Ye va yi wasi Jakɔbu we ocɔnuye
50
1 Jozɛfu zɔn jɛ otɔ we ocɔ la ji, kpo avin kpo, bo kɔn ɖasin do e ji, bo kisi ni-i. 2 E mɛ godo, e ɖe ogbe na doto odanwatɔ etɔnye tun ye boo si ami na he didaye we ocɔ. Doto laye bo si ami la na ocɔ la, e ba do nɔ onyi na azan susu. 3 Ye sɔ onyihinhɔn kanɖe bo do si ami la na ocɔ la. Azan xena ami sisi la nɔ ɖu, e mi mɛ. Ejiputitɔye bo fan avin do ta ni-i na onyihinhɔn kanɖegban.4 Xena avin finfan we azan laye va yi vɔ, Jozɛfu lɔ na ɛmɛ xeye ni bɔ do Falawɔn la wu ye tun mɔ: «Ko ɖe kuku, na mi yi owan na-a, ko ɖe kuku, mi do ɛwɛn xe na Falawɔn na-a: 5 Gbɔxwe didaye na do ku, e lɔ tun mɔ boo ta onu tun Kana we oto mɛ bɛ mɔ bo na ɖi ocɔ hetɛye do. Le yɔgun xena emyɔ ŋutɔ o jlaɖo mɛ. Mi wɛ dɔn, ko ɖe kuku, ma yi, a bo va yi ɖi didaye we ocɔ, e mɛ godo, ko na trɔ gbɔn.» 6 Falawɔn la lɔ tun ye boo va yi lɔ na Jozɛfu tun mɔ: «Yi, a bo va yi ɖi didawe we ocɔ, ɖi lena e byɔ we, o bo xo ogbe etɔn ni-i ɖo ha.» 7 Jozɛfu jɛ omɔ a do va yi ɖi otɔ la, mi wɛ, Falawɔn we xɔsudanwatɔ zɛtɛye, ɛmɛhyɔn xeye ni le oxwe etɔn gbe ye, kpodo Ejiputi we oto mɛhyɔn zɛtɛye, jɛ ɛtɛ ni-i. 8 Jozɛfu we xwedo zɛtɛye, nɔvyɛye, kpodo otɔ we xwedo we ɛmɛ gbokpweye can, bo kplɔ ye do. Vikpɛ viviye, kpodo gbɔgbwɛye, lɛngbɔye kpodo onyiye jan wɛ ci Gocɛnu we kansin la mɛ. 9 Ahwanhunye le ɛtɛ ni-i, ɛmɛye can bo le osɔye ji bo le ɛtɛ ni-i. Ɛmɛ xeni le ɛtɛ ni-i laye su taŋu. 10 Ye va yi jɛ Golɛnua-Atadi, le Judɛn we otɔ godo. Ye wasi ocɔ nu le blɛ, bo fan avin, bo fan avin taŋu. Jozɛfu bo nɔ lutu mɛ na otɔ na onyihinhɔn acowe. 11 Kanatɔ xeye ni le oto la mɛ ye, kpɔn lutu xe mɛ na ye le, le Golɛnu-Atadi la, gbɔɔn bo lɔ tun mɔ: «Lutu mɛ taŋu wɛ Ejiputitɔye le.» Mi wɛ dɔn ye do na nyikɔ tɛnxo mɛ la, xeni le Judɛn le otɔ la godo tun mɔ: «Abɛli Mizrayimub».
12 Mɔsinha wɛ Jakɔbu vikpɛye wasi onu xena yetɔ o lɔ na ye saa tun ye boo wasi na he, ɖo mɛ. 13 Ye kɔ yetɔ we ocɔ do yi Kana we oto mɛ, ye bo ɖi-i do ogun ɖaxo xeni le ɛkpɛn ɖaxo mɛ le Makpela, e bo kpan ŋukɔn Mamule, le ogle xena Ablaxamu xɔ le Eflɔn, Hɛti we jijimɛvi si, bo do ɖo ocɔɖityɔn. 14 Xena ye ɖi yetɔ vɔ, Jozɛfu, kpo nɔvyɛye, kpo ɛmɛ zɛtɛye xeye ni kplɔ-ɛ do ye, na ocɔ ɖiɖi laye, gbɔn va Ejiputi.
Jozɛfu na oji ɖiɖe nɔvyɛye
15 Xena Jozɛfu nɔvyɛye kpɔn tun yetɔ bo ku, ye lɔ na yenɔniɔye tun mɔ: «Jozɛfu hɛn e na do okɛn mí, a bo ɖe onu nyanyla zɛtɛye xena mí wasi kpo-e ye, we atɔ na mí.» 16 Mi wɛ ye do ɛwɛn ɖodan Jozɛfu, bo lɔ tun mɔ: «Gbɔxwe didawe na do ku, e lɔ tun mɔ: 17 “Oxo xena mi na lɔ na Jozɛfu xɛn: le kuku ɖiɖe mɛ, sɔ ɛhwɛ kpodo onu nyanyla ɖaxo xena nɔvweye wa do we ye, sɔ kɛ ye.” Fifi sɔ ɛhwɛ mɛ la sɔ kɛ mí, Mawu xena didawe sɛn ke wɛ míye can sɛn nɔ.» Hwexenu na ye do ɛwɛn mɛ la na Jozɛfu nɔ, e bɛ avin. 18 Mi wɛ nɔvyɛ laye ŋutɔ va e kɔn, bo jɛ klita le akɔn mɛ ni-i, bo lɔ tun mɔ: «Ɛmɛxixɔye ha wɛ mí nyi na we.» 19 Vɔ, Jozɛfu bo ɖo e wu na ye tun mɔ: «Mi ká mɔ vɔ o. Mawu we domɛ wɛ ko le? 20 Mi jlo na wasi onu nyanyla kpo-o saa, vɔ, Mawu bo ɖɔli nyanyla la do trɔ zun onywɛ, e mɛ, onu xeni lo jɔ nɔ le egbe ba do jɔ, ɛmɛ susu ba do gan. 21 Fifi, vivɔ ti ni ká jɛ mia ji, mɔ, ko na kpe ŋukunsin do miye kpodo vikpɛ miatɔnye wu.» Jozɛfu lɔ oxo na ye kpodo owan yiyi, bo fa oji na ye.
Jozɛfu ku
22 Jozɛfu kpodo otɔ we xwedo nɔ Ejiputi. Jozɛfu bo nɔ ɛgbɛ na oxwe sandi ɖokpo ota ɖokpo. 23 E nɔ ɛgbɛ bo kpɔn ovyɛ Eflayimu we vikpɛye, bo mɔ kpɔn ovi xena vikpɛ mɛ laye va ji ye. E sɔ dagboyɔvi etɔn Makii we vikpɛye, do ɖo emyɔ ŋutɔ vikpɛye. Makii la bo nyi Manase vyɛ. 24 Gbeɖokpo Jozɛfu lɔ na nɔvyɛye tun mɔ: «Ko na ku zaanɖe, vɔ, Mawu na va gɔ alɔ na mi dandan. E na va ɖe mi tɔn le oto xe mɛ, a bo kplɔ mi do yi oto xe we ajɔgbe na e fyan na Ablaxamu, Izaki, kpo Jakɔbu mɛ.» 25 Jozɛfu bo na na Izrayɛli vikpɛ gbokpweye fyan ajɔgbe ni-i tun na Mawu va gɔ alɔ na ye, ye boo bɛ oxu hetɛye sɔn bwɛ a do sɔn. 26 Oxwe sandi ɖokpo ota ɖokpo wɛ Jozɛfu ɖo, bo do ku le Ejiputi. Ye si ami hwɛnnywɛye do ocɔ etɔn, e ba do nɔ onyi na azan susu. Ye bo sɔ-ɛ sɔ ɖo ɛkpɛn we ɖaka mɛ.