Juda kpodo Tamaa we gbexo
38
1 Le hwe mɛ la nu, Juda lɛ le nɔvyɛye kɔn, bo sɔn yi dahwe Adulamu we toxomɛtɔ ɖe kɔn, ye bo nɔ yɔ dahwe la tun Hila. 2 Le blɛ, Juda kpɔn nyɔnuvi ɖe xeni nyi Cuwa kanatɔ vyɛ. E bo sɔ ɖe, bo nɔ kpo-e. 3 Nyɔnuvi la yi gomi, bo ji ovi ŋusunglo, Juda bo ɖo nyikɔ ni tun Ɛɛ. 4 Nyɔnuvi mɛ la mɔ ji ovi ŋusunglo bu ni-i, bo ɖo nyikɔ ni-i tun Onani. 5 E mɛ godo, e mɔ ji ovi ŋusunglo bu ke, bo ɖo nyikɔ ni-i tun Cela. Juda la bo le Kezivu le hwexenu na osyɛ ji ovi mɛ la.6 Juda bo ɖe nyɔnu na ovi tantyan etɔn Ɛɛ la, nyɔnu la bo nɔ nyi Tamaa. 7 Vɔ, Juda we ovi tantyan Ɛɛ la ɔn jɛŋu na Xwetɔ Mawu, mi wɛ Xwetɔ Mawu hu-i. 8 Mi wɛ Juda lɔ na Onani tun mɔ: «Sɔ fofo tɔwe syɛ la do sɔ okpo, a bo nɔ kpo-e, o ba do ɖo jijimɛviye ni-i.» 9 Vɔ, Onani nyɔ-ɛ tun ovi xena e na ji le okposi la wu bo ɔn nyi etɔn nɔ, mi wɛ dɔn, na e nɔ kpodo nyɔnu la nɔ, bo ka na afɔ nɔ, e nɔ sɔ kɔn do nyixɔ mɛ, e ko mɔ do ɖo jijimɛvi na fofo etɔn nɔ. 10 Onu xena e wa nɔ mɛ la ɔn jɛŋu na Xwetɔ Mawu, mi wɛ, e na na emyɔ can ku. 11 Juda bo lɔ na Tamaa ovi syɛ la tun mɔ: «Va yi nɔ didawe we oxwegbe, a bo nyi okposi le blɛ, gbɔɔn do jɛ hwexenu na ovi tɛye Cela na hwɛn.» E lɔ mɔsinha, ɖo, e ɔn jlo tun Cela la can a ku ɖi fofo etɔnye ha. Tamaa bo va yi ci otɔ we oxwegbe.
12 Oxwe susuye va yi, Cuwa vyɛ nyɔnusi xeni nyi Juda syɛ la, bo ku. Xena lutu mɛ ninɔ we azan la va yi vɔ, Juda yi Timuna, emyɔ kpodo hadwe etɔn Hila xeni sɔn Adulamu we toxo mɛ, a bo do va yi kpɔn ɛmɛ xeye ni xwlɛ ofun le lɛngbɔ etɔnye wu nɔ ye. 13 Ye va yi lɔ na Tamaa tun mɔ: «Kpɔn, suwetɔ va yi Timuna nɔ, na ye a do xwlɛ ofun lɛngbɔ etɔnye wu.» 14 Mi wɛ e ɖe okposi we onu etɔnye, bo sɔ dukwi sɔ cɔn, bo butu eɖe, bo yi xlɔn onyi le Enayimu we toxo we agbo mɔnu, ɖo, blɛ wɛ omɔ gbɔn, bo do yi Timuna. E bo kpɔn tun Cela bo o hwɛn, vɔ, ye ko sɔ emyɔ Tamaa la sɔ ni-i na ni a ɖe o. 15 Juda kpɔn-ɛ, bo bu-i tun lɛlonɔ wɛ ha, ɖo, e cɔn onu ŋumɛ. 16 E tɛkpɔ-ɛ le omɔ la ji, bo lɔ ni-i tun mɔ: «Ko ɖe kuku, va mí a sɔn na ma ɖo oxo kpo we.» E ko nyɔ-ɛ tun visyɛ wɛ. Mi wɛ, nyɔnu la ɖo e wu ni-i tun mɔ: «Na o ɖo oxo kpo-o ɖe, ɛlɛ o na na-a?» 17 E bo lɔ tun mɔ: «Mɔ, ko na sɔ gbɔgbwɛvi ɖokpo le gbɔgbwɛ tɛyee mɛ ɖodan we.» Nyɔnu la bo tun: «E nyɔ, vɔ, sɔ onu ɖe sɔ do awoba gbɔxwe, gbɔɔn do jɛ hwexenu na o na sɔ gbɔgbwɛvi la sɔ ɖodan.» 18 Juda bo lɔ ni-i tun mɔ: «Ɛlɛ ko na sɔ do awoba na we?» E bo ɖo e wu ni-i tun mɔ: «Josi dido we ogan tɔwe kpodo okan xeni le e wu, kpo okpo xeni le alɔ mɛ na we.» Juda bo sɔ onu mɛ laye ni-i, bo ɖo oxo kpo-e. Nyɔnu la bo yi gomi ni-i. 19 Mi wɛ nyɔnu la site, bo sɔn, bo ɖe dukwivi xeni sɔ cɔn la tɛ, bo mɔ sɔ okposi we onu etɔnye sɔ do.
20 Juda va sɔ hadwe etɔn xeni sɔn Adulamu la sɔ ɖodan, na ni a va yi sɔ gbɔgbwɛvi la sɔ na nyɔnu la, a bo yi onu xeye ni le owoba laye do va. Vɔ, hadwe etɔn la bo va yi kan-ɛ dokpo. 21 E bo kan ɛmɛ xeye ni le ofi laye se tun mɔ: «Bɔ lɛ nyɔnu agalɛtɔ xeni nɔ nɔ Enayimu we omɔto bwɛ la le?» Ye bo ɖo e wu ni-i tun mɔ: «Agalɛtɔ ti ɔn nɔ bwɛ kpɔn can.» 22 Mi wɛ e lɛkɔ va Juda kɔn bo lɔ ni-i tun mɔ: «Ko ɔn kpɔn-ɛ, mɔsinha ke, ɛmɛ xeye ni nɔ nɔ ofi la ye bo lɔ na-a tun lɛlonɔ ɖe bo ɔn nɔ blɛ kpɔn can.» 23 Juda bo ɖo e wu tun mɔ: «Kpɔn, ni sɔ onu laye, ɛmɛye ni ká va ko mí. Ko sɔ gbɔgbwɛvi la ɖodan, myɔ o ko kpɔn-ɛ.»
24 Xena sunzan atɔn ha va yi vɔ, ye va lɔ na Juda tun mɔ: «Vwesi Tamaa lɛ aga, gbɔɔn lɛlo we gomi wɛ le e si fifi.» Juda bo lɔ tun mɔ: «Ye ni ɖe-e tɔn a tɔ-ɛ ozo!»
25 Hwexenu na ye ɖe-e tɔn nɔ, e dɔn ɛmɛ ɖodan sutɔ la tun ye boo va yi lɔ ni-i tun mɔ: «Ɛmɛ xe tɔn ni nyi onu xeye wɛ ko yi gomi na. Ko ɖe kuku, glo josi dido we ogan xe kpodo okan xeni le e wu kpɔn, a bo glo okpo xe kpɔn. Onu tɔn lɛ ye nyi?» 26 Xena Juda kpɔn onu laye kpɔn, e do josi-i tun hetɛye bɛ, mi wɛ e lɔ tun mɔ: «E wa onu do osɛna ji hugan mɔ, ɖo, ko ɔn sɔ-ɛ na ovi tɛye Cela ni a sɔ ɖe.» Juda ko mɔ tɛkpɔ nyɔnu la kpɔn gbeɖe.
27 Xena ovi jiji we ganmɛ va su ni-i, ye kpɔn tun hoho bɛ bo le dɔmɛ ni-i. 28 Hwexenu na e lo ji ovi nɔ, ovifɛ ɖokpo ɖe alɔ ɖokpo tɔn. Nyɔnusi ovijina-ɛmɛtɔ la bo wle-e, bo bla okan vɛɛ do e wu, bo tun mɔ: «Ovi xe wɛ tɔn tantyan.» 29 Vɔ, ovi mɛ la bo mɔ dɔn alɔ etɔn do sɔn, nɔvyɛ owegɔ la, bo tɔn jɛ ŋukɔn ni-i. Mi wɛ nyɔnusi ovijina-ɛmɛtɔ la do axwa bo lɔ tun mɔ: «Bɔ lɛ o hun omɔ gbɔn bo do tɔn?» Ye bo ɖo nyikɔ na ovi mɛ la tun Pelɛsi e gɔnmɛ ni nyi omɔ. 30 E mɛ godo, ovifɛ xena okan vɛɛ le alɔ na la bo tɔn. Ye bo ɖo nyikɔ ni-i tun Zela.