Jakɔbu sɔn yi Ejiputi
46
1 Mi wɛ Izrayɛli jɛ omɔ kpodo onu xeni nyi etɔn zɛtɛye seŋu. Xena e jɛ Bɛ-Ceba, e wasi ovɔsinsanye na otɔ Izaki we Mawu. 2 Le ozan mɛ la mɛ, Mawu lɔ oxo na Izrayɛli gbɔn ɖiɖexlɛye mɛ, bo tun: «Jakɔbu! Jakɔbu!» E bo yi ogbe bo tun «Ago!» 3 Mawu bo lɔ tun mɔ: «Mɔ wɛ nyi Mawu, didawe we Mawu. Ká vɔ Ejiputi yiyi, ɖo, ko na sɔ we do wasi otogun ɖaxo ɖe le blɛ la. 4 Mɔ ŋutɔ, ko na kplɔ we do yi Ejiputi la, a bo kplɔ jijimɛvi tɔweye do gbɔn. Jozɛfu we alɔ mɛ wɛ o na ku do.» 5 Jakɔbu lɛ le Bɛ-Ceba. Izrayɛli vikpɛye bo kɔ yetɔ Jakɔbu, kpodo vikpɛ yetɔnye kpodo ye syɛye do gɛkɛvi xena Falawɔn sɔ ɖodan a do va yi bɛ ye laye mɛ. 6 Ye bo bɛ kanlin yetɔnye, kpodo dɔkunnu yetɔn xeye na ye ɖo le Kana we oto la mɛ ye. Jakɔbu va sɔn yi Ejiputi kpodo jijimɛvi etɔnye seŋu. 7 Vikpɛ etɔn nyɔnusiye kpodo ŋusungloye wɛ, dagboyɔvi etɔn nyɔnusiye kpodo ŋusungloye wɛ, jijimɛvi etɔn zɛtɛye wɛ e kplɔ do va Ejiptuti.Jakɔbu we hwɛndo xeni va Ejiputi
8 Izrayɛli we vikpɛ ŋusunglo xeye ni va Ejiputi we nyikɔye xɛn: Jakɔbu kpodo vikpɛ ŋusunglo etɔnye.
10 Simɛnyɔ vikpɛ ŋusungloye xɛn: Yemuwɛli, Yaminu, Ohadi, Yakinu, Sowa, kpodo Cawulu xena e ji le nyɔnu Kanatɔ ɖe wu.
11 Lewi vikpɛ ŋusungloye xɛn: Gɛcɔnu, Kexati, Melali.
12 Juda vikpɛ ŋusungloye xɛn: Ɛɛ, Onani, Cela, Pelɛsi kpo Zela. Vɔ, Ɛɛ kpodo Onani bo o ku le Kana we oto mɛ. Pelɛsi vikpɛ ŋusungloye wɛ nyi Ɛsilɔnu kpodo Xamulu.
13 Isakaa vikpɛ ŋusungloye xɛn: Tola, Puwa, Yacubu, kpo Cimlɔnu.
14 Zabulɔn vikpɛ ŋusungloye xɛn: Selɛdi, Elɔnu, Yaxleli.
15 Vikpɛ ŋusunglo xeye na Leya ji na Jakɔbu le Padanu-Alamu ye mɛ, ovyɛ nyɔnuvi Dina can bo bɔ do ye wu. Vikpɛ etɔn ŋusungloye kpodo nyɔnusi wasi ogban ŋukun atɔn.
16 Gadi vikpɛ ŋusungloye xɛn: Sefyonu, Hagi, Cuni, Esibɔnu, Eri, Alodi, Aleli.
17 Acɛ vikpɛ ŋusungloye xɛn: Yimina, Ciwi, Belya, kpodo ye nɔvyɛ nyɔnusi Sela. Belya vikpɛ ŋusungloye xɛn: Xebɛ kpodo Malikyɛli. 18 Vikpɛ ŋusunglo xeye na Zilipa ji na Jakɔbu ye mɛ, yee kpodo vikpɛ yetɔnye wasi fɔtɔn ŋukun ɖokpo. Laban wɛ sɔ Zilipa la na ovyɛ nyɔnusi Leya.
19 Hlacɛli Jakɔbu syɛ, we vikpɛ ŋusungloye xɛn: Jozɛfu kpodo Bɛnyaminu. 20 Asinati Onu we hunnɔ Potifela vyɛ nyɔnuvi, ji Manase kpodo Eflayimu na Jozɛfu le Ejiputi.
21 Bɛnyaminu vikpɛ ŋusungloye xɛn: Bɛla, Bɛkɛ, Acibɛli, Gela, Naama, Ɛxi, Hlɔci, Mupimu, Xupimu, Adi.
22 Vikpɛ ŋusunglo xeye na Hlacɛli ji na Jakɔbu ye mɛ, yee kpodo vikpɛ yetɔnye wasi wenɛ. 23 Dan vyɛ ŋusunglo xɛn: Xucimu.
24 Nɛfutali vikpɛ ŋusungloye xɛn: Yaxisɛli, Guni, Yesɛ, Cilɛmu.
25 Vikpɛ ŋusunglo xeye na Bilixa ji na Jakɔbu ye mɛ. Yee kpodo vikpɛ yetɔnye wasi acowe. Laban wɛ sɔ Bilxa la na ovyɛ nyɔnusi Hlacɛli.
26 Jakɔbu we ɛmɛ zɛtɛye xeni tɔn sɔn ɛhun etɔn mɛ, bo va Ejiputi, wasi kanɖeko atun ŋukun ɖokpo. Visyɛye ko le e mɛ o. 27 Vikpɛ owe wɛ ye ji na Jozɛfu le Ejiputi. Jakɔbu we ɛmɛ zɛtɛye seŋu xeni va Ejiputi wasi kanɖe ogban.
Jozɛfu va kpe otɔ do Gocɛnu
28 Jakɔbu sɔ Juda ɖodan Jozɛfu ni a do va kpe-e le Gocɛnu. Mi wɛ ye va jɛ Gocɛnu we kansin la mɛ. 29 Jozɛfu na na ye dɔn ahwanhun etɔn va ni-i, e bo ɖyɛ e mɛ a do va yi kpe otɔ Izrayɛli le Gocɛnu. Xena e gbaŋu do otɔ la wu, e zɔn kpla okɔ ni-i, bo bɛ avin finfan, bo tɛ do e wu. 30 Izrayɛli lɔ ni-i tun mɔ: «Xena ko kpɔn ŋumɛ tɔwe vɔ, o bo le ɛgbɛ, ko hɛn fifi, ko na ku faa.» 31 Jozɛfu bo lɔ na nɔvyɛye kpodo otɔ we xwedo we ɛmɛ gbokpweye tun mɔ: «Ma va yi klan Falawɔn tun nɔvyee kpodo didaye we xwedo xeni le Kana we oto mɛ saa la bo gbɔn va kɔn ye. 32 A bo mɔ lɔ ni-i tun mɔ: Kanlinkplɔtɔye wɛ ye nyi, bo nɔ win gbɔgbwɛye kpodo lɛngbɔye. Ye bo hɛn gbɔgbwɛ yetɔnye, lɛngbɔye, nyibu yetɔnye kpodo onu xena ye ɖo zɛtɛye do va. 33 Na Falawɔn va yɔ mi, bo kan mi se tun odan ŋukɔn lɛ mi nɔ wa jaa, 34 mi na ɖo e wu ni-i tun mɔ: “Kanlinye wɛ odansɔvi tɔweye nɔ win sɔn ovii gbɔɔn do va jɛ egbe, ɖi mía dagbwaye tɔn ha.” E mɛ, mi ba do nɔ Gocɛnu we kansin la mɛ.» Ɖo, kanlinkplɔtɔye we onu nɔ xyɔ ɛwu na Ejiputitɔye.