Lɔga Messɛa :Yesusi Lɔga Kìwacheo Na Ibhɛa :Zuga Kɔbhbhɛa Nɔng Urgusa
21
1 Na kali kona Yesus dhɔlɛsɛ zuga kɔbhbhɛa nɔng rɛ sɛgɛn yirisiya kèe Tibirado.
a Na huna dhɔlɛsɛna yɔk rɛ,
bere anna ɛnɛnggeo,
2 yɔk Simon Betiros ko Tomas ko Natinayela ku hira bere kùhudhukkono ɔra iho baa Gelila kènno Kana,
ko erroa Zɛbɛdosi ko zuga kɔbhbhɛa Yesus gena gee ku ramman,
bere ɛlla kari.
(Nɔng Tomas sara gɛnyɛ gena keli Didimos)
3 Na Simon Betiros koo sɛɛsɛ lalugɛ,
“Anye mɛa kokka urgusa ibha.”
Na ko yɔk seyɛsɛ,
“Ko agge kidhi kari ni.”
Na banda na irrɔgɔ gonggul na ago.
Na yɔk ngabartonu dhɔng,
chɔɔ urgusite dhɔnɛ ngani kibhigito dhul.
4 Na hunaa bho arsaye,
Yesus chilu yirisiyɔ tugɔ.
Na yɔk zuga kɔbhbhɛa nɔng bere imaggɛayɔ hunde a nɔngge.
5 Na nɔng eliu yɔk na ghinu na sɛɛsɛ,
“Lusa!
Urgusite dhɔnɛ kàmi ihe oo ninggɛ?”
Na yɔk yaktɛsɛ na seyɛsɛ,
“Ninggɛ dhul.”
6 Na nɔng sɛɛsɛ,
“Ga ibhta galiya ibhɛo urgusa na ujjuktɛsɛ ma tana ihɛa gonggulɔ siyɔ sɛtɛn.
Hunde messo ngangaye,
ale ibhbhoyɔ.”
Na yɔk hunaa ujjugɛsɛnɛaye,
ibhigi urgusa bo mɛra na chɔɔ bhee nguggonɛ na ghurtonɛ gonggul toye garu ke ngaya anɛ mɛriye.
7 Na yɔk bhɛa zuga kɔbhbhɛa nɔng,
hira ibhɛsɛna :Yesusi hini sɛɛsɛ Betiros,
“Ngahirronu childe dhaa a Komoru so!”
Na Simon Betiros hunaa shikko bhɛa ngahirronu anɛa Komoruye,
ibha ruma nɛnɛ bhone dhaa bhurushana sabbɔ ke bhɛaa mesɛa zinggo na dhakkusu na bɔrrɔyɛsɛ yirisi toye na kok kassa Yesus.
8 Na ko yɔk zugaa kɔbhbhɛa Yesus ku gena kɔbhta Simon Betiros gonggulɔ ga bo ghurtonɛa galiyaa ibhɛa urgusa dhinɛnɛa :urgussu.
Na tugurto chɔɔ yirisi dhey ke ngaya bere ɛlɛ yirisiyɔ tugɔ jaa bhɛa hunde kɛlɛhɛnna rɛndinde anda anna siyɔ kɛngi 200 sɔngge.
9 Na hunaa honynyo na dokkɛa ba yirisiyɔ tugɔye,
argi urgusite dhaa karak marara sambe tundɔ ko lottay.
10 Na Yesus sɛɛsɛ yɔk,
“Ga hoyɛy urgusaa ibhbho gena.”
11 Na Simon Betiros irrɔgu gonggul na ngɔga galiyaa ibhɛa urgusa dhinɛnɛa :urgussu dhik iho ma toye na tuguro yirisi dhey.
Nɔng ngagalitonu ibhɛ urgusaye bere dhinɛnɛa urgusa bo bibiyo ku 153.
Na chɔɔ ko hunde kibhigi ngaurgusa bu mɛrte,
nɔng galiya ibhɛa urgusa bere ngani kɛrrɛyɛayo.
12 Na koo Yesus sɛɛsɛ yɔk,
“Hoya usigi tila!”
Na bhɛa zuga kɔbhbhɛa nɔng,
chɔɔ inde dhɔnɛ bere gissono nɔng na ghin na senɛsɛn,
“Ani nɛng?”
bere ningginɛna dhul ke ngaya gaɛ nɔng hunde a Komoruye.
13 Na nɔng ko na ibha tila na aynɛ yɔk.
Na ibha urgusa na aynɛ sɛgɛn.
14 Nɔng Yesus huna bere bansana rɛsɛyɔ na dhɔlɛsɛna zuga kɔbhbhɛa nɔng rɛ,
mɛa hunde kɔ̀tɔrɛ ngandaye,
te jagarɛ kɛngi sizzi.
Lɔga Ghinɛa :Yesusi Betiros
15 Na yɔk hunaa ussa tila na tewa ushaye,
nɔng Yesus ghinu Simon Betiros na sɛɛsɛ,
“Eriya Yona Simone,
ngangaye ibhbhagany hini goore na chɔɔ ngalaluguya jorrondɔ?”
Na nɔng yagɛsɛ na sɛɛsɛ,
“Mmm!
Komoru,
anye hunde kibhbhaginy hini gooreye,
inye gayɔ.”
Na sɛɛsɛ :Yesusi,
“Ee,
hunde a ngangaye,
bhɛk mɛninyaa ganyu na iwo shɛɛ ni!”
16 Na ghinu sɛgɛn na sɛɛsɛ,
“Eriya Yona Simone,
ngangaye ibhbhagany hini dhere chi dha?”
Na nɔng yagɛsɛ na sɛɛsɛ,
“Mmm!
Komoru,
anye hunde kibhbhaginy hiniye,
inye gayɔ.”
Na sɛɛsɛ :Yesusi,
“Ee,
hunde a ngangaye,
iwo mɛdɛrniya ganyu na bhɛk shɛɛ ni!”
17 Na koo tɔrɛ ke jagarɛ kɛngi sizzi na ghinu sɛgɛn na sɛɛsɛ,
“Eriya Yona Simone,
ngangaye ibhbhagany hini chi dha?”
Na nɔng Betiros munyuu ke ngaya kìghinɛ jagarɛ kɛngi sizzi na kèsenɛsɛn,
“Ngangaye ibhbhagany hini chi dhaye?”
Na yagɛsɛ na sɛɛsɛ,
“Komorue,
inye ani na gai lɔgɔ kumulɔng na chɔɔ hunde kibhbhaginy hiniye,
gayɔ.”
Na sɛɛsɛ :Yesusi,
“Ee,
hunde a ngangaye,
iwo mɛdɛrniya ganyu na bhɛk shɛɛ ni!
18 A challi,
mɛa ga shigonydɔ!
Nɔng inye huna bere ngani dhakkani ngo,
ruminyaa gunyu rɛ annaa bere chibɛsɛni :ɛna na chɔɔ kɔi gɔrre hiniye.
Na nɔng hunde ale teu hiriye,
bhanyi sɛnɔ na ruminya chibbaginy :hiriyɔ tɔllɔng na chɔɔ dhiganniny gɔrre ngahinioye.”
19 Nɔng Yesus bhee bere yokkonɛ ngalɔktaye,
a ngaya dha bere se kudhugunoy lɔga Betirosi hunde ale rɛ na ajjɛ Tumu diram ɛnɛngge.
Na koo sɛɛsɛ Betiros,
“Ga kɔbhanydɔ!”
20 Na Betiros budhɛ na aru hira ibhɛsɛna :Yesusi hini hunde kɔbhbhana yɔk wurtɔye.
(Nɔng ngahirronu a hira bere kala Yesus aminɛnɛa ko zuga kɔbhbhɛa nɔng jhaynɔ,
ngireo ngo gɔra Yesusi na ghinno na senɛsɛna,
“Komorue ngangaye,
inde se kɔgɔdhaginy mirɔgaye,
a nɛng?”)
21 Na Betiros hunaa orro ngahirronuye,
ghinu Yesus na sɛɛsɛ,
“Komorue,
na ko nɔng ngahirra lɔga gɛnyɛ ale a ɛnɛng?”
22 Na Yesus yagɛsɛ na sɛɛsɛ,
“Kesea kihinnon :anynyo tɔllɔng na ga kɛtɛ basseyɔ ko bhee ale kowokkonɛ :anynyo,
na inye lɔga gɛnyɛ ghini na me ɛnɛng?
Inye maya kɔbhbhany hung!”
23 Na zugo shigi ngalɔkta na bhɛa zuga yɛbhbhɛa Yesus tɔlɔ lɔkte sennɛ,
“Ngahirronu kɔbh Yesus ibhɛsɛn :nɛa hiniye se ale ngani ngarɛsso dhul.”
Nɔng Yesus nganga bere ngani kesɛɛsɛayo.
Nɔng bere senɛsɛna,
“Kesea kihinnon :anynyo tɔllɔng na ga kɛtɛ basseyɔ ko bhee ale kowokkonɛ :anynyo,
na inye lɔga gɛnyɛ ghini na me ɛnɛng?”
24 Nɔng ngahirronu kɔbh Yesuse rɛ a hira bere orrono ngalɔkta kumulɔng kawariyɔ na dhugunɛsɛna zugo na chɔɔ kɔdhdhɛsɛna dadab.
Na yɔk lɔga bere orrono :nɛa kawarre na dhugunnono,
agge kaggaoyɔ hunde a dhereye.
25 Yɔk lɔga bere messo :Yesusi ga bo mɛra gena ngani ɛllɛ.
Na yɔk ngalɔktonu kumulɔng chɔɔ hunde kɔ̀tɔgɔndɛsɛ dadabinya na ngadadabinyaonu kabhbhasayɛsɛ ba kumulɔng,
anye hunde kɛlɛhɛniye anda heo ngahɛtinɛnɛo dhul ke ngaya dadabinya anɛ mɛriye.