Lɔga Gulsaa Bholisuny Yɛbhɛa Yesus
7
1 Na Yesus hunaa yogɛsɛna zugo ngalɔkta kumulɔng na tewa ushaye,
bana na ogu Kibiromɔ.
2 Nɔng gulsaa bholisuny bhakka ngonu lɔ bariya yelo goore na ilaga na se kertɔ.
3 Na nɔng hunaa shikko Yesus iho jaye,
iwa zuga Ayhudhi nyagasa na egu na keliyɛsɛ Yesus na kibaysɛsɛ bariya nɛnɛ.
4 Na koo yɔk yoktɛsɛ Yesus na tolohɛsɛ na seyɛsɛ,
"Nganda maya ibaysiyɔ.
5 Nɔng ngahirra a hirre yel bhora nayo bhoy na chɔɔ doraa kàmadhɛa zugo lɔga Tumu bere kɔdhagiy ꞉nɛa.”
6 Na Yesus bana na dhi ko yɔk kari.
Na hunaa dokkɛa dori jaye,
gulsa egɛsɛ Yesus tugɔ na sɛɛsɛ,
"Komorue,
doraa nanu ngakuni.
Anye ko inye ngakɛhɛto.
Kani chinyi ghasuri.
7 Na bhee kɔgɔɛ na kitinyanɛnɛ ko inye ninggɛ.
Yogo lɔgɔ hung na bariya nanu kaba.
8 Kɔ anye kani gulsa na ga ganyu bibiyo ɛlɛ.
Bholisa kegi ꞉anyo ganyu ɛlɛ.
Na hunde kesenɛsɛn kon,
'Woyɔye',
kundɔ.
Hunde kesenɛsɛn gen,
'Agoye',
hɛyɔ.
Bariya nanu hunde kesenɛsɛn,
'Me ngagaletaye',
mesɔ.”
9 Na nɔng hunaa shirara ngalɔktaye,
iwachiyɛ na budhɛɛ na sɛɛsɛ zuga dhiyɛa kari,
"Anye yɛbhate heo ko nganda lɔ ngahiraye ngani karo Isirayelɔ.”
10 Na hunaa zuga keko wokonɛaye,
dha hira ilagasa ku bariy bau.
Lɔga Ibaysiya ꞉Yesusi Eriya Tɛriya Ku Bhoyogi
11 Na Yesus tɛa bhee chinyi na banda ko zuga bɛrrana ꞉nɛa ko gen ge mɛri na ago ɔra kènno Nayn.
12 Na hunaa hɛa na dokkɛa ɔr bhɛa ku waran jaye,
yɔk zugo tandonu itonɛ hira rɛsa na kojigitɔ.
Ngahirra rɛse nɔng dorigiye a dhɔnɛ.
Na jɔnɛ dhɛyanɛ ko zugo kari na ruono gɔrɔ gɔrɔ.
Nɔng a bhoyogi.
Hiri ninggɛ na lɔ nɔng sɔng.
13 Na hunaa oro ꞉komoruyɔye,
towonyɛsɛ na ilalu.
14 Na ogu na ibu kɛya kòngoronɛa hiri na zuga ngoronɛa hiri shiliyɛ.
Na sɛɛsɛ hira rɛsa,
"Ngabara,
ga bana tuno!".
15 Na dhɔnga sabba na bana na tɛu tuno na mɛziu.
Na iwa ꞉Yesusi na aynɛ jɔnɛ.
16 Na zugo kumulɔng tɛngɛrɛ bho na eterisana Tumu na se,
"Dha tɔlɔ hira bo barara yokkono lɔga Tumu bhɛa na!
Dha Tumu tɔyɛy zuga gɛnyɛ na kibaysieytɔ.”
17 Na lɔga Yesusi tɔgɔnday Yudhagiye na tɛhɛtɛy ko ba.
Lɔga Egɛsɛna ꞉Yohanisa Churo Zugo Yesus
18 Na zuga dhiyɛa ko Yohanisa churo zugo koo yoktɛsɛ hira nɛ ngalɔkta kumulɔng.
Na nɔng iwa zukte ku ramman
19 na egɛsɛ Yesus na sɛɛsɛ,
"Ga ago ghini na seyɛsɛ 'Ngangaye,
hira bere kèseno ale kuni ani ꞉inyo rɛ wo kereyo kon?'"
20 Na zugo hoya chɔɔ bhɛa nɛnɛ na seyɛsɛ,
"Agge ekoniy ꞉Yohanisa churo zugo na senagiy,
'Ago ghini Yesus na seyɛsɛ,
'Hira bere senɛa ꞉zugu ale kuni ani ꞉inyo rɛ wo kereyo kon?''"
21 Na kala gina Yesus ibaysiu zuga ilagasɛa ko ga kawarɛ chaga ko ga margiya ꞉mɛnɛngu na baya.
22 Na yagɛsɛ ꞉Yesusi na sɛɛsɛ,
"Ago na yoktɛsɛ Yohanis ngalɔkta shikano nyawa na orono chɔɔ kawarreye na seyɛsɛ,
'Zuga kawarɛ chaga kawarɛ oninyayɔ.
Zuga ngɔlɛa ibaysi na woyɛyɔ.
Ga ilagasɛa lɔgɔrɔm basɛyɔ.
Dunggɛna shikɛ bho.
Ga rɛsɛa bansanɛyɔ.
Bhoyoga kàmadhɛsɛn kamannaa Tumu.'
23 Inde lɔga ganyu ngadhɔtoye a tuhinɛ.”
24 Na zuga eko ꞉Yohanisi hunaa wokonɛaye,
Yesus madhɛsɛ zugo lɔga Yohanisi na sɛɛsɛ,
"Ngangaye,
huna bɔrɔ heo korgiye,
ngagɔra senno gɔnyigi ɔng?
Senno gɔnyigi koregena ɛbɛka ꞉ngɔ na chukinɛna?
25 Dha heo na gɔnyigi ɔng?
Senno gɔnyigi hira lɔma ruminyaa bo ghilghila?
Zukte malukɛ ruminyaa challa na bu dhɛynɛye a ngagenu bhakkɛ doraa manggisi toye ngonuye.
26 Ngangaye wo,
senno gɔnyigi ɔng?
Senno gɔnyigi hira yokkono lɔga Tumu?
Ee,
chɔɔ Yohanis ko zuga bere mɛzia lɔga Tumu sabbɔ ngahɛto.
27 Lɔga bere kɔ̀gɔdhɛsɛna dadaba Tumu na kèseno,
'Ali kibhan hiri na diroginy gɔrɔ sabbɔ',
a nɔni?
A Yohanis.
28 Bhɛa ngazukta bhakkɛ baye inde heo ko Yohanis ninggɛ.
Hiri hunde ke ko chinyi na kɛyɛbh Tumu,
chɔɔ Yohanis joronoyɔ.”
29 Na zugo kumulɔng,
chɔɔ zuga mukɛa gharata hunaa shikɛa ngalɔkta yokkono ꞉Yesusiye,
tɔrɔ yɔk na se,
"Ngalɔkta Tumuye dha a dhere.”
Yɔk se ke ngaya bere shurɛ ꞉Yohanisiye.
30 Na yɔk zuga Bhɛrɛsi ko ga gayɛa damiya Tumu ku nana,
tamara churaya Yohanisi ko ngalɔkta hinɛsɛn Tumuye.
31 Na Yesus seu,
"Ngangaye,
ngatenyda ale kɛlɛhɛnɛsɛn ɔng?
Kale hɛ ko ɔng?
32 Hɛ ko ngaerroya elisɛsɛnɛ lalugɛ tirany zazumɔye kɛngɔ na senɛ,
'Keterisogung yeloy na ngabɔrɔtoye?
Na kirrɔgɛyɔ na ngaruoye?'
33 Hunaa Yohanis kuno na tila ko woyna kuchudha ngamatawo,
igge senno,
'Lɔ mɛnɛnga rɛhɔ.'
34 Na ngamɛa artanyu hiri hoynɛ hunde kami tila na kamayi woyna kuchudhana,
na seyaganyu,
'Gɔnyigi ghormoy aminɛ ko zuga mukɛa gharata ko zuga gɛrsa dhutiyogi!'
35 Mɛya lɔga Tumu ku dhere kargi bhɛa hoyany.”
Lɔga Tɛriya Uhudho Yesus Mala Ɔngɔna Hurhur
36 Na Yesus eliu Bhɛrɛsi konnɔ na kusigi tila.
Na koo ogu chɔɔ doraa nɛnɛ na tɛya bay.
37 Nɔng dha bere ngaɔrronu lɔ tɛrite kawarɛ hɔli ku lolu.
Na hunaa shikko Yesus bhɛa amɛa tilaye,
bana na dhuma bililiya bo lɔma mala ɔngɔna hurhur na ɔgɛ chɔɔ bhɛa ihɛa ꞉Yesusi.
38 Na shilɛsɛ Yesus bhuguyɔ na turɛsɛ sak sak.
Na iwa kedhero na tonyoy jagara gɛnyɛ na huga chɔra sabba.
Na chomu jagarɛ tugɔ na uhudhu mala ɔngɔna hurhur.
39 Na hira elisɛna tila kɛngɔ toye seu,
"Hunde ngahirra kete hira ekono ꞉Tumu dhere,
anda ngatɛrita hirhirte gayɔ hunde a tɛrite bere me lɔkte gɛrsiye.”
40 Na Yesus sɛɛsɛ hiri,
"Simone,
keni kòyogoginy lɔk gena.”
"Ee,
yogogonyoni komoru.”
41 "Ee,
zukte ku ramman atabarisɛ birinya bhɛa hir konnuny.
Na kona kɔɛ zugo hirkonɛa tɔmmɔn ko ramman ko zugo tɔmmɔn (5,000),
kona zugo hirkon ko zugo hayna (500).
42 Na ahaye gadhiɛ garayɛ na dhɔyɛsɛ.
Na anda inde shumun gooreye a inong?"
43 Na Simon seu,
"Heo a nganda kɔ̀dhɔyɛsɛn ge mɛrte.”
"Ee,
ujukan shɛɛshi.”
44 Na gɔnyu gɔra tɛriny na sɛɛsɛ Simon,
"Ngatɛrita oriyɔ?
Anye hunaa kutunukoni,
maa konyɛyi jagarɛ ngani anyo.
Nɔng hunaa tunukono,
onyony jagarɛ kedhere na hukana chɔra sabba.
45 Hunaa kuguni,
inye ngani chɔbanyo.
Nɔng ihineya kugunɛy ko ngamɛa ngani chob jagarɛ.
46 Inye nɔng hunaa anye kuguni doraa nunu,
chɔɔ sabbaa nanu ngani uhudhonyo malɔ.
Nɔng wa uhudhonyo jagarɛ mala dhandala ɔngɔna hurhur.
47 Ngamɛa ngatɛrita yelony goore ke ngaya kujugɛ lɔga gɛnyɛ bo gɛrsaye.
Na inde lɔga gɛnyɛ kujuk ge muchugiye,
ko nɔng yelony ke chinyi.”
48 Na sɛɛsɛ tɛriya gina,
"Inye lɔga gunyu gɛrsa wa kujuka.”
49 Na zuga amɛa tila kari kɛngichine toye se,
"Ngangaye,
nganda ujuk lɔga gɛrsaye a nɛng?"
50 Na nɔng sɛɛsɛ tɛri,
"Wa ibaysienyo ꞉Tumu ke ngaya yɛbhɛany anyeye.
Na bana ok shɛɛ hung.”