47
1 Jozɛfu va yi lɔ na Falawɔn la tun mɔ: «Didaye kpodo nɔvyee kpo sɔn Kana we oto mɛ, bo va. Ye bo hɛn gbɔgbwɛ yetɔnye, lɛngbɔye, nyibu yetɔnye, kpodo onu yetɔn zɛtɛye do va. Ye le Gocɛnu we kansinmɛ.» 2 E mɛ godo, Jozɛfu kplɔ nɔvyɛ ŋusunglo atun bo sɔ xlɛ Falawɔn. 3 Falawɔn bo kan nɔvyɛ laye se tun mɔ: «Odan ŋukɔ lɛ mi nɔ wa?» Ye bo ɖo e wu ni-i tun mɔ: «Gbɔgbwɛye kpo lɛngbɔye wɛ mí odansɔvi tɔweye, nɔ win ɖi mía dagbwaye ha.» 4 Ye bo mɔ lɔ na Falawɔn la tun mɔ: «Mí va, a do va nɔ oto xe la mɛ viɖe, ɖo ama ti ɔn mɔ le na gbɔgbwɛ kpodo lɛngbɔ mí odansɔvi tɔweye tɔn ye o. Mɔ bɔ do e wu, xovɛ la syɛnxu le Kana we oto la mɛ diin. Fifi, mí ɖe kuku, na ogbe mí odansɔvi tɔweye, na mí a nɔ Gocɛnu we kansin la mɛ.» 5 Falawɔn lɔ na Jozɛfu tun mɔ: «Didawe kpo nɔvweye mɛ gbɔn va kɔn we, 6 Ejiputi we oto la le alɔ mɛ na we, ɖo tɛnxo nywɛ na didawe kpodo nɔvweye, ye ni nɔ Gocɛnu we kansin la mɛ. E nyi tun o nyɔ ɛmɛ xeye ni bizo le ye mɛ ye, be bo sɔ ye na ye a kpɔn kanlin tɛyee ji.»7 Jozɛfu bo kplɔ otɔ Jakɔbu can va sɔ xlɛ Falawɔn. Jakɔbu bo do ogbe na Falawɔn la, bo xo fifa we ɛɖɛ ni-i. 8 Falawɔn bo kan-ɛ se tun mɔ: «Oxwe nɛmu lɛ o ɖo?» 9 Jakɔbu bo ɖo e wu ni-i tun mɔ: «Ko dan gbɔn gbeji-gbeji nɔ fifi, e wasi oxwe sandi ɖokpo ota atɔn. Oxwe tɛye ɔn su, ye bo mɔ nyi oganxixo nyanylaye na-a. Oxwe tɛyee ɔn su ɖi oxwe xena dagboyee nɔ ɛgbɛ na bo do dan gbɔn gbeji-gbeji.» 10 Xena Jakɔbu klan Falawɔn la bo xo fifa we ɛɖɛ ni-i vɔ, e lɛ le e kɔn.
11 Jozɛfu bo va yi ɖo tɛnxo nywɛ na otɔ kpodo nɔvyɛye le Ejiputi we oto la mɛ, le Hlamusɛsi we kansinmɛ ɖi lena Falawɔn ɖe ogbe etɔn ɖo ha. 12 E bo na onuɖuɖu otɔ, nɔvyɛ laye, kpodo otɔ we xwedo la seŋu. Lena ye su ɖo, we onuɖuɖu wɛ e na ye.
Jozɛfu kplɔ Ejiputi we oto la le xovɛ hwenu
13 Xovɛ la syɛnxu gbɔɔn onuɖuɖu ɔn mɔ le ofi ti. Ejiputitɔye kpodo Kanatɔye bo lo ɖitɔ nɔ do xovɛ la wu. 14 Jozɛfu kpli oho zɛtɛye xena Ejiputitɔye kpodo Kanatɔye do va xɔ ɛjinukunye le e si la, bo bɛ oho la sɔ va yi ɖo Falawɔn we oxwegbe. 15 Oho va vɔ le Ejiputi kpodo Kana. Ejiputitɔye bo va Jozɛfu kɔn, bo lɔ ni-i tun mɔ: «Na mí onuɖuɖu. Mí ɔn mɔ ɖo oho ɖe, o na kpɔn mí nɔ lesinha, mí ba ku wɛɛ?» 16 Jozɛfu bo ɖo e wu na ye tun mɔ: «Xena oho ɔn mɔ le mia si, mi bɛ kanlin miatɔnye va, a do va yi onuɖuɖu.»
17 Ye hɛn kanlin yetɔnye va na Jozɛfu. E bo na ye onuɖuɖu do osɔ yetɔnye nu, gbɔgbwɛye, lɛngbɔye, onyibuye, kpodo osɔkɛtɛ yetɔnye nu. Oxwe mɛ la mɛ, Jozɛfu na ye onuɖuɖu do kanlin yetɔn zɛtɛye nu. 18 Xena oxwe mɛ la va yi vɔ, ye trɔ va e kɔn le oxwe owegɔ la mɛ, bo lɔ ni-i tun mɔ: «Ɛmɛ ɖaxo, mí ɔn kpewu na hwla do we tun oho bo ɔn mɔ le mía si, kanlin míatɔnye can bo o trɔ zun tɔwe vɔ. Míye ŋutɔye kpodo nyixɔ míatɔnye jan wɛ drɔn na we. 19 O na kpɔn míye kpodo nyixɔ míatɔnye nɔ lesinha, mí ba ku wɛɛ? Xɔ míye kpodo nyixɔ míatɔnye, o ba na mí onuɖuɖu. Mí na trɔ zun ɛmɛxixɔye na Falawɔn, nyixɔ míatɔnye ba trɔ zun etɔn. Na mí ɛjinukun xeye na mí na xwa ye, na mía nɔ ɛgbɛ, mí ko mɔ ku nɔ, ogle míatɔnye can ko mɔ ci vɔvɔ nɔ.»
20 Mi wɛ Jozɛfu xɔ Ejiputi we nyixɔ zɛtɛye na Falawɔn. Ɖo, Ejiputitɔ ɖokpo-ɖokpo sa ogle etɔn do xovɛ xeni syɛnxu do ye nɔ la wu. Oto la zɛtɛye seŋu bo trɔ zun Falawɔn tɔn. 21 Sɔn ofi xena Ejiputi we oto la bɛ sɔn, gbɔɔn do yi ofi xena e vɔ do, Jozɛfu na na otovi laye trɔ zun ɛmɛxixɔ seŋu. 22 Hunnɔye we nyixɔ jan wɛ Jozɛfu ɔn xɔ, ɖo, Falawɔn ɖe osɛn tɔn bo nɔ do kpedo ye wu. Onuɖuɖu yetɔn Falawɔn bɛ nɔ na ye. Mi wɛ dɔn na yee ɔn do sa nyixɔ yetɔnye.
23 Jozɛfu bo va lɔ oxo na otogun la, bo tun mɔ: «Mi kpɔn, ko xɔ miye kpodo nyixɔ miatɔnye na Falawɔn fifi. Ɛjinukunye xɛn, mi va yi xwa do ogle miatɔnye ji. 24 Vɔ, na ɛjinukun la ɖiɖe va ya, mi na sɔ maɖo-atun sɔ na Falawɔn. Akpa ɛnɛ gbokpweye ba nyi miatɔn kpodo xena mi na mɔ va xwa ye, e ba nyi onuɖuɖu na miye kpodo vikpɛ miatɔnye kpodo ɛmɛ xeye ni le oxwe míatɔnye gbe ye.» 25 Ye bo ɖo e wu ni-i tun mɔ: «Ɛmɛ ɖaxo, o hwlɛn ɛgbɛ míatɔn gan, bo ɖe dɔmɛnywɛ sɔ xlɛ mí. Mí na nyi ɛmɛxixɔye na Falawɔn.» 26 Mi wɛ Jozɛfu ɖe osɛn tɔn, osɛn la bo mɔ le gbɔɔn do va jɛ egbe. Osɛn la wɛ nyi tun: «Le Ejiputi we oto mɛ, ɛjinukunye we maɖo atun nyi Falawɔntɔn.» Hunnɔye we nyixɔ jan wɛ ɔn nyi Falawɔntɔn.
Jakɔbu we oxo kpotwi xena e lɔ ye
27 Izrayɛli we vikpɛye, jɛ oxwe do Ejiputi, le Gocɛnu. Ye bo trɔ zun nyixɔtɔye, bo ji ovi do blɛ, bo su gbagbagba. 28 Jakɔbu nɔ Ejiputi na oxwe fɔtɔn ŋukun owe. Oxwe xena e nɔ ɛgbɛ na zɛtɛye bo wasi oxwe sandi ɖokpo ota ɛnɛ ŋukun acowe.
29 Xena Izrayɛli kpɔn tun okuzan hetɛye bo tɛkpɔ nɔ, e yɔ ovyɛ Jozɛfu, bo lɔ ni-i tun mɔ: «Ko ɖe kuku, na o kɔn dɔmɛ do wu ye oxojɔxo, ko ɖe kuku na we, sɔ alɔ tɔwe sɔ ɖo atagboa tɛye gɔ, a bo xo ogbe, a bo ɖe owan yiyi kpodo dɔmɛnywɛ sɔ xlɛ-ɔ. Ko ɖe kuku, ká ɖi-u do Ejiputi. 30 Na ko sɔn yi dagboye kɔn le okutomɛ, kɔ ocɔ tɛye sɔn Ejiputi a bo va yi ɖi-u do yɔgun yetɔn mɛ.» Jozɛfu bo ɖo e wu ni-i tun mɔ: «Ko na wasi-i ɖi lena o lɔ-ɛ ɖo ha.» 31 Jakɔbu bo lɔ ni-i tun mɔ: «Ta onu na-a.» Jozɛfu bo ta onu ni-i. Mi wɛ, Jakɔbu do onu odo le ojan etɔn we otob, bo do ɛkpɛ ni-ic.