Jozɛfu wa odan le Potifa we oxwegbe
39
1 Ye kplɔ Jozɛfu do yi Ejiputi, mi wɛ Potifa Ejiputitɔ, xeni nyi xɔsudanwatɔ ɖaxo na Falawɔn, bo nyi sɔja xeye ni nɔ cɔ Falawɔn la we oga, xɔ Jozɛfu la le Isimayɛli we jijimɛvi xeye ni kplɔ-ɛ do yi blɛ la ye si. 2 Xwetɔ Mawu le kpodo Jozɛfu, onu zɛtɛye bo zɔn ni-i nɔ. Xwetɔ etɔn Ejiputitɔ la we oxwegbe wɛ Jozɛfu nɔ nɔ. 3 Xwetɔ etɔn la va kpɔn onu jɛ e wu tun Xwetɔ Mawu bo le kpo Jozɛfu, bo nɔ na na odan ɖekpekpe xeni nɔ wasi, nɔ ɖo ŋukɔn yiyi. 4 Potifa kɔn dɔmɛ do e wu bo sɔ-ɛ do ɖo odanwatɔ emyɔ ŋutɔ tɔn. E bo sɔ-ɛ do ɖo onujikpɔntɔ le oxwe etɔn gbe, bo mɔ sɔ onu xeni ɖo zɛtɛye sɔ do alɔ mɛ ni-i. 5 Bɛ sɔn hwexenu na Potifa sɔ-ɛ do ɖo onujikpɔntɔ le oxwe etɔn gbe, bo sɔ-ɛ sɔ ɖo onu etɔn zɛtɛye nu, Xwetɔ Mawu do na Ejiputitɔ la we oxwe do Jozɛfu wu. Xwetɔ Mawu we dona la bo gbakpe onu etɔn zɛtɛye ji, le oxwe etɔn gbe kpodo ogle etɔn gbe. 6 Do e mɛ la wu, Potifa jo onu zɛtɛye xeni ɖo do alɔ mɛ na Jozɛfu. E ko mɔ nɔ kpɔn onu ti kɔn zɛgbɔn onuɖuɖu etɔn xeni nɔ ɖu wu.Jozɛfu nyi hwanjavi ɖe bo jɔhun, bo nyɔhwyan.
Jozɛfu we oga syɛ lɔ ni-i tun ni boo va ɖo oxo kpo he
7 Azan viɖe godo, Jozɛfu we xwetɔ syɛ va jɛ ŋumɛ ɖiɖo ni-i ji. Nyɔnu la bo lɔ ni-i tun mɔ: «Va ɖo oxo kpo-o.» 8 Jozɛfu gbɛ, bo lɔ na xwetɔ etɔn syɛ tun mɔ: «Kpɔn, xwetɔ tɛye ɔn mɔ nɔ kpɔn onu ti kɔn le oxwe la gbe, e bo sɔ onu zɛtɛye sɔ do asi na-a. 9 Le oxwe etɔn gbe, ɛmɛ ɖe ɔn mɔ kpa ɛcɛ hugan mɔ. E ɔn gbɛ onu ti na-a zɛgbɔn myɔ wu, ɖo osyɛ wɛ o nyi. Ɛlɛ dɔn ko na do do onu baɖabaɖa ɖaxo mɛ sin, a bo wa onu nyanyla do Mawu?» 10 Ganke oxo ɖokpo la jan wɛ nyɔnu la nɔ lɔ na Jozɛfu nɔ tɛgbɛ, vɔ, Jozɛfu ɔn yi ogbe a do va yi hlɔn aha ni-i gbɔɔn a do ɖo oxo kpo-e can.
11 Gbeɖokpo Jozɛfu ɖyɛ oxwe la gbe a do va yi wa odan etɔn, vɔ, oxwe la gbe we odansɔvi ti ko le. 12 Potifa syɛ la bo wle awu le okɔ ni-i, bo lɔ tun mɔ: «Va ɖo oxo kpo-o.» Vɔ, Jozɛfu bo jo awu la do alɔ mɛ ni-i, bo si, bo sɔn le oxwe la gbe. 13 Xena nyɔnu la kpɔn tun e bo sɔn bo jo awu etɔn do alɔ mɛ ni-i, bo si sɔn le oxwe la gbe, 14 e do axwa bo yɔ odansɔvi oxwe la gbe tɔnye, bo tun mɔ: «Mi kpɔn! E hɛn dahwe Heblitɔ mɛ va, a do ba oha mí. E tɛkpɔ-ɔ, a do ɖo oxo kpo-o, ko bo do axwa lelele. 15 Xena e kpɔn tun ko bo do axwa bo yɔ ɛmɛye nɔ kpoŋu, e jo awu etɔn do aha na-a, bo si, bo sɔn le oxwe la gbe.»
16 Mi wɛ, nyɔnu la sɔ awu la sɔ ɖo aha, bo nɔ ote gbɔɔn do jɛ hwexenu na Jozɛfu we xwetɔ la gbɔn do. 17 Nyɔnu la bo mɔ lɔ oxo ɖokpo ŋumyɔ laye na oswa, bo lɔ tun mɔ: «Ɛmɛ xixɔ Heblitɔ xena o hɛn va na mí la, tɛkpɔ-ɔ, bo jlo na ba oha-a. 18 Vɔ, xena ko do axwa, bo yɔ ɛmɛye nɔ, e jo awu etɔn do aha na-a, bo si sɔn le oxwe la gbe.» 19 Xena Jozɛfu we xwetɔ se oxo xena osyɛ to ni-i la, bo do lɔ ni-i tun walɔ xena ɛmɛxixɔ etɔn bo zan do va yi hekɔnye bɛ mɛ, oji etɔn fyɛ taŋu. 20 Mi wɛ Jozɛfu we xwetɔ la, na na ye wle-e, bo sɔ tu do ogankpamɛ, le ofi xena ye nɔ tu xɔlu we ogantɔye do.
Jozɛfu ɖu oga le ogankpamɛ
Mi wɛ Jozɛfu nɔ ogankpamɛ le blɛ la. 21 Vɔ, Xwetɔ Mawu bo le kpodo Jozɛfu, bo ɖe ogbeji ninɔ etɔn sɔ xlɛ-ɛ, bo na na ahwanga xeni kpa na ogankpa la ɖe dɔmɛnywɛ sɔ xlɛ Jozɛfu. 22 Ahwanga la bo sɔ ogantɔ xeni le blɛ la zɛtɛye sɔ do alɔ mɛ na Jozɛfu. Emyɔ wɛ ɖo na nɔ nɔ ŋukɔn na odan ɖekpekpe xena ogantɔye na wa. 23 Ahwanga la ɔn mɔ nɔ kpe ŋukunsin do odan xeni do asi na Jozɛfu ti wu, ɖo, Xwetɔ Mawu le kpo Jozɛfu, bo nɔ na na odan ɖekpekpe na e sɔ, nɔ ɖo ŋukɔn yiyi.