28
Su Kesiket ni nga Pablo dia Puluˈ Malta
1 Mendadi dekag ami misiket, misuunan nami dayun su ngalan nug benwa kia, Malta. 2 Su nga getaw dangen dia, mekesuun ilan gupia dinami. Mipenembaˈ ami nilan, mikpeleket ilan gapuy, puˈ minugdakig dupiˈ, metegdaw gupia.
3 Mendadi kini si Pablo, mingayu sebegbed, inuklaken tu gapuy. Duun dayuni mamak gumiwaˈ sabaˈ mainit, mingulibed di kemet ni Pablo. 4 Benaˈ minitaˈ nu nga getaw dangen dia, diadia miktaluˈ, “Aa, ki getaw kini, minget memunuˈan. Ndaˈ ma melaatay diag dagat, laak mbinasa dun ini, metibabaˈen.” 5 Dagid si Pablo, inikpigen su mamak, misegbu dayun tu gapuy, ndaˈ da pekendun dun si Pablo. 6 Pekpelaban dayun nu ngag dumanen, mengebag atawaka metigbak. Laak saˈ miniben na nilan pekpelabay mukaˈ ndaˈ gusay pekendun dun, mipalinig delendeman nilan, laung nilan dayun, “Masiˈ getaw kini, diwata!”
7 Naa su kaunutan di puluˈ kia, ngalanen si Publio, duunig lupaˈen mesempel di kisiketan nami kia. Pinembaˈen ami, pipiananen ami telu gebii diag balayen. 8 Mendadi su gamaˈ ni Publio, pegladu, ndiˈ mekegbuat sabaˈ mipanas mukaˈ migudu. Sumiled si Pablo tu sugud nu migladu, minenabi dayun megdepen diniin, piuliˈanen. 9 Dekag mipenggulaula, su kelaun migladu dia puluˈ kia, suminungkak ilan dini Pablo, migelaˈ ilan dayun mauliˈay. 10 Melaun dayuni pimegay nilan dinami, mukaˈ ki kesakay nami pelum genat dia, bitang nilan diag bangkaˈ nami sug launan sukat nami di kepanaw nami.
Minundas si nga Pablo ditug Roma
11 Benaˈ telu bulan pelum, suminakay ami puliˈ, sikayan namiig bangkaˈ genat tug Alejandria pitenlen dadema dia puluˈ kia mitaang di timpu metegdaw. Kig bangkaˈ kia, piningalan dun “Gapid Diwata.”
12 Mendadi midepet ami tu Siracusa, telu gebii ami dayun dia. 13 Genat dia, sumikat ami pelum, minundas ami ditug Regio. Genat itu benaˈ migendaw, misagut ami genus genat di gilidan gendaw, kaas di keduaˈ endawen, ugat pami medengguˈ tu Puteoli. 14 Duuni kepetedan mipekitaˈ nami dia, inggat ami nilan megbebenwa dia nilan sala simana. Tubus itu, minundas nami ditug Roma.
15 Naa su nga kepetedan ditug Roma, benaˈ midengeg nilan puˈ minateng ami diag Italia, mipanaw ilan gikteb dia Tebuˈan Apio mukaˈ dia Telu Buuk Pektulugan, adun sumungkak dinami. Benaˈ mikitaˈ dinilan si Pablo, mikpaladpalad tu Megbebayaˈ, miamuˈamuˈ dayun gupia.
Ditug Roma si Pablo
16 Mendadi maˈantu, benaˈ minateng ami tuˈu ditug Roma, biwang dini Pablo megbenwa dig balayen, dumanen da laaki sala tawan sundalu megingat diniin.
17 Naa di ketelu endawen mateng dia, inggat ni Pablo mekpungun dia su nga kaunutan nu getaw Judea. Benaˈ mipungun nailan, kaliˈ pektaluˈ si Pablo dinilan, “Uu Mingumpated, naan kini, pia ndaˈi salaˈu tu nga sama ta getaw Judea sampay tug betad nu nga ginepuˈay ta, pia maˈantu, pinirisuu ditu Jerusalem, pigwakilu dayun tu getaw Roma. 18 Benaˈ sinaakanu nu nga getaw Roma kia, beluyenu nilan sia, puˈ ndaˈi misimaˈ nilan salaˈu lagaˈ na ginau. 19 Laak dagid su nga getaw Judea, pimilas nilan gupia, kaas mitegelanu dayun menengi ukumenu tu gedapan nu tampusan gadiˈ si Cesar. Asa ndiˈu dumangat di samatawu dig bansa ta. 20 Kaas iini inggatu dun amu, adun mekpekitaˈ ita mukaˈ megabitabit ita. Mendadi ki pedetengen ta nu nga getaw Israel, iini binaludu dun kadina kini, sabaˈ nu kesakupu diniin.”
21 Kaliˈ pektaluˈ su nga kaunutan nu getaw Judea kia dini Pablo, “Naa, ndaˈi midawat nami sulat genat ditu Judea mekatag diniˈa, mukaˈ ndaˈ dademai minateng dini kepetedan ta megukit melaat gulaula mu. 22 Laak mauyaˈan nami mekineeg diniˈa, puˈ misuunan nami, libaken dig liwagan benwa ki pikumpungan niu kia.”
23 Saˈ maˈnia, mikpasad ilan di gendaw, dayun melaun gupia getaw mikpungun diag balay pegbenwanan ni Pablo. Migukit dayun dinilan si Pablo patay sendaw, migwali dinilan mekatag di kesakup tu Keglekaunutan nu Megbebayaˈ. Pingmetuudanen ilan sia mekatag dini Isus, inalapen su Palinta nu Megbebayaˈ pisulaten dini Moises mukaˈ tu ngag duma pimuunanen dengantu. 24 Duun dayuni mituudan dun, duuni mpauk mekpetuud. 25 Mendadi mimegawaˈ ilan dia, miksumpakiˈig delendeman nilan. Laak sebulus pai piktaluˈ ni Pablo dinilan, laungen, “Metuud su tinaluˈ nug Balakat nu Megbebayaˈ ditu ginepuˈay niu, su pisulaten tu pimuunanen si Isaias ditu Misulat Taluˈen, 26 laungen,
‘Ki nga getaw kini, laaway mu, taluˈ mu dayun dinilan,
Menamal damu mekineeg, laak ndiˈ amu mekesabut.
Menamal damu mengenleng, laak ndiˈ amu mekengitaˈ.
27 Puˈ sug delendeman nilan, mimilas gupia.
Sinseng nilani nga telinga nilan,
pideng nilani mata nilan.
Saˈ kanaˈ da maˈnia, mekengitaˈ ilan sia
mukaˈ mekedengeg ilan sia,
dayun mekesabut ilan,
mukaˈ lumingay ilan puliˈ sia dinaan, laung nu Megbebayaˈ,
adun peneguliˈan ku ilan.’”
28 Mendadi, diksuˈ ni Pablo su tinaluˈen kia, laungen, “Mendadi, pesuun ku diniu, iin nai pitendayan tu kegawen nu Megbebayaˈ, ki kanaˈ getaw Judea. Ilan, mektalenten ilan dun!” 29 Benaˈ mideksuˈ ni Pablo teluˈay, migawaˈ dayun dia su nga getaw Judea, mipatiˈ ilan meksinualay.
30 Mendadi, migbebenwa pa dia si Pablo sampay duaˈ taun, diag balay pilitianen. Adin su mingumbelayan diniin, penembaˈenen. 31 Minamal megukit mekatag di kesakup tu Keglekaunutan nu Megbebayaˈ mukaˈ mekpetuˈun mekatag di Kaunutan si Isukristu. Minibeluˈ gupia megukit si Pablo, ndaˈi mekesagapaˈ diniin.