Kamannaa Yesusi Bere Kɔdhdhɛsɛna :Markosi Dadab
Lɔga Madhinɛnɛa :Yohanisa Churro Zugo
1
1 Ngadadabta anna shigininyanɛa kamannaa challa Eriya Tumu Yesus Kirisosia. 2 Huna bere hira yogɛsɛna zugo lɔga yokkono :Tumu kèe Isayas kɔdhdhɛsɛna lɔga ajjɛa :Tumu dadab, dha bere kɔdhdhɛsɛn lɔkte sennɛ, “Anye ale kibhbhan hira nanu kona na kegi sabbɔ na kɔhaginy ganggua ale dhoi,” 3 “na nɔng ale i korugiye na yogɛsɛn zukte hony bhɛa nɛnɛye lɔgɔ goore na senɛsɛn, ‘Kɔhɔ ganggua Komoruyny na kɛtɛ dib.’”4 Na koo Yohanisa Churro Zugo bana na churu zugo korugiye na madhɛsɛ bhɛa ujjugɛa lɔga gɛ gɛrsa na wokkonɛa gɔra Tumu na churnɛnɛa ma na ridhingɛa gɛ ujjugɛa :Tumu. 5 Na zuga bhakkɛa Yerusalem ko ga bhakkɛa baa Yudha kumulɔng ago na assa nɔng. Na koo dhugundɛsɛ Tumu lɔga gɛ gɛrsa na churu :Yohanisi kidhoa Yordanosi. 6 Nɔng Yohanis dha bere maluk ruma kèmessono chɔra galiseny na kurɔ chib kɔdhɔrɔ na am rɛtɛa dusuny ko maradhoga. 7-8 Na dha bere hunde madhɛsɛn zugo lɔgɔye, senɛsɛn, “Anye kuchurrong ma sɔng. Na nɔng hir kona ale kɔbhbhanany na churrong Kuloya Tumu. Nɔng ngahirronu anna jorrononyi anye, na bhɛa nɛnɛ anye kani na chinynyo ghasura chɔɔ chahaa gɛnyɛ ngakubhurushaniyo.”b
Lɔga Bere Kùchurɛa Yesus Ko Ga Illobɛa :Moldoyɔ
9 Na ngakoleonu ko nɔng Yesus ko ɔra iho baa Gelila kènno Naziret na churu :Yohanisi Yordanosɔ. 10 Na hunaa kùchurro na ngani bansana ma toyeye, aru tumu hunde onɛ na Kuloya Tumu dhibɛsɛn nɔng huna yikkaynyde. 11 Na shigu lɔkte hony tumɔ hunde sennɛ, “Erite nan ajjany hini hɔldin na kibhbhaginy hiniye, ani :inynyo.” 12 Na hunaa kòyoktɛsɛa ngalɔkta na tewa ushaye, ɔgɛ :Kuloya Tumu korugiye shaw hung, 13 na koo tɛu ngonu ungo 40 na illobu :Moldoyɔ. Nɔng dha bere hunde i ngonuye ɛl ko kɛginyaa dusuny, na zuga ekko :Tumu kachchɛ nɔng.
Lɔga Bɛrranɛa :Yesusi Zuga Kɔbhbhɛa Nɔng Sabbune
14 Na hunaa Yohanis kìbhta na kàytɛa doraa chibinuny na tewa ushaye, nɔng Yesus bana na ogo Gelilagiye na madhɛsɛ zugo kamannaa Tumu challa na sɛɛsɛ, 15 “Kolea urruknyɛsɛnɛa lɔga bere bhiigɛsɛna :Tumu zugo wa kowa. Na mɛa ko nɔng kolea senno kɔtɔlɔmɛ :nɛa zugo te ja. Na mɛa ujjugu lɔga gu gɛrsa na yɛbhɛ kamannaa challa.” 16 Na kali kona hunaa Yesus dhoo yirisiya Gelila dheyte, aru Simon ko gɔynɛa kèe Indiriyas hunde ujjugɛsɛnɛ galiya ibhɛa urgusa yirisi toyeye. Yɔk dha bere a zuga ibhbhɛa urgusa. 17 Na sɛɛsɛ :Yesusi, “Ga hoya kɔbhtaanyuc na kàmadhung na kòjjung ke zuga mukkano zugo ngadamita ibhɛo urgusaye.” 18 Na yɔk dhɔyɔ gala gɛ ibhɛa urgusa ke tiri na kɔbhɔyɛ. 19 Na hunaa ngani hɛa ko bhe chinyiye, Yesus aru erroa Zɛbɛdosi Yaykob ko gɔynɛa kèe Yohanis hunde ɛl gonggulɔ tundɔ na ɔdhdhɛ gala gɛ ibhɛa urgusaye. 20 Na eliu ke tiri na sɛɛsɛ, “Ga kɔbhtaanyuyɔ!” Na yɔk dhɔyɔ chɔgɔnɛ Zɛbɛdos ko zuga messɛa zinggo kari gonggulɔ ngonu na kɔbhɔ nɔng.
Lɔga Obhoniseonɛa :Yesusi Mɛnɛngi Bhɛa Hira Tɔgɛsɛna
21 Na koo ago na daga ɔra kènno Kibirom. Na hunaa tewa Kala Ayawsunyde, Yesus ogo doraa madhinɛnɛa zuga Ayhudhi lɔga Tumu na madhu zugo. 22 Na zugo iwachiyɛ ke ngaya Yesus madhɛ zugo na michchanɛ lɔgɔ huna hira lɔmma buyn na damiya madhinɛnɛa :zuga madhdhɛa zugo Damiya Tumu bere kàjjɛa Muse ngamadhɛsɛnnoye. 23 Nɔng dha bere ngadoronu madhinɛnɛ :Yesusiye lɔ hirre tɔgɛsɛndɔ. Na koo yogo lɔgɔ goore na seu, 24 “Ngahirra bere chillan Naziretɔ kènniny Yesuse, ko agge kɔlɔmnɛ ɔng? Ngangaye, wa kou na dhiyeytɔ?d Nɔng anye kagainydɔ hunde ani hir inongge. Inye ani Hira Kullɛna Barara Bere ekkoninyi :Tumu.” 25 Na Yesus wologu mɛnɛngiya lɔmma :hiriyɔ rɛhɔ na sɛɛsɛ, “Dhiyɛ! Na bhona bhɛa ngahirra na ogo!” 26 Na mɛnɛngi dhagɛ hiri ba gɛrrɛng gɛrrɛng, na aru wuy goore na bhona na ogo. 27 Na zugo iwachiyɛ goore na ghindɛ kɛngɔ na se, “Yee! Na dha kalda nganda a ɔng? Na mɛa dha a madhaa ngani dhullana bo lɔmma buyn ka? Ga gɔnyigiyɛ ni! Kèe nɔng dhaa yogɛsɛn chɔɔ mɛnɛnga lɔgɔ na ko yɔk shikkɛ na igomɛsɛnɛyɔ!” 28 Na sabhana nɛnɛ bhasanyɛsɛ ba shaw hung na tɛhɛtɛy ko oriya ɛlla Gelilagiye ngonu kumulɔng.
Lɔga Ibbaysiyɛa :Yesusi Zuga Bo Mɛra
29 Na hunaa bhonsanɛa doraa madhinɛnɛa zuga Ayhudhi lɔga Tumuye, nɔng ko Yohanis ko Yaykob ko zuga kɔbhbhɛa nɔng gena ago doraa bhakkɛa :Simon ko :Indiriyas. 30 Nɔng dha bere nyaga Simoni ilaga na rɛ awuren goore na ungu bay ngonu. Na zugo yoktɛsɛ Yesus ngalɔkta ilagasɛ :nyaga Simoniye ke tiri. 31 Na nɔng ogo bhɛaa ungusɛa :tɛriyaa ilagasa na ibhu siyɔ na dhɔnga. Na rɛ lalu na bau shaw hung. Na bana na tagayu yɔk. 32 Na hunaa su ngɔa na bho tewa ririnyaye, zugo hoyɛy zuga ilagasɛa ko ga tɔgɛsɛnɛa :mɛnɛngu kumulɔng na ayɛsɛ Yesus. 33 Na yɔk zuga orony kumulɔng dha bere mukkinya na ɛl tu kɛngɔ ngonu. 34 Na nɔng ibbaysiu zuga ilagassɛa ga bo mɛra lɔmmɛa mutanyoga bhiy bhiy, na obhoniseo mɛnɛnga bo mɛra bhɛa zugony. Na yɔk mɛnɛnga dha bere Yesus hunde a hir inongge gaɛyɔ. Na nɔng taganyɛ yɔk bhɛa senno ngakudhugundɛ nɔng hunde a hir inongge.
Lɔga Yesus Allinɛnɛa Ko Tumu Bhokkonnɔ Bhichang
35 Na bhelleyɔ shaw kolea ngani ku gidhanggay, Yesus bana na ogu ɔr dheyyɔ bhɛa zugo ningginɛna na alliyɛ ko Tumu. 36 Na koo Simon ko zuga ɛlla kari ago na lami nɔng goore. 37 Na hunaa jɔanɛaye, seyɛsɛ, “Zugo kumulɔng lamienyɛ inye so!” 38 Na nɔng yagɛsɛ na sɛɛsɛ, “Anye huna bɔɔ kuguni, bɔɔ kènno kàmadhɛsɛ zugo kamannaa challa. Na mɛa banda kago ngaoriya ɛl jaa bɔɔ sabbɔ ngani kaytɛoye na kàmadhɛsɛ zugo lɔgɔ.” 39 Na koo ogo na tɔɛ oriya ɛlla baa Gelila kumulɔng na madhu zugo doriyoa gɛ madhinɛnɛa zuga Ayhudhi lɔga Tumu ngonu na obhoniseo mɛnɛnga lɔmmɛa :zugu.
Lɔga Ibbaysiyɛa :Yesusi Hira Amma :Gedhdhe
40 Na kali kona hirre am :gedhdhe kona ko na tɔgɔdhɛsɛ kɔmma na tɔllɔhɛsɛ na sɛɛsɛ, “Komorue, inye ani barari. Na mɛa hunde sea :inynyo sabbaa nunu, anda onynyonony na kabasi na kihi hurr.” 41 Na Yesus towonyɛsɛ :hiriyɔ na tadhɛ siyɔ na sɛɛsɛ, “Wa keseyau, na mɛa baa na tɛ hurr.” 42 Na hunaa kèsenɛsɛna ngangaye, gedhdhe tururriyaa na bau shaw hung. 43-44 Na koo dagɛsɛ go na sɛɛsɛ, “Ngalɔkta ngayogɛsɛ hir kona go! Na nɔng mɛa ok na dhɔlɛsɛ gɔldanga doraa Tumu rɛ. Na ibha ahaa bere sennagungu ꞉Muse kènno tonydɛy, na uddulɛsɛ Tumu. Na kartiny :zugu na kataktiny hunde dha bɔɔ bau dhere na tɛu hurrte.” Na ittonu. 45 Na nɔng hiri lɔgaa kòyogɛsɛna na kènno ngayogi ngani ngashikko. Na hande kɔɛye kumulɔng, koo yogɛsɛ zugo lɔgaa ibbaysiyɛa :Yesusi. Na hunaa tewa ngangaye, Yesus bhee kɔɛ ɔr toye bhɛa zugo mɛra garu ke ngaya se ngakamargiyɛ :zuguye. Na tɛu ɔr dheyyɔ bhɛa zugo ningginɛna. Na chɔɔ ko hunde kɛtɛ ngonu, yɔk zugo bere honynyo surr hande bhakkɛye kumulɔng na assanɛa nɔng chi.