Kala Kùhudhukonɛa Yesus
2
1 Na ngakoleonu komoruya Rome kènno Awsos yogɛsɛ zuga gɛnyɛ kumulɔng na kago oriya gɛ na kɔgɔndɛsɛ sara na kotoyitɔ.
2 Yɔk dha bere sabbɔ sara ngani kɔgɔndɛsɛwo.
Na kɔdhdhanɛ kolea anɛa Kirinosi gulsa Soriyagiye.
3 Na zugo ago oriya bere koginggɛuny bhoy na kɔgɔndɛsɛ sara.
4 Na Yoseb bana ɔra iho Gelilagiye kènno Nazerit na ogu ɔra bere iritɛnyanɛa koginɛ Dawiy iho Yudhagiye kènno Betelem.
5 Na dhigan sedheya tɔginɛnɛa kènno Mariyam na kɔtɔgɔndɛsɛ sara.
Nɔng lɔ eri kɛngɔ.
6 Na hunaa ɛla ngonuye,
kolea hudhuginɛnɛa te ja.
7 Na hudhugo liya nɛnɛ ku aw.
Na bhee ungusɛ garu.
Na iwa eriya nɛnɛ na ulubu rumɔ na tungu gonggula amɛa beyo lanjoya kedhono.
Lɔga Orɛa ꞉Zuga Bhɛkɛa Mɛdɛrni
8-9 Na ngaɔrronu lɔ zuga bhɛkɛa mɛdɛrni barɔ ɔr dheyyɔ.
Na hunde bhɛginɛye,
assa ꞉hira ekono Tumu.
Na abakkanu ꞉dirama Tumu huna susuny na tɛngɛrɛ bho gore.
10 Na sɛɛsɛ ꞉hira ekono Tumu,
"Te may.
Bho ngaɛngɛrso.
Keni kòyogogung kamannaa bo challa dɛlɛa zuga Isirayeli.
11 Wa hira kɛ̀bɛrana ku Komoru ibayseyo zugo hudhukiya Betelemɔ ɔra Dawiy.
12 Ngamɛa ga kàmadhdhagung na ago gɔnyigitɔ.
A erite kulub rumɔ na ungu gonggula amɛa beyo lanyjoyte.
Ali oroyɔ.”
13 Na bara Tumu dhulda dɛk na shili ko hira ekono Tumu na eterisana Tumu.
14 Na se,
"Diram any kete na Tumua iho surr tumɔ tundɔ.
Na zukte hin Tumu ɛl bayte kɛtɛldi shɛɛ.”
15 Na hunaa wokkɛa tumɔye,
zuga iwonɛna alli na se,
"Banda kago ɔrɔ na kɔ̀gɔnyigi ngalɔkta wa yokogiy ꞉hira ekono Komoruyɔye.”
16 Na banda ke tiri na ayuguyɛ.
Na hunaa hɛaye,
jɔya Yoseb ko Mariyam na argi eri hunde ungu gonggula amɛa beyo lanyjoyte.
17 Na hunaa gunynyɛa eri na tewa ushaye,
yogo lɔga gɛnyɛ wa yokkono ꞉hira ekono Tumu.
18 Na zuga shikɛa kumulɔng iwachiyɛ.
19 Na nɔng Mariyam ɛsɛdhu ngalɔktonu na tɔlɔmu hinisɔ.
20 Na zuga iwonɛna waga na eterisana Tumu ke ngaya shigɛ lɔgɔ na orɛ erite.
Na se,
"Dha hira ekono Tumu yokkono dheregɛ!"
Lɔga Kɛ̀hɛɛa Yesus Doraa Tumu Erimo
21 Na hunaa eri ungo anna isey na kenno kegendɛsɛ milikitiya zuga Ayhudhi na kɔgɔndɛsɛ saraye,
nɔng dha keli Yesus sara bere kɔdhɛsɛna ꞉hira ekono Tumu huna chɔɔ jɔnɛ kɛngɔ ngani kɔtɔlɔmayo.
22 Na Yoseb ko Mariyam tɛldi ko bhee Mariyam onynɛnɛ damiya bere senɛa ꞉Muse.
Na koo dhumba eri na aytɛ Yerusalemɔ na kayɛsɛ Tumu.
23 Anna bere senno,
"Erroye may ku awchinaye kumulɔng agga Tumu" na kɔ̀gɔdhɛsɛna dadab.
24 Na koo dhumba yela ramman oo yikkay hoya ramman na uduldɛsɛ Tumu go damiya bere senɛa ꞉Tumu.
25 Na nɔng dha bere lɔ hirre ke Simiwon bhak Yurusalem.
Na re hira keseno kilal zuga Isirayeli.
Na bhɛk damiya Tumu shɛɛ na anna bo hɔla.
Na Kuloya Tumu i bhɛa nɛnɛ
26 na dhɔlɛsɛn bhɛa keseno shaw ngarɛsɛ na karɛ hira bɛrrana ꞉Tumu.
27 Na kali kona ibanisiwo ꞉Kuloya Tumu na ogu doraa Tumu.
Na Yoseb ko Mariyam hoyay eriya nɛ kènno Yesus na kemesigi damiya dha errowuny.
Na hunaa honynyɛa ngangaye,
28 dhuma ꞉Simiwoni na bou na eterisanu Tumu.
29 Na seu,
"Komorue,
lɔga bere bhiikkaganyi wa dheytiya.
Ngamɛa hunde kère te challi.
Itononyo shɛɛ hung.
30-31 Wa kara hira bere dhumani na seni dhɔlɛsɛ bhorinya kumulɔng kawarre na kibaysiey agge.
32 Nganda a kaliya ale dhɔlɛsɛna bhorinya lɔga gunyu.
Nɔng kunɛ diram na ajɛ erroa gunyu Isirayeli.”
33 Na Yoseb ko Mariyam iwachi ngalɔkta kòyogɛ hoynɛye na dɛɛbɛyɛ.
34 Na tuhu ꞉Simiwoni na sɛɛsɛ Mariyam,
"Ngaerita aynde bɛrrana ꞉Tumu na kɛngɛr zuga Isirayeliye.
Na gen kujugayɔ,
gen kɔdhɔngayɔ.
Nɔng ale madhɛsɛn lɔgɔ na kibaytɔ.
Na yɔk taɛyɔ.
35 Na dhɔlɛsɛn ꞉Tumu lɔga gɛ lɔmɛa hinisiye.
Nɔng rɛsɛ lɔmi ꞉inyo sabbaa nunu.”
36 Na dha bere eriya Nuwaeli kènno Hana i ngonu.
Nɔng a ashaya Asari na yogɛsɛn zugo lɔga Tumu.
Na bhɛa bere kuduriyaye ɛl ko hira nɛnɛ oynya isabay sɔng na hira nɛnɛ garu.
37 Na kɔ doraa Tumu bar ko kale tiyi na alenɛ ko Tumu na chib rɛ huny.
Na nyaga na oynya a zugo wush ko wush na doraa Tumu ngagaraso.
38 Na kala gina rɛ ko na eterisanu Tumu na yogɛsɛ zuga bere reyɛa bhɛa kenno kangagay ngaerita Yurusalemɔ chɔllaɔ.
39 Na hunaa Yoseb ko Mariyam dheshshanɛa damiya Tumu na tewa ushaye,
waga ɔra nɛk.
40 Na eri tuhu ꞉Tumu.
Na shila na te liya bo dhɔrɔgɔsa gaa bho.
Na teyelu ꞉Tumu gore.
Lɔga Yesus Oynyaa Kùhudhukonɛa Tɔmmɔn Ko Rammanɔ Kɔ̀ɛa Doraa Tumu
41 Na yɔk Yoseb ko Mariyam oynya oynya ago Yurusalemɔ na kemesigi damiya nɛ kènno Basikal.
42 Na wurtɔ hunaa Yesus oynya anna tɔmmɔn ko rammande,
dhi ko yɔk kari na mesigi damiya nɛ sɛgɛn.
43 Na hunaa mesɛa dami na wokɛaye,
nɔng dha Yesus dhɔyɛ Yurusalemɔ na yɔk ngani kargito.
44 Yɔk senɛ kako i zuke toye ngaya.
Na koo jhayn hunde dokɛ ganggu na gunyɛ erite,
ninggɛ.
Na ghini zuga gɛ dhiyɛa kari na garu.
45 Na lamiɛsɛ eri gɔrɔ gɔrɔ na waga Yurusalemɔ sɛgɛn.
46-47 Na hunaa ungo anna sizite,
koo argi doraa Tumu toye hunde chirar zuga madhɛa zugo lɔga Tumu na ghinnɛ na dhugunɛsɛn hologunde.
Na zuga shikɛa iwachiyɛ.
48 Na jɔnɛ ko shɔgɔnɛ dɛɛbɛ na gɔnyigi laay na sɛɛsɛ ꞉jɔnɛ,
"Ye gɛrɛ!
Eriya nanugɛ!
Lɔ ɔng tiranyɛy na kushurnɛno ngangaye?
Ke anye ko shɔgɔnu wa kalamiyɛo kɛr.”
49 Na sɛɛsɛ,
"Wa goore lamionyu kɛɔng?
Hunde kihi doraa Babaa nanuye,
imagoyɔ?"
50 Na yɔk rɛgɛ ꞉lɔku.