27
Sumikat si nga Pablo Pangay tug Roma, Sakup Italia
1 Naa benaˈ delendeman ni nga Festo pesekain ami pangay ditug Italia, si Pablo, ilan nu ngag duma pinikutan, pigwakil nilan di kaunutan nu sundalu. Ki kaunutan kini, ngalanen si Julio, piningalan dun su pikumpungan sundalunen, “Su Pikumpungan nu Tampusan Gadiˈ si Cesar.” 2 Saˈ maˈnia, suminakay ami dig bangkaˈ genat tug Adramito sungu meksekat pangay tu ngag lunsud dig benwa Asia. Mendadi, sumikat ami dayun, duma nami si Aristarco, getaw Macedonia, lunsuden su Tesalonica. 3 Naa benaˈ migendaw, minapit ami ditu Sidon. Lilaatan ni Julio kia si Pablo, bigayen mangay mengumbelayan ditu nga sambaten diag lunsud kia, adun ebangan nilan iin. 4 Minundas ami dayun meksakay ditu melimbengan nu puluˈ Cipre, puˈ misensung nami su genus. 5 Benaˈ duminipag ami tug dagat dia dapit Cilicia mukaˈ Panfilia, midepet ami tu Mira, sakup Licia. 6 Selian nami dia, mibaangan nu kaunutan sundaluig bangkaˈ genat tug Alejandria pangay tug Italia, pisakay ami dayun.
7 Naa duuni santaˈ gebii miksilegyaˈ ami mpanaw, mesumayaˈ gupiai kaigin nami, gusul dami mukaˈ mitandaˈ tu Nido. Benaˈ ndiˈ ami mekebundas sabaˈ metiktegi genus misensung nami, mikangay ami dia melimbengan nu puluˈ Creta, mibianan nami dayun su Piksuungan Salmon. 8 Melegen pa paduni kebundas nami, subay piangay nami tu gembabaw sug bangkaˈ, midepet ami dayun tug luguk dagat piningalan dun su Melengen Luguk, mesempel tug lunsud Lasea.
9 Naa kumalenged milangan nami gupia, mekebinasa saˈ mundas ami, puˈ minayan na su gendaw mekpuasa. Mendadi si Pablo, tinituluˈanen sia su ngag duma nami, laungen, 10 “Yamu nga kaunutan, misimaˈu puˈ saˈ mundas ita, duuni mesaitan dinita sampay melaun lulan mbeleng, dakus duun dinitai megbayaˈbayaˈ dun.” 11 Dagid piktalentenan nu kaunutan sundalu su tinaluˈ nu meguit tug bangkaˈ mukaˈ nu gapuˈen, batul nu tinaluˈ ni Pablo. 12 Naa kagina ndiˈ mpia bilinan barkuig luguk kia saˈ timpu metegdaw, melaun duma nami laung nilan melengas sukat nami, adun puluˈ medepet ami pa sia tu Fenicia, ditu ami dayun megbebenwa saanan nu timpu metegdaw. Puˈ ki Fenicia kia, luguk dia Creta, mitubang di sindepan.
Su Salindapak diag Laud
13 Mendadi, benaˈ suminambelsambeli genus genat di dapit gilidan nu gendaw, laung nilan dun mbaluy na sug delendeman nilan. Binatun nilan dayun su pundu mukaˈ sumikat ami, inabay nami su gembabaw di puluˈ Creta kia. 14 Dagid ndaˈ maiben, misagut ami metikteg gupia genus genat tug binuidan, piningalan dun, “Su Genus genat di Silangan.” 15 Misensung nug bangkaˈ nami su genus, ndiˈ nami dayun mekebundas, subay piuyun nami dayun di genus kig bangkaˈ. 16 Selian nami mian dia melimbengan nu maikaˈ puluˈ piningalan dun Cauda, binatun nilan sug buti pegbiglasen nug bangkaˈ, laak melegen gupia betunen. 17 Igbed nilan dayun tali kig bangkaˈ adun ndiˈ mbengkal, ikup nilan dayun sug layagen, puˈ mendek ilan mesenlad ditu gembabaw ditu dapit Libya. Sinulut nami dayun su genus. 18 Minamal mekiwangiwang kig bangkaˈ sabaˈ nu nga nabek. Kaliˈ pegendaw, kinulangan nilan su ngag lulan, linabuˈ nilan tug dagat. 19 Di ketelu endawen, kinulangan nilan padun lebuˈay diag dagat su pengimbaalan nug bangkaˈ. 20 Duun dayuni santaˈ gebii, ndaˈ maitaˈ su gendaw mukaˈ bitun, bigyuan ami gupia, kaas tigaˈwan, ndaˈidun nai pedetengen nami megawen ami.
21 Mendadi benaˈ miniben ndaˈ kaˈaan su nga getaw, kini si Pablo, minadap dinilan, kaliˈ pektaluˈ, “Yamu ngag dumau, melengas sia pituud niau, ndaˈ ita sia sekat genat ditu Creta, ndaˈidun siai mbeleng di nga pimetang ta mukaˈ ndaˈidun siai mesaitan. 22 Laak taluˈu diniu nandaw, gempiai ginaa niu! Puˈ ndaˈi sala tawan diniu matay, mbeleng su laak bangkaˈ. 23 Puˈ kagebii, duuni migindeg dia gupidu getaw langit sesuguˈen nu Megbebayaˈ, ki Kaunutan ku pektemuyen ku. 24 Miktaluˈ dinaan su getaw langit, laungen, ‘Ndiˈa mendek, Pablo! Puˈ subay madapa pa tu tampusan gadiˈ si Cesar. Puˈ bigay diniˈa nu Megbebayaˈ, megawen su kelaun tendug mu kia sumakay.’” 25 Laung pa ni Pablo, “Naa kagina maˈantu, gempia daani ginaa niu! Puˈ mituudanu tu Megbebayaˈ, menuud gupia ki pisuun dinaan kia. 26 Laak medeksaˈ ita di puluˈ.”
27 Mendadi benaˈ su kepaat puluˈ gebiinen, sinulut ami salindapak ditug dagat Mediteraneo. Benaˈ miginengaˈi gebii, pingantap nu nga sesuguˈen dig bangkaˈ kia, mesempel nami di geksid. 28 Tikad nilan dayuni kedalemen, duaˈ puluˈ depa. Benaˈ misiginsigin, sepuluˈ buˈ lima depa na laak. 29 Mindek ilan dayun mesuntuk ami dig batu, kaas miglabuˈ ilan paat buuk pundu dia gulinen. Pinenabi nilan dayun ki kesebang na nu gendaw. 30 Mikelaguy dayun sia su nga sesuguˈen dig bangkaˈ kia, pilusad nilan sug buti diag dagat, tautau lebuˈen nilani pundu diag dulungen. 31 Dagid laung ni Pablo ditu kaunutan sundalu mukaˈ tu nga sundalunen, “Ndiˈ amu megawen, subay bilinen ilan dinig bangkaˈ.” 32 Dekag pinutuk nu sundalu su nga tali dig buti, pilabuˈ nilan dayun diag dagat.
33 Naa benaˈ putiˈ delagay na, ginuut ni Pablo sug launan getaw bataˈ maan ilan, laungen, “Sepuluˈ buˈ paat gebii nandawi kegaliˈ niu tug benwa, ndaˈ pai kaˈaan niu. 34 Kaas penengiin ku diniu, bataˈ maan amu, adun mekesikad amu. Puˈ ndaˈi sebaluig buuk di gulu niu mbeleng.” 35 Tubusen teluˈay, minalap si Pablo pan, dayun mekpaladpalad tu Megbebayaˈ di gedapan nug launan nilan. Pimetanen su pan, dayun pekaan. 36 Mendadi sug launan dumanen, miamuˈamuˈ nailan, mikaˈaan ilan dayun dema. 37 Yami nga suminakay dig bangkaˈ kia, duaˈ gatus buˈ pitu puluˈ buˈ enem tawan ami. 38 Mendadi dekag ilan mibesug, bileng nilan su kelaun trigo, adun megaan sug bangkaˈ.
Su Kegebaˈ nug Bangkaˈ Sikayan ni nga Pablo
39 Mendadi kaliˈ pegendaw, su nga sesuguˈen kia dig bangkaˈ, ndaˈ nilan mailala sug benwa, laak minitaˈ nilanig luguk duuni pentadanen, delendeman nilan dayun, saˈ sia megaga nilan, dungguˈ ami dia. 40 Bileng nilan dayun diag dagat su nga pundu, dunut inubad nilan su tali iniket tug bensalan. Binatun nilan dayun sug layag diag dulung adun sembelen nu genus, miˈigin ami tuˈu pangay dia geksid. 41 Laak misenlad ami di gembabaw. Milebeng sug dulungen, ndiˈ dayun mekaigin. Misabaˈ dayun nu nabek su gulinen.
42 Kaliˈ pegleketau su nga sundalu, gelaˈen nilan sia petayay ki nga pinikutan kia, adun mbuus ndiˈ ilan lumanguy mekelaguy. 43 Laak dagid su kaunutan sundalu kia, mauyaˈanen ndiˈ matay si Pablo, kaas misagapaˈ ilan niin. Sinuguˈen su metau lumanguy, sumampak ilan diag dagat, dayun lumanguy ilan tu geksid. 44 Su ndiˈ metau lumanguy, sinuguˈen megabanan tu tabla mukaˈ tu peta nug bangkaˈ. Maˈantu, migelaˈ ami mesiket tu geksid, ndaˈi mikendun dun.