25
Minengi si Pablo Ukumen ni Cesar, su Tampusan Gadiˈ nu Getaw Roma
1 Naa kini si Festo, telu gebii genat di kaingkuden dia Cesarea, mipanaw dayun ditu Jerusalem. 2 Mendadi ki nga kaunutan nug belian mukaˈ ki ngag duma kaunutan nu getaw Judea, duminangat ilan dini Festo mekatag dini Pablo. Migubug ilan diniin, 3 miksaak ilan gimu, pateden sia si Pablo dia Jerusalem, puˈ duun puliˈig delendeman nilan, pengepaˈen pa nilan si Pablo petayay dig dalan. 4 Laak kaliˈ sembag si Festo, “Naa pegingaten na si Pablo di pirisuan ditu Cesarea, dayun naan, sunguu meditu. 5 Saˈ maˈnia, adin sug duuni pegbayaˈen diniu, melengas megdunut dinaan tugbeng ditu. Dayun saˈ duuni salaˈ nu getaw kiin, subay dia dengatay.”
6 Naa benaˈ labi na sala simana dia si Festo, tumigbeng puliˈ tu Cesarea. Mendadi benaˈ minateng dia, benaˈ migendaw, miningkud dia pengukuman si Festo, sinabinen dayun si Pablo. 7 Saˈ minateng dia si Pablo, migindeg dia peglidunganen ki nga getaw Judea kia minateng genat tu Jerusalem. Minamal ilan dayun dumangat diniin, laak ndaˈi petuˈusan nilan dun. 8 Dagid si Pablo, sumimbag, laungen, “Ndaˈu pemilas ditu Palinta nu getaw Judea, ndaˈ dau dema pekesalaˈ ditu Pengedapan tu Megbebayaˈ sampay ndaˈ pau padun pekesalaˈ ditu tampusan gadiˈ nu getaw Roma si Cesar.”
9 Laak dagid si Festo kini, peleliagenen sia su nga getaw Judea, kaas sinaaken dini Pablo, “Meliaga da gelinenig dangat diniˈa di gedapan ku ditu Jerusalem?”
10 Kaliˈ sembag si Pablo, “Dini nau pegindeg gedapan nu pengukuman ni Cesar, ki mbantang pengukuman dinaan. Suunan mu gupia, ndaˈiduni salaˈu di nga getaw Judea. 11 Saˈ pinenggiˈ pimilasu sug balaˈud atawaka mikesalaˈu lagaˈ na ginau, naa pia petain nau. Laak dagid saˈ ndaˈi metuuden kig dinangat nilan kini dinaan, naa ndaˈi mekegwakil dinaan dinilan.” Diksuˈ ni Pablo, “Mendadi, penengiin ku, ukumenu ditu gedapan ni Cesar.”
12 Mendadi kini si Festo, benaˈ migyagayaga ilan nu ngag limbangen, sumimbag dini Pablo, “Mendadi, pinengi mu ukumen ka ditu gedapan ni Cesar, dituun ka na tuˈu ukumay.”
Iwit si Pablo tu Gedapan ni nga Agripa mukaˈ Berenice
13 Tubus itu duuni santaˈ gebii, minateng dia Cesarea si Adiˈ Agripa mukaˈ si Berenice, minangay ilan megbasa tug begu gubirnadur, si Festo. 14 Naa mendadi benaˈ minibeniben ilan dia, inukitan ilan ni Festo mekatag dini Pablo. Kaliˈ pektaluˈ si Festo, “Duuni getaw binilin ni Felix kiin pinikutan dini. 15 Su ditu pau Jerusalem, dinangat iin nu nga kaunutan nug belian mukaˈ nu ngag duma kaunutan nu getaw Judea, pinengi nilan, ukumen ku sia. 16 Laak tinaluˈu dinilan puˈ kanaˈ betad ta getaw Roma, ki getaw dinangat, pegwakil ditu nga duminangat dun subay pegedapen pailan, adun mekesembag su dinangat. 17 Mendadi saˈ minateng ilan dini, ndaˈu lenganay. Saˈ migendaw, miningkudu dayun dia pengukuman, piangayu si Pablo. 18 Laung ku dun melaat gupiai gulaulanen, laak benaˈ migindeg su nga duminangat dun, ndaˈi mitaluˈ nilan salaˈen, 19 duun laaki piksisuˈan nilan mekatag dig danilan betad mukaˈ mekatag di getaw ngalanen si Isus, minatay na, laak dagid laung ni Pablo tetubuˈ. 20 Naa kagina ndiˈu metau mukum dun saˈ maˈantu, sinaaku dini Pablo saˈ liaganen gelinen ditu Jerusalem sug dangat. 21 Laak pinenginen, pegingaten pa, adun ukumen ni Cesar. Saˈ maˈantu, sinuguˈu pikutan pa dini si Pablo, sampay matengi kepatedu diniin ditu ni Cesar.”
22 Laung ni Agripa dini Festo, “Naan, mauyaˈan ku medengegu gupia ki taluˈ nu getaw kiin.”
“Naa lemaˈ, medengeg mu da,” simbag ni Festo.
23 Naa benaˈ migendaw, minateng na pelum si Agripa mukaˈ si Berenice. Migimakay ilan gupia, pigbesaan ilan gupia nu nga getaw selian nilan suled diag balay pengukuman. Dia dadema su nga kaunutan nu kelaun sundalu mukaˈ su nga metaas linekian dig lunsud kia. Mendadi benaˈ mipungun ilan, piangay ni Festo si Pablo. 24 Kaliˈ dayun pektaluˈ si Festo, “Uu Adiˈ Agripa mukaˈ launan niu nga mikpungun dinami dini, kini minitaˈ na niu ki getaw dinangat nug launan getaw Judea dini Cesarea mukaˈ ditu Jerusalem, beksain nilan puˈ kanaˈ na laung mbantang mektetubuˈ pa si Pablo kini dinig dibabaw lumbang. 25 Laak dagid danaan, ndaˈi misimaˈu salaˈen lagaˈ na ginaanen. Mendadi kagina pinenginen dengaten tu gedapan ni Cesar, delendeman ku, puiten ku tuˈu ditug Roma. 26 Laak dagid ndaˈiduni misuunan ku gempia sulaten ku ditu ni Cesar mekatag diniin. Mendadi yamu nga getaw mukaˈ labi na yaˈa, uu Adiˈ Agripa, kagina maˈantu, inatedu iin dini gedapan niu, adun saˈ mesaakan ta, duun nai gempiau sulaten metenday ditu ni Cesar. 27 Puˈ danaan, ndiˈ mesuˈat duuni pinikutan puitu ditu, subay pedumaan dadema puit sug dinangat dun.”