Lɔga Bɛrranɛa ꞉Yesusi Zuga Kɔbhɛa Nɔng
5
1 Na kale kona koo chilu yirisiya kènno Gelilav tugɔ na kamadh zugo na ikinyi ꞉zuga senno kishigi lɔga Tumu bhɛa nɛnɛ.
2 Na hunaa ikinynɛnaye,
aru gongguloye ku ramman w yirisiyɔ dheyyɔ hunde ɛl hɔlɔngge.
Yɔk dha eygo bhonda na onyɛ mɛrɛbinya.
3 Na koo irrɔgu gonggula Simoni na sɛɛsɛ,
"Simone,
ga heo isikan gonggul ma toye bhee chinyi se.”
Na tɛu gonggulɔ toye na madhu zugoni.
4 Na hunaa madha zugo na tewa ushaye,
sɛɛsɛ Simon,
"Ga ɔgɛ gonggul ngonu hɔrtex na ibhigi urgusa.”
5 Na Simon seu,
"Ay komorue,
ke wa barɔ kunguso ngaya na kalamio bar bar na ngakoro dhul.
Ye,
ga kilobtoyɔni damite senɛye.”
Na ujuktɛsɛ mɛrɛbinya ma.
6 Na hunde hɔrɔanɛ ngangaye,
dhɔngga urgusaa bo mɛra na mɛrɛbinya ajjo ngani kɛrɛytɛ.
7 Na umba zuga gɛ ɛla gonggul konnɔ.
Na hoyɛy gonggul na chɔtɛsɛ urgusa.
Na gonggulo dhiyɛ na ajjo ngani kɔngɔ ma toye.
8 Na Simona kènno Betiros aru urgusa na tɔgɔdhɛsɛ Yesus kɔma na seu,
"Ye gɛrɛ!
Yesuse,
tɛ rɛna!
Bhɛa nanu ja ngakuni!
Anye kani hira kɔlɔmi ridhing.”
9-10 Nɔng dha se ke ngaya ibhɛ urgusaa bo mɛraye,
na dɛɛsɛ ko zuga gɛnyɛ ɛla kariye.
Na ko yɔy bɛkanyaa gɛnyɛ kènno Yaykob ko Yohanis dɛɛsɛyɛ.
Na Simon sɛɛsɛ ꞉Yesusi,
"Bho ngaɛngɛrsi!
Inye ngamɛa keni ale ibh zugo hunde ngaurugusayaye.”
11 Na obhonisiyo gonggulo bho na dhɔyɔ ko ahaa gɛ kumulɔng na kɔbhɔ Yesus.
Lɔga Ibaysiya ꞉Yesusi Hira Ama Gedhe
12 Na kale kona ago ɔr konnɔ.
Na koo itinyandɛ ko hira lɔma gedhe.
Na bhanyɛsɛ ꞉hiriyɔ sɛno na tɔgɔdhɛsɛ kɔma na sɛɛsɛ,
"Komorue,
inye ani barari.
Ibaysionyo na tonyony ridhing na kɛtɛ bhee hɔli.”
13 Na tadhɛ sɛno na sɛɛsɛ,
"Te hɔli.
Wa kibaysienyo.”
Na gedhe tururiya na bau.
14 Na dagɛsɛ go na sɛɛsɛ,
"Na ngayogɛsɛ hir kona wo.
Eeni.
Na inye ok na dhɔlɛsɛ gɔldangɛaa doraa Tumu sɔng rɛ.
Na koo iwa ahaa bere senagungo ꞉Muse kenno tonydoy ridhing na udulɛsɛ Tumu.
Na kartiny ꞉zugu hunde ani hɔliye,
na kete misikirinya.”
15 Na sawanaa Yesusi tɛhɛtɛy ko ba.
Na zugo muktiya na kichirara lɔga gɛnyɛ na ge ilagasɛye kabatɔ.
16 Na nɔng kalde dhɔnɛ dhɔnɛ Yesus kɔ bhee zugo ninggɛye na alenɛ ko Tumu.
Lɔga Ibaysiya ꞉Yesusi Hira Ku Anyakuwanday
17 Na kale kona zuga madhɛa zugo damiya Tumu ko Bhɛrɛsaz honyo Gelilagiye ko ga Yudha ko ga Yurusalemi hoya na tɛldi bay na kichirara lɔga Yesusi.
Nɔng dha lɔ barartina Tumu na ibaysɛ zugo.
18 Na zug gena ngarta anyakuwanday kona algayɔ na kayɛsɛ Yesus dorigiye toye na kibaysiyɔ.
19 Na dha zugo te mɛri na bhee dhoyɛ garu.
Na irrɔgɔ dori kura na bolkiyɔ kura tan kona na ɔsɔnisi hiri algaya nɛnɛ na ayɛ Yesus zuke kɛrghɛnɔ.
20 Na Yesus aru yɛbhaa zuga ngoronɛa na sɛɛsɛ hiri,
"Liya na,
lɔga bere mesi gɛrsa any kagarayɛ.”
21 Na zuga madhɛa zugo ko ga Bhɛrɛsi ale na se,
"Nganda aynde kun ori dhɔm Tumu ngangaye?
Inde ujuk lɔga gɛrsa bay ngaya ihe?
Ngaujuko ꞉Tumu sɔng?"
22 Na Yesus iyoso ngalɔktonu ɛsɛdhɛ ꞉yɔkuye na sɛɛsɛ,
"Ngangaye,
ngalɔkta kɛngichine toye ɛsɛdho kɛɔng?
23 Bhasen hunde hiri kèsenɛsɛn,
'Lɔga gunyu gɛrsa wa kujuktaye' wo bhasen hunde kèsenɛsɛn,
'Bana dhuma algaya nunu na ogoye?'
24 Ye,
ga kɔdhɔlagung barartina nanu Hiri Hoynɛ kujugɛy lɔga gɛrsa na tagatɔni wo!"
Na sɛɛsɛ hira ku anyakuwanday,
"Bana iwa algaya nunu na ogoa!"
25 Na hiri banab na iwa algaya nɛnɛ na eterisanɛ Tumu gɔrɔ gɔrɔ chɔɔ doraa nɛnɛ.
26 Na zugo eterisana Tumu na iwachi na se,
"Hɛm!
Ngakalda wa karta lɔga bo dhandalani wo!"
Lɔga Kèliya Lewi
27 Na Yesus bana na ogu na assa hira muko gharata kènno Lewi na sɛɛsɛ,
"Ga kɔbanydɔ!"
28 Na Lewi dhɔyu ahaa gɛnyɛ messo na dhi ko Yesus kari.
29 Na koo dhiganu Yesus doraa nɛnɛ na kaynɛ tila.
Na koo eliu zuga gɛnyɛ mukɛa gharata kari ko gena na kusɛ kari na Lewi keterisan Yesus.
30 Na zuga Bhɛrɛsi genad ale girɔngichinne na ghini zuga bɛrrana ꞉Yesusi na seyɛsɛ,
"Ige aminɛno ko zuga mukɛa gharata ko zuga lɔmɛa ridhing kɛ ɔng?"
31 Na sɛɛsɛ ꞉Yesusi,
"Akim kɔn zuga ilagasɛa sɔng.
Ga basa ngakɔdho.
32 Anye keni kalama zuga lɔmɛa ridhing na kujugu lɔga gɛ gɛrsa na kibaysi na kɛtɛldi bhee hɔli.
Ga basa ngakalamiyo.”
Lɔga Kìghinɛa Yesus Bhɛa Kìchibɛa Rɛhi Hunynɛn.
33 Na yɔk seyɛsɛ,
"Agge yɔk zuga Yohanisi ko ga Bhɛrɛsi chibɛ rɛhi hozzo na alenɛ ko Tumu kale kale.
Na inye ge gunyde aminɛ na maynɛ hung?"
34 Na sɛɛsɛ ꞉Yesusi,
"Ngamɛa karuy hunde duriye,
rora ɛla kari chibɛ rɛhi hozzo?
Ngachibɛwo.
35 Nɔng kole ke kɔgɛ karuyɔye,
ihe.
Na ngakoleonu chibɛ rɛhi hozzo ni.”
36 Na ɛlɛhɛnɛsɛ lɔk gena na sɛɛsɛ,
"Inde ɛrɛchana ruma chaga na dhagɛsɛn ruma mujuso ninggɛ.
Ko hunde karagɛsɛ ɛrɛynɛyɔ.
Nɔng chɔɔ ruma nyagasa ko na chaga ngaganɛwochi.
37 Chɔɔ hirre shudhɛsɛn kamaya nyagasa woynae chaga ninggɛ.
Nɔng koo hunde kojɛsɛ,
ale dhu na kama bhɛsinɛ na udutinɛ na garasɔ.
38 Woyna chaga maya kojɛsɛn kamaya chaga na ganɛyɔni.
39 Ee,
nɔng ngangaye,
hira mata woyna ku suna,
nachaga ngahino dhul.
Martɔ na se,
'Ay,
choy ꞉suna.'"