24
Dinangat nu nga Getaw Judea si Pablo
1 Genat itu benaˈ lima gebii, tumigbeng dia Cesarea su Tampusan Metaas Belian si Ananias, dumaneni nga kaunutan nu getaw Judea mukaˈ sala tawani gabugadu, ngalanen si Tertulo. Mendadi, benaˈ minadap ilan ditu gubirnadur si Felix, binukaˈ nilan dayun kig dangat nilan dini Pablo. 2 Benaˈ sinabi si Pablo, dinangat dayun ni Tertulo, kaliˈ pektaluˈ,
“Uu pegbesaan Felix! Melinaw gupiaig benwa nami nemun mikpuun di kelengas nu keguit mu tug benwa. Melaun dademai kepia mu di nasud nami. 3 Mendadi, liliag ami tu kelaun kepia mu kia, kaas mikpaladpalad ami diniˈa. 4 Naa adun ndiˈa melangan dinami kini, penengiin ku diniˈa, kelelaat kineegay mui taluˈ nami kini dedeliˈen nami taluˈ diniˈa. 5 Ki getaw kini, batik nami dun mekesasaw di nga getaw, pisamuken su nga getaw Judea di tibuuk lumbang, iin dadema su kaunutan di pikumpungan Nazareno kiin. 6 Naa benaˈ peglemuˈanen sia su Pengedapan tu Megbebayaˈ ditu Jerusalem, dinaap nami, [adun ukumen nami sia mekatag di Palinta nami. 7 Dagid mituaˈ su kaunutan nu kelaun sundalu, si Lisias, pinendegen patiˈ uiˈay dinami si Pablo kini. 8 Dayun sinuguˈ ni Lisias, madap diniˈa su nga duminangat dun]. Naa saˈ saakan mu, mesuunan mu gupia diniin sug launan puunan nug dangat nami kini diniin.” 9 Su nga getaw Judea, sinanguˈ da nilan dema kig dinangat kia dini Pablo, piglegintuud nilan gelaˈ.
Sumimbag si Pablo di Gedapan ni Felix
10 Mendadi kini si Pablo, tinduˈ na nu gubirnadur sumbag. Kaliˈ pektaluˈ si Pablo,
“Mendadi, uu pegbesaan Felix, liliagu sumbag diniˈa, puˈ suunan ku puˈ miniben ka meglegukum di nasud nami. 11 Naa melemu mu mesimaˈ su metuud, puˈ nandaw, sepuluˈ buˈ duaˈ gebii laak genat di kedituun ku Jerusalem adun mektamuy. 12 Naa ki nga getaw Judea kini, ndaˈu nilan maitaˈ meksual di getaw dia Pengedapan tu Megbebayaˈ, ndaˈu nilan dadema maitaˈ mekpesasaw tu nga getaw dia nga simbaan nilan, pia adin diag lunsud kia. 13 Mukaˈ padun ndiˈ nilan mpaitaˈ kig dangat nilan nandaw dinaan, ndaˈi petuˈusan nilan dun diniˈa. 14 Laak naan, engkenen ku gupia diniˈa, ndiˈu pegbuniini gikteb nu kektamuyu tu Megbebayaˈ piktamuy nu ginepuˈay nami, pektemuyen ku iin pebian dig Bianan piningalan dun nu nga getaw Judea kini su piksuayan betad. Asa mekpetuudu gusay dig launan Palinta nu Megbebayaˈ pisulaten dini Moises mukaˈ tu ngag duma pimuunanen dengantu. 15 Mendadi, kinii pedetengen ku tu Megbebayaˈ, metubuˈ puliˈ su nga getaw, su mekesuun sampay su mikesalaˈ, iin dadema su pedetengen nu nga getaw Judea kini. 16 Kagina maˈantu, gelaˈen ku namali ginau di ndaˈi kegbiksuˈu di gedapan nu Megbebayaˈ sampay di gedapan nu getaw.”
17 Pibundas gusay ni Pablo su taluˈen, “Mendadi, benaˈ duuni santaˈ taun, minuliˈu ditu Jerusalem adun uiten ku su kwarta gabangu tug bansau, mukaˈ adun mekanuu tu Megbebayaˈ. 18 Saanan ku dia, mitaanganu nu nga getaw Judea, mitubusu mekanu dia Pengedapan tu Megbebayaˈ, ndaˈi pinungun ku getaw mukaˈ ndaˈ dademai kesamuk. 19 Laak duuni getaw Judea genat tug Asia mikaitaˈ dinaan dia, melengas ilan siai dumangat dinaan di gedapan mu, saˈ pinenggiˈ duunig dangat nilan. 20 Atawaka ki nga getaw Judea kini, melengas teluˈen nilan su misimaˈ nilan sia salaˈu, su dinangatu nilan ditu gedapan nu Pikumpungan nu Metaas Gukum. 21 Mabuˈ iin laaki metuud, saanan ku megindeg dia gedapan nilan, minekegu mektaluˈ, laung ku, ‘Inukum niau nandaw sabaˈ kekpetuudu dun puˈ metubuˈ puliˈ su nga minatay.’”
22 Mendadi si Felix, linanganen dayun su gukumanen, puˈ duuni misuunanen mekatag dig Bianan kia. Laung ni Felix di nga getaw Judea kia, “Saˈ mateng na su kaunutan nu kelaun sundalu si Lisias, ukumen ku naig dinangat niu kini.” 23 Sinuguˈen dayun su kaunutan di sundalunen, ingaten pa nilan si Pablo, laak taang dun, peguaˈen da nilan, mukaˈ suangen dadema pegebangan si Pablo nu nga sambaten.
Minadap si Pablo dini Felix mukaˈ dini Drusila
24 Naa duuni santaˈ gebii, si Felix, mituaˈ na pelum dia, ilan nu sawanen si Drusila, getaw Judea. Piangay dayun ni Felix si Pablo, kineeganen dayun su tinaluˈ ni Pablo mekatag di kekpetuud dini Kristu Isus. 25 Dagid benaˈ duunig yaga ni Pablo mekatag di kekesuun mukaˈ tu kegbenaˈbenaˈ di gayak sampay mekatag di Gendaw nu Kengukum nu Megbebayaˈ di tibaˈan getaw, mindek si Felix, laungen dini Pablo, “Pegbuata na deliˈ. Sebiin ku da yaˈa saˈ ndaˈ nai kelangan ku.” 26 Sala pa delendeman ni Felix, ganguten dun sia lekaten ni Pablo kwarta sug lawasen, kaas tatapen sebiay megabitabit si Pablo.
27 Laak benaˈ mipapas naig duaˈ taun, suminukli pelum dini Felix gubirnadur si Porcio Festo. Saˈ migawaˈ si Felix, binilinen si Pablo dia pirisuan, kekpeleliagen tu nga getaw Judea.