˈu belibaday. Naa mendadi, uu Cornelio, saˈ maˈantu, taˈ mai tuyuˈ mu dinaan?”
30 Kaliˈ sembag si Cornelio, “Naa, paat gebii na nandaw genat kenenabiu diag balayu, ginengaˈ menaugi gendaw. Mendadi saanan ku menenabi, mitekaw duuni getaw mituaˈ di gedapan ku, tumiagi penepetenen, 31 miktaluˈ dinaan, ‘Cornelio! Tilimaˈ nu Megbebayaˈ su kenenabi mu, mukaˈ pingebeten su kepepia mu tu nga getaw. 32 Naa saˈ maˈantu, suguˈ mui getaw mangay ditu Jope, ditu ni Simon sala ngalanen si Pedro. Migbebenwa diag balay nu sala Simon, getaw meninaˈ panit dia geksid dagat.’ 33 Kaas iini miksabiu dun diniˈa ganam,” maaˈ laung pa ni Cornelio. “Naa milelaata dinaan, puˈ minangaya dini. Mendadi, dini nami gedapan nu Megbebayaˈ, ki tibuuk pikpungunan nami, adun kineegan nami su gikteb nu pitaluˈ nu Megbebayaˈ diniˈa.”
Su Pigwali ni Pedro
34 Mendadi, kaliˈ pektaluˈ si Pedro, “Aa naa, minget misuunan ku na, ndaˈig lingken petailen nu Megbebayaˈ. 35 Adin su megbasa diniin mukaˈ menggulaula melengas, pia taˈ bensaay dun, duaten iin nu Megbebayaˈ. 36 Mendadi, misuunan niu ki tinaluˈ nu Megbebayaˈ dinami nga getaw Israel, ki Gempia Petenday, ki kepeseksud di getaw tu Megbebayaˈ pebian dini Isukristu, su Kaunutan nu tibaˈan getaw. 37 Suunan niu puˈ dekag miktituluˈ si Juan mekatag di kekpebunag tubig, duuni mekesalebuˈ mipenggulaula diag liwagan Galilea sampay Judea. 38 Midengeg niu si Isus getaw Nazaret, sug bigayan nu Megbebayaˈ Balakaten mukaˈ ginuungen. Kini si Isus, lineepen su tibuuk benwa Judea, pipiananen su nga getaw mukaˈ pineguliˈanen su nga pilegetan nu Palin, puˈ ibangan iin nu Megbebayaˈ.”
39 Laung padun ni Pedro, “Mendadi, sug launan pinggulaula ni Isus dia Judea mukaˈ ditu Jerusalem, yamii miketakesiˈ dun. Dagid kini si Isus, pinatay nu nga getaw Judea, linansang nilan di kurus. 40 Benaˈ di ketelu endawen, pitubuˈ puliˈ iin, pitubuˈ nu Megbebayaˈ, mukaˈ pinitaˈ pa pagid nu Megbebayaˈ di getaw. 41 Ndaˈen paitaˈ di tibaˈan getaw, pinitaˈen laak di ngag daansamaˈ mipemiliˈen, saˈitada dinami nu nga miksalu dema diniin maan mukaˈ minum, su ketubuˈen puliˈ. 42 Yami demai sinuguˈen megukit dun ki Gempia Petenday tu nga getaw dakus megukit dun puˈ iini tinduˈ nu Megbebayaˈ mengukum ditu tibaˈan getaw tetubuˈ saˈ minatay. 43 Iin dademai tinakesiˈan nu kelaun pimuunan nu Megbebayaˈ dengantu, sinulat nilan ditu Misulat Taluˈen puˈ adin su mekpetuud dini Isus, pedesunen nu Megbebayaˈ su salaˈen, sabaˈ nu pegbayaˈ ni Isus.”
Pingepuˈan nug Balakat nu Megbebayaˈ su nga Kanaˈ Getaw Judea
44 Mendadi selian ni Pedro megukit, mitekaw pengepuˈay nug Balakat nu Megbebayaˈ ki kelaunan mikineeg di pitendayen kia. 45 Su nga getaw Judea mikpetuud dini Isus tumindug dini Pedro genat ditu Jope, misebuˈan ilan dun dayun, kagina ki kanaˈ getaw Judea, bigay dadema nu Megbebayaˈ dinilan pingepuˈan ilan nug Balakaten. 46 Puˈ midengeg nilan su nga kanaˈ getaw Judea kia, mipalin su pikebitan nilan, dakus inal nilan su Megbebayaˈ. Kaliˈ pektaluˈ si Pedro, 47 “Naa ki nga getaw kini, pingepuˈan nailan nug Balakat nu Megbebayaˈ, maaˈ dadema gupia dinita. Mendadi kagina maˈantu, duun bai mekebelibad dun, bunagan nailan tubig?” 48 Saˈ maˈnia, suminuguˈ dayun si Pedro, bunagan ilan tubig tuˈus di kesakup nilan dini Isukristu. Tubus itu, ginuut ni nga Cornelio si Pedro, ndiˈ pa deliˈ muliˈ di nga santaˈ gebii.