40
1 Xena onu mɛ laye jɔ va yi vɔ, xɔlu Ejiputitɔn we ahanbatɔ kpodo kpɔnnɔmɛtɔ etɔn, jɛ agɔ do xwetɔ yetɔn, xeni nyi Ejiputi we xɔlu la. 2 Falawɔn la do aɖi do xɔsudanwatɔ owe mɛ laye, ahanbatɔye we oga la kpodo kpɔnnɔmɛtɔye we oga la. 3 E bo wle ye do ogankpa mɛ le ahwanga xeni kpa na sɔja xeye ni nɔ cɔ xɔlu, kɔn, le ofi xena ye tu Jozɛfu do. 4 Ahwanga la sɔ Jozɛfu sɔ ɖo na ye, e ba nɔ do sɔ odan na ye, ye bo nɔ ogankpa mɛ la mɛ na azan dindyɔn ɖe.Jozɛfu ɖe odrɔ gɔnmɛ na ogantɔ owe laye
5 Le ozan mɛ gbeɖokpo, ahanbatɔ la kpodo kpɔnnɔmɛtɔ la, xeye na ye wle do ogankpa mɛ laye, laye ku odrɔ. Ɛmɛ ɖokpo-ɖokpo we odrɔ bo ɖo gɔnmɛ sise etɔn. 6 Xena Jozɛfu va ye kɔn le kɛklɛnu, e kpɔn tun ye bo le onulilo mɛ. 7 E bo kan Falawɔn we xɔsudanwatɔ xeye kpodo emyɔ kpo ni le ogankpa ɖokpo la mɛ le xwetɔ etɔn we oxwegbe laye, se tun mɔ: «Ɛlɛ dɔn na mi do ɖɔŋu mɔsinha le egbe?» 8 Ye bo ɖo e wu ni-i tun mɔ: «Mí ku odrɔ, vɔ, ɛmɛ ti ko le bo na ɖe e gɔnmɛ.» Jozɛfu bo ɖo e wu na ye tun mɔ: «Mawu hɛn nɔ ɖe odrɔ gɔnmɛ wɛɛ? Mi lɔ odrɔ laye na-a.»
9 Ahanbatɔye we oga la to odrɔ etɔn na Jozɛfu, bo lɔ tun mɔ: «Le odrɔ tɛye mɛ, ko kpɔn vɛntin ɖe le ŋukɔn na-a, 10 vɛntin la bo ɖo alɔklan atɔn. Xena e jɛ kpoŋu, e do ɛsɛ, oxwi etɔnye bo na hlɛzɛn bibya. 11 Falawɔn we kɔkpo bo le alɔ mɛ na-a, mi wɛ ko gbɛn hlɛzɛn laye, bo fyɔn ye do kɔkpo la mɛ, bo sɔ do alɔ mɛ na Falawɔn la.» 12 Jozɛfu bo lɔ ni-i tun mɔ: «Odrɔ xena o ku la we gɔnmɛ xɛn: alɔklan atɔn laye, nyi onyihinhɔn atɔn. 13 Le onyihinhɔn atɔn gbe, Falawɔn na kɔ we do yi oji, e na mɔ sɔ we do odan xena o nɔ wasi saa la mɛ, o ba mɔ jɛ kɔkpo sisɔ do alɔ mɛ na Falawɔn ji ɖi lena o nɔ sɔ ni-i ɖo saa ha le hwexenu na o nyi ahanbatɔ ni-i. 14 Vɔ, na onu va nyɔ na we nɔ, ɖoŋudo wu ye. Ko ɖe kuku, wasi dɔmɛnywɛ na-a, a bo lɔ oxo tɛye na Falawɔn, e ba do ɖe-o tɔn le ogankpa xe mɛ. 15 Ɖo, fin wɛ ye fin-u le Heblitɔye we oto mɛ, le bwɛ xe can, ko ko wa onu ti na ye na do sɔ-ɔ sɔ do ogankpa mɛ o.»
16 Xena kpɔnnɔmɛtɔye we oga kpɔn tun gɔnmɛ ɖiɖe la bo jɔhun, e lɔ na Jozɛfu tun mɔ: «Mɔ can ko ku odrɔ. Le odrɔ la mɛ, ko hɛn kpɔnnɔ jaxwi atɔn do ota. 17 Kpɔnnɔ hamɛ-hamɛ, xena Falawɔn nɔ ɖu wɛ gɔ jaxwi xeni le jigbe la mɛ. Vɔ, oxɛye bo va ɖu ye le ota na-a nɔ.» 18 Jozɛfu bo ɖo e wu ni-i tun mɔ: «Odrɔ xena o ku la we gɔnmɛ xɛn: jaxwi atɔn laye nyi onyihinhɔn atɔn. 19 Le onyihinhɔn atɔn gbe, Falawɔn na kɔ we do yi oji nyanyla tɔn, e ko jɛ e ji na we nɔ. E na do okan okɔ na we, do otin wu, oxɛye bo na va ɖu olan tɔwe.»
20 Mi wɛ le onyihinhɔn atɔn gbe la, Falawɔn lo ɖu jijigbezan etɔn we oxwe nɔ. E bo wasi agɔɖuɖu ɖaxo na odansɔvi etɔn zɛtɛye seŋu. Le ye ɛmɛ zɛtɛye we ŋumɛ, e ɖe ahanbatɔye we oga la kpodo kpɔnnɔmɛtɔye we oga la tɔn le ogankpa mɛ. 21 E sɔ ahanbatɔye we oga la sɔ ɖo odan etɔn mɛ. E bo mɔ jɛ kɔkpo sisɔ do alɔ mɛ na Falawɔn ji. 22 Vɔ, e na ogbe ye bo do okan okɔ na kpɔnnɔmɛtɔye we oga la. Onu laye bo jɔ ɖi lena Jozɛfu ɖe e gɔnmɛ na ye ɖo saa ha pɛpɛpɛ. 23 Vɔ, ahanbatɔye we oga la, ɔn mɔ ɖoŋudo Jozɛfu wu, e wɔn-ɛ.