Kamannaa Yohanis 20

Lɔga Bansanɛa :Yesusi Rɛsɛyɔ

1 Na hunaa Kala Ayawsuny tewa ushaye, unga ku sabba bhelleyɔ shaw kolea bho ngani anɛa gidhanggay, Ngamariyama bere hudhukkinyana Magadhalagiye, bana na ogu chɔɔ bhogoya ku igingey. Na hunaa dokko ngonuye, aru hunde bɛa bortɔ kùnyugɛa igingey tugɔ dhaa ubullanɛ na tutuk tɛu hauye. 2 Na ngea chɔɔ bhɛa ɛlɛa :Simon Betirosi ko hira kɔbhbha Yesus ibhɛsɛna :Yesusi hini na sɛɛsɛ, “Dhaa obhonisiyo Komoru igingeyɔ na aytɛ. Na hunde ojjɛ oriye, kìmaktɔ.”

3 Na Betiros ko ngahirronu kɔbh Yesuse, bhonda na ago bhɛaa ihɛa igingeyɔ. 4 Na yɔk bhɛa anɛa ramman bere hunde hɛaye, ngessɛayɔ. Na nɔng ngandonu ku konde ngeu goore na dagɛsɛ Betiros ba na jɛmu bhogoya ku igingey sabbɔ. 5 Na dhugumo na dhenggiu igingey na dharɛsɛ ruminyaa bɔɔ kìchibɛa Yesus ku salala hɛtta ko bharasi hunde ɛl ngonuye. Nɔng bere chillo bhɔ hung na bhɛa ku igingey toye ngani kutunnukkao. 6 Na ko nɔng Simon Betiros ko na tunnugu bhogoyaa ku igingey toye. Na aru ruminyaa bɔɔ kìchibɛa Yesus ku salala hɛtta ko bharasi hunde ɛl ngonuye, 7 ko ruma dha bɔɔ kìchibɛa Yesus sabba hunde takkuynɛ na i lɛtɛtɛm bhichangge. 8 Na koo wurtɔ hira kɔbhbha Yesus wa dogɛsɛna Simona kèe Betiros ba na jimmana sabbɔ ko nɔng tunnugu toye na aru na yɛbhu. 9 Yɔk lɔga ɛlla dadabinyaa Lɔga Tumu sennɛa, “Yesus maya ale rɛ na bansanayɔ,” dha bere ngani kutunggɛsɛo. 10 Na yɔk zuga kɔbhbhɛa nɔng ku ramman koo waga doriyoa dha bɔɔ ungussɛa.

Lɔga Dhɔlɛsɛna :Yesusi Ngamariyama Bere Hudhukkinyana Magadhalagiye Rɛ

11 Na nɔng Ngamariyam chilu igingeyɔ bhɔ ngonu na turu sak sak. Na hunaa ngani ruoye, dhugumo na dhenggiu igingey. 12 Na aru zuga ekkono :Tumu gee ku ramman hunde malukkɛ ruminyaa bo hɔla na ɛl bay bhɛa bɔɔ kòjjɛa Yesuse. Na kona bere iho tana bɔɔ dhagɛa :Yesusi sabba, na kona iho gɔra jagarruny.

13 Na yɔk seyɛsɛ Ngamariyam, “Ngatɛritaye, ru ɔng?”

Na nɔng yagɛsɛ na sɛɛsɛ, “Aye dhaa zugo ibhta Komoruya nanu na aytɛ. Na chɔɔ hunde ojjɛ oriye, anye kimagiyɔ.” 14 Na hunaa ngani yokkono ngalɔkta na budhinɛnaye, aru Yesus hunde chil ngonuye. Na nɔng hunde a Yesuse dha bere imaktɔ.

15 Na sɛɛsɛ :Yesusi, “Ngatɛrita, ru ɔng? Na lami nɛng?” Na nɔng Ngamariyam se kako a hira bhɛkka ngaguonu na sɛɛsɛ, “Igge hunde bare aytɛoye, yoktogiy bhee bare ojjɛoye na kàytɛo.”

16 Na Yesus eliu nɔng na sɛɛsɛ, “Ngamariyam!”

Na nɔng budhɛ na eliu tuga Hibiru goore na seu, “Rabbuni!” (“Rabbuni” a bhɛa kènɛa, “Hira madhdhiy.”)

17 Na sɛɛsɛ :Yesusi, “Ga ngaibhbhonyi ke ngaya mɛa bhɛa Babaa nanu ngani kàbanɛo na kɔ̀gɛoye. Na nɔng mɛa ga ok na yogɛsɛ gochonginyaa ganyu na sɛɛsɛ, ‘Wa seaganyɔ, “Mɛa anye kani nganda kabansi na kɔgɔ bhɛa Babaa nanu ko naa nuye, ko bhɛa Tumu Komoruya nanu ko naa nuye.”’”

18 Na Ngamariyama bere hudhukkinyana Magadhalagiye ogo na yogɛsɛ zuga kɔbhbhɛa Yesus na sɛɛsɛ, “Wa karra Komoru!” Na koo kɔbhɛsɛ chɔɔ lɔgaa yogɛsɛna :Yesusi.

Lɔga Dhɔlɛsɛna :Yesusi Zuga Kɔbhbhɛa Nɔng Rɛ

19 Na ngakaldonu jhaynɔ yɔk zuga kɔbhbhɛa Yesus bere ɛlla dorigiye kari ke ngaya ɛngɛrsɛ gulsachina Ayhudhiye. Na chɔɔ bere nyugɛsɛnɛa rɛhi dori. Na hunaa ngani ɛlla dorigiye kari ngangaye, Yesus dhula dɛk na chilu kɛrghɛna nɛ na sɛɛsɛ, “Tɔlɔmɔ zany na tɛldi ke na bo challa!” 20 Na hunaa yogɛsɛa nganga na tewa ushaye, dhɔlɛsɛ moloa lɔmma sɛnɛ ko na lɔmma kullubhbheniyɔ. Na yɔk hunaa orrɛa Komoruye, hinisiya gɛ te hɔli goore.

21 Na koo tɔrɛ sɛgɛn na sɛɛsɛ, “Tɔlɔmɔ zany na tɛldi ke na bo challa! Na mɛa ko anye kekkung damiya bere ekkonɛanyi :Babaa nanu.” 22 Na hunaa yogoa ngalɔkta na tewa ushaye, hɔngɛsɛ na sɛɛsɛ, “Tɔlɔmɔ Kuloya Tumu. 23 Nɔng igge hunde ujjugu lɔga gɛrsa messɛa :zugu na seyɛsɛ, ‘Any kagarayɛ,’ ngalɔkta gɛye kùjjuk na garsɛ dhul. Na nɔng hunde tɔlɔmbo hinisichinne dhɛɛ na ngani ngaujjukkooye, yɔk ngalɔkta gɛ gɛrɛse ngakùjjukko na garsɛo dhul.”

Lɔga Dhɔlɛsɛna :Yesusi Tomas Rɛ

24 Na huna bere Yesus assana zugo dorigiye ngonu, bhɛa zuga gɛnyɛ ku tɔmmɔn ko ramman, na kèleo Tomas nɔng bere ningginɛnayɔ. (Nɔng Tomas sara gɛnyɛ gena keli Didimos.) 25 Na koo zuga kɔbhbhɛa Yesus yoktɛsɛ Tomas na seyɛsɛ, “Agge hunaa wa karto Komoru!”

Na nɔng sɛɛsɛ, “Anye hunde moloa lɔmma sɛnɛ bɔɔ kàragɛsɛna muddɛn ngani kàrro na kùgummo hallagiya nanu, na moloya iho kulubhbheniyɔ siyɔ ngani kìchɔrɛsɛoye, ngakɛyɛbhiyo.” 26 Na yɔk hunaa tɛlda ungo issabbay na tewa ushaye koo muktɛ dorigiye ko Tomas kari damiya bɔɔ sabbune. Na ngakaldonu, dori bere anna nyuginɛ. Na ko hunde dori kete nyuginɛ nganga, nɔng Yesus koo dhula na chilu kɛrghɛna nɛ na sɛɛsɛ, “Tɔlɔmɔ zany na tɛldi ke na bo challa!” 27 Na sɛɛsɛ Tomas, “Ga wo gɔny sɛna ganyu na kum hallagiyɔ. Na ga ittono siyɔ na ichɔrɛsɛ kullubhbheni toye bhɛa bɔɔ kɔ̀gɔdhdhanyi. Anye hunde ngani kani basiye mɛa yɛbh hung na ko hini ngadhaginɛno!” 28 Na nɔng Tomas sɛɛsɛ, “Inye ani Tumu Komoruya nanu!” 29 Na sɛɛsɛ :Yesusi, “Nɔng inye mɛa wa yɛbhu ke ngaya orrɛanyde. Na yɔk gee ngani kartanyo na yɛbhbhanyɛye, a tuhinɛ.”

Lɔga Kènno Kàtaktɛ Ngakammannaya Yesusi Bere Kɔdhdhɛsɛn :Yohanisi Ngadadabtaye

30 Nɔng Yesus huna bere ɛlla ko zuga kɔbhbhɛa nɔng, bere messo lɔga bo mɛra barara gena. Na yɔk ngalɔktonu ngadadabta toye ngani kɔ̀tɔgɔndɛsɛo. 31 Na yɔk ngalɔkta bere kɔ̀gɔdhdhɛsɛn ngadadabta toyeye, agga bere kɔ̀gɔdhdhɛsɛna na kènno yɛbhtɛ :iggeu bhɛa Yesus anɛa Kirisos ko bhɛa anɛa Eriya Tumu. Na hunde yɛbhbho nɔngge, aynde jɔanɛo basseya iho dhulde.