Lɔga Ilobɛa ꞉Setanɔ Yesus
4
1 Na hunaa Yesus iho Yordanosɔ,
chayɛ ꞉Kuloya Tumu na waga.
Na lama ꞉Kuloya Tumu na dhiganu dusɔ
2 na kilob mɛnɛngiya ku jɔnɛ kènno Setan ungo zugo ramman.
Na ngaungga chɛbu rɛ hozzo na amissɛ ngani ngaamo dhul na wurtɔ dhagu ꞉hozzo.
3 Na koo sɛɛsɛ ꞉Setanɔ,
"Hunde ani eriya Tumu dhereye,
sɛɛsɛ ngabɛya 'Te tila.'"
4 Na sɛɛsɛ ꞉Yesusi,
"Hiri ngabhagɛwo tila sɔng.”
5 Na dhiganu ꞉Setanɔ bhee dharnɛ na dhɔlɛsɛ baa ɛlɛa ꞉komortɛnu kumulɔng kɛchɛk.
6 Na sɛɛsɛ,
"Ngakomorumoya ngazuktaye bhoy ko dirama nɛ bere kayanyo anye.
Na mɛya hirre kihinɛnde kajɛ hung.
7 Ngamɛa ko inye tɔgɔdhagany kɔma na kayiny ngabaya kumulɔng.”
8 Na sɛɛsɛ ꞉Yesusi,
"Bere kenno 'Kɔma tɔgɔdhɛsɛ Komoruya nunu Tumu sɔng na tagaytɔ.'"
9 Na koo dhiganu ꞉Setanɔ Yurusalemɔ na oju doraa Tumu tundɔ na sɛɛsɛ,
"Hunde ani Eriya Tumu dhereye,
ga bɔrɔt hurr toye ngonu.
10 Anna bere senor
bhɛkinyɛ ꞉zuga ekono Tumu
11 na boinyɛ sɛnɛ na bɛna jagarɛ ngaujenyɛwo.”
12 Na sɛɛsɛ,
"Bere kenos 'Tumu ngailobi.'"
13 Na hunaa Setan ilobɛa lɔgɔ kumulɔng na tewa ushaye,
kendɛ na Setan lamiu gangguye ale ibhɛ sɛgɛn.
Lɔga Yesusi Ngashigɛawo ꞉Zugu Nazeritɔ
14-15 Na Yesus aynɛ ꞉Kuloya Tumu barartin na wagu Gelilagiye.
Na koo madhu zugo doriyoa kamadhɛa zugo lɔga Tumu.
Na kamannaa nɛnɛ shigi ꞉zugu ngaorionu kumulɔng na teyele gore.
16-17 Na ogu Nazeritɔ ɔra bere shilanɛa.
Na koo Kala Ayawsuny ogu doraa kamadhɛa zugo lɔga Tumu huna dha nɛnɛ.
Na koo bana na kayɛ dadaba Isayasi.
Na bhelego na toyiyɔ bhee se nganga.
18-19 "Anye bɛranany ꞉Tumu tɔlɔng na Kuloya nɛnɛ kɔlɔmi ꞉anyo na ke kòyogɛsɛ bhoyoga lɔga gɛnyɛ.
Na a nganda ekonony na kòyogɛsɛ zugo lɔgɔ ngangaye.
Nɔng nganda aynde ibaysɛ ꞉Tumu zugoye.
Na ge chibinɛye ko ge kìtiranyɛ na kɔ̀chɔlayɛ kobhonisiyo hɔlɔng na kɛtɛldi bhee hɔli.
Na ge kawarɛ dhitinɛ ɛl mugurɔye kargi bho.”
20 Na iwa dadab na ulubu na aynɛ hira ajɛa na tɛa bay.
Na zuga ɛla doraa Tumu kumulɔng gɔnyigi lay.
21 Na sɛɛsɛ ꞉Yesusi,
"Ngamɛa ngalɔkta shikoye te usha.
Wa bhugunyɛsɛa.”
22 Na yɔk ga hinɛ shɛɛshi na iwachi ngalɔktonu bu chal yokkonoye.
Na se,
"Ay,
nganda eriya Yosebi ngayo?"
23 Na nɔng seu,
"Kaggayɔ,
ale ɛlɛhɛnaganyo lɔgɔ na senaganyo,
'Barartanye,
ibaysi rɛa nunu.
Na ɔmɛ lɔga bɔrɔ kishiko senno mesi Kibiromɔ ngaya na kàrtoyɔ.'
24 Ga shigitɔ,
nɔng hira yokkono lɔga Tumu zuga bhurana nɛnɛ ngahinɛwochi.
25 Ngamɛa ga kɔɔbagung shɛɛ,
bɛrgua bere nyugɛa ꞉Eliyasi guyɔ oynya sizzi ko taginya illɛy na ba anɛa hozzo,
tɛrroa Isirayeli ku bhoyoga a mɛri.
26 Nɔng Eliyas tɛrroa Isirayeli ngakegɛsɛno.
Kegɛsɛn tɛrite ana Sidonagiye ɔra kènno Sɛrɛbhata.
27 Na huna ko nɔng Ɛlsa madha zugo lɔga Tumu,
zuga Isirayeli gena ilagasɛ sɛrta.
Na Tumu dhɔnɛ ngani kibaysiwo.
Na ibaysi Namana sɔng hira kuno Soriyagiye.”
28 Na hunaa shikɛa,
zuga ɛla doraa Tumuye dɛbɛ
29 Na bandɛsɛ na obhonisiyo na tuguru na aytɛ kutulɔ tundɔ bhɛa lɛshat na kujukta ngɔlɔlɔ.
30 Na Yesus bhɛlu zugo toye na ogu.
Lɔga Obhonisionɛa ꞉Yesusi Mɛnɛnga Ungusɛa Hiri
31 Na koo ogu ɔra iho Gelilagiye kènno Kibirom na Kala Ayawsuny madhu zugo.
32 Na hunaa madha zugoye,
dɛɛbɛ ke ngaya michanɛ lɔgɔ huna komoruyunyde.
33 Na nɔng dha ngonu lɔ hirre ungusɛ ꞉mɛnɛngiyɔ na aru wuy gore.
34 Na seu,
"Ay,
Yesusa Nazeritiye,
marigɛiy kɛ ɔng?
Wa kou shaw hung na dheyaiytɔ?
Kagainydɔ.
kagainydɔ.
Inye ani Eriya bo Hɔla ekoninyi ꞉Tumu.”
35 Na sɛɛsɛ ꞉Yesusi,
"Dhitɛ na ɔta ngahirra na bhonoyɛ ago!u" Na mɛnɛngi dharaya hiri na dhagɛsɛ ba zuke kɛrghɛnɔ na ngani ngabhiiginɛwo na bhono.
36 Na zugo iwachi na ale na se,
"Hɛm!
A hirre ke nɛng,
nganda bu barar na yogɛsɛn mɛnɛnga lɔgɔ na shikɛ na bhonsanɛ ngangaye?"
37 Na kamannaa nɛnɛ shigi ꞉zugu kumulɔng na tɛhɛtɛy ko ba.
Lɔga Ibaysiya ꞉Yesusi Zuga Ilagasɛa Mɛra
38 Na bhona na ogu doraa Simoni.
Na hunde kɔye yoktɛsɛ ꞉zugu lɔgɔ na kibaysi nyaga Simoni.
Ilaga na rɛ awuren gore.
39 Na koo Yesus shilɛsɛ ja na yogɛsɛ awurney na rɛ lalu na bau.
Na bana na tagayu zugo.
40 Na koo ririnyaye zugo hoyay zuga ilagasɛa kumulɔng na kibaysiyɔ.
Na koo tadhɛ ꞉Yesusi sɛno na baya.
41 Na zuga lɔmɛa mɛnɛnga,
mɛnɛnga bhonda na artɛsɛ Yesus wuy na se,
"Inye ani Eriya Tumu!"
Yɔk dha gaɛyɔ hunde a hira bɛrrana ꞉Tumuye.
Na wologu ꞉Yesusi na sɛɛsɛ,
"Tɛldi lay!
Ngayokto sɛgɛn!"
42 Na bhorroyɔ Yesus bana na ogu bhɛa zugo ningginɛna.
Na zugo lami Yesus na ago chɔɔ bhɛa ihɛa ꞉nɛa na kalamba na bhokonnɔ ngakɔ.
43 Na nɔng seu,
"Anye bere kèkonɛanyi ngakamanaya chalde alenɛnɛ ꞉Tumu zugoye.
Na kòk kàmadhɛsɛ zugo ori genne.”
44 Na ogu Yudhagiye na madhu zugo doriyoa kamadhɛa zugo lɔga Tumu.