Falawɔn ku odrɔ
41
1 Oxwe owe godo, Falawɔn la ku odrɔ ɖe, bo kpɔn eɖe le otɔ sisa xena ye nɔ yɔ tun Nilu to. 2 E na kpɔn jaa, bo kpɔn onyibu osi acowe xeni nyɔ kpinkpɔn, bo do oju nywɛɖe, ye bo tɔn sɔn Nilu la mɛ, bo jɛ ama ɖuɖu ji le otɔ la to. 3 E mɛ godo, onyibu osi acowe buye, xeni vɛ kpinkpɔn, bo ɖitɔ xangan-xangan, bo mɔ tɔn le Nilu la mɛ, bo va yi bɔ do acowe tantyantɔn laye wu, le otɔ la to. 4 Onyibu osi xeni ɖitɔ, bo vɛ kpinkpɔn laye, ɖu onyibu osi acowe xeni nyɔ kpinkpɔn, bo do oju laye. Mi wɛ Falawɔn la davo bo fɔn.5 Falawɔn la mɔ ɖyɛ awlɔn mɛ, bo mɔ ku odrɔ owegɔ. E kpɔn ɛjinukun we getin ɖokpo le ote, e bo zɛ ovi acowe, ye bo hwan ganji, bo nyɔ kpinkpɔn. 6 E mɛ godo, ɛjinukun we getin bu mɔ wu do aha na ɖee la, e bo zɛ ovi acowe, ye bo hwekun, zozo we jɛhɔn xo sɔn hwezɛdo bo fyɔ ye. 7 Ɛjinukun xeni hwekun laye mi xeye ni hwan bo glo laye. Falawɔn davo bo fɔn, e bo kpɔn tun he bo ku odrɔ ɖe.
8 Le kɛklɛnu etɔn, ayi gbado na Falawɔn la, e bo yɔ Ejiputi we majikiwasitɔ zɛtɛye kpodo onunywɛtɔ zɛtɛye, bo to odrɔ xeni ku la na ye. Vɔ, ɛmɛ ti ɔn kpewu bo ɖe odrɔ la gɔnmɛ ni-i. 9 Mi wɛ, ahanbatɔye we oga la, lɔ na Falawɔn tun mɔ: «Ko na lɔ onu nyanyla xena ko wasi le egbe. 10 Gbeɖokpo, o do aɖi do mí ɛmɛ odansɔvi tɔweye, o bo tu mɔ kpodo kpɔnnɔmɛtɔye we oga do ahwanga xeni kpa na sɔja ɛmɛcɔtɔye, we ogankpa mɛ. 11 Mí bo va ku odrɔ le ozan ɖokpo la mɛ, emyɔ kpo mɔ kpo, odrɔ ɖokpo-ɖokpo bo ɖo gɔnmɛ sise etɔn. 12 Hwanjavi Heblitɔ ɖe le ogankpa la mɛ kpodo mí, e bo nyi ɛmɛxixɔ na ahwanga xeni kpa na sɔja ɛmɛcɔtɔye. Mí to odrɔ míatɔnye ni-i, e bo ɖe ye gɔnmɛ na mí, ɛmɛ ɖokpo-ɖokpo kpodo etɔn. 13 Onu laye bo va jɔ pɛpɛpɛ ɖi lena e ɖe e gɔnmɛ na mí ɖo ha. Ye mɔ sɔ-ɔ ɖo odan tɛye mɛ, ye bo do okan okɔ na kpɔnnɔmɛtɔye we oga la.»
Jozɛfu ɖe odrɔ gɔnmɛ na Falawɔn
14 Falawɔn dɔn tun ye boo yɔ Jozɛfu do va, ye bo hwlɛndo do kplɔ-ɛ sɔn ogankpa mɛ do va. Ye lun ɛgɛn ni-i bo xlwɛ ota ni-i. E bo ɖɔli onudido etɔn, ye bo kplɔ-ɛ va Falawɔn kɔn. 15 Falawɔn la lɔ na Jozɛfu tun mɔ: «Ko ku odrɔ ɖe, ɛmɛ ti ko kpewu ɖe odrɔ la gɔnmɛ na-a. Vɔ, ko bo se tun na ye to odrɔ ɖe na we, o nɔ ɖe e gɔnmɛ.» 16 Jozɛfu bo ɖo e wu ni-i tun mɔ: «E ɔn nyi mɔ hɛn, vɔ, Mawu wɛ na ɖewu xeni na fa oji na Falawɔn.» 17 Falawɔn la bo lɔ na Jozɛfu tun mɔ: «Le odrɔ tɛye mɛ, ko le otɔ sisa Nilu to. 18 Ko na kpɔn kpoŋu, ko kpɔn onyibu osi acowe xeni nyɔ kpinkpɔn, bo do oju nywɛɖe, ye bo tɔn sɔn Nilu la mɛ, bo jɛ ama ɖuɖu ji le otɔ la to. 19 E mɛ godo, onyibu osi acowe buye, xeni vɛ kpinkpɔn, bo ɖitɔ xangan-xangan, mɔ tɔn le Nilu la mɛ. Le Ejiputi we oto mɛ seŋu, ko ɔn kpɔn kanlin ɖe, e bo vɛ kpinkpɔn ɖo mɔsinha kpɔn. 20 Onyibu osi xeni ɖitɔ, bo vɛ kpinkpɔn laye, ɖu onyibu osi acowe xeni nyɔ kpinkpɔn, bo do oju laye. 21 Ye mi ye ganke, o ɔn na nyɔ-ɛ tun ye mi ye can. Lena ye vɛ kpinkpɔn do saa la jan wɛ ye mɔ le. E mɛ, ko davo bo fɔn. 22 E mɛ godo, ko mɔ ku odrɔ bu ke. Ko kpɔn ɛjinukun we getin ɖokpo le ote, e bo zɛ ovi acowe, ye bo hwan ganji, bo nyɔ kpinkpɔn. 23 E mɛ godo, bu mɔ zɛ ovi acowe ke, vɔ ye bo hwekun, zozo we jɛhɔn bo xo sɔn hwezɛdo bo fyɔ ye. 24 Ovi acowe xeni hwekun laye bo mi ovi acowe xeni hwan bo nyɔ kpinkpɔn laye. Ko to-e na majikiwasitɔye, vɔ, ɛmɛ ti ɔn kpewu ɖe e gɔnmɛ na-a.»
25 Jozɛfu lɔ na Falawɔn tun mɔ: «Odrɔ owe laye, gɔnmɛ sise ɖokpo gee wɛ ye ɖo. Onu xena Mawu ka wasi nɔ, wɛ e ɖe xlɛ we. 26 Onyibu osi acowe xeni nyɔ kpinkpɔn laye nyi oxwe acowe, ovi acowe xeni nyɔ kpinkpɔn xena ɛjinukun we getin la zɛ ye can, nyi oxwe acowe. Odrɔ ɖokpo gee wɛ ye nyi. 27 Onyibu osi acowe ɖe laye, xeni ɖitɔ, bo vɛ kpinkpɔn laye, kpodo ovi acowe xeni hwekun xena ɛjinukun we getin zɛ, zozo we jɛhɔn hwezɛdotɔn bo fyɔ ye la, yee can nyi oxwe acowe. Onu xena ye lo ɖe xlɛ nɔ, wɛ nyi tun xovɛ na tɔn na oxwe acowe. 28 Oxo xena ko lɔ fifi la, e mi mɛ. Mawu wɛ sɔ onu xeni ka wasi nɔ sɔ xlɛ we. 29 Kpɔn, oxwe acowe lo gbɔn nɔ, ɛji bo na jɛ taŋu le Ejiputi we oto la mɛ seŋu. 30 E mɛ godo, xovɛ na tɔn na oxwe acowe, gbɔɔn ɛmɛye na wɔn tun ɛji bo jɛ taŋu le Ejiputi we oto la mɛ seŋu kpɔn. Xovɛ la na dɔn oto la do aya mɛ. 31 Xovɛ la na syɛnxu gbɔɔn ɛmɛ ti ɔn mɔ ɖoŋudo ɛji xeni jɛ taŋu le oto la mɛ saa wu nɔ o. 32 O ku odrɔ la do owe ji. E lo ɖe xlɛ nɔ tun ogbeta na Mawu sɔ la, e na wasi-i dandan, e bo na wasi-i le madɛn mɛ. 33 Fifi, Falawɔn ni kan ɛmɛ xeni ɖo zinzin kpo onu nyinywɛ, a bo sɔ ɖo Ejiputi we oto la nu. 34 O ba mɔ ɖo onujikpɔntɔye do oto la mɛ, ye ba nɔ yi ɛjinukun laye we maɖo atun, gbɔn Ejiputi we oto la mɛ, le ɛji jijɛ taŋu we oxwe acowe laye mɛ. 35 Ye na kpli onuɖuɖu ɖo onyi le oxwe nywɛ xeye ni gbɔn nɔ laye mɛ. O ba na ogbe, ye ba kpli ɛjinukun gbɔn toxoye mɛ, ye ba kpe ŋukunsin do ye wu na we. 36 E ba nyi onuɖuɖu xena ye na kpli ɖo onyi na Ejiputi we oto la na oxwe acowe we xovɛ xeni na va tɔn la. E mɛ, xovɛ la ko mɔ vɔ okun na otovi laye nɔ o.»
Falawɔn sɔ Jozɛfu do ɖo oga do oto zɛtɛye etɔn nu
37 Aɖaŋu na Jozɛfu ɖe la, jɛŋu na Falawɔn kpodo xɔsudanwatɔ etɔnye seŋu. 38 Falawɔn bo lɔ na xɔsudanwatɔ etɔnye tun mɔ: «Mí kpewu na mɔ kpɔn ɛmɛ bu xe mɛ na Mawu we Gbigbɔ le ɖi dahwe xe ha?» 39 Mi wɛ Falawɔn lɔ na Jozɛfu tun mɔ: «Xena Mawu na na o nyɔ onu mɛ la zɛtɛye, ɛmɛ ti ɔn ɖo zinzin kpodo onu nyinywɛ ɖi myɔ ha o. 40 Mi wɛ dɔn, myɔ wɛ ko na sɔ ɖo oto tɛye nu. Otovi tɛye zɛtɛye bo na nɔ zɔn do ogbeɖiɖe tɔwe ji. Xɔlu na mɔ ko nyi jan wɛ na dɔn na ko na do ɖo ɛcɛ hugan we.» 41 Falawɔn la bo mɔ lɔ na Jozɛfu tun mɔ: «Kpɔn, ko sɔ Ejiputi we oto la zɛtɛye sɔ do alɔ mɛ na we.» 42 Mi wɛ Falawɔn ɖe josi dido we alɔgan etɔn le alɔ bo sɔ do alɔ na Jozɛfu, bo do cigan we awu ni-i, bo sɔ sika we oɣlɔ sɔ do okɔ ni-i. 43 E bo na na e ɖyɛ ahwanhun etɔn owegɔ mɛ, ɛmɛye bo le ŋukɔn ni-i bo do axwa nɔ tun mɔ: «Onu le do!»
Lena Falawɔn sɔ Jozɛfu sɔ ɖo Ejiputi we oto la zɛtɛye nu ɖo mɛ.
44 Falawɔn la mɔ lɔ na Jozɛfu tun mɔ: «Mɔ wɛ nyi Falawɔn, vɔ, na ɔn na ogbe, ɛmɛ ti ɔn kɔ alɔ nɔ gbɔɔn do ɖe afɔ nɔ, le Ejiputi we oto la mɛ seŋu.» 45 E mɛ godo, Falawɔn ɖo nyikɔ na Jozɛfu tun e bo nyi Safunati-Panɛya. E bo sɔ Asɛnati Potifela vyɛ nyɔnuvi sɔ ni-i, e bo sɔ ɖe. Potifela la bo nyi Oni we toxo we hunnɔ. Mi wɛ Jozɛfu tɔn, bo gbɔn Ejiputi we oto la mɛ. 46 Oxwe ogban wɛ le ota na Jozɛfu, le hwexenu na ye kplɔ-ɛ va Falawɔn, Ejiputi we xɔlu la, we ŋukɔn.
Xena Jozɛfu lɛ le Falawɔn kɔn, e va yi gbɔn Ejiputi we oto la zɛtɛye mɛ. 47 Le oxwe acowe xe mɛ na ɛji ɖo na jɛ taŋu le la, ɛjinukun le oto la mɛ gbagbagba. 48 Jozɛfu bo kpli oxwe acowe xeye mɛ na ɛji jɛ le, le Ejiputi la, we ɛjinukun zɛtɛye, bo xuxu ye ɖo onyi le toxoye mɛ. E na na ye bɛ ɛjinukun xeni le ogle ɖekpekpe mɛ, do toxo xeni tɛkpɔ ye mɛ. 49 Jozɛfu kpli ɛjinukun ɖo onyi gbagbagba ɖi ɛxuta we okɔ ha. E su gbɔɔn na e gbɔjwɛ jo akɔnŋuta wiwa do, ɖo e gbɔn ojlɛ wu.
50 Gbɔxwe xovɛ we oxwe la na do va, Asɛnati xeni nyi Potifela Oni we hunnɔ vyɛ nyɔnuvi la, ji ovi ŋusunglo owe na Jozɛfu. 51 Jozɛfu bo ɖo nyikɔ na ovi tantyan la tun Manase, ɖo, e lɔ tun mɔ: «Mawu na na ko wɔn vivɛsise tɛye zɛtɛye, bo wɔn klan na ko klan le didaye we xwedo zɛtɛye wu.» 52 E bo yɔ ovi owegɔ la tun Eflayimu, ɖo, e lɔ tun mɔ: «Mawu na na ko ji ovi le oto xe mɛ na ko kpe ofun le.»
53 Oxwe acowe xeye mɛ na ɛji na jɛ taŋu le laye, va yi le Ejiputi we oto la mɛ. 54 Mi wɛ oxwe acowe xeye mɛ na xovɛ na tɔn le laye bɛ, ɖi lena Jozɛfu lɔ-ɛ ɖo saa ha pɛpɛpɛ. Xovɛ tɔn gbɔn oto zɛtɛye mɛ, vɔ, onuɖuɖu bo le Ejiputi we oto mɛ. 55 Xena xovɛ va tɔn le Ejiputi we oto la zɛtɛye mɛ, otogun la do axwa bo do byɔ onuɖuɖu Falawɔn. E bo lɔ na ye tun mɔ: «Mi va yi kpɔn Jozɛfu, a bo wasi onu xena e na lɔ na mi.» 56 Xovɛ la syɛnxu gbɔn oto la mɛ seŋu. Mi wɛ Jozɛfu hun ofi xeye na e xuxu ɛjinukun do laye, bo sa ɛjinukun na Ejiputitɔye. Vɔ, xovɛ la bo mɔ syɛnxu do e ji nɔ le Ejiputi. 57 Ɛmɛye nɔ sɔn ɛgbɛ la we ofi zɛtɛye seŋu, a bo va Ejiputi, a do va xɔ ɛjinukun le Jozɛfu si, ɖo, xovɛ la syɛnxu nɔ gbɔn nyixɔ la ji seŋu.