Lɔga Yohanisa Churo Zugo
3
1 Na hunaa oynyaa Tibari anɛa komoru anna tɔmmɔn ko haynaye,
nɔng Bhilatosm a gulsaa Yudha.
Na Herediwos a gulsaa Gelila na gɔynɛa kènno Bhilibhos a gulsaa Itori ko Tirakondosi.
Na Lisaniwos a gulsaa Sabila.
2 Yɔk Hanas ko Kayama a gɔldangɛaa doraa Tumu bibiyo.
Na ngakaldonu eriya Zakariyasi kènno Yohanis yogɛsɛ ꞉Tumu lɔgɔ mogiyɔ.
3 Na koo dhaa oriya ɛla Yurdanosɔ toye na madhɛsɛ zugo lɔgɔ na sɛɛsɛ,
"Dhɔyɔ lɔga gɛrsa na wakta gɔra Tumu na churtɛ ma.
Ko nɔng Tumu ujuk lɔga gu gɛrsa na senagung 'Àny kagarayɛ.'"
4 Ngalɔkta agga bere yokkono ꞉Isayasi na kɔdhɛsɛna dadab na senno,
"Ali yokogung hirre kun korugiye,
na senagung,
"Alala,
diri ganggua komoruny na kete dib.
5 Na hande ku hororite dindɛsɛ ba na kutulo kumulɔng kɛtɛldi ray.
Na hande rɔngɔte kɛtɛldi dib.
Na hande chakarte kete ghilghili.
6 Na baseya Tumu kargi ꞉bhorinya kumulɔng.”
7 Na Yohanis zuga honyo na kuchur ꞉nɛa sɛɛsɛ,
"Ngagiya bu hinisi gɛrɛ na hɛto ko hoyaa kurmusiye,
inde ibachung na senagung,
'Ago churtɛ na jara wologa Tumuye' a nɛng?
8 Ye,
ga sabbɔ ujugu lɔga gu gɛrsani na eggiyo kawarɛte challi!
Na hinisiye ngaseno 'Agge kano erroa Awurami.
Kɛlo hung.
' Tumu hunde kudhuma ngabɛnda na kete erroa Awurami ayɔ.
9 Na mɛya chɔɔ ga argito.
A nganda kɛlɛhɛnagiy kɛyɔye.
Ngamɛa bhey i kɛyɔ sugumɔ ja.
Na hunde kawarɛte challi ngaegisonoye,
kegedhana na kujugɛsɛn go.”
10 Na seyɛsɛ ꞉zugu,
"Na ale kèmeso ɛnɛng?"
11 Na Yohanis seu,
"Inde lɔ ruminya rammande kona any kɛngɛrɛsɛ inde wo hɔlɔngge.
Inde lɔ tila bhee buye ko nɔng nganga.”
12 Na ko yɔk zuga mukɛa gharata hoya na ghini na seyɛsɛ,
"Yohanise,
na agge kèmeso ɛnɛng?"
13 "Ige mukta ge wa toyisogung manggisiye sɔng.
Gena ngatɔrɛwo.”
14 Na ko yɔk bholi hoya na ghini na seyɛsɛ,
"Na agge kèmeso ɛnɛng?"
Na keseyɛsɛ,
"Ige tɔlɔmɔ birinyaa gu hung.
Birinyaa zugony hɔlɔng ngamayichono na magɛsɛno butomo na shilɛwo.”
15 Na yɔk bhɛgɛ na se,
"Ay,
na nganda a Hira Kɛ̀bɛrana ku Komoru ibayseyo zugo ka?"
16 Na Yohanis seu,
"Alala,
anye kuchurong ma sɔng.
Nɔng inde ɔnɛ gooreye aynde kun wurtɔye na churong Kuloya Tumu ko gogiye.
Anye bhɛa nɛnɛ kani na chinyo gɛrsa hungn.
17 Nɔng ale hunde kunde,
sageono zuga challa hunaa liwaa lɔma kawarɛ na ojɛsɛn balanggi.
Na zuga gɛrsa shɔgɛ goa ngadhitinɛnawo dhul hunaa hukony.”
18 Na Yohanis madhɛsɛ zugo kamannaa bo challa na ɛlɛhɛnɛsɛ lɔkte mɛri na kɛtɛhɛnɛtɔ.
Lɔga churaya Yesusi ko ga bere koginggɛa bhonsanɛa.
19-22 Na hunaa zugo churnɛna bhoyte,
ko nɔng Yesus ko na shurɛ.
Na aleɛ ko Tumu na bhurbhurɛaa tumɔ oyɛ.
Na Kuloya Tumu ko huna yelaynyo na tɛa gawla Yesusi.
Na Tumu seu,
"Erite nan keyelinyde,
ani ꞉inyo.
Na ngamɛa hunde korinyde,
hinisa nanu challi gore.”
Na nɔng dha ngakaldonu gulsaa kènno Herediwos kɔɛ tɛriya gɔynɛ na ɛdɛ lɔkte mɛri.
Na koo wologu ꞉Yohanisi na taganyɛ.
Na Herediwos ɛdɛu sɛgɛn na chɛbu Yohanis.
23 Na huna Yesus kɔdhanɛa madha,
oynyaa gɛnyɛ a hirkon ko tɔmmɔn.
Na yɔk zugo senɛ a liya Yosebi.
Na Yoseb a liya Eli.
24 Na Eli a liya Mati.
Na Mati a liya Lewi.
Na Lewi a liya Miliki.
Na Milik a liya Yona.
Na Matatayu a liya Amosi.
Na Amos a liya Nahami.
Na Naham a liya Esilimi.
Na Esilim a liya Nage.
26 Na Nage a liya Mayati.
Na Mayat a liya Matatayu.
Na Matatayu a liya Seme.
Na Seme a liya Yoseki.
Na Yosek a liya Yodha.
Na Yodha a liya Yonani.
27 Na Yonan a liya Resa.
Na Resa a liya Zurubabel.
Na Zurubabel a liya Sɛlatayale.
Na Sɛlatayal a liya Neri.
Na Hadhi a liya Yosasi.
Na Yosa a liya Ghosami.
Na Ghosam a liya Elimodomi.
Na Elimodom a liya Eri.
Na Eliyazir a liya Yorami.
Na Yoram a liya Madhat.
Na Madhat a liya Lewi.
Na Lewi a liya Simoni.
30 Na Simiwon a liya Yuhudha.
Na Yuhudha a liya Yosebi.
Na Yoseb a liya Yonami.
Na Yonam a liya Iliyakimi.
Na Manan a liya Madhat.
Na Madhat a liya Natani.
Na Natan a liya Dawiy.
Na Dawiy a liya Isey.
32 Na Isey a liya Iyobe.
Na Iyobe a liya Bowasi.
Na Bowas a liya Salemoni.
Na Salemon a liya Nasoni.
Na Aram a liya Arani.
Na Aran a liya Eseromi.
Na Eserom a liya Bharesi.
Na Bhares a liya Yuhudha.
Na Isak a liya Awurami.
Na Awuram a liya Tarani.
Na Taran a liya Nakori.
Na Nakor a liya Seroki.
35 Na Seruk a liya Rawuni.
Na Rawun a liya Bhilaki.
Na Bhilak a liya Abari.
Na Abar a liya Sala.
Na Arbakasa a liya Semi.
Na Sem a liya Nɔa.
Na Nɔa a liya Lame.
Na Lame a liya Matusala.
37 Na Matusala a liya Heno.
Na Heno a liya Yare.
Na Yare a liya Malayeli.
Na Malayel a liya Kanani.
Na Set a liya Adami.
Na Adam a liya Tumu.