Kamannaa Yesusi bere kɔdhdhana Lukasi
Lɔgɔ Bhɛa Ku Sabba
1
1 Tebulose,
ngalɔkta bere urugɛsɛn ꞉Tumu bhɛa nayoye,
zugo ga mɛra lɔga anda gayɛa anna bere ilobta na tɔgɔndɛsɛa dadabinya.
2 Yɔk ngalɔkta yokogiyɛ ꞉zuga bere orronɛa kawarre ko zuga madhɛsɛnɛa zugo lɔga Tumu.
3 Chɔɔ kɔ anye ngalɔkta bere kamarakka bhoy na a challi.
Ngamɛa keni kɔ̀tɔgɔdhɛsɛ dadab na kayiny inye
4 Na ko inye jɔayɛy ngalɔkta bere madhaginyɛ ꞉zugu tugɔye bhɛa anɛa dhere.
Lɔga Kèkonɛa Hira Eko ꞉Tumu Kenno Kuhudhuktoy Yohanisa Churo Zugo
5 Bɛrgua anɛa Herediwosi komoru Yudhagiye lɔ hirre ke Zakariyas na a gɔldanga doraa Tumu.
Na nɔng a ashaya hirre ke Abiya.
a.
Na tɛriya nɛnɛ keli Elsabet na a ashaya Eroni.
6 Na yɔk bhɛkɛ daminyaa yokkono Tumu shɛɛ.
Na lɔkte gɛrsi ngani kɛdɛto dhul.
Na hunde guny Tumuye,
a hɔli.
7 Na Elsabet a mun.
Eri ninggɛ.
Na nyagasɛ hɔlɔng.
8-9 Na kali kona gɔldangɛaa kimsiya Zakariyasi mesigi zinggo doraa Tumub toye na mesɛ kari.
Na mesigi damiya taa nɛ na kɛbɛrta hirre tunuk doraa barara toye na kudulɛsɛ Tumu goc.
Na bɛrta Zakariyas.
10 Na hunaa koo tunuko doraa barara na udulɛsɛna Tumu goye,
yɔk zugo kumulɔng shilɛ bhɔ na alenɛ ko Tumu.
11 Na hunaa udulɛsɛna Tumu goye,
aru hira ekono ꞉Tumu ngawgiye sɛtɛn hunde shilde.
12 Na dɛɛbu na tɛngɛru bho.
13-15 Na sɛɛsɛ ꞉hira ekono Tumu,
“Ngaɛngɛrsanyi.
Bhɛa bere ogolɛy Tumu wa shika.
Ngamɛa ale tɛriya nunu lɔmmana erite may.
Na iwo Kuloya Tumu shɛɛ hunde chɔɔ ngani lɔ jɔnɛ kɛngɔye.
Na hunde hudhukonoye,
sara gɛnyɛ eli Yohanis.
Na dhɛynɛno na shumuno gore.
Na dɛlo ko zugo kumulɔng ke ngaya ale ajɛ ꞉Tumu buynde.
Nɔng ke ale galde barar kùdhutiye ngamayi.
16 Na ale kalama zuga Isirayeli ge mɛrte na kayagɛsɛ komoruya nɛ Tumu.
17 Nɔng ale lɔ kuloyte barar hunaa na bere Eliyasi.
Na jim sabbɔ na mukana zugo na kataktɛ ko erroa gɛ na kuhuyaga kawakta gɔra Tumu.
Na kɛtɛldi kɔk kere Komoru.”
18 Na Zakariyas seu,
“Ngalɔkta hunde a dhereye,
ale kagga ɛnɛng?
Anye ko tɛriya nanu kano nyagasi.”
19 Na sɛɛsɛ ꞉hira kekono,
“Anye kani hira kɛlo ko Tumu kènno Gabirel.
Na a nganda kèkonony na koyogoginy lɔgɔ.
20 Yɔk ngalɔkta kolea nɛ ihe.
Ngamɛa inye ngaya ngayɛbhiwoye,
ale kadhaka ibhinɛ na ngamɛziwo ko bhee ale dheshinyanɛ ngalɔkta.”
21 Na hunaa Zakariyas iho doraa barara toye dirte,
yɔk zuga ɛla bhɔ dɛɛbɛ na se,
“Ay,
na dha tɔlɔ ɔng?"
22 Na hunde bhonsanaye,
mɛzi garu.
Na zuga ɛla bhɔ argi hunde mɛzi sɛnɛye na taga na se,
“Na dha aru gale kona doraa barara toye!"
23 Na hunaa kolea kayɛa Tumu dheshinyanaye,
wagu doraa nɛnɛ.
24 Na koo tɛriya nɛnɛ tɔlɔma eri.
Na taginya hayna ulugunyɛ kesɔ.
25 Na seu,
“Ye gɛrɛ!
Arany ꞉Tumu na ɔgagany lɔga bere wolokɛanyɛa ꞉zugu kowoyɛy hɔlɔngge.”
Lɔga Kèkonɛa Gabirel Kenno Kuhudhuktoy Yesus
26-27 Na hunaa taginya anna ilɛyte,
Gabirel ego ꞉Tumu sɛgɛn na ogu ɔra iho Gelilagiye kènno Nazerit na koyogɛsɛ sedheya kènno Mariyam lɔgɔ.
Nɔng ko zuga maya kari ngani kutunggito.
Imagtɔ.
Na dha bere tɔginɛnɛ ashaya Dawiyi kènno Yoseb.
28 Na ogu chɔɔ bhɛa Mariyami na sɛɛsɛ,
“Ani challi?
Inye ɛllo ko Tumu kari na tuhenydɔ.”
29 Na Mariyam dɛɛbu na seu,
“Na dha nganda a isaye ku nɛnɛng?"
30 Na sɛɛsɛ ꞉hira kèkono,
“Mariyame,
bho ngaɛngɛrsi.
Hineny ꞉Tumu gore.
31 Na ale lɔman erite may.
Na hunde hudhukonde,
sara gɛnyɛ eli Yesus.
32 Na keli Liya Tumu.
Nɔng ale a komoruya bo gore.
Na ajɛ ꞉Tumu lalanga bere koginɛ Dawiyi.
33 Na a komoruya erroa Yaykobi dhul ko kingi.
Na komorumoa nɛnɛ ngagaraso.”
34 Na Mariyam seu,
“Ɛnɛng?
Anye ko hira maya ngani kùtunggoyo.”
35 Na sɛɛsɛ ꞉hira kèkono,
“Ale Kuloya Tumu kun bhɛa nunu na ulubeny barartina Tumu.
Na aynde kelɛ ngaerita bu hɔl ridhing ninggɛye Liya Tumuye.
36-37 Nɔng ahite dhandal bhɛa Tumu ninggɛ.
Chɔɔ bhɛnɛnia nunu Elsabet anna bere wo hɔlɔng.
Na mɛya bɔrɔ aynɛa ꞉Tumu eri nyagayɔ.
Na mɛya taginya a illɛy.”
38 Na Mariyam seu,
“Ee,
anye kani sedheya kàgay Tumu.
Na ngalɔkta kimagiyɔ.
Ngamɛa hunde wa seu ngangaye,
any kete ngagiya yokogony ꞉inyoye hungni.”
Na kendɛ na hira kèkono ogu.
Mariyam Ogu Na Kɔgɔny Elsabet
39 Na ngakaldonu Mariyam bana ke tiri na kok kɔgɔny Elsabet.
Na ogu ɔra iho Yudhagiye bo lɔma kutulo.
40 Na koo tunugu dorif na isayɛ ko Elsabet.
41 Na hunaa isanɛnaye,
Kuloya Tumu tunugu Elsabet na eriya lɔma kɛngɔ tiranyu ke na bo challa.
42-43 Na Elsabet yogo lɔgɔ goore na sɛɛsɛ Mariyam,
“Inye ani mamaa Komoruya nanu.
Na tuheny ꞉Tumu goore na ko ngatɛroya kumulɔng ngahɛtowo.
Na chɔɔ erite ale hudhukonde a tuhinɛ.
Ngamɛa ngaya kunɛ na gunyanyde,
challi gore.
44 Inye hunaa kuni na kisanɛna,
eriya kɔlɔmi kɛngɔ tirany na bo challa.
45 Inye tuheny ꞉Tumu goore ke ngaya yɛbhɛg ngalɔkta yokoginy ꞉Tumuye.
Nɔng ale ngalɔkta urugɛsɛndɔ.
Yeloya Mariyami
46-48 Na Mariyam seu,
"Anye sabbaa nanu kɛdɛli Komoruya nanu Tumu goore bere ibaysionyi.
Na keterisani surr hinisɔ toye ke ngaya kadhanɛany eriya nɛnɛ chinyo gɛrsaye.
Na tenyi kumulɔng senɛ kani inde kutuhonyde
49 ke ngaya mesogɛany ngahirra bu ɔnɛye lɔga bo dhandala.
Nɔng sara gɛnyɛ a barari.
50 Na zukte ɛngɛrsɛye chirbhisi bhoy teenye teenye.
51 Nɔng wa dhɔla yira nɛnɛ na bhasawa zuga dhɔngɛa rɛhi na bhassayɛ.
52 Na ujuga komortɛn na zuga bere ku bhoyoga yɔk dhɔnga.
53 Na ɛdhɛysiwa zuga bere dhaka hozzo ahaa bo challa.
Na ga bere lɔma ahaa bo dhɛynɛna kàhanga hɔlɔng.
54-55 Nɔng ngani lɔ lɔga bere bhiigɛsɛna babachina ga.
Na ɛaniy erroa gɛnyɛ Isirayeli kagacha.
Na chirbhisi Awuram ko ashaya gɛnyɛ dirr.”
56 Na Mariyam hunaa yokkono ngalɔktonu na tewa ushaye,
taginya sizzi tɛldi ko Elsabet ngonu na wurtɔ wagu ɔra nɛnɛ.
Kala Kùhudhukonɛa Yohanisa Churo Zugo
57 Na hunaa wokoye,
Elsabet kolea hudhuginɛnɛa te ja na hudhugo erite may.
58 Na shigi zuga ɛla kari ko bhɛnɛna gɛnyɛ na hoya na dɛlɛyɛ.
Nɔng dha chirbhisi ꞉Tumu gore.
59 Na hunaa eri ungo anna iseyte,
zugo hoya na kegendɛsɛ eri milikitiya bere yogɛsɛna ꞉Tumu.
Na kɔgɔndɛsɛ sara na keli huna shɔgɔnɛ.
60 Na nɔng jɔnɛ seu,
"Ay,
keli Yohanis so.”
61 Na seyɛsɛ ꞉zugu,
"Na ke inde keli ngasara bhɛa nu ninggɛ.”
62 Na mɛzɛɛsɛ shɔgɔnɛ sɛnɛ na koyogo sarre kèliyɛ eri.
63 Na shɔgɔnɛ ogolo dadab na tɔgɔdhɛsɛ sara na sɛɛsɛ,
"Keli Yohanis so.”
Na aynɛ na zugo kumulɔng iwachiyo.
64 Na tugɔ oyɛ na mɛziu na eterisanu Tumu.
65 Na zuga ɛla kari dɛɛbɛ na tɛngɛrɛ bho.
Na koo yogo na tɛhɛtɛy ko ba ngonu.h
66 Na zuga shikɛa se,
"Na dha ale ngaerita i ɛnɛng?"
Na tɔlɔmɔ hinisiye.
Nɔng dha barartina Tumu i bhɛa nɛnɛ.
Lɔga Dheleo Zakariyasi
67 Na shɔgɔnɛ zɛgɛsɛ ꞉Kuloya Tumu na yogo lɔgɔ na seu,
68 "Àny kese ꞉Tumu Komoruya Isirayeli ke ngaya kunɛ na ibaysiyɛy zuga gɛnyɛye.
69-70 Wa ayiyo olea bo lɔma kɛrɛɛ ibayseiy bhɛa ashaya Dawiyi damiya bere yogɛa ꞉zuga yokonɛa lɔga Tumu.
71 Na kibaysiey bhɛa mirɔgaa ga mariyiyɛa.
72 Nɔng ngani chirbhisi babachina ga na lɔga bere bhiigɛsɛna lɔ hinisɔ.
73-74 Ngalɔkta bere kibhiigɛsɛn babaa na Awurambe ke kabayɛ mirokke na katagaytɛ Tumu sɔng na bho ngakɛngɛrsi.
75 Na hunde kagay Tumuye,
kete ga bo hɔla challa kɛnganiy ꞉Tumu ko bhee ale kɛrɛsɛye.”
76 Na sɛɛsɛ eriya nɛnɛ,
"Ngaeritaye,
inye ale keliyeny hira yokoni lɔga Tumu.
Na jimi sabbɔ na diri ganggua Komoruny
77 na yogɛsɛn zuga gɛnyɛ lɔgɔ.
Na hunde ujukɛ lɔga gɛ gɛrsaye,
ko nɔng senɛsɛn,
'Àny kagarayɛ' na ibaysiyɔ.
78-79 Tumuj chirbhisiey goore na ajiy hira bo hɔla huna susuny na ibaysieytɔ.
Nɔng hunde ujonoye,
lamaniy zuga kɛla mugurɔ kɛngɛrsa rɛsɛ na kɛ̀hɛ gɔra kàyawsɛa.”
80 Na eri chila na lɔgɔ te dhandal.
Na bhagu dusinya ko bhee bhonsɛn Isirayel.