Jozɛfu
(37-50)
Jozɛfu ku odrɔ
37
1 Jakɔbu ci Kana, ofi xena otɔ o nɔ saa. 2 Jakɔbu we vikpɛye we gbexo xɛn: Jozɛfu nyi hwanjavi ɖe, bo ɖo oxwe fɔtɔn ŋukɔn owe. E nɔ kplɔ fofo etɔnye do, na ye kplɔ ogbɔye yi amakanmɛ nɔ. Fofo etɔn mɛ laye, bo nyi otɔ syɛ xeye na ye nɔ yɔ tun Bilixa kpodo Zilipa we vikpɛ ŋusungloye. Jozɛfu nɔ va to fofo etɔnye we oxo nyanylaye na yetɔ. 3 Izrayɛlia yi owan na Jozɛfu hugan vikpɛ etɔn gbokpweye, ɖo, e ji-i le nyɔxo mɛ. E bo tɔ awu gblɛlɛ abɔ gaga nɔ ɖe xeni vɛ oho ni-i. 4 Jozɛfu we fofoye bo kpɔn tun yetɔ bo yi owan ni-i hugan ye ɛmɛ gbokpweye seŋu. Mi wɛ ye gbɛ owan na Jozɛfu la, ye ko mɔ nɔ kpewu lɔ oxo ni-i kpodo ogbe fifa.5 Gbeɖokpo Jozɛfu ku odrɔ. E bo to odrɔ etɔn la na fofo etɔnye, ye bo mɔ gbɛ owan ni-i do e ji taŋu. 6 Jozɛfu lɔ na ye tun mɔ: «Ko ɖe kuku, mi ɖo oto odrɔ xena ko ku: 7 mi kpɔn, mí le nugyo bo lo bla ɛjinukun we getin xeye na mí gbo ye nɔ, zɔnɖokpo kpoŋu getin xena ko bla la, fɔn, bo le ote, getin xeye na miye mi bla ye bo lɛ do-e, bo do onu odo nɔ le ŋukɔn na getin bibla tɛye la nɔ.» 8 Jozɛfu we fofoye bo kan-ɛ se tun mɔ: «O ka va ɖu xɔlu do mía nu nɔ wɛɛ alo o ka va kpa ɛcɛ do mía ji nɔ wɛɛ?» Ye bo mɔ gbɛ owan ni-i do e ji, do odrɔ etɔnye kpodo oxo etɔnye wu.
9 Jozɛfu mɔ ku odrɔ bu ke, bo mɔ to-e na fofo etɔnye. E lɔ tun mɔ: «Mi kpɔn, ko mɔ ku odrɔ ke tun ohwe, osun, kpodo sunhwevi weɖokpo bo va do onu odo le ŋukɔn na-a nɔ.» 10 E bo to odrɔ mɛ la na otɔ ɖi lena e to-e na fofo etɔnye ɖo ha. Otɔ bo gbɛ onu ni-i bo tun mɔ: «Odrɔ ŋukɔ lɛ nyi e mɛ na o ku? Mɔ, nawe, kpodo fofo tɔweye na va do onu odo na we wɛɛ?» 11 Fofo etɔnye bo hwan ɛwu do-e nɔ, vɔ, otɔ bo hɛn oxo mɛ laye wu.
Jozɛfu we fofoye sɔ-ɛ sɔ sa
12 Jozɛfu we fofoye yi Sicɛmu we kansinmɛ, a do kplɔ yetɔ we ogbɔye do yi amakanmɛ. 13 Mi wɛ Israyɛli va lɔ na Jozɛfu tun mɔ: «Fofo tɔweye kplɔ kanlinye do yi amakanmɛ le Sicɛmu. Va, na ma dɔn we do yi yekɔn.» Jozɛfu bo ɖo e wu tun mɔ: «E nyɔ, ko se.» 14 Otɔ la mɔ lɔ tun mɔ: «Ko ɖe kuku, va yi kpɔn tun fofo tɔweye kpodo kanlin laye le nywɛɖe jaa, o ba gbɔn a bo va ɖo ogbe na-a.» E bo dɔn-ɛ ɖodan sɔn Eblɔn we sisahun mɛ, Jozɛfu bo va yi jɛ Sicɛmu la, 15 bo lo bu omɔ nɔ gbɔn gbefaji, mi wɛ dahwe ɖe kpɔn-ɛ, bo kan-ɛ se tun mɔ: «Ɛlɛ o lo kan nɔ?» 16 Jozɛfu bo ɖo e wu ni-i tun mɔ: «Fofo tɛyee wɛ ko lo kan nɔ. Ko ɖe kuku, o na kpewu na jlɛ ofi xena ye kplɔ kanlinye do yi amakanmɛ le la na-a wɛɛ?» 17 Dahwe la bo ɖo e wu ni-i tun mɔ: «Ye o lɛ le bwɛ, ko se ye lɔ nɔ tun heye a bo sɔn yi Dotanu.» Jozɛfu jɛ ɛtɛ na fofo etɔnye bo kan ye nɔ, bo va yi kpɔn ye le Dotanu la.
18 Jozɛfu we fofo laye kpɔn-ɛ le dindyɔnu daan, gbɔxwe e na va ye kɔn, ye bla ogbe do e wu, a do hu-i. 19 Ye bo lɔ na yenɔniɔye nɔ tun mɔ: «Hee! Mi kpɔn, odrɔ we oga la mɛ lo gbɔn nɔ. 20 Fifi, e ya! Mí a hu-i, a bo sɔ ocɔ etɔn sɔ flɛn do kalogun ɖe mɛ. Mí ba va yi lɔ tun kanlin ni nɔ wa adan ɖe bɛ bo vunvun-i ɖu. E mɛ, onu xena odrɔ etɔn laye na va nyi, mí ba kpɔn.» 21 Xena Hlubɛnu se oxo la, e hwlɛn-ɛ gan le alɔ yetɔn mɛ, bo lɔ tun mɔ: «Mí ɔn hu-i nɔ.» 22 E bo mɔ lɔ tun: «Mi ká kɔn ɛhun ɖo onyi o! Mi sɔ-ɛ sɔ flɛn do gbefaji we kalogun mɛ mɛ, vɔ, mi ká na alɔ miatɔn a jɛ e wu.» E lɔ mɔsinha nɔ, a do kpewu hwlɛn-ɛ gan le alɔ yetɔn mɛ, a bo kplɔ-ɛ sɔ yi na otɔ.
23 Xena Jozɛfu va fofo etɔn laye kɔn, ye wle-e, bo ɖe awu gblɛlɛ la le okɔ ni-i, awu gblɛlɛ xeni vɛ oho la. 24 Ye bo wle-e, bo sɔ-ɛ sɔ flɛn do kalogun la mɛ. Kalogun la bo le toto, ɛsin ko le e mɛ. 25 E mɛ godo ye xlɔn onyi a do ɖu onu. Mi wɛ, ye kɔ okɔ kpoŋu, bo kpɔn Isimayɛli we jijimɛvi ajɔdotɔ susu, ye bo zɔn kpɔkpɔ, bo sɔn Galadi. Ye bo do adlagantib kpodo bomu kpodo ladanumu we agban do osɔkpotɔnɔ yetɔnye ji, bo bɛ do sɔn yi Ejiputi nɔ. 26 Mi wɛ Juda lɔ na nɔvyɛye tun mɔ: «Na mí hu mía nɔvyɛ la, bo cɔn onu do oku etɔn we oxo ji, ale ŋukɔn lɛ na le e mɛ na mí? 27 E ya, mí a sɔ-ɛ sɔ sa na Ismayɛli we jijimɛviye, alɔ míatɔn ni ká jɛ e wu o, ɖo, mía nɔvyɛ wɛ e nyi, ɛhun míatɔn wɛ.» Nɔvyɛye bo yi ogbe na oxo mɛ la. 28 Vɔ, Madyanc we jijimɛvi ajɔdotɔye gbɔn blɛ la va yi nɔ, ye bo ɖe Jozɛfu tɔn-ɛ le kalogun la mɛ, bo sɔ-ɛ sɔ sa ohogan oko do Isimayɛli we jijimɛviye, yee bo kplɔ Jozɛfu do sɔn yi Ejiputi. 29 Xena Hlubɛnu trɔ va kalogun la kɔn, e ɔn mɔ kpɔn Jozɛfu le e mɛ. E bo vun awu etɔn le okɔ. 30 Mi wɛ e trɔ va nɔvyɛye kɔn, bo lɔ na ye tun mɔ: «Ovi la ɔn mɔ le ofi la! Bɔ lɛ ko na gbɔn fifi?» 31 Ye gbo ohlo na agbo ɖe, bo sɔ Jozɛfu we awu gblɛlɛ la, bo nylɔ-ɛ do ɛhun mɛ. 32 E mɛ godo, ye sɔ awu gblɛlɛ xeni vɛ oho la, sɔ ɖodan yetɔ, bo do ɛwɛn xe do e ji: «Onu xena mí kpɔn xɛn. Mí ɖe kuku, glo-e kpɔn, tun e kɛ nyi ovi tɔwe we awu gblɛlɛ la kɛ nyi e mɛ maa?» 33 Jakɔbu glo-e kpɔn, bo lɔ tun mɔ: «Ovi tɛye we awu gblɛlɛ bɛ nyi xe o! Kanlin wa adan ɖe ɖu-i; awoo! E vunvun Jozɛfu.» 34 Mi wɛ, e vun awu xeni le okɔ ni-i, bo sɔ dɔkpod sɔ bla alin ji, bo nɔ lutu mɛ na azan susu do ovyɛ wu. 35 Vikpɛ etɔn zɛtɛye, ŋusunglo kpodo nyɔnusi, site, a va fa akɔn ni-i, vɔ, e bo gbɛ bɔnu sise. E bo lɔ tun mɔ: «Lutu mɛ wɛ ko na le gbɔɔn a bo va yi kpɔn ovi tɛye le okutomɛ.» Jakɔbu bo mɔ gbɛ fan avin do ota na ovyɛ nɔ.
36 Madyan we jijimɛvi laye bo sa Jozɛfu na Potifa le Ejiputi, Potifa la bo nyi xɔsudanwatɔ ɖaxo na Falawɔn. Emyɔ wɛ nyi sɔja xeye ni nɔ cɔ Falawɔn la we oga.