Jozɛfu ɖe eɖe sɔ xlɛ nɔvyɛye
45
1 E mɛ godo, Jozɛfu ɔn mɔ kpewu ɖu eɖe ji le ŋumɛ na ɛmɛ xeye ni le aha ni-i ye, mi wɛ, e do axwa, bo lɔ tun mɔ: «Mi ɖe ɛmɛ xeye ni le aha na-a zɛtɛye tɔn.» Ɛmɛ bu ti ɔn mɔ drɔn le aha ni-i, gbɔxwe na e ɖe eɖe sɔ xlɛ nɔvyɛye. 2 Jozɛfu bo jɛ avin finfan ji, ogbe etɔn bo yi oji nɔ, gbɔɔn Ejiputitɔye bo se, oxo la bo va yi ɖyɛ otomɛ na ɛmɛ xeye ni le Falawɔn we oxwegbe ye can. 3 Jozɛfu lɔ na nɔvyɛye tun mɔ: «Mɔ Jozɛfu wɛ, didaye mɔ gbɛ le ɛgbɛ wɛɛ?» Nɔvyɛye ɔn kpewu ɖo oxo ti e wu ni-i o, ɖo, ayi gbado na ye. 4 Mi wɛ, Jozɛfu lɔ na ye tun mɔ: «Ko ɖe kuku, mi tɛkpɔ-ɔ.» Ye bo tɛkpɔ-ɛ. E bo lɔ na ye tun mɔ: «Mɔ wɛ nyi Jozɛfu, mia nɔvyɛ, xena mi sa le Ejiputi. 5 Vɔ, mi ká ci onulilo mɛ, mi bo ká do ɛhwɛ na miaɖe tun mi sɔ-ɔ sa, ɖo, a do hwlɛn ɛgbɛ miatɔnye gan wɛ dɔn na Mawu do sɔ-ɔ sɔ ɖodan oto xe mɛ jɛ ŋukɔn na mi. 6 Xovɛ tɔn le oto la mɛ fifi, oxwe owegɔ xɛn e wasi nɔ. Vɔ, e mɔ drɔn oxwe atun, ɛmɛ ɖe ko kpewu na lɛ ogle, gbɔɔn bo na do ɖe ɛjinukun ɖe can. 7 Mi wɛ dɔn Mawu do sɔ-ɔ ɖodan oto xe mɛ jɛ ŋukɔn na mi, na okunkan miatɔn a do gan le oto xe mɛ, a bo do hwlɛn mi ɛmɛ susu gan. 8 Fifi, miye hɛn sɔ-ɔ ɖodan bwɛ, vɔ, Mawu wɛ. Ɖo, e sɔ-ɔ sɔ ɖo ɖi otɔ ha na Falawɔn, bo na na ko kpa na Falawɔn we oxwe seŋu, bo mɔ na na ko nyi onujikpɔntɔ le Ejiputi we oto la mɛ seŋu. 9 Fifi, mi hwlɛndo a bo va yi lɔ na didaye tun mɔ: Ɛwɛn xena ovi tɔwe Jozɛfu do ɖodan we xɛn: Mawu sɔ-ɔ do wasi xwetɔ na Ejiputi we oto la seŋu, hwlɛndo, a bo va kɔn ye. 10 O na jɛ oxwe do Gocɛnu we kansinmɛ, o ba tɛkpɔ-ɔ, myɔ kpodo vikpɛ tɔweye, dagboyɔvi, gbɔgbwɛ, lɛngbɔ, nyibu, kpo onu xeni nyi tɔweye seŋu. 11 Le blɛ la, ko na kpe ŋukunsin do wu we, e mɛ onu ti ko mɔ dɛn we nɔ, myɔ kpodo xwedo tɔwe, kpodo onu xeni nyi tɔwe zɛtɛye, ɖo, xovɛ la na mɔ nɔ onyi na oxwe atun.12 Miye ŋutɔye mi kpɔn-ɛ fifi kpo ŋukunsin miatɔnye, le ota ji myɔ Bɛnyaminu nɔvye, o kpɔn-ɛ nɔ kpo ŋukunsin tɔweye, tun mɔ ŋutɔ bɛ bo lɔ oxo na mi nɔ kpodo onu tɛye. 13 Mi va yi lɔ lena ko nyi ɛmɛjɔmɛ taŋu ɖo le Ejiputi na didaye, mi ba lɔ onu xena mi kpɔn zɛtɛye ni-i. E mɛ godo mi ba yawu kplɔ didaye va bwɛ.» 14 Jozɛfu kpla asi okɔ na nɔvyɛ Bɛnyaminu, bo fan avin, nɔvyɛ Bɛnyaminu la can bo fan avin. 15 Jozɛfu kisi na nɔvyɛ gbokpweye can kpo avin kpo. Hwe mɛ nu gbɔɔn wɛ ye va kpewu lɔ oxo kpo-e.
Falawɔn yɔ Jakɔbu tun ni boo va Ejiputi
16 Le xɔlu we oxwegbe, ye se tun Jozɛfu nɔvyɛye bo va Ejiputi. Oji bo jɔ Falawɔn kpodo xɔsudanwatɔ etɔnye. 17 Falawɔn la bo lɔ na Jozɛfu tun mɔ: «Lɔ oxo xe na nɔvweye: mi do agban na kanlin miatɔnye, a bo yi Kana we oto mɛ, 18 a bo kplɔ miatɔ kpodo xwedo miatɔnye va kɔn ye. Ko na ɖo tɛnxo nywɛ na mi le Ejiputi we oto mɛ, mi bo na ɖu ɛjinukun nywɛ xeni le oto la mɛ ye. 19 Myɔ, o na mɔ lɔ na ye tun mɔ: mi sɔ gɛkɛvi xena kanlin nɔ dɔn ye sɔn bwɛ, a do va yi bɛ vikpɛ miatɔnye, mia syɛye, mi ba kɔ miatɔ, a bo va. 20 Ŋukunsin miatɔnye ni ká ci onu xena mi na jo do Kana ye ji o. Ɖo, tɛnxo nywɛ xeni le Ejiputi we oto la mɛ seŋu na nyi miatɔn.»
21 Izrayɛli vikpɛ laye bo wasi ɖo mɔsinha. Jozɛfu bo na ye gɛkɛvi xena kanlin nɔ dɔn ye, bo mɔ na ye onu xena ye na ɖu le omɔ la j ɖi, lena Falawɔn na ogbe etɔn ɖo ha. 22 E bo na awu xeni vɛ oho ye ɛmɛ ɖokpo-ɖokpo. Vɔ, e na ohogan sandi atɔn Bɛnyaminu kpodo awu atun. 23 E bo sɔ onu xeye sɔ ɖodan otɔ: osɔkɛtɛ owo, ye bo do Ejiputi we ɛjinukun nywɛ-nywɛye do ye ji, kpodo osɔkɛtɛ osi owo, ye bo do ɛjinukunye, kpɔnnɔye, onuɖuɖu hamɛ-hamɛye do ye ji, na otɔ we omɔ zinzɔn. 24 Jozɛfu bo ɖe ogbe na nɔvyɛye, ye bo sɔn, e bo lɔ na ye tun mɔ: «Mi ká va yi wa ojlɛ le omɔ ji o!» 25 Ye lɛ le Ejiputi, bo va yi jɛ Kana we oto mɛ, le yetɔ Jakɔbu kɔn. 26 Ye bo lɔ ni-i tun mɔ: «Jozɛfu mɔ gbɛ le ɛgbɛ! Emyɔ la bɛ kpa ɛcɛ le Ejiputi we oto la mɛ seŋu.» Vɔ, Jakɔbu lintin le ote, ɖo, e ɔn kan do oxo xena ye lɔ nɔ la ji. 27 Ganke, ye lɔ oxo zɛtɛye xena Jozɛfu lɔ na ye, ni-i, e bo kpɔn gɛkɛvi xena Jozɛfu sɔ ɖodan, a bo do kɔ-ɛ laye, hwemɛnu wɛ zozo ɖe ɖyɛ lanmɛ na yetɔ Jakɔbu le. 28 Izrayɛli bo lɔ tun mɔ: «E kpe! Ovi tɛye Jozɛfu mɔ gbɛ le ɛgbɛ! Ma va yi kpɔn-ɛ gbɔxwe a ku.»