23
1 Mendadi, kini si Pablo, pingenlenganen su nga Metaas Gukum kia, kaliˈ pektaluˈ dinilan, “Genat kaikaˈayu sampay nemun, ndaˈi pegbiksuˈan ku di gedapan nu Megbebayaˈ.” 2 Benaˈ midengeg nu Tampusan Metaas Belian, si Ananias, tinaluˈen dayun di nga sakupen pegindeg dia gupid ni Pablo, depiˈen nilan sug babaˈ ni Pablo. 3 Laung ni Pablo tu Metaas Belian, “Yaˈa kiin, tautawa da mekesuun, ukuman ka pa nu Megbebayaˈ! Mauma mingkuda kiin mengukum dinaan mekatag di Palinta ni Moises, asa yaˈa, mimilasa dun, puˈ pidapiˈ mau?”
4 Laung dayun nu nga getaw pegindeg dia gupid ni Pablo, “Penampalaksaan mu masiˈ ki Tampusan Metaas Belian?”
5 Kaliˈ sembag si Pablo, “Aw, yamu kepetedan ku, ndaˈu mesuunay puˈ iini Tampusan Metaas Belian. Puˈ sinulat ditu Misulat Taluˈ nu Megbebayaˈ, laung, ‘Subay ndiˈ mu tampalaksaan su kaunutan niu.’”
6 Mendadi misimaˈ ni Pablo puˈ sug duma getaw dia, Saduseo ilan, dakus duun dademai nga Pariseo. Minekeg dayun mektaluˈ si Pablo dinilan, “Yamu kepetedan ku getaw Israel! Naan, Pariseo mau, bataˈu dema Pariseo. Dayun nandaw, miukum niau pelum sabaˈ nu kekpedatengu dun puˈ metubuˈ puliˈ su nga minatay!”
7 Lemen laak mideksuˈ teluˈay ni Pablo, mimeksual dayun su nga Pariseo mukaˈ su nga Saduseo, miksimawiˈ su pikumpungan nilan kia. 8 (Puˈ su nga Saduseo, teluˈen nilan puˈ ndiˈ metubuˈ puliˈi getaw, mukaˈ ndiˈ nilan petuuden puˈ duuni sesuguˈen nu Megbebayaˈ getaw langit, sampay diwata. Laak sug launanen kia, mituudan dun gelaˈ su nga Pariseo.) 9 Mendadi, minamal dayuni kesasaw. Duuni nga mekpetuˈun di Misulat Palinta nu Megbebayaˈ migindeg dia gedapan nilan, Pariseo ilan. Miglegintuud ilan dayun, laung nilan, “Ki getaw kini, ndaˈiduni mesimaˈ nami salaˈen! Mabuˈ duun daani getaw langit atawaka diwata mikabit diniin!”
10 Milebian dayuni kesasaw nu nga getaw, mindek dayun su kaunutan nu kelaun sundalu, mbuus peksibintengan nilan si Pablo. Sinuguˈen dayuni nga sundalu menaug dia piktebenan getaw, adun uiˈen nilan dinilan si Pablo, eteden nilan puliˈ ditug balay nu nga sundalu.
11 Naa benaˈ migendaw, dayun miglegebii, su Kaunutan Megbebayaˈ, masiˈ migindeg dia gupid ni Pablo mukaˈ miktaluˈ diniin, laungen, “Ndiˈa mendek! Tuminakesiˈa dinaan dini Jerusalem, maˈnia dadema su ketakesiˈ mu ditu pagid Roma.”
Su Sabut Binesaan sia si Pablo
12 Naa benaˈ migendaw na pelum, duuni nga getaw Judea mikpungun, miksabut ilan, suminapa ilan tu Megbebayaˈ, ndiˈ daw ilan maan mukaˈ ndiˈ ilan minum, subay binesaan nilan pa si Pablo. 13 Kanaˈ da paat puluˈ tawan ilan ki miksabut kia. 14 Mendadi ilan kini, minadap ilan tu nga kaunutan nug belian dakus su ngag duma kaunutan nu getaw Judea, kaliˈ ilan pektaluˈ dinilan, “Suminapa ami tu Megbebayaˈ, ndiˈ nami inaman su gaan, taman ndiˈ nami mpatay si Pablo. 15 Mendadi, yamu kampuˈ nu Pikumpungan nu Metaas Gukum, melengas pemuun niu tu kaunutan nu kelaun sundalu nu nga getaw Roma, pateden diniu si Pablo. Pemuun niu diniin puˈ saakan niu daw si Pablo mekatag dig dangat diniin. Dagid dekag pa mesebang diniu si Pablo, yami kini, minuyaˈ nami mengapaˈ diniin petayay.”
16 Dagid duuni manak ni Pablo, bataˈ nu pateden libun, midengegen sug delendeman nilan kia pegepaˈen nilan si Pablo. Iin, miditu dayun balay nu nga sundalu, inukiten dayun dini Pablo. 17 Miksabi dayun si Pablo sala tawan sundalu, laungen dayun diniin, “Ated mui gembataˈ kini ditu kaunutan niu, puˈ duuni teluˈenen diniin.” 18 Kaliˈen egakay ditu kaunutan, laung nu sundalu, “Sinabiu ni Pablo, ki pinikutan kia, sinuguˈu niin uiten diniˈa ki gembataˈ kini, puˈ duun dawi teluˈenen diniˈa.”
19 Inulipit dayun nu kaunutan su gembataˈ kia, pisuayen di melayuˈlayuˈ, sinaaken dayun diniin, “Naa, alanduni teluˈen mu dinaan?”
20 Kaliˈ sembag su gembataˈ, “Su getaw Judea daw, miksabut ilan ubugen daw nilan diniˈa lemaˈ, si Pablo kiin, pated mu ditu gedapan nu Pikumpungan nu Metaas Gukum, puˈ tautau saakan pa nilan daw. 21 Laak kelelaat diniˈa daw, ndiˈ mu ilan petuuday, puˈ kanaˈ da paat puluˈ tawan ilan daw, mingandam ilan mengapaˈ dini Pablo. Suminapa ilan ndiˈ ilan maan mukaˈ ndiˈ ilan minum, gekteb ndiˈ pa nilan mpatay si Pablo. Naa minuyaˈ na daw ilan, pegelatan daw nilan laak su kesuguˈ mu dun.”
22 Piawaˈ dayun nu kaunutan su manak ni Pablo kia. Laak tinaluˈen pa diniin, “Ndaˈi ukitan mu dun, pia sala tawan, puˈ pisuunan mau dun kini.”
Pigwakil si Pablo tu Gubirnadur si Felix
23 Naa su kaunutan nu kelaun sundalu kia, miksabi duaˈ tawan sundalunen, kaliˈ dayun pektaluˈ dinilan, “Pepengandam niuig duaˈ gatus tawan sundalu adun mangay ilan tu Cesarea, duma nilani pitu puluˈ tawan sundalu sumakay kebayuˈ mukaˈ duaˈ gatusi meguit teliaman. Sekat amu buus medalemdalem nai gebii. 24 Andam da niu demai kebayuˈ sekayan ni Pablo, dayun ingat niu gupia iin, ated niu ditu ni Gubirnadur Felix.” 25 Suminulat dayun dini Felix su kaunutan sundalu, maˈniniˈ.
26 “Ditu niˈa, pegbesaan Gubirnadur Felix, naani mikpesulat diniˈa, si Claudio Lisias. Gempia gendaw diniˈa. 27 Mendadi ki getaw kini piwitu diniˈa, dinaap nu nga getaw Judea, dayun saˈ sungu nilan petayay, misepenan ku ilan. Naa pisuun dinaan puˈ sakup Roma iin, kaas piawiˈu di nga sundalu kia. 28 Piatedu dayun tu Pikumpungan nu nga Metaas Gukum nilan, adun mesuunan ku tantu sug dangat nilan diniin. 29 Naa misuunan ku dayun, ndaˈiduni salaˈ nu getaw kiin lagaˈ na ginaanen atawaka pirisuun laak. Kig dinangat nilan, masiˈ piglisuˈan nug danilan palinta. 30 Naa benaˈ pisuun dinaan puˈ duuni sabut nu getaw binesaan nilan sia si Pablo kiin, ndaˈu lenganay pated diniˈa iin, pimuun ku tu ngag dumangat dun, subay dengaten nilan di gedapan mu. Daal daitu.”
31 Mendadi, dinunutan dayun nu nga sundalu su sinuguˈ nu kaunutan nilan kia. Inated dayun nilan si Pablo tug Antipatris gebii kia. 32 Benaˈ migendaw na, su sala penunan sundalu laak mpanaw, miksimpuliˈ nailan tug balay nilan dia Jerusalem, binilin nilan su nga sundalu sumakay pelum di kebayuˈ, ilani mundas megated dini Pablo. 33 Benaˈ minateng ilan tu Cesarea, pigwakil nilan si Pablo ditu gubirnadur mukaˈ bigay nilan diniin su sulat kia. 34 Benaˈ mibasa nu gubirnadur, sinaakanen si Pablo saˈ taˈ prubinsyaay dunig daan benwanen. Benaˈ misuunanen puˈ daan benwanen su Cilicia, 35 laungen dini Pablo, “Kineegan ku ki sembag mu saˈ mateng su ngag duminangat diniˈa.” Sinuguˈen dayun pegingaten si Pablo tug balay nu gubirnadur si Herodes.