Jozɛfu mɔ do nɔvyɛye kpɔn ke
44
1 Onu mɛ laye godo, Jozɛfu ɖe ogbe na oxwejikpɔntɔ etɔn tun mɔ: «Do ɛjinukun do ɛmɛ xeye we atiye mɛ, gbɔɔn ye ba gɔ, o ba do xena ye kpewu na hɛn a, a bo sɔ oho ɛmɛ ɖokpo-ɖokpo tɔn sɔ ɖo ɛjinukun la ji ni-i, le ati la mɛ. 2 O ba mɔ sɔ kɔkpo tɛye xena ye sɔ oganwe do wasi sɔ do vikpɛvi la we ati mɛ le ɛjinukun la ji, a bo mɔ sɔ oho etɔn can sɔ do e ji.» E bo wasi ɖi lena Jozɛfu lɔ ɖo ha. 3 Xena onyi hɔn, ye ɖe omɔ na yee kpodo osɔkɛtɛ yetɔnye. 4 Ye lɛ le toxo la mɛ, vɔ, ye ɔn jɛ dindyɔnu ɖe, mi wɛ Jozɛfu lɔ na oxwejikpɔntɔ etɔn tun mɔ: «Site, jɛ ɛtɛ na ɛmɛ mɛ laye, a bo va yi tu ye do, a bo kan ye se tun mɔ: ɛlɛ jɔ mi do sɔ nyanyla do tu axɔ na onywɛ? 5 Mi ɔn nywɛ tun kɔkpo mɛ la wɛ xwetɔ tɛye nɔ do nu ɛsin, bo mɔ nɔ do kpɔn olu wɛɛ? Onu nyanyla mɛ mi wa.»6 E bo va yi tu ye do oxojɔxo, bo lɔ oxo mɛ laye na ye. 7 Ye bo ɖo e wu tun mɔ: «Ɛmɛ ɖaxo, ɛlɛ jɔ o do lɔ oxo ɖo mɔsinha? Odansɔvi tɔweye ɔn kpewu na do onu mɔsinhatɔn sin kpɔn gbeɖe. 8 Kpɔn, oho xena mí kpɔn le ati míatɔnye mɛ, mi hɛn sɔn Kana we oto mɛ va na we. Naɖe mi na mɔ va fin oho alo sika le xwetɔ tɔwe we oxwegbe ɖo? 9 Ɛmɛ xe kɔn na ye na kpɔn kɔkpo la le, le mí odansɔvi tɔweye mɛ, ɛmɛ la na ku, míye ŋutɔye can bo na trɔ zun ɛmɛxixɔ na we.» 10 Oxwejikpɔntɔ la lɔ tun mɔ: «Pɛɛ, oxo xena mi lɔ la, ji wɛ ko le fifi. Ɛmɛ xe kɔn na ko na kpɔn kɔkpo la le, na trɔ zun ɛmɛxixɔ tɛye, ɛhwɛ ba jo mi ɛmɛ gbokpweye.» 11 Ye bo jɛ agban yetɔnye ɖo ote bleŋu, ɛmɛ ɖokpo-ɖokpo bo hun ati etɔn. 12 Oxwejikpɔntɔ la bo jɛ ati laye mɛ giglo kpɔn ji, bo bɛ sɔn ɛmɛhyɔn la ji, bo va yi vɔ do vikpɛvi la ji, kɔkpo la bo va yi le Bɛnyaminu we ati mɛ. 13 Mi wɛ ye vun ye ŋutɔye we awu le okɔ. Ɛmɛ ɖokpo-ɖokpo bo mɔ do agban na osɔkɛtɛ etɔn, ye bo trɔ va toxo la mɛ.
Juda lɔ oxo do hwlɛn ota na Bɛnyaminu
14 Juda kpodo nɔvɛyee va Jozɛfu we oxwegbe, e bo mɔ gbɛ le oxwe la gbe. Ye bo cɔn ŋumɛ onyi le ŋukɔn ni-i. 15 Mi wɛ Jozɛfu lɔ na ye tun mɔ: «Ɛlɛ nyi e mɛ na mi do sin mɛ, mi ɔn nyɔ-ɛ tun ɛmɛ ɖi mɔ ha nɔ kpɔn olu wɛɛ?» 16 Juda bo ɖo e wu ni-i tun mɔ: «Ɛmɛ ɖaxo, oxo ŋukɔ lɛ mí na lɔ fifi? Ɛmɛ ɖaxo, oxo ŋukɔ lɛ mí na lɔ fifi gbɔɔn ɛhwɛ míatɔn ba jɔ? Mawu wɛ ɖe agɔ xena mí odansɔvi tɔweye jɛ ɖo agbaŋugba. Mi wɛ dɔn, mí na nyi ɛmɛxixɔ tɔweye, míye kpodo ɛmɛ xe si na ye kpɔn kɔkpo la le.» 17 E bo lɔ na ye tun mɔ: «Ko ɔn do onu mɔsinhatɔn sin nɔ kpɔn gbeɖe. Ɛmɛ xe si na ye kpɔn kɔkpo la le jan wɛ na nyi ɛmɛxixɔ tɛye. Mi ɛmɛ gbokpweye, mi trɔ sɔn yi miatɔ kɔn le fifa mɛ.»
18 Juda tɛkpɔ Jozɛfu bo tun mɔ: «Ɛmɛ ɖaxo, kafla, ɖe omɔ na mɔ odansɔvi tɔwe, na ma lɔ oxo ɖokpo na we, ká do aɖi do-o, ɖo, ko nyɔ-ɛ tun o ɖo ɛcɛ ɖi Falawɔn ha. 19 Tantyan na mí do va, o kan mí se tun míatɔ le ɛgbɛ wɛ ja, bo mɔ kan se tun mí mɔ ɖo nɔvi bu wɛ ja. 20 Mí bo ɖo e wu tun mɔ, míatɔ le, bo ku nyɔxo, e bo ɖo ovi ɖokpo xena ye ji ni-i le nyɔxo mɛ etɔn, ovi mɛ la we fofo bo o ku, emyɔ ɖokpo gee wɛ nyi onɔ vyɛ xeni drɔn, otɔ bo yi owan ni-i. 21 O bo lɔ na mí tun mɔ, míye boo kplɔ-ɛ do va, na he ŋutɔn a bo kpɔn-ɛ kpo ŋukunsin. 22 Mí bo ɖe e mɛ na we tun, ovi mɛ la bo ɔn kpewu na lɛ le otɔ kɔn, tun na e lɛ le e kɔn, otɔ bo na ku. 23 O bo lɔ na mí odansɔvi tɔweye tun na míye bo ɔn hɛn mía nɔvyɛkpɛ mɛ la do va, míye boo ká va tɔn le ŋumɛ na he o. 24 Mi wɛ, hwexenu na mí trɔ sɔn yi odansɔvi tɔwe didaye la kɔn, mí lɔ oxo xena o lɔ laye ni-i. 25 Xena e va lɔ na mí tun míye boo mɔ trɔ va xɔ onuɖuɖu ke, 26 mí lɔ ni-i tun mɔ: mí ɔn yi nɔ. Mía nɔvyɛkpɛ la ɖo na kplɔ mí do, gbɔxwe mí na yi, ɖo, mí ɔn kpewu na va yi tɔn le ŋumɛ na dahwe la, na mía nɔvyɛkpɛ la ɔn kplɔ mí do. 27 Mi wɛ, didaye odansɔvi tɔwe la, lɔ na mí tun mɔ: “Mi nywɛ nywɛɖe tun siyea, ovi owe jan wɛ e ji na-a, 28 ɖokpo ko mɔ le, ko kan do e ji tun kanlin hɔntun tɔn ɖe wɛ vunvun-i, ko ɔn mɔ kpɔn-ɛ gbeɖe gbɔɔn do va jɛ fifi. 29 Fifi mi ka mɔ kplɔ ovi ɖokpo xeni drɔn la le kɔn ye nɔ. Mɔ xɛn o ku nyɔxo taŋu, na onu nyanyla ɖe va yi jɔ do e ji le omɔ ji, ko na le vivɛsise mɛ gbɔɔn a bo ku.” 30 Fifi, na mɔ ko trɔ sɔn yi didaye odansɔvi tɔwe la kɔn, ovi xena e yi owan na taŋu la ko le ɛtɛ na mí, 31 na e ɔn kpɔn ovi la le ɛtɛ na mí, e na ku. E ba va nyi tun mí odansɔvi tɔweye wɛ hɛn vivɛsise va na míatɔ odansɔvi tɔwe la le nyɔxo mɛ etɔn, gbɔɔn e bo ku. 32 Mɔ bɔ do e wu, mɔ odansɔvi tɔwe, wɛ yi ogbe le ŋumɛ na didaye, a do kpe ŋukunsin do ovi la wu. Ko bo lɔ ni-i tun mɔ: na ko ɔn hɛn do gbɔn va na we, be ko hu ɛhwɛ do we tɛgbɛ-tɛgbɛ. 33 Fifi, ko ɖe kuku na we, mɔ odansɔvi tɔwe, ma nɔ bwɛ, a bo nyi ɛmɛxixɔ tɔwe, do domɛ na vikpɛvi la, na emyɔ, a kplɔ fofo etɔn gbokpweye do, a bo sɔn. 34 Ɖo, naɖe ko na wa a do trɔ sɔn yi didaye kɔn, na nɔvye la ɔn le kpo-o? O o, ko ɔn jlo na va yi kpɔn vivɛ xena didaye na se.»