Komoruya Kala Ayawsɛa ꞉Zugu
6
1 Na kale kona Kala Ayawsɛa ꞉zugu yɔk dhaya gu kona kɛrghɛn ko zuga kɔbhɛa nɔng na kenda liwa na tubhuyu sɛnɛ na usigiyɛ.
2 Na zuga Bhɛrɛsi gena se,
"Damiya bere senno ꞉Muse Kala Ayawsuny ngakemesi,
messo ke ɔng?"
3 Na yagɛsɛ ꞉Yesusi na sɛɛsɛ,
"Imagoyɔ Dawiy huna bere dhaka ꞉hozzo ko dehunyɛaa gɛnyɛ
4 na kɔa doraa Tumu na ibhana tilaa amɛa ꞉ gɔldangaa Tumu sɔng na ajɛa dehunyɛaa gɛnyɛ na amɛa.
Ngalɔktonu kulɛ ngayo?"
5 Na seu,
"Ko anye Hiri Hoynɛ kani Komoruya Kala Ayawsuny.”
6 Na Kala Ayawsuny kona ogu doraa kàmadhɛa zugo lɔga Tumu konnɔ na madhu zugo.
Nɔng dha ngonu lɔ hirre siya sɛtɛni chudhinɛ.
7 Na zuga Bhɛrɛsi ko ga madhɛa zugo damiya Tumu kɔngɔ Yesus na se,
"Ga kɛ̀bhɛgɛ na hunde ibaysi ngahirra Kala Ayawsunyde kìbhigi na kìshildɛ bhɛa zugony.”
8 Na Yesus aru ngalɔktonu ɛsɛdhɛye na sɛɛsɛ hira siyɔ chudhinɛna,
"Bana!
Wo chil bhɛa!"
Na ko na chilu.
9 Na sɛɛsɛ zugo,
"Ga kighinong lɔk gena.
Ngakoleya bere kajiy ke kawsɛye bere ke kemesɛ lɔga gɛrsa wo ga challa?
Na zugo kibaysi wo ngakibaysi?
10 Na gɔnyu ba na sɛɛsɛ hiri,
"Ga ɔr siyɔ!"
Na ɔru siyɔ na ɔdhɛ na tɛhɛyɛ ko lallɛn.
11 Na zuga gina dɛɛbɛ na daga go na se,
"Na ale ngahirra kème ɛnɛng?"
Na ago.
Kala Bɛrranɛa ꞉Yesusi Zuga Ku 12 Na Koyoktɛsɛ Zugo Lɔga Gɛnyɛ
12 Na ngakoleonu ko nɔng ogu kutulɔ na aleɛ ko Tumu barbar na bho aru.
13-16 Na bhorroyɔ eliu zuga dhiyɛa kari na bɛra ge ku tɔmmɔn ko ramman: Simona kènno Betirosf ko gɔynɛ Indiriyas,
Yaykob,
Yohanis,
Bhilibhos,
Bartolomiwos,
Matewos,
Tomas,
eriya Ilbhiwos kènno Yaykob,
Simona Irisho Zugo,
eriya Yaykobi kènno Yuda,
ko Yudaa kènno Askorotu ajɛa Yesus mirɔga.
Na yɔk ale kete zuga eko ꞉nɛa na koyoktɛsɛ zugo lɔga gɛnyɛ.
Lɔga Tuhayuny Ko Ga Chɔllauny
17 Na yɔk bhonda kutulɔ na koo assa zuga bo mɛra kɔbhɛa nɔng ɛla darɔ.
Na hunde shilɛye,
yɔk zugo dha te ga bo mɛra.
Gena hony Yudhagiye,
gena hony Yorusalemɔ,
gena hony oriya ɛla yirisiyɔ dheyyɔ kènno Tiros ko Sidhona.
18 Yɔk dha hony na kishigi lɔga Yesusi na ge ilagasɛye kabatɔ.
Na zuga mariɛa ꞉mɛnɛngu baya.
19 Na zugo argi barartina ibaysiya zugo ꞉nɛa na kugumu nɔng sɛnɛ.
20 Na Yesus gɔnyu zuga bɛrrana ꞉nɛa na sɛɛsɛ,
"Ngagiya ku bhoyogaye,
anno dhɛynɛ ke ngaya Tumu anɛ Komoruya nuye.
21 Ngagiya mɛya dhakung ꞉hozzoye,
anno dhɛynɛ ke ngaya ale chasɛoye.
Ngagiya mɛya ruoye,
anno dhɛynɛ ke ngaya ale hinisi anɛung hɔliye.
22 Ige ngamɛa ale hunde kàmarɛung Hiri Hoynɛ na kɛnganungɛ ꞉zugu na lɛsungɛ na kɔdhagungɛ sarre gɛrsiye,
anno dhɛynɛ.
23 Na ngakaldonu igge dɛlɛ na bɔrɔyɔ ga bo hinisi hɔla ke ngaya ale ɛdhɛtanung ꞉Tumu tumɔye.
Yɔk ngazukta ku kuhuyagaye,
anna bere koginggɛ marɛa zuga yogɛsɛnɛa zugo lɔga Tumu ngangachi.
24 Alala,
ngazukta mɛya bu ku dɛlɛlya dhɛynɛnoye,
igge mɛya dhɛynɛna nu a nganda sɔng.
25 Ngachasiyokta giya mɛya bu chasoye,
igge chaseya nu a mɛya sɔng na wurtɔ dhakung ꞉hozzo.
Ngadɛlɛlɛmoya lɔmo mɛya na chigɛoye,
chigina nu a mɛya sɔng na wurtɔ a ro.
26 Hunde tɔrtungɛ ꞉zuguye,
iwo rɛhi.
Anna bere zuga ɛlɛhɛnanɛa lɔga Tumu rɛhiya gɛ na tabhɛa zugo kɔ̀tɔra nganga.
Na ngagiya mɛya tɔrungɛye,
a ashaya zuga bere tɔrɛa ngazuktonu.
Lɔga Keyeleya Mirɔga
27 Ngamɛa igge ngagiya shikonyoye,
mirɔgaa gu teyeletɔ.
Na ge marungɛye ngamarro.
Tɛhɛnɛ hung.
28 Na hunde lɔ zukte chɔrungɛye,
tuhutɔ.
Na ge idhaungɛye,
ògoldɛsɛ Tumu.
29 Na hunde nyugeny konnɔ bolongite,
bhɔdhɛsɛ nganda ku konde sɛgɛn.
Na hunde lɔ inde bhuruchaniny hotayte,
ngabhirnɛnɛ.
Ɔgɛsɛ darsum sɛgɛn.
30 Ge ogolungɛ ahaye,
ayɛyɔ.
Ngakanyɛo.
Na hunde hɛyɛ ahaa guye,
dhɔtɛsɛyɔ.
Ngayakano.
31 Hunde senno kɛtɛhɛndung ꞉zuguye,
ko igge tɛhɛnɛ zugo.
32 Hunde yelo zuga yelongɛa igge sɔng wo,
bhee ko hologun jɔanoye a inong?
Ko yɔk kuhuyaga zuga yelɛa yelɛyɔ.
33 Na hunde yelo zuga mesungɛa shɛɛ sɔngge wo,
hologun a inong?
Kuhuyaga yɔk mesɛ nganga sɛgɛn.
34 Hunde iwa aha gen na katabariseny hira ale senno kayagaginyo wo,
bhee ku hologun jɔande a inong?
ko yɔk kuhuyaga atabarisinɛ kɛngɔ nganga sɛgɛn.
35 Ko igge mirɔgaa gu tèyeletɔ.
Ngamarro.
Mesigi shɛɛ.
Hunde atabarisiungɛye,
ayɛ hung.
Hinisi ngakedho.
Ige ale anno erroa Komoruya bo ke Tumu na hologuna nu jɔano tumɔ.
Nɔng kuhuyagaa marɛa hin hung.
36 Na ko igge chirbhisi zugo hunde shɔgɔnu Tumuye.
Lɔga Ngakujukanɛa Zugo
37 Zugo ngaujukano.
Hunde ngaujukanoye,
ko igge ngakujukanunggo.
Hunde zugo hɔlɔng hung ngauwasiwoye,
ko igge ngakuwasungɔ.
Ujugu ko zugo lɔgɔ na tɛldi bhee hɔli.
38 Ayɛ zugo aha na igge kaung ꞉Tumu.
Ali kamansisogung galeya mansinɛnɛo ꞉igeu sabbɔ kɔ̀gɔdhɛsɛn na kàmadhɛsɛn na shiha bay kɔ̀tɔrɛ ke mɛri.”
39 Na ɛlɛhɛnɛsɛ lɔgɔ na sɛɛsɛ,
"Hiri kawarɛ chaga lallɛn anda dhigandɔ?
Ali ngangɔsɛnɛwo bhee kɔbɔngi kari rammane?
40 Tambari ko hira madha,
dhɔnɛ ngayo.
Hiri hunde kàmadha na tagu shɛɛye,
tɛhɛyɛ ko hira madha.
41 Rugɛrugɛa chinyo goore lɔma ꞉goonu gunyi kɛ ɔng?
Ngagiya guny lɔmi ꞉inyo mɛrte ngaoriwo?
42 Anda hunde ngani dhɔgɔyayo ga gunyu sabɔye wo,
goonu ale senɛsɛn,
"Dhɔgɔya!"
Ɛnɛng?
Alala,
ngazukta tabhiy nigiyayɔ na hinisi toye gɛrɛse,
ga dhɔgɔya rugɛrugɛa lɔmi ꞉inyo sabbɔ.
Na hunde aru bho shɛɛye,
sɛɛsɛ goonu,
"Dhɔgɔya rugɛrugɛ kawarreni.”
Lɔga Kɛyuny Ko Kawara Gɛnyɛ
43 Kɛya challa nadhungana kawara gɛrsa ninggɛ.
Kɛya gɛrsa nadhungana kawara challa ninggɛ.
44 Kɛnɔ kumulɔng kàgayɛ kawarɛ.
Shurayɔ,
dhudhubanggura ngaegisonowo.
Radhiyɔ,
kɛyay ngadhunganawo.
45 Hira kɛngɔ challa yokkono lɔga challa.
Hira kɛngɔ gɛrsa yokkono lɔga gɛrsa.
Hiri lɔga lɔma kɛngɔ obhonisiono tugɔ.
Zuga Ku Gɔngga Ko Ga Ku Kadhinyoga Ghendhɛa Doriyo
46 Lɔga koyokogungu ngashikowo na elionyu "Komoru,
Komoru" kɛ ɔng?
47 Ngahirra kun bhɛa nanu na shik lɔga ganyu na bhɛkte,
ga kɔ̀dhɔlagung hunde hɛt ko nɛye.
48 Heo ko hira bhɔka dori jagarɛ ke hɔri shɔwayɔ.
Na hunde guyɔ dhak na taan kunoye,
ngabushonowo.
49 Na inde shik ga ganyu na ngabhɛkoye,
heo ko hira kɔdhdha dori kidho tugɔ.
Na hunde taan kunoye,
nyomo ke bhaseni na bhee chinyi ngadhɔyinɛno.”