Lɔga Hira Kɔa Dugayɔ
8
1 Na wurtɔ Yesus bhɛlu ori toye na madhɛsɛ zugo bhɛa yɔk lɔmɛa ꞉Tumu.
Na hunde madhɛsɛn ngakamanaya chalde,
zuga bɛrrana ku tɔmmɔn ko ramman dhɛɛ kari
2 ko tɛrroa bere mariya ꞉mɛnɛngu ko ga bere ilagasɛa na ibayseo ꞉nɛa.
Kona keleo Mariyam Magadala bhonsanɛa ꞉mɛnɛnga ku isabay,
3 ko Yohana,
tɛriya Kuza hira ku gulsa doraa Herediwosi,
ko Sosana ko zug gena ga mɛra ɛlɛ.
Yɔk ibhanɛ ahaa gɛ na ɛyanɛ Yesus ko zuga bɛrrana.
4 Na zugo muktiya oriye kumulɔng na hoya bhɛa nɛnɛ.
Na hunaa muktiya ke mɛriye,
koo ɛlɛhɛnɛsɛ lɔga hira kɔhinɛna na sɛɛsɛ,
5 "Hir kona bansana na koo kudukɛyɔ.
Na hunaa kɔa dugayɔye,
koo liwa gen ajhasanu bhɔ na usigi ꞉shɔau na daga chɔɔ ꞉zugu jagarre.
6 Na gena ngɔɛsɛ guguriyɔ na dhumuta na chibok garu na mudhuguya.
7 Na gena ngɔɛsɛ ɔmbay toye.
Na hunaa shilanaye,
chɛbu ꞉ɔmbayɔ na gartɛ toye.
8 Na ga ngɔsɛna dar shilda shɛɛ na ngara dhogone.
Na kawariya dhɔnɛna koo shila na egiu na bholongguya dhɔnɛna kɔbhɔlɔytay kawarɛte mɛri.”
Na hunaa yokkono ngalɔktonu na tewa ushaye,
sɛɛsɛ zugo,
"Inde lɔ nyabite sɛ kishiktɔ.”
9 Na zuga bɛrrana ꞉nɛa ghini ngalɔkta hologun.
10 Na sɛɛsɛ,
"Bhɛa Tumu lɔmɛa zugo anna bere kàungo na igge gaoyɔ.
Na yɔk gen kɛlɛhɛnɛsɛn lɔgɔ,
Na ga orɛa ke ngakibh-tɛsɛ lɔgɔ hinisi,
Na ga shikɛa ke ngakatagato.
11 Ngalɔkta bhɛa ku hologun a nganga.
Dugu a lɔga Tumu.
12 Ngagiya ajhasanɛ bhoye a ngazukta shikɛ lɔga Tumuye.
Na Setan hunde kunde,
ibhana lɔga ɛla hinisiye na kɔɛyɔ.
Se ngakɛyɛbɛ na kabatɔ.
13 Ngagiya kùduk guguriyɔye agge shikɛ lɔga Tumu na dɛlɛ.
Na hunde lɔgɔ se kete dhandaleye,
dhɔttɛ Tumuye.
Yɔk sinda ba toye ngani kagoto.
14 Ngagiya kùdugɛsɛn ɔmbay toyeye a ngazukta shikɛ lɔga Tumu na koo halɛ shurnɛ ahaa gɛ mɛrtin na bo woɛ nyangay nyangay na dhɔttɛ Tumu na kawarɛ ngaegisonɛwoye.
15 Ngagiya kùduk darɔye a ngazukta hinisi chal na hunde shikɛ lɔga Tumuye,
lɔmɛ hinisiye toye na bhɛkɛ shɛɛ na egisonɛ kawarɛye.
Lɔga Goa Kèterinyo Dorigiye
16 Goa kèterinyo dorigiye toye jɔ wo hayagiye ngakulubo.
Koy bhee dharnɛ.
Na hunde zugo tunukonɛye,
keterinydɔ.
17 Ahite ulugunynɛ na kìmagi ninggɛ.
Ali dhugunnɛ na kortɔ.
Bhee magɛ ba na litinyanɛ ninggɛ.
Ali bhelekinyayɔ.
18 Ngamɛa ga shirara shɛɛ.
Inde lɔgɔ shik shɛɛye lɔga gɛnyɛ kɔ̀tɔrɛ ke mɛri.
Nɔng inde shɛɛ ngashikoye chɔɔ lɔga lɔma kɛ̀hɛɛ rang.”
Lɔga Yesus Jɔnɛ Ko Gɔynggɛwuny
19 Na Yesus gɔynggɛ ko jɔnɛ hoya na kɔgɔnyɔ Yesus.
Na zugo te mɛri na bhee orɛ garu.
20 Na yogɛsɛ hir konnɔ na sɛɛsɛ,
"Mamaa nunu ko erroa gu anggiya laminɛ bhoye na bhee dhowonɛ ninggɛ.”
21 Na nɔng sɛɛsɛ,
"Mamaa nanu ko erroa gayo a ngagiya shikɛ lɔga Tumu na bhɛkɛye.”
Lɔga Lamɛa ꞉Yesusi Tan Na Dhiynɛnɛa
22 Na kale kona bana na sɛɛsɛ zuga bɛrrana ꞉nɛa,
"Banda kère gonggulɔ yirisiyɔ tando" na ago.
23 Na hunde ngani woɛ ma toyeye,
Yesus dha tungu.
Na ngɔ kon bana yirisiyɔ toye na gonggul dhaba ma na ajjo zugo ngani kub gonggulɔ.
24 Na zugo ibanisi Yesus na seyɛsɛ,
"Komorue,
te rɛsɛ so!"
Na zugo dɛɛbɛ na se,
"A hirre ke nɛng nganda ɛngɛrsɛ aha bhoy na shikɛ chɔɔ ꞉maa yirisiny ko ꞉ngɔye?
Lɔga Obhonisionɛa ꞉Yesusi Mɛnɛnga Bhɛa Hira Ama ꞉Lolu
26 Na ago gonggulɔ chɔɔ Gergeson baa iho yirisiya kènno Gelila tando.
27 Na Yesus hunaa bhonsana gonggulɔ baye,
daga hirre ku lolu.
Nɔng dha bere ihineya kinginye a lolu na wo ngaulo.
Na chɔɔ doraa bhakka ninggɛ.
Na bhak bhogoyɛa kojɛa zugo.
28-29 Na hunaa oro Yesuse,
aru wuy na shɔu ba "Bum!"
na Yesus sɛɛsɛ mɛnɛnga,
"Bhonda ago!"
Na yɔk mɛnɛnga atɛsɛ hiri lɔgɔ na seu,
"Eriya Tumu Yesuse,
inye kɔ anye kɔlɔmnɛ ɔng?
Kotolohaginydɔ.
Ngatiranyɛanyi!"
ke ngaya chugɛ mɛnɛngaye.
Nɔng dha bere ngahirra lɔ mɛnɛngge mɛri rɛhɔ.
Na hunde kìchib sigoye,
jagarɛ ko sɛno kari na kɛ̀bhɛkte,
ken dur dur na tɔkɛ ꞉mɛnɛngu dusɔ.
30 Na ghinu ꞉Yesusi,
"Sara gɛnyɛ?"
Na seu,
"Kano kaman" ke ngaya lɔmɛ mɛnɛnga mɛra rɛhɔye.
31 Na mɛnɛnga tɔlɔhɛsɛ Yesus na seyɛsɛ,
"Ngatɔgagi bhɛa kɔbɔnga chɔllanɛnɛa ꞉zuga gayo mɛnɛngu na kagarto dhul.”
32 Na nɔng dha bere ngaɔrronu lɔ zukte iwoɛ chɔwachinaa bo mɛra gɛsayɔ.
Na mɛnɛnga seyɛsɛ Yesus,
"Tɔgagiy ngachɔwachinda toye hung.”
Na Yesus igomɛsɛ.
33 Na mɛnɛnga bhonda hiriyɔ na tunugu chɔwachin na ubulandɛ bhɛa bo bhala na ngɔyɛsɛ yirisi toye na ergiyɛ.
34 Na zuga iwonɛna hunaa orɛa ngalɔktaye,
ulugunydɛ na nge na koo yoktɛsɛ zugo ori toye.
35 Na hunaa zugo mukinyana na honyo bhɛa Yesusi na senno kɔgɔnyigi ngalɔktaye,
argi lolu hunde dha bau na tɛldi ko Yesus kari na malugu ruminyaye na tɛngɛrɛyɛ.
36 Na zuga orɛa koo yogoyɛ hunde dha hiri ba ɛnɛngge.
37 Na zuga Gergesoni kumulɔng tɛngɛrɛ Yesus na seyɛsɛ,
"Waga!"
Na nɔng irrɔgu gonggul na wagu.
38 Na hira kìbayseo sɛɛsɛ Yesus,
"Kidhi kari!"
Na nɔng Yesus sɛɛsɛ,
39 "Ko anye ngakidhiyo.
Inye ok ɔrɔ na yogɛsɛ zugo ngalɔkta wa ibaysiɛny Tumuye.”
Na nɔng wagu ɔrɔ na koo madhɛsɛ zugo lɔga ibaysiya ꞉Yesusi.
Lɔga Eriya Kìbanisiono Rɛsɛyɔ Ko Ga Tɛriya Taana Nyawa Oynya Tɔmɔn ko Raman
40 Na hunaa Yesus wokono yirisiyɔ tandɔye,
koo lamba zuga dhaa nɔng reyɛa.
41 Na hira ku gulsa doraa kàmadhɛa zugo lɔga Tumu kènno Yaros tɛɛsɛ Yesus na kidhigan doraa nɛnɛ
42 Ke ngaya eriya nɛnɛ dorigiye dhɔnɛna ku sedhey hinɛ rɛsɛye.
Chɔɔ a chinyi oynya a tɔmmɔn ko ramman sɔng.
Na hunaa Yesus kɔwaye,
ikinyi ꞉zugu.
43 Na zuke toye lɔ tɛrite dha bere taanana kingi oynya tɔmmɔn ko ramman na dheshana ahaa gɛnyɛ akimɛte na ngani ngabaso.
44 Na koo kɔbha Yesus wurtɔ na idiranu ruma maluko nyabhi dari na nyawaa taanɛa kedhu.
45 Na Yesus ghinɛ na seu,
"Idiranany ꞉noni?"
Na zugo kɛngga lɔgɔ na Betiros sɛɛsɛ Yesus,
"Ngangaye,
ghinɛn kɛ ɔng?
Ngaoriwo hunde zugo ikisinɛye?"
46 Na nɔng seu,
"Anye wa idirananyo ꞉hir konnɔ na ara ꞉kuloyɔ na bawa.”
47 Na tɛri seu,
"Dha orony ɛnɛng?
Anye ɔra nanu ngakɔgɔyo.
Kòk na kɔ̀dhɔlɛsɛ rɛ.”
Na bhariyu na ogu chɔɔ bhɛa ihɛa ꞉Yesusi.
Na koo yogɛsɛ damiya idiranɛa ꞉nɛa rum na basɛa.
Na zuga ɛla kari ko yɔk shigiyɛ.
48 Na sɛɛsɛ ꞉Yesusi,
"Hoya nanuye,
bana ogo.
Inye wa ibaysienyo ꞉yɛbhaa nunu.”
49 Na hunde chinyi ngani yokkono lɔgɔ ngangaye,
hira iho doraa Yarosi ko na yogɛsɛ Yaros lɔgɔ na sɛɛsɛ,
"Hira madhi ngatani!
Eri wa erra.”
50 Na hunaa Yesus shikko ngalɔktaye,
sɛɛsɛ Yaros,
"Ngadɛɛsi!
Yɛbhany hung.
Eri basɔ.”
51 Na ago chɔɔ bhɛa Yarosi na taganyɛ zugo kes na sɛɛsɛ,
"Tɛldi bho!"
Na dorigiye toye dhi ko Betiros ko Yaykob ko Yohanis ko eri shɔgɔnɛ ko jɔnɛ sɔng.
52 Na zugo hunaa ruɛaye,
nɔng ilalu zugo na sɛɛsɛ,
"Ngaruo!
Eri ngani kero.
A basi.
Ungu hung.”