Jakɔbu ɖo vikpɛ etɔnye ɖodan Ejiputi
42
1 Jakɔbu se tun ɛjinukun bo le Ejiputi, mi wɛ e lɔ na vikpɛ etɔnye tun mɔ: «Ɛlɛ dɔn mi do kpɔn ŋumɛ na mianɔniɔye nɔ? 2 Mi kpɔn, ko se tun ɛjinukun bo le Ejiputi. Mi yi, a bo yi xɔ va na mí. E mɛ, mí ba nɔ ɛgbɛ, mí ko mɔ ku nɔ.» 3 Mi wɛ, Jozɛfu we fofo owo laye, yi Ejiputi, a do va yi xɔ ɛjinukun. 4 Vɔ, Jakɔbu ɔn sɔ Bɛnyaminu xeni nyi Jozɛfu nɔvyɛ sɔ ɖodan, ɖo, e lo lɔ nɔ tun mɔ: «Onu nyanyla ɖe ni ká va yi jɔ do e ji o.» 5 Izrayɛli we vikpɛ laye va ɛjinukun xɔ gbe, ɖi ɛmɛ gbokpweye can ha, ɖo, xovɛ la tɔn le Kana we oto mɛ taŋu.Jozɛfu kpodo fofo etɔnye kpe
6 Jozɛfu wɛ kpa le oto la mɛ, emyɔ wɛ nɔ sa ɛjinukun na otovi zɛtɛye. Fofo etɔnye bo va, bo do onu odo ni-i, bo cɔn ŋumɛ onyi. 7 Xena e kpɔn ye, e nyɔ ye, vɔ, e ɔn sɔ eɖe sɔ xlɛ ye, e bo kan oxo ye se kpodo ogbe sinsyɛn kpo tun mɔ: «Bɔ lɛ mi sɔn?» Ye bo ɖo e wu ni-i tun mɔ: «Kana we oto mɛ wɛ mí sɔn, a do va xɔ ɛjinukun.»
8 Jozɛfu nyɔ fofo etɔn laye, vɔ, yee ɔn mɔ nyɔ-ɛ o. 9 Mi wɛ Jozɛfu flin odrɔ xeye na e ku do ye wu saa laye, e bo lɔ na ye tun mɔ: «Onudokantɔye wɛ mi nyi, mi va bo na do va kpɔn ofi xena oto le nuvo do ye.» 10 Ye bo lɔ tun: «Mɔsinha hɛn mɔ ɛmɛ ɖaxo! Ɛjinukun xɔ gbe wɛ mí ɛmɛ odansɔvi tɔweye va. 11 Otɔ ɖokpo vikpɛye wɛ mí nyi seŋu, oxojɔxo wɛ mí lɔ nɔ, mí odansɔvi tɔweye ɔn nyi onudokantɔye!» 12 Vɔ, e lɔ na ye tun mɔ: «Ojo wɛ, mi va bwɛ a do va kpɔn ofi xena oto la le nuvo do ye wɛ.» 13 Ye bo mɔ lɔ ni-i tun mɔ: «Mí ɛmɛ odansɔvi tɔweye, nɔvi ŋusunglo weve wɛ mí nyi saa, otɔ ɖokpo bɛ ji mí, le Kana. Kpɔn, vikpɛvi la le míatɔ kɔn fifi trololo, ɛmɛ ɖokpo ko mɔ le.» 14 Mi wɛ Jozɛfu lɔ tun mɔ: «Oxo xena ko lɔ na mi nɔ wɛ nyi tun, onudokantɔye wɛ mi nyi. 15 Didokpɔn xena ko na wasi na mi xɛn: ko ta Falawɔn na mi, tun keŋu gbɔxwe mi na sɔn le oto xe mɛ, mia nɔvyɛ vikpɛvi la jan wɛ na va gbɔxwe. 16 Mi sɔ ɛmɛ ɖokpo sɔ ɖodan le mia mɛ, ni a va yi kplɔ-ɛ do va, ɛmɛ gbokpweye ba nɔ ogankpamɛ. E mɛ, ko ba kan odo se na oxo miatɔnye a do kpɔn tun oxojɔxo wɛ jaa. Na e ɔn nyi mɔsinha, ko ta Falawɔn na mi, onudokantɔye wɛ mi nyi.»
17 Jozɛfu bo tu ye do ogankpamɛ do okpɔ na onyihinhɔn atɔn. 18 Onyihinhɔn atɔngɔ la gbe, e lɔ na ye tun mɔ: «Mɔ, ko nɔ vɔ Mawu, mi kpɔn, onu xena mi na wa a do nɔ ɛgbɛ xɛn: 19 Na e nyi tun oxojɔxo jan wɛ mi lɔ, be ɛmɛ ɖokpo na nɔ ogankpa xe mɛ na ye tu mi do la, mi ɛmɛ gbokpweye ba hɛn ɛjinukun va yi na xwedo miatɔn xeye ni le xovɛ ye. 20 E mɛ godo, mi ba kplɔ mia nɔvyɛ kpɛ la do va na-a. E mɛ, ko ba do kpɔn tun oxojɔxo bɛ miye bo lɔ nɔ, mi ko mɔ ku nɔ.» Ye bo wasi mɔsinha. 21 Vɔ, le yenɔniɔye mɛ, ye bo lɔ nɔ tun mɔ: «Huun! Onu xena mí wa kpo mía nɔvyɛ Jozɛfu, we otodindɔn wɛ jɛ mía ji, ɖo, mí kpɔn vivɛ xena e se nɔ le hwexenu na e ɖe kuku na mí nɔ, vɔ, mí ko ɖo oto-e o, mi wɛ dɔn vivɛ sise xe do jɛ mía ji nɔ.» 22 Hlubɛnu bo lɔ na ye tun mɔ: «Ko ɔn gbɛ na mi tun miye boo ká wa onu nyanyla ɖe kpo ovi la wɛɛ? Vɔ, mi ɔn ɖo oto-o, fifi, ohlɔn etɔn xɛn ye byɔ mí nɔ.» 23 Ye ɔn nyɔ-ɛ tun Jozɛfu lo se oxo xena ye lo lɔ nɔ la, ɖo, na e lɔ oxo na ye nɔ, ɛmɛ wɛ nɔ ɖe ogbe gɔnmɛ na ye. 24 Mi wɛ Jozɛfu tɔn le ye kɔn, bo fan avin. Xena e lɛkɔ va ye kɔn, e lɔ oxo na ye, bo wle Simɛnyɔ le ye mɛ, bo na na ye bla-ɛ le ŋumɛ na ye.
Jozɛfu we fofo laye trɔ sɔn yi Kana
25 Jozɛfu ɖe ogbe tun ye boo do ɛjinukun do ati yetɔnye mɛ ni a bo gɔ, a bo sɔ ɛmɛ ɖokpo-ɖokpo we oho sɔ ɖo ati etɔn mɛ, a bo mɔ na ye onu xena ye na ɖu le omɔ ji. Ye bo wasi mɔsinha na ye. 26 Ye do agban yetɔnye do osɔkɛtɛ yetɔnye ji, bo sɔn.
27 Xena ye jɛ ofi xena ye na dɔ le ozan mɛ, ɛmɛ ɖokpo hun ati etɔn, a do na onuɖuɖu osɔkɛtɛ etɔn, mi wɛ e kpɔn oho etɔn le ɛjinukun la ji le ati la mɛ. 28 E bo do axwa bo lɔ na nɔvyɛye tun mɔ: «Ye sɔ oho tɛye sɔ na-a, mi xɛn le ati tɛye mɛ!» Oji gbado na ye, ye bo titɔ nɔ, bo kan yenɔniɔye se nɔ tun mɔ: «Ɛlɛ nyi xe na Mawu wasi kpo mí?»
29 Xena ye gbɔn va yetɔ Jakɔbu kɔn le Kana, ye to onu xeni jɔ do ye ji zɛtɛye ni-i, 30 bo lɔ tun mɔ: «Ɛmɛ xeni kpa le oto la mɛ, lɔ oxo na mí kpodo ogbe sinsyɛn kpo, bo sɔ mí do kpɔn onudokantɔye. 31 Mí bo ɖo e wu ni-i tun mɔ: mí ɔn nyi onudokantɔye, oxojɔxo bɛ mí bo lɔ nɔ. 32 Nɔvi ŋusunglo weve wɛ mí nyi saa, otɔ ɖokpo bɛ ji mí, mía nɔvyɛ ɖokpo ko mɔ le, vikpɛvi la le míatɔ kɔn le Kana. 33 Mi wɛ dahwe xeni kpa le oto la mɛ la, lɔ na mí tun mɔ, lena he bo na wa a do kpɔn tun míye bo lɔ oxojɔxo nɔ bɛ xɛn: míye boo jo ɛmɛ ɖokpo ɖo onyi le míye mɛ, a bo sɔ ɛjinukun sɔ va yi na xwedo míatɔn xeye ni le xovɛ ye. 34 E mɛ godo míye a bo hɛn mía nɔvyɛ vikpɛvi la va na he. E mɛ, he a bo do nyɔ-ɛ tun míye bo ɔn nyi onudokantɔye, vɔ, oxojɔxo bɛ míye bo lɔ. E mɛ, he bo na jo mía nɔvyɛ la do na mí, a bo jo míye do na míye a bo gbɔn oto la mɛ.»
35 E mɛ godo, ye ɖɔli ɛjinukun xeni le ati yetɔnye mɛ ye, ɛmɛ ɖokpo-ɖokpo bo kpɔn oho etɔn le bibla le ati etɔn mɛ. Xena ye kpɔn oho laye, vivɔ jɛ ye ji, yee kpodo yetɔ. 36 Mi wɛ, yetɔ Jakɔbu lɔ na ye tun mɔ: «Miye wɛ dɔn na ko do kan vikpɛ tɛyee dokpo nɔ, Jozɛfu ɔn mɔ le, Simɛnyɔ ko mɔ le. Mi xɛn, mi ka mɔ kplɔ Bɛnyaminu nɔ! Mɔ wɛ zɛtɛye lo kpɛn ota na nɔ.» 37 Mi wɛ Hlubɛnu lɔ na otɔ tun mɔ: «Na ko ɔn kplɔ-ɛ gbɔn va na we, o ba hu vikpɛ tɛye ŋusunglo owe laye. Sɔ-ɛ sɔ do asi na-a, ko na hɛn-ɛ gbɔn va na we.» 38 Jakɔbu bo ɖo e wu ni-i tun mɔ: «Ko gbɛ! Ovi tɛye ɔn kplɔ mi do nɔ. Fofo etɔn o ku, emyɔ ɖokpo gee wɛ drɔn. Mɔ xɛn o ku nyɔxo taŋu, na onu nyanyla ɖe va yi jɔ do e ji le omɔ ji, ko na le vivɛsise mɛ gbɔɔn a bo ku.»