Lɔga Bere Messɛa :Zuga Kɛ̀bɛrrana Na Ekko ꞉Yesusi
Lɔga Bere Kɔyɛa ꞉Yesusi Tumɔ
1
1-2 Tebulose,
dadaba bere kɔgɔdhdhani sabbɔ annaa kɔgɔdhɛsɛni lɔga bere messo ꞉Yesusi na madhɛsɛna zugo kumulɔng ko bhee yogɛsɛn zuga bere ekko ꞉nɛa lɔga ajjɛa ꞉Kuloya Tumu na kɔa tumɔ.
3 Na nɔng anna bere sabbɔ rɛsayɔ na banaa na koo dhɔlɛsɛ yɔk rɛ kɛngi mɛri ungo zugo ramman na kataga bhɛa ihɛa basseyɔ dhere.
Na hunaa dhɔlɛsɛna rɛ na ɛlla kariye,
madhɛsɛ bhɛa Tumu lɔmɛa zugo.
4 Na kali kona hunaa ɛlla kari bhɛa aminɛnɛaye,
aynɛ lɔgɔ na sɛɛsɛ,
“Tɛldi Yerusalemɔ ngaya dirr ko bhee ajjɛung ꞉Babaa Nanu Kuloya Nɛnɛ damiya bere bhiikkagungu ꞉nɛa na koyokkogungu ꞉anynyo.
5 Nɔng Yohanis anna bere churro zugo ma.
Na nɔng igge ale ɛllo ungge muchugi na kùchurrong Kuloya Tumu.”
6 Na kali kona hunaa ɛlla kari kutula kèe Dɛbɛrɛ Zaytuye,
yɔk ghini na seyɛsɛ,
“Komorue,
kolea ale yagɛsɛni zuga Isirayeli buyn a mɛa ka?”
7 Na Yesus yagɛsɛ na sɛɛsɛ,
“Unga bere ɛsɛdhdhana ꞉Tumu sabbaa nɛnɛ bhee gayɛo ꞉iggeu ninggɛ.
8 Na nɔng hunde ale ngɔsagung ꞉Kuloya Tumuye,
jɔano barartin na anno zuga yokko lɔga ganyu Yerusalemɔ ko Yudhagiye ko Samariyagiye kumulɔng ko bhee uturronɛ ba.”
9 Na hunaa yogoa ngalɔkta na tewa ushaye,
argi hunde kɔ tumɔye.
Na nɔng ulubu ꞉idhoɔ na yɔk ngani ngaorrɛo.
10 Na hunaa kɔa tumɔ na ngani gunynyɛa churrte,
zukte ku ramman malukkɛ ruminyaye hɔli dhulda dari na chili ko yɔk.
11 Na keseyɛsɛ,
“Igge ngazukta Gelilaye,
lɔ ɔng chillo ngaya na gunynyo tumuye?
Ngahirra kèe Yesus kɛ̀hɛɛ tumɔye,
ale wokkono ngadamita orɛoye sɛgɛn.”
Lɔga Kɛ̀bɛrranɛa ꞉Matiyas Na Sɛrɛa Bhɛa Yuda
12 Na yɔk banda Dɛbɛrɛ Zaytugiye na waga Yerusalemɔ.
Dɛbɛrɛ Zaytu nɔng a kutula iho Yerusalemɔ dheyyɔ jaa.
13 Na hunaa dokkɛa ɔrte,
ago doraa ungusɛa ku bɛ na irrɔgɔ balanggi tundɔ.
Na zuga ɛlla ngonu bere anna Betiros ko Yohanis ko Yaykob ko Indiriyas ko Bhilibhos ko Tomas ko Bartolomi ko Matewos ko eriya Ilbiyosi kènno Yaykob ko Simona Irisho zugoa ko eriya Yaykobi kènno Yuda.
14 Na yɔk ko tɛrro gen ko mama Yesusi Mariyam ko Yesus gɔynggɛ kali kali mukkinya na allinɛ ko Tumu hinise dhɔnɛ.
15 Na kali kona zuga yɛbhbhɛa Yesus gee ku zugo illɛy muktɛ bhee dhɔnɛ.
Na nɔng Betiros bana na chilu bhɛa nɛ sabbɔ na sɛɛsɛ,
16 “Ngagochonginyaa ganyde,
lɔga ngahirra kèe Yuda bɔɔ ajjɛ Yesus mirɔgaye,
a lɔga bere ajjɛa ꞉Kuloya Tumu Dawiy sabbɔ na yokkono na ɛlla dadabɔ.
Na ngalɔkta maya bere bhugnyɛsɛnɛyɔ.
17 Nɔng Yuda bere anna hira kɛ̀bɛrrana na kagacha ngalɔkta kari.”
18 Ngahirra nɔng anna bɔɔ ibhbhana birinyaa gɛnyɛ messono kuhuyamo na tallanɛa ba bhokonnɔ,
na ujinɛna “bum” na kɛngɔ bhɛsinɛna na chɔlla ubinyana ba.
19 Na yɔk zuga Yerusalemi kumulɔng taga ngalɔkta na ngabaonu tuga nɛ tɔgɔndɛsɛ sarre kèe “Akeldama.”
“Akeldama” a bhɛa kènɛa “Baa Nyabbuny.”
20 Na nɔng Betiros sɛɛsɛ,
“Yɔk ngalɔkta Yudaye annaa bere kɔ̀gɔdhɛsɛna Dadaba Yellony toye na sennɛa,
“ ‘Bhɛa bhakka ꞉nɛa any kɛtɛ hɔlɔng
na baa nɛnɛ kete guru.’
“Na ngadadabtonu bhokona se,
“ ‘Buyna nɛnɛ any kɛsɛrɛ ꞉konnɔ.’
21-22 “Na mɛa agge maya kɛ̀bɛrrana hir kona bhɛa zuga bere kɛ̀lla ko Komoru Yesus kari,
bɛrgua bere churɛa :Yohanisi zugo ko bhee kɔɛ Yesusi tumɔ.
Na kɛsɛrɛ bhɛa Yuda na kete hira koyokko ngalɔkta bɔɔ bansanɛ ꞉Yesusi rɛsɛyɔye kari.”
23 Na yɔk koo ibhta zukte ku ramman.
Yoseba kèleo Barsabba oo Iyotos ko na kèleo Matiyas.
24-25 Na alliyɛ ko Tumu na se,
“Komorue,
inye ani na gayi lɔga ɛsɛdhdhɛa ꞉zugu hinisichinne kumulɔng.
Na mɛa bhɛa ngazukta ku rammande,
ga dhɔlagiy inde bɛrran ꞉inynyo na seni kɛsɛrɛ bhɛa Yuda na keme lɔga gunyu bortɔ dhɔtta huna kɔa bhɛa bɔɔ hinno na rɛsaye.”
26 Na mesigi damiya nɛ kɛ̀bɛrnɛnɛa na bɛrta Matiyas.
b Na tɔru zuga ekko ꞉Yesusi ku tɔmmɔn ko dhɔnɛ.