Jakɔbu yi ogbe tun Bɛnyaminu bo na yi Ejiputi
43
1 Xovɛ la mɔ syɛnxu le Kana nɔ. 2 Xena ye ɖu ɛjinukun xeye na ye hɛn gbɔn sɔn Ejiputi la vɔ, yetɔ lɔ na ye tun mɔ: «Mi mɔ trɔ yi a bo va yi xɔ ɛjinukun va na mí.» 3 Juda bo ɖo e wu ni-i tun mɔ: «Dahwe xeni kpa le oto la mɛ, tɔ ogbe mí nywɛɖe tun, na míye bo ɔn hɛn mía nɔvyɛ vikpɛvi la do va, míye boo ká va tɔn le ŋumɛ na he o.» 4 Na o yi ogbe tun mía nɔvyɛ boo kplɔ mí do, mí na yi, a bo va yi xɔ onuɖuɖu va na we. 5 Vɔ, na o gbɛ tun e bo ɔn yi nɔ, míye can ɔn yi nɔ, ɖo, dahwe la lɔ na mí tun mɔ: «Na mia nɔvyɛ ɔn le ɛtɛ na mi, mi ká va tɔn le ŋumɛ na.» 6 Izrayɛli bo ɖo e wu ni-i tun mɔ: «Ɛlɛ dɔn mi do wa onu vivɛ mɛ kpo-o, bo do lɔ na dahwe la tun, heye bo mɔ ɖo nɔvi bu?» 7 Ye bo ɖo e wu ni-i tun mɔ: «Dahwe la wɛ kan oxo mí se do míye kpodo xwedo míatɔn wu. E bo kan se tun míatɔ le ɛgbɛ wɛ jaa, bo mɔ kan se tun mi mɔ ɖo nɔvi bu wɛ jaa? Mí bo ɖo oxo mɛ laye wu ni-i. Naɖe mí na wa na do nyɔ-ɛ tun e bo na lɔ tun míye boo kplɔ mía nɔvyɛ vikpɛvi la do va ɖo?»8 Mi wɛ Juda lɔ na otɔ Izrayɛli tun mɔ: «Jo ovi la do, na ni a kplɔ-ɔ do. Mí a site, mí a yi, e mɛ mí ba do nɔ ɛgbɛ, mí ko mɔ ku nɔ, míye ŋutɔye, kpodo myɔ kpodo xwedo míatɔnye. 9 Ɛgbɛ etɔn le alɔ tɛye mɛ, mɔ siye wɛ o na va kan-ɛ do. Na ko ɔn hɛn do gbɔn va na we, bo sɔ do alɔ tɔwe mɛ, be ko hu ɛhwɛ do we tɛgbɛ-tɛgbɛ. 10 Na mí ɔn do va dɛn ɖoɖo leha wɛ, be mí o na yi, bo o gbɔn zɔn owe.»
11 Mi wɛ yetɔ Izrayɛli lɔ na ye tun mɔ: «Xena e le mɔsinha, be lena mi na hɛn ɖo xɛn: mi sɔ onu nywɛ xeni le oto míatɔn mɛ ɖeye do ati miatɔnye mɛ, a bo va yi na dahwe mɛ la. Mi sɔ bomu viɖe, owinsin viɖe, kpodo adlaganti kpodo ladanumu, kpodo otinkun sinsyɛn ɖeye. 12 Mi hɛn oho donu vovwe owe, mi ba tu oho xena mi kpɔn le ati miatɔnye mɛ la, tanyɔ ɛmɛ ɖe wɛ wa ofɛn, bo sɔ do ati miatɔnye mɛ. 13 Fifi mi kplɔ mia nɔvyɛ la, a bo trɔ sɔn yi dahwe mɛ la kɔn. 14 Mawu hɔnhlɔn zɛtɛyetɔ, ni na na dahwe la a kpɔn dɔŋuɖunu na mi, a bo jo mia nɔvyɛ ɖee la kpodo Bɛnyaminu do na mi. Mɔ, na ko na kan ovi dokpo, ma kan dokpo kpoŋu.»
Jozɛfu kpodo nɔvyɛye mɔ kpe zɔn owegɔ
15 Ye sɔ onu xena ye ka va yi na nɔ la, kpodo oho donu vovwe owe la. Yee kpodo Bɛnyaminu bo sɔn yi Ejiputi, bo va yi Jozɛfu kɔn. 16 Xena Jozɛfu kpɔn yee kpodo Bɛnyaminu kpo, e lɔ na oxwejikpɔntɔ etɔn tun mɔ: «Kplɔ ɛmɛ mɛ ye do yi oxwe tɛye gbe. Hu kanlin a bo ɖa onuɖuɖu. Mɔ kpo ye kpo wɛ na ɖu onu le ogan weve mɛ do okpɔ.» 17 Oxwejikpɔntɔ la, bo wasi ɖi lena Jozɛfu lɔ ɖo ha, bo kplɔ ye do yi Jozɛfu we oxwegbe. 18 Xena ye kplɔ ye do sɔn yi Jozɛfu we oxwe la gbe nɔ, vivɔ jɛ ye ji, ye bo lɔ tun mɔ: «Oho xena ye sɔ ɖo ati míatɔnye mɛ, le hwexenu na mí va oto la mɛ tantyan la wɛ dɔn na ye do kplɔ mí do sɔn nɔ. E mɛ, ye na hwlɛndo a bo zɔn jɛ mía ji, a bo yi osɔkɛtɛ míatɔnye, a bo sɔ mí do wasi ɛmɛxixɔye.» 19 Mi wɛ ye tɛkpɔ Jozɛfu we oxwejikpɔntɔ la, le oxwe la we agbo mɔnu, bo lɔ ni-i tun mɔ: 20 «Kafla, ɛmɛ ɖaxo, mí o va bwɛ ɖe tantyan bo do va xɔ onuɖuɖu. 21 Xena mí va yi jɛ ofi xena mí na dɔ le ozan mɛ, bo hun ati míatɔnye, ɖokpo-ɖokpo míatɔn kpɔn oho etɔn le ɛjinukun la ji le ati la mɛ, oho xena mí tu la pɛpɛpɛ. Vɔ, mí hɛn oho laye va fifi, 22 bo mɔ hɛn oho bu a do xɔ onuɖuɖu. Mí ɔn nyɔ ɛmɛ xeni sɔ oho la sɔ do ati mɛ na mí saa.» 23 Oxwejikpɔntɔ la bo ɖo e wu na ye tun mɔ: «Ayi miatɔn ni jɛ odo, mi ká mɔ vɔ. Mawu miatɔn, miatɔ we Mawu, wɛ sɔ dɔkun sɔ do ati miatɔnye mɛ. Oho xena mi do xɔ onu la, ko o yi-i.»
Oxwejikpɔntɔ la bo kplɔ Simɛnyɔ va na ye, 24 bo kplɔ ye do ɖyɛ Jozɛfu we oxwe la gbe. E bo hɛn ɛsin va na ye, na ye a do klɔ afɔ, e bo na onuɖuɖu osɔkɛtɛ yetɔnye. 25 Ye jla onu xeye na ye ka na nɔ laye ɖo onyi, bo tre kpɔn Jozɛfu we viva nɔ le ogan weve la mɛ. Ɖo, ye se tun ye bo na ɖu onu le blɛ. 26 Xena Jozɛfu gbɔn va oxwegbe, ye sɔ onunina xena ye hɛn va oxwe la gbe ye, sɔ ni-i, bo do onu do ni-i. 27 Kpodo ogbe fifa, e do ogbe na ye, bo kan ye se tun mɔ: «Miatɔ nyɔxonɔ xe we oxo na mi lɔ na-a la, naɖe e le ɖo? E mɔ gbɛ le ɛgbɛ?» 28 Ye bo ɖo e wu ni-i tun mɔ: «Ɛɛn, míatɔ odansɔvi tɔwe la, le nywɛɖe, e bo mɔ gbɛ le ɛgbɛ.» Ye bo jɛ klita bo do onu odo. 29 Jozɛfu ɖe okɔ, bo kpɔn nɔvyɛ Bɛnyaminu, onɔvyɛ ŋutɔ-ŋutɔ. Mi wɛ e kan ye se tun mɔ: «Mia nɔvyɛ vikpɛvi xe we oxo na mi lɔ na-a la mɛ?» E bo mɔ lɔ tun: «Mawu ni nyɔ dɔmɛ do wu we, ovi tɛye.»
30 Xena Jozɛfu kpɔn nɔvyɛ la, vivɔfun nyi-i taŋu, avin bo sɔ-ɛ. E bo yawu ɖyɛ oxɔ etɔn mɛ, bo va yi fan avin. 31 Xena e fun ŋumɛ vɔ, e lɛkɔ va, bo ɖu eɖe ji, bo tun ye boo ma onuɖuɖu la. 32 Jozɛfu ɖokpo wɛ nɔ onuɖuka etɔn nu, yee can bo ɖu onu do ovo, Ejiputitɔ xeye na e yɔ va oxwe etɔn gbe ye can bo ɖu onu do ovo. Ɖo, Ejiputitɔye ɔn ɖo na ɖu onu kpodo Heblitɔye, e nɔ xyɔ lanmɛ na ye. 33 Jozɛfu nɔvyɛ laye bo xlɔn onyi le ŋukɔn ni-i, nwi-nwi, sɔn ɛmɛhyɔn ji gbɔɔn do yi vikpɛvi ji. Ye bo kpɔn yenɔniɔye nɔ, e bo kpaca do ye nɔ. 34 Jozɛfu na na ye ba le onuɖuɖu xeni le akɔn mɛ ni wu na nɔvyɛye. Bɛnyaminu we onuɖuɖu bo su hugan fofo etɔnye tɔn zɔn atun. Yee kpo emyɔ kpo, ɖu bo nu gbɔɔn e bo ye bo mu.