Jakɔbu xo fifa we ɛɖɛ na Jozɛfu we vikpɛye
48
1 Onu mɛ laye we godo, ye va lɔ na Jozɛfu tun mɔ: «Kpɔn didawe ɔn le ozan.» E bo kplɔ vikpɛ etɔn owe laye, Manase kpodo Eflayimu, ye bo yi. 2 Mi wɛ ye lɔ na Jakɔbu tun mɔ: «Vwe Jozɛfu va kɔn we.» E bo jɛ gbagba bo xlɔn onyi le ojan etɔn ji. 3 E bo lɔ na Jozɛfu tun mɔ: «Mawu hɔnhlɔn zɛtɛyetɔ, ze do ŋumɛ na-a, le Luzu, le Kana we oto mɛ, bo do na-a. 4 Bo lɔ na-a tun mɔ: “Ko na na na o na ji, a bo gba okun, o ba do trɔ zun dagbo-dagbo na otogun susu. Ko na sɔ oto xe sɔ na jijimɛvi tɔweye, e bo na nyi yetɔn tɛgbɛ-tɛgbɛ.” 5 Fifi, vikpɛ ŋusunglo owe xeye na ye ji na we le Ejiputi keŋu gbɔxwe ko va laye, ye trɔ zun mɔ ŋutɔ vikpɛye. Eflayimu kpodo Manase na nyi tɛyee ɖi Hlubɛnu kpodo Simɛnyɔ ha. 6 Vɔ, vikpɛ xeye na o na va ji do ɛtɛ na yee, na nyi ovi tɔwe. Fofo yetɔnvxeye we cinnɔye mɛ, wɛ yee na yi yetɔnye le. 7 Ɖo, hwexenu na ko lɛkɔ sɔn Padanu bo tɛkpɔ Eflata nɔ, Hlacɛli ku le omɔ ji, le aha na-a, le Kana. Ko ɖi-i do blɛ, le Eflata we omɔ la ji, le Bɛtɛlɛxɛmu. 8 Xena Izrayɛli kpɔn Jozɛfu vikpɛ laye, e kan se tun mɔ: Onu lɛ nyi e mɛ ye?» 9 Jozɛfu bo ɖo e wu na otɔ tun mɔ: «Vikpɛ xeye na Mawu na-a le bwɛ ye wɛ.» Jakɔbu bo tun mɔ: «Ko ɖe kuku, kplɔ ye va kɔn ye na ma xo fifa we ɛɖɛ na ye.»10 Vɔ, Izrayɛli we ŋukunsinye ci flifli, ɖo, e ku nyɔxo. Jozɛfu bo kplɔ vikpɛ etɔn laye do va, Jakɔbu bo wle ye do akɔn nu, bo kpla asi okɔ na ye. 11 Izrayɛli bo lɔ na Jozɛfu tun mɔ: «Ko ɔn mɔ nyɔ-ɛ tun ko na va kpɔn ŋumɛ tɔwe can, ganke, e mi xɛn Mawu na na ko va kpɔn gbɔɔn bo kpɔn vikpɛ tɔweyee.» 12 Mi wɛ Jozɛfu kɔ vikpɛ etɔn laye le ataa ji na otɔ, bo jɛ klita, bo do onu odo ni-i. 13 E mɛ godo, e hɛn alɔ na vikpɛ etɔn owe laye. E hɛn Eflayimu kpodo aɖusilɔ, e ba do le amyɔ ji na Izrayɛli, bo hɛn Manase kpodo amyɔlɔ emyɔ ba do le aɖusi mɛ na Izrayɛli. E bo dɔn ye tɛkpɔ-ɛ. 14 Vɔ, Izrayɛli sɔ alɔb ɖe gbɔn ɖe ji, e sɔ aɖusilɔ etɔn sɔ ɖo ota na Eflayimu, ovi owegɔ la, bo sɔ amyɔlɔ etɔn sɔ ɖo ota na Manase ovi tantyan la. 15 E bo xo fifa we ɛɖɛ na Jozɛfu, bo lɔ tun mɔ:
«Mawu xena dagboye Ablaxamu kpodo didaye Izaki se otonu na
Mawu xeni nyi kplɔtɔ tɛye sɔn hwexenu na ko jɔ, gbɔɔn do va jɛ egbe
16 Mawu we ɛwɛndotɔ xeni ɖe-o tɔn le onu nyanyla zɛtɛye mɛ
Ni do na vikpɛ xeye
Dogbɔn ye ji, nyikɔ tɛye, didaye Izaki we nyikɔ kpodo dagboye Ablaxamu we nyikɔ, ni ci onyi,
Ye ni ji, a bo gba okun,
Gbɔn nyixɔ la ji.»
17 Xena Jozɛfu kpɔn tun otɔ bo sɔ aɖusilɔ etɔn sɔ ɖo ota na Eflayimu, e ɔn jɛŋu ni-i. Mi wɛ e wle otɔ la we alɔ, bo na do ɖe-e tɛ le ota na Eflayimu, a bo sɔ ɖo ota na Manase, 18 bo lɔ na otɔ la nɔ tun mɔ: «Didaye, mɔsinha hɛn mɔ, ovi tantyan la xɛn, sɔ aɖusilɔ tɔwe sɔ ɖo ota ni-i.» 19 Vɔ, otɔ bo gbɛ, bo lɔ tun mɔ: «Ko nyɔ-ɛ, ovi tɛye, ko nyɔ-ɛ, emyɔ can na trɔ zun otogun, bo na nyi ɛmɛ ɖaxo, ganke nɔvyɛkpɛ na nyi ɛmɛ ɖaxo hugan-ɛ, jijimɛvi etɔnye bo na nyi otogun susu.»
20 Le gbegbe mɛ la, e xo fifa we ɛɖɛ na ye bo lɔ tun mɔ: «Nyikɔ miatɔnye ji wɛ Izrayɛli vikpɛye na xo fifa we ɛɖɛ gbɔn, ye na nɔ lɔ tun mɔ: Mawu ni wasi dɔmɛnywɛ na we ɖi lena e wasi na Eflayimu kpodo Manase kpo ɖo ha.» Lena Jakɔbu sɔ Eflayimu sɔ ɖo ŋukɔn na Manase ɖo mɛ. 21 E mɛ godo, Izrayɛli lɔ na Jozɛfu tun mɔ: «Kpɔn, ko na ku zaanɖe, vɔ, Mawu bo na le kpodo mi, e bo na kplɔ mi do yi mia dagbwaye we oto mɛ. 22 Mɔ, ko sɔ Sicɛmu we oto la sɔ na we, e mɛ la wɛ na nyi akpa xena o na do hugan xena nɔvweye na va yi. Nyixɔ mɛ la wɛ ko sɔ dɛnkpwe kpodo oda do yi le Amɔ we jijimɛviye si.»