Jakɔbu lɔ onu xeni na va jɔ swɛ do vikpɛ etɔnye ji na ye, bo mɔ xo fifa we ɛɖɛ na ye
49
1 Mi wɛ Jakɔbu yɔ vikpɛ etɔnye bo lɔ na ye tun mɔ:«Mi kpli mia ɖe,
Na ma lɔ onu xeye ni na va jɔ do mia ji le swɛ godo ye na mi.
2 Mi kpli miaɖe, a bo ɖo oto-o, mɔ Jakɔbu vikpɛye,
Mi ɖo oto mɔ miatɔ Izrayɛli.
3 Myɔ Hlubɛnu, myɔ wɛ nyi ovi tantyan tɛye,
Hɔnhlɔn tɛye we okun sinsyɛn, myɔ wɛ nyi ovi tantyan xena ko ji, e bo ɖe xlɛ tun ko bo nyi ŋusunglo.
O ɖo hɔnhlɔn hugan nɔvwe zɛtɛye, ye bo nɔ ɖo bubu na we.
4 O le ɖi otɔ sisa xeni le adan ji ha,
O ɔn mɔ nyi tantyan le nɔvweye mɛ nɔ o,
Ɖo, o dɔ mɔ didawe syɛ kɔn le
Ojan tɛye ji,
Xena o wasi mɔsinha, o ɖu osu na ojan la.
5 Simɛnyɔ kpodo Lewi, ohagbɛ wɛ ye nyi
Ye sɔ ogbeta a do hɛn onugble kpodo adan.
6 Vɔ, mɔ, ko ɔn jlo na ɖo alɔ le e mɛ kpodo ye,
Ko ɔn jlo na nɔ ɖo alɔ le ogbe bibla yetɔnye mɛ
Ɖo, ye hu ɛgbɛtɔye do aɖi wu,
Ye do afɔku onyisuye, e bo jɛŋu na ye.
7 Ko do onu aɖidido yetɔnye, ɖo e syɛnxu diin
Ko do onu onuwiwa gbɔn ojlɛ wu yetɔn, ɖo, ye sin ɛdɛn.
Ko na ma jijimɛvi yetɔnye gbɔn Jakɔbu we oto la mɛ seŋu,
Ko na kankan jijimɛvi yetɔnye gbɔn Izrayɛli we oto la zɛtɛye mɛ seŋu.
8 Juda myɔ, nɔvweye, na nɔ kanfu we,
O na kpa ɛcɛ do kɛntɔ tɔweye ji gannu-gannu,
Didawe vikpɛye na nɔ do onu odo le ŋukɔn na we,
9 Juda ovi tɛye, o ɖo hɔnhlɔn ɖi kinnikinni winwyan ha,
Xeni wle olan etɔn bo ɖu, bo lɛkɔ va nɔtyɔn etɔn.
E xwi, bo hlɔn onyi ɖi kinnikinni ha.
Ɖi kinnikinni osi ha, onu lɛ xa bo na fɔn-ɛ site?
10 Xɔlu we otinkplɔ, na nɔ Juda we akɔta mɛ tɛgbɛ.
Xɔluye we otinkplɔ la na nɔ asi na jijimɛvi etɔnye tɛgbɛ.
Gbɔɔn do jɛ hwexenu na ɛmɛ xe tɔna na e nyi na va.
Ɛmɛ xena otogunye na se otonu na.
11 Vɛntinye na su le vɛngle etɔn mɛ gbɔɔn
E bo na nɔ sin okan na osɔkɛtɛ etɔn xena xovɛ ci nɔ, do e mɛ.
E bo na tɔ okan osɔkɛtɛvi etɔn do vɛntin adodwe we aba wu
Vɛn na le e si gbɔɔn e bo na nya awu etɔn le e mɛ.
E ba nya awu gblɛlɛ etɔn le hlɛzɛn we ɛsin mɛ.
12 E nu vɛn gbɔɔn ŋukunsin etɔn bo bya jɛglɛ.
E nu nyibunɔsin gbɔɔn aɖu etɔnye bo wee.
13 Zabulɔn na ɖo nɔtyɔn etɔn do ɛxuto.
Nɔtyɔn etɔn na nyi ɖaka ɖaxoye we glityɔn.
Nyixɔ etɔn na yi kaka Sidɔn we toxo mɛ.
14 Isaka le ɖi osɔkɛtɛ xeni ɖo hɔnhlɔn ha, bo nɔ hlɔn okpwe mɛ.
15 E kpɔn tun tɛnxo xeni bo le la bo nyɔ, oto la bo jɔhun,
E xa okpo a do hɛn agban,
Ɛmɛ xixɔ we odan wiwa, wɛ ye zin do okɔ ni-i.
16 Dan na nɔ ɖɔ ɛhwɛ na otogun etɔn
Ɖi lena e le ɖo le Izrayɛli we akɔta gbokpweye mɛ ha.
17 Dan le ɖi odan xeni le omɔ ji ha,
Ɖi zakpata ha, le omɔto:
E nɔ xu aɖu afɔ na osɔye
Osɔkuntɔ ba jɛ wɛnsin.
18 Xwetɔ Mawu, ko kpɔn omɔ na we nɔ tun myɔ bo na hwlɛn-ɔ gan.
19 Gadi, fyanfinnɔye we ogbɛ na lɛ do-e.
Vɔ, e na kpe ahwan kpo ye, a bo jɛ ɛtɛ na ye.
20 Acɛ we oto na na ɛjinukun taŋu,
Xɔlu we onuɖuɖu nywɛ na nɔ sɔn e kɔn.
21 Nɛfutali le ɖi ɛtyɛ, xena ye jɛ ɖo ote ha.
E bo ji ovib jijɔhunye.
22 Jozɛfu nyi otin xeni nɔ syɛn nywɛɖe,
Bo wu do otɔjɔtyɔn ɖe.
Alɔklan etɔnye yi oji gbɔɔn bo gbɔn ogli wu.
23 Kanhwandatɔye do hwɛvo le e wu, bo da-ɛ kanhwan.
Bo sɔ-ɛ do ɖo kɛntɔ
24 Ganke e hɛn kanhwan etɔn wu nywɛɖe.
Alɔ kpodo alɔgba etɔnye bizo
Dogbɔn Mawu hɔnhlɔn zɛtɛyetɔ xeni nyi Mawu Jakɔbutɔn we hɔnhlɔn we alɔgɔ mɛ,
Dogbɔn kplɔtɔ etɔn, Izrayɛli we ɛkpɛnc ɖaxo la, we nyikɔ mɛ.d
25 Dogbɔn didawe we Mawu ji, alɔgɔ na va na we
Dogbɔn Mawu hɔnhlɔn zɛtɛyetɔ ji, dona na nyi tɔwe
Donaye ni sɔn jigbe, le jiŋukunsin, a bo nyi tɔwe.
Ɛsin ni nɔ tɔn sɔn nyixɔ gɔ na we
Nyɔnusiye na ji, kalinye bo na ji
26 Fifa we ɛɖɛ xena mɔ didawe lo xo na we nɔ ye,
Hugan nyɔna okpó mavɔmavɔye tɔn
E le ŋukɔn na nyɔna kpokpwe xixoye tɔn.
Fifa we ɛɖɛ la ni nɔ ota na Jozɛfu,
Ni ja do emyɔ xeni kpa ɛcɛ na nɔvyɛye ji.
27 Bɛnyaminu le ɖi ohla xeni nɔ vunvun olan ɖu ha.
Kɛklɛnu, e nɔ vunvun olan ɖu.
Hwedo, e ba ma olan xena e wle ye.»
28 Izrayɛli vikpɛye ni wasi akɔta weve laye, ye mɛ. Oxo xena yetɔ lɔ do ye wu bɛ mɛ. E xo fifa we ɛɖɛ na ye, ɛmɛ ɖokpo-ɖokpo kpodo ɛɖɛ xeni jɛ ni-i.
Jakɔbu ku
29 E mɛ godo, Jakɔbu na ogbeɖiɖe xe vikpɛ laye, bo lɔ tun mɔ: «Na ko ku, mi ɖi-u do dagboyee ha, le ogun ɖaxo mɛ, le ogle xeni nyi Eflɔntɔn saa ji. Eflɔn bo nyi Hɛti we jijimɛvi. 30 Ogun la le ɛkpɛn ɖaxo mɛ le Makpela, e bo kpan ŋukɔn Mamule, le Kana we oto mɛ. Ablaxamu wɛ xɔ ogle mɛ la, le Eflɔn Hɛti we jijimɛvi si bo do wasi ocɔɖityɔn. 31 Blɛ wɛ ye ɖi Ablaxamu kpodo osyɛ Sala do. Ye bo mɔ ɖi Izaki kpodo osyɛ Hlebeka can do blɛ. Blɛ la ke wɛ ko ɖi Leya do. 32 Ogle la kpodo ɛkpɛn ɖaxo xeni le e ji la wɛ ye xɔ le Hɛti we jijimɛviye si.» 33 Xena Jakɔbu lɔ oxo mɛ laye na vikpɛ etɔnye vɔ, e hlɔn onyi bo bɛ afɔ etɔnye do ojan la ji, bo sɔn yi dagbwaye kɔn le okutomɛ.